Rot Bilong Daunim Bel Hevi

WANPELA meri nem bilong em Lola, em i tok: “Mi stap bel hevi, na dispela i mekim na mi pilim olsem mi gat asua, long wanem mi wanpela wokmeri bilong Jehova na mi ting i no stret mi stap bel hevi olsem.” Em, planti taim dispela kain tingting em i namba wan samting Kristen i mas wok long daunim sapos em i stap bel hevi. Lola i tok moa, olsem: “Pastaim mi save kotim skin bilong mi, long wanem mi stap bel hevi, tasol taim mi lusim dispela pasin na mi putim olgeta tingting bilong mi i go bilong daunim dispela bel hevi bilong mi, nau mi inap winim dispela hevi.” Tru tumas, sapos yu stap bel hevi, yu no ken kotim skin bilong yu na pilim olsem yu gat asua long ai bilong God. Nogat.

Sampela taim wanpela sik bilong skin i save mekim na man o meri i stap bel hevi. Long yia 1915, taim ol dokta bilong nau i no kisim save yet long dispela samting, Wastaua (tok Inglis) i bin tok: “Dispela pasin bilong i stap bel hevi na pilim olsem yu stap wanpis, em i save painim olgeta manmeri long sampela taim. . . . Na sapos skin bilong man o meri i gat sik samting, orait dispela inap mekim em i stap bel hevi moa yet.” Olsem na sapos inap longtaim liklik yu stap bel hevi, gutpela sapos yu go lukim dokta na em i ken glasim skin bilong yu olsem yu gat wanpela sik bilong skin na dispela i as bilong bel hevi bilong yu, o nogat. Na sapos bel hevi bilong yu i kamap bikpela tru, ating yu mas i go lukim wanpela dokta i gat wok long stretim dispela kain sik bilong bel hevi.a

Na sapos yu no gat sik bilong skin na i gat narapela as bilong bel hevi bilong yu, yu no ken ting olsem ol wokboi bilong God i no inap bel hevi long sampela taim. Tingim Hana, em i bin stap gut long God, tasol Baibel i tok, Hana i save “pilim nogut tru na i krai.” (1 Samuel 1:7, 10) Nehemia tu i “krai planti” na “bel hevi i stap.” Na sampela taim em i “bel hevi tru.” (Nehemia 1:4; 2:3) Jop i gat bikpela bel hevi na em i tok, em i les long i stap laip, long wanem em i pilim olsem God i lusim em. (Jop 10:1; 29:2, 4, 5) Wanpela taim King Devit i tok, tingting bilong em i bagarap na bel bilong em i hevi moa yet. (Buk Song 143:4) Na aposel Pol i stori long bel bilong em i pret na i no i stap isi.—2 Korin 4:9; 7:5, 6.

Olgeta dispela man na meri ol i gutpela wokboi na wokmeri bilong God, tasol kain kain hevi na pret samting i bin mekim ol i bel hevi inap liklik taim. Tasol God i no bin lusim ol o tekewe spirit bilong em long ol. I no olsem ol i bin pundaun long samting bilong spirit na mekim rong na ol i bel hevi. Nogat. Taim Devit i bel hevi, em i beten long God na em i tok: “Bikpela, givim amamas long bel bilong mi, wokman bilong yu.” Na God i bin helpim Devit long dispela taim bilong Devit ‘i karim hevi,’ na bihain Devit i stap amamas gen. (Buk Song 86:1, 4, 7) Jehova i laik helpim ol wokboi bilong em olsem long nau tu.

Sapos Kristen i bel hevi, dispela samting yet i no makim olsem em i no strong long spirit o tingting bilong em i gat sik samting. Olsem na sapos Kristen i stap bel hevi inap longtaim, em i no ken sem long dispela samting na haitim. Em i mas kirap mekim wanpela samting em inap helpim em tru long stretim dispela samting na daunim bel hevi bilong em. Em i mas mekim wanem?

Kamapim Bel Bilong Yu

Em i mas toktok wantaim wanpela man na kamapim bel bilong em long dispela man. Long Sindaun 12:25, Baibel i tok: “Sapos man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long wantok bilong en, orait wantok bai i belgut tru.” Sapos yu pasim hevi bilong yu long bel na yu no kamapim, bai i no gat wanpela man inap save long bikpela bel hevi bilong yu, olsem yu save wari oltaim. Olsem na sapos yu toktok wantaim wanpela man em i gat pasin sori na em inap helpim yu, ating bai yu kisim save olsem wankain hevi i bin painim ol narapela olsem nau i painim yu. Na sapos yu kamapim bel bilong yu long wanpela man, dispela inap mekim isi bel bilong yu, nogut yu pasim maus. Olsem na sapos yu stap bel hevi, yu mas kamapim bel bilong yu long poroman marit bilong yu, o long papa o mama, o long wanpela gutpela pren em i gat pasin bilong sori na em i stap strong long spirit inap long em i helpim yu.—Galesia 6:1.

