Yumi Ken Givim Wanem Samting Long Jehova?
GOD JEHOVA em i gutpela piksa tru bilong pasin bilong givim samting. Em i bin givim “laip na win na olgeta samting long olgeta manmeri.” (Aposel 17:25) God i save mekim san bilong em i kamap antap long ol man nogut na long ol gutpela man wantaim. (Matyu 5:45) Yes, ‘Jehova i save mekim ren i kam daun, na em i mekim planti gutpela kaikai i kamap. Em i givim planti kaikai long yumi na mekim bel bilong yumi i amamas.’ (Aposel 14:15-17) Tru tumas, “olgeta gutpela samting yumi save kisim na olgeta presen i gutpela tru, em olgeta i save kam long heven. Papa i bin mekim kamap olgeta lait bilong skai, em i save salim dispela ol samting i kam daun long yumi”!—Jems 1:17.
God i save givim olgeta dispela samting bilong skin long yumi, na em i salim lait bilong em na tok i tru long yumi. (Buk Song 43:3) Jehova i mekim gut tru long ol wokboi bilong em i stap gut long em—em i givim ol kaikai bilong spirit long ol long taim stret long rot bilong dispela lain i olsem ‘gutpela wokboi.’ (Matyu 24:45-47) Ol dispela samting i kam long God inap helpim yumi, long wanem, God yet i mekim na yumi ol sinman bilong i dai yumi inap kamap wanbel wantaim em. Olsem wanem yumi inap kamap wanbel wantaim em? Long rot bilong i dai bilong Pikinini bilong em Krais Jisas, em Krais i bin lusim laip bilong em bilong baim bek planti man. (Matyu 20:28; Rom 5:8-12) Em wanpela gutpela presen tru God bilong pasin sori, em Jehova, i givim long yumi!—Jon 3:16.
Yu Ting i Gat Sampela Samting Yumi Inap Givim Long Jehova?
Planti handet yia paslain long taim God i salim Jisas olsem pe bilong baim bek yumi, wanpela man bilong raitim song long Baibel i pilim tru marimari bilong God na ol wok God i mekim bilong kisim bek yumi, na dispela man i tok: “Bikpela i bin mekim gut tru long mi. Olsem na bai mi givim wanem samting long em? Bai mi bringim wanpela kap wain long Bikpela olsem ofa i soim olsem God i kisim bek mi pinis. Mi mekim olsem bilong tok tenkyu long Bikpela i bin kisim bek mi. Long taim olgeta manmeri bilong en i kam bung, mi bai mekim olsem mi bin promis.”—Buk Song 116:12-14.
Sapos yumi givim bel olgeta long Jehova, olsem dediket long em, yumi bilip tru olsem em bai kisim bek yumi na yumi truim ol tok promis yumi mekim long em. Yumi Witnes Bilong Jehova na yumi inap tenkyu long em, olsem litimapim nem bilong em oltaim na autim tok bilong Kingdom bilong em. (Buk Song 145:1, 2, 10-13; Matyu 24:14) Tasol yumi no inap givim sampela samting long em na bai em i gat planti samting moa. Nogat. Em yet i papa bilong olgeta samting. Na yumi no inap bekim gutpela pasin em i bin mekim bilong helpim yumi.—1 Stori 29:14-17.
Taim yumi givim mani, olsem kontribusen, bilong helpim wok bilong Kingdom, i no olsem yumi helpim Jehova o bekim gutpela pasin em i bin mekim long yumi. Nogat. Tasol em wanpela rot bilong kamapim bel bilong yumi olsem yumi laikim tumas Jehova. Taim yumi givim kontribusen, sapos yumi mekim long laik bilong yumi yet na yumi laik helpim wok bilong lotu i tru, na yumi no tingting long helpim yumi yet o long kisim biknem long ai bilong ol man, orait, bai yumi amamas na bai yumi kisim blesing long Jehova. (Matyu 6:1-4; Aposel 20:35) Man inap givim samting na em inap kisim dispela amamas sapos long olgeta taim em i putim hap mani samting bilong em i stap bilong helpim lotu i tru o bilong helpim gutpela man i sot long samting. (1 Korin 16:1, 2) Olsem na ating man i mas tilim olgeta samting bilong em long 10-pela hap na givim wanpela hap olgeta bilong mekim wok bilong lotu o olsem wanem?