Wanpela meri, nem bilong em Mari, em i gat sampela tingting kranki i mekim em i bel hevi, tasol em i pasim long bel na em i no kamapim long wanpela man o meri. Olsem na em i hatwok long daunim bel hevi bilong em. Em i tok, “Inap planti yia mi haitim ol tingting bilong mi na ol narapela i no save liklik olsem mi ting mi no inap mekim gut wanpela wok na mi nogut tasol.” Tasol bihain Mari i kamapim bel bilong em long wanpela elda long kongrigesen. Tingting bilong Mari i olsem wanpela hul wara i daun moa, tasol elda i givim sampela gutpela askim long em na em i “pulim” dispela tingting i kam antap. Dispela i helpim Mari long save gut long ol tingting bilong em i mekim em i bel hevi. (Sindaun 20:5) Gutpela tok bilong Baibel elda i givim long em i strongim bel bilong em. Em i tok: “Nau long namba wan taim mi save long rot bilong stretim ol dispela tingting bilong mi i save mekim mi i bel hevi.”

Olsem na sapos yu bel hevi na yu toktok wantaim wanpela gutpela elda, ating dispela inap helpim yu. Ating bai em inap givim ol gutpela tok long yu, olsem “wara,” bilong mekim gut bel bilong yu, em bel bilong yu i stap olsem ‘ples i drai.’ (Aisaia 32:1, 2; Buk Song 143:6) Man i gat gutpela tingting long ol samting bilong spirit, ating dispela kain man em inap helpim yu long save long ol samting yu mas mekim bilong “winim pait” na pinisim bel hevi bilong yu, maski yu pilim olsem i no gat rot bilong pinisim. (Sindaun 24:6) Olsem na yu mas kamapim bel bilong yu long wanpela man, tasol i gat sampela samting moa yu mas mekim.

Yu No Ken Ting Yu Nogut Tasol

Sapos yu pilim olsem yu nogut tasol, dispela inap mekim yu i bel hevi. Ating sampela Kristen, taim ol i stap pikinini yet, sampela man i bin mekim nogut long ol na ol i no bin i stap amamas, na dispela i mekim na ol i stap bel hevi na pilim olsem ol i nogut tasol. Sapos sampela man i bin mekim nogut long yu taim yu pikinini yet—ating ol i bin bagarapim skin bilong yu o bel bilong yu o mekim pasin sem long yu—yu no ken ting yu nogut tasol. Yu mas kisim stretpela tingting long yu yet. Aposel Pol i tok: “Yupela i no ken ting save na pasin bilong yupela i winim ol arapela. Nogat. Yupela i mas skelim gut ol pasin bilong yupela yet na tingting stret.” (Rom 12:3) Olsem na yu mas was gut, nogut yu hambak na yu ting save na pasin bilong yu i winim ol arapela, tasol nogut yu daunim tru yu yet na yu ting olsem yu no gat save na yu nogut tasol. Yu mas kisim stretpela tingting long yu yet. Ol manmeri i stap pren bilong God ol i stap olsem gutpela samting tru long ai bilong em; em i save laikim ol tru. Olsem na em i save makim sampela bilong “stap manmeri tru bilong [em].” Em gutpela samting tru!—Malakai 3:17; Hagai 2:7.

Na em gutpela samting tru yumi inap i stap “wanwok bilong God” na mekim wok Kristen bilong kamapim ol disaipel (1 Korin 3:9; Matyu 28:19, 20) Planti Kristen, em ol i stap bel hevi, ol i bin kisim save olsem: Sapos ol i mekim dispela wok, dispela i save strongim bel bilong ol na ol i no pilim moa olsem ol i nogut tasol. Mari i tok: “Taim mi kamap Kristen pinis, mi stap bel hevi yet na mi pilim yet olsem mi no inap mekim gut wanpela wok na wanpela taim em i bungim wanpela yangpela meri i gat sik long kru bilong het, tasol em i laik lainim ol tok bilong Baibel. Mari i stori olsem: “Em i sot long tisa i save mekim gutpela pasin isi long em, long wanem em i no inap kisim kwik save. Olsem na taim mi wok long lainim em, mi mas putim olgeta tingting bilong mi i go long helpim em long kisim save, na nau mi no tingim moa mi yet na dispela tingting bilong mi olsem mi no inap mekim gut wanpela wok. Dispela meri i sot long man bilong helpim em na mi save, sapos mi mekim wok long strong bilong Jehova mi inap long helpim em. Taim em i kisim baptais, dispela i strongim tru bel bilong mi. Nau mi pilim olsem mi inap long mekim wok na mi amamas long mi yet; bikpela bel hevi bilong mi i pinis olgeta.” Tru tumas, “man bilong givim samting bilong helpim ol arapela man, em yet bai i kisim planti samting.”—Sindaun 11:25.

Tasol planti manmeri i stap bel hevi, ol i save kotim skin bilong ol long ol liklik popaia bilong ol. Wanpela meri Kristen em i gat bikpela bel hevi, em i tok: “Maski mi save wok strong tru long klinim haus na kukim kaikai na long singautim ol manmeri i kam long haus, bihain gen mi save kotim skin bilong mi long olgeta liklik wok mi no bin mekim gut.” Sapos man o meri i no tingting stret na oltaim em i kotim skin bilong em long ol liklik popaia bilong em, dispela bai mekim na bai em i bel hevi na pilim olsem em i nogut tasol. Tasol yumi mas save, God bilong yumi em i Man bilong sori na em i save yumi no gutpela man olgeta. “Em i no save kros nating long yumi.” (Buk Song 103:8-10, 14) Jehova em i save tru wanem pasin i stret, winim tru yumi, tasol em i no save kros kros long yumi long olgeta liklik liklik pasin kranki yumi save mekim; em i save marimari long yumi. Olsem na yumi mas bihainim pasin bilong em na yumi no ken kotim skin bilong yumi long olgeta liklik popaia bilong yumi.

Yumi olgeta i gat sampela pasin kranki bilong yumi, na yumi save popaia. Tasol yumi gat sampela strong na sampela gutpela pasin bilong yumi. Aposel Pol i save, i gat sampela wok em i no inap mekim gutpela olgeta, tasol em i no kotim skin bilong em long dispela. Em i tok: “Maski sapos mi no save tumas long pasin bilong autim tok, save bilong mi i no sot liklik.” Pol i no bel hevi na pilim olsem em i nogut tasol long wanem em i ting em i no inap autim gut tok long planti man, olsem mekim pablik-tok; em i tingim ol samting em inap mekim gut. (2 Korin 11:6) Na olsem tasol, ol manmeri i stap bel hevi, ol i mas tingim ol samting ol inap mekim gut.

Baibel i tok, “Ol man i gat gutpela tingting i save daunim ol yet.” Ol i mekim pasin daun—ol i save i gat sampela samting ol i no inap mekim na ol i no inap senisim dispela. (Sindaun 11:2) Yumi olgeta wan wan i narapela narapela kain—yumi gat narapela narapela kain sindaun na hevi, na strong bilong skin, na save, na wok samting yumi inap mekim. Tasol taim yumi givim bel olgeta long mekim wok bilong Jehova, na yumi mekim wok inap tru long skel bilong yumi yet, orait Jehova i save amamas long yumi. (Mak 12:30-33) God em i no man bilong mekim hatpela pasin; taim ol manmeri bilong lotuim em ol i wok strong, em i no save bel nogut long wok bilong ol na oltaim em i laik bai ol i mekim gutpela wok moa. Nogat. Em i no kain man olsem. Wanpela meri Kristen i daunim pinis bel hevi bilong em, nem bilong em Leora, em i tok: “Mi save mi no mekim gut sampela wok olsem ol arapela i mekim, olsem mi no save autim gut tok. Tasol mi wok long mekim. Na ol wok mi mekim, mi mekim gut tru inap long skel bilong mi yet.”

Bilong Stretim Rong na Hevi i Kamap Namel long Yu na Narapela Man

Tasol olsem wanem sapos yu mekim bikpela rong? Ating yu bel hevi olsem King Devit, em ‘bel bilong em i gat bikpela hevi tru na long olgeta de em i krai tasol,’ long wanem em i bin mekim rong o sin. Tasol sapos yu hevi long rong yu bin mekim, ating dispela i makim olsem yu no bin mekim dispela kain sin em God i no inap lusim tingting long en. (Buk Song 38:3-6, 8) Sapos yu bel hevi na yu pilim olsem yu gat asua, ating dispela i makim olsem yu gat gutpela bel na yu bin lainim gut maus bilong bel na em i mekim gut wok bilong en. Orait, sapos yu bin mekim rong, yu mas mekim wanem? Olsem wanem? Yu beten pinis long God na askim em long lusim tingting long rong bilong yu na yu kirap pinis long mekim sampela samting bilong stretim dispela rong? (2 Korin 7:9-11) Sapos olsem, orait yu mas bilip long marimari bilong God, em i save marimari moa yet long ol man, na yu mas pasim tok long bel olsem yu no ken mekim gen dispela rong. (Aisaia 55:7) Sapos ol i bin stretim yu, orait “yu no ken bel hevi tumas,” long wanem Jehova i save stretim ol man em i laikim tumas. (Hibru 12:5, 6) Ol tok samting bilong stretim man i save mekim wok olsem: Em bilong helpim sipsip i bin lusim rot na bai em i ken kamap strong gen. Em i no bilong makim olsem dispela man (o meri) i nogut tasol. Nogat.

Na sapos bel bilong yumi i kotim yumi long rong yumi bin mekim na i tok, yumi man nogut, yumi no ken tingting planti na ting olsem Jehova tu i bin skelim yumi na em i ting yumi man nogut. Baibel i tok: “Maski sapos bel bilong yumi i kotim yumi long wanpela samting, yumi ken i stap bel isi long ai bilong God. Long wanem, God em i save long olgeta samting, na save bilong en i winim tru save i stap long bel bilong yumi.” (1 Jon 3:19, 20) Jehova i no lukim tasol ol rong na popaia bilong yumi. Em i save long olgeta samting—sapos i gat sampela samting i makim olsem yumi no gat bikpela asua, orait em i save long dispela, na em i save long olgeta wokabaut bilong yumi, na long olgeta tingting i kirapim yumi long mekim ol samting yumi mekim, na em i save long olgeta laik bilong yumi. Em i gat bikpela save tru, olsem na taim yumi beten askim em long lusim rong bilong yumi, em inap marimari long yumi na harim beten bilong yumi, olsem em i bin mekim long Devit.

Sapos hevi i kamap namel long yu na narapela man, o yu tingting tumas long ol narapela i mas laikim yu, dispela tu inap mekim yu i pilim olsem yu nogut tasol, o bai yu bel hevi na ting olsem ol narapela man i no laikim yu. Yumi olgeta i gat sin na yumi save popaia, olsem na ating wanpela Kristen bai mekim sampela tok long yu na yu bai ting olsem em i no pilim hevi bilong yu o em i no mekim gutpela pasin long yu. Tasol sapos kain hevi olsem i kamap na yu go tokim dispela Kristen olsem yu bel hevi long tok em i bin mekim, orait planti taim dispela bai stretim hevi. (Lukim Matyu 5:23, 24.) Na Solomon i tok: “Yu no ken harim olgeta toktok bilong ol manmeri.” Bilong wanem yu no ken mekim olsem? “Long wanem, yu save olsem, planti taim yu yet yu bin tok nogut long narapela man.” (Saveman 7:21, 22) Olsem na yu mas tingting stret—yu no ken ting olsem yu yet yu no inap popaia, na yu no ken ting olsem hevi i no inap kamap namel long yu na ol narapela man. Tasol taim hevi i kamap, karim dispela hevi na lusim kwik sin bilong ol arapela.—Kolosi 3:13.

Na sapos ol narapela man i laikim yu o nogat, dispela i no makim olsem yu gutpela man o nogat. “Ol man i bin givim baksait long [Krais],” na ol i “lukim em olsem man nating.” (Aisaia 53:3; Sekaraia 11:13) Tasol yu ting dispela i makim olsem em i nogut o i mekim em i kamap man nogut long ai bilong God? Nogat, a? Na sapos yumi gutpela olgeta wankain olsem Jisas, bai i gat sampela man ol i no amamas long yumi.

Strong Bilong Karim Hevi

Sampela taim sapos yumi gat bikpela bel hevi tru, maski yumi wok strong long winim dispela, yumi stap bel hevi yet. Dispela kain hevi i mekim na bel bilong sampela Kristen i bagarap stret na ol i kisim tingting wankain olsem bilong Jona, em Jona i tok: “Sapos mi dai, em i gutpela.” (Jona 4:1-3) Tasol bikpela bel hevi bilong Jona i no stap oltaim. Bihain em i daunim bel hevi bilong em na bel bilong em i amamas gen. Olsem na sapos long dispela taim bel bilong yu i hevi tumas na yu pilim olsem i gutpela sapos yu dai, yu mas save, dispela hevi em i olsem dispela kain hevi em Pol i tok em bai “i stap sotpela taim tasol.” (2 Korin 4:8, 9, 16-18) Dispela hevi bai pinis! I gat rot bilong stretim olgeta hevi i save painim yumi. Jehova i mekim tok promis olsem: “Mi save strongim bel bilong ol [man i bel hevi] na mekim laip bilong ol i kamap gutpela gen.”—Aisaia 57:15.

Na long olgeta taim yu mas beten. Yu no ken lusim pasin bilong beten, maski i olsem God i no harim. Devit i krai long God na em i tok: “God, yu harim mi i singaut long . . . bel bilong mi i hevi tru. Olsem na mi singaut long yu bilong yu ken helpim mi. Yu bringim mi i go long wanpela ples hait.” (Buk Song 61:1, 2) Olsem wanem God i mekim bel bilong yumi i stap isi, olsem bringim yumi i go long wanpela ples hait? Olsem wanem em i mekim dispela samting em yumi ting long strong bilong yumi yet yumi no inap mekim? Wanpela meri, nem bilong em Ailin (Eileen), em inap bekim dispela askim. Inap planti yia Ailin i wok long daunim bel hevi na em i tok: “Jehova i no larim mi i les long mekim. Dispela i helpim mi long bilip olsem sapos mi wok yet long mekim, bai em i wok yet long helpim mi. Mi save long ol tok i tru bilong Baibel na dispela samting tasol i helpim mi na mi stap laip yet. Long kain kain rot—olsem long rot bilong beten, wok autim tok, ol miting, ol buk na nius, ol famili na pren bilong mi—Jehova i bin givim strong long mi na mi wok strong yet long daunim bel hevi bilong mi.”

Yu mas tingim dispela hevi i olsem wanpela traim i kamap bilong traim bilip bilong yu. Aposel Pol i mekim gutpela tok bilong strongim bel bilong yumi, em i tok yumi ken bilip tru long God, long wanem “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem: Em bai i mekim yupela i sanap strong, na dispela traim bai i no inap daunim yupela.” (1 Korin 10:13) Tru tumas, God bai givim “bikpela strong” long yu, “em i strong bilong God,” na bai yu inap karim olgeta hevi bilong bel.—2 Korin 4:7.

Long Nupela Taim Bai i No Gat Bel Hevi!

God i tok promis pinis olsem klostu nau bai em i pinisim olgeta samting nogut bilong dispela graun i save mekim yumi i bel hevi. Em bai mekim olsem long rot bilong Kingdom bilong em long heven. Long Baibel em i tok: Lukim, mi wokim nupela skai na nupela graun. Na ol man bai i no inap tingim moa ol samting i bin kamap bipo. Yupela i ken bel gut, na amamas oltaim long nupela samting nau mi wokim.” (Aisaia 65:17, 18) Namba wan truim bilong dispela tok i bin kamap long yia 537 paslain long Krais, taim God i kisim lain Israel bilong bipo i go bek long ples bilong ol. Ol i lain bilong em na long dispela taim ol i bin mekim singsing na ol i tok: “Taim Bikpela i bringim mipela i kam bek long Saion, mipela i ting mipela i olsem driman nating. Olsem na mipela i lap moa yet, na mipela i singim song bilong amamas moa yet.” (Buk Song 126:1, 2) Klostu nau bai namba tu truim bilong dispela tok profet i kamap long nupela taim God i laik kamapim, na bai yumi amamas moa moa yet!—2 Pita 3:13; Kamapim Tok Hait 21:1-4.

Taim Kingdom bilong God (em “nupela skai”) i bosim stretpela lain manmeri i stap long graun (em “nupela graun”), bai ol dispela manmeri i kamap gutpela olgeta long bel na long skin na long spirit. I no olsem bai ol i no inap tru tingim moa ol samting i bin kamap long bipo. Nogat. Tasol bai i gat planti gutpela samting long dispela nupela taim bilong amamas long en, olsem na bai ol i tingim tru ol dispela samting na bai i no gat as na ol i tingim ol samting nogut i bin kamap long bipo na i bin mekim ol i bel hevi. Olaman! Long olgeta de, taim ol i kirap long moningtaim, bai tingting bilong ol i klia na bai ol i amamas long kirap mekim ol wok bilong ol dispela de—bai i no gat wanpela samting bilong mekim ol i bel hevi na pasim ol long mekim wok!

Lola (em pastaim yumi bin stori long em) i bilip olsem dispela gutpela nupela taim bai kamap tru na em i tok: “Mi tingim Kingdom bilong Jehova bai stretim dispela hevi na dispela samting i helpim mi tru. Mi save, bel hevi bilong mi i no ken i stap oltaim oltaim; bai em i pinis.” Yes, yu ken bilip tru olsem God bai inapim yumi long winim pait na daunim tru bel hevi!

[Futnot]