Yu Mas Givim Wanpela Hap Long God o Nogat?
Long maus bilong profet Malakai, Jehova i tok: “Yupela i mas tilim olgeta samting bilong yupela long 10-pela hap na bringim wanpela hap olgeta long haus bilong mi. . . . Yupela i mekim olsem na bai mi ken givim planti gutpela samting long yupela na yupela i no ken sot. Bihainim dispela rot na bai yupela i ken save olsem tok bilong mi em i tru olgeta.” (Malakai 3:10) Narapela Baibel i tanim dispela tok olsem: “Kisim takis olgeta i kam long haus bilong bungim kaikai.”—Baibel An American Translation.
Sampela lotu i save bihainim dispela pasin, olsem ol man i save givim takis long lotu. Ol i save tilim mani bilong ol long 10-pela hap na givim wanpela hap olgeta (10 pesen) bilong helpim lotu.
Tumbuna bilong lain Israel, em Abraham (Abram), em i bin i go pait wantaim King Kedorlaomer na ol pren bilong em, na bihain Abraham i tilim olgeta samting em i kisim long pait long 10-pela hap na em i givim wanpela hap long Melkisedek, em i king bilong Salem na pris bilong God. (Stat 14:18-20; Hibru 7:4-10) Sampela yia bihain Jekop i bin tok promis long tilim ol samting bilong em long 10-pela hap na givim wanpela hap long God. (Stat 28:20-22) Abraham wantaim Jekop i givim dispela long God long laik bilong ol yet. Ol dispela Hibru bilong pastaim i no gat lo i tok ol i mas givim wanpela hap bilong olgeta samting bilong ol long God.
Tok Bilong Lo Long Givim Wanpela Hap Long God
Taim ol Israel i kamap lain bilong Jehova, em i givim lo long ol i tok ol i mas tilim ol samting bilong ol long 10-pela hap na givim wanpela hap long God. Sampela i ting ol Israel i bin givim tupela hap long olgeta yia; tasol sampela saveman i tok, ol i bin givim wanpela hap tasol long olgeta yia. Ol i no save givim sampela samting long God long ol namba 7 yia, long wanem, ol i no save planim kaikai long dispela yia, na bai i no gat samting ol i ken givim long God. (Wok Pris 25:1-12) Ol i save givim namba wan kaikai i redi long gaden long God, na ol i save tilim tu ol samting bilong ol long 10-pela hap na givim wanpela hap long God.—Kisim Bek 23:19.
Ol i save tilim ol kaikai bilong gaden na bilong ol diwai long 10-pela hap, na ol pikinini bilong ol bulmakau sipsip tu, na wanpela hap bilong olgeta dispela samting ol i save kisim i go long haus bilong God na givim long ol Livai, long wanem, ol Livai i no kisim graun olsem ol narapela lain bilong Israel i bin kisim. Na ol Livai i tilim ol dispela samting long 10-pela hap na givim wanpela hap bilong helpim ol pris bilong lain bilong Aron. Ol Israel i save rausim pipia bilong wit pastaim na ol i kisim i kam, na ol i save wokim ol grep na ol kaikai bilong diwai oliv i kamap wain na wel pastaim na ol i kisim i kam. Sapos wanpela Israel i laik, em i ken givim mani olsem senis bilong kaikai, tasol em i mas skelim pe bilong kaikai na skruim 5 pesen moa long en.—Wok Pris 27:30-33; Namba 18:21-30.
Na wanpela hap moa bilong ol samting ol i tilim long 10-pela hap em ol i save putim bilong helpim famili taim ol manmeri i mekim bung bilong ol bikpela de bilong lotu. Tasol olsem wanem sapos ol i stap longwe long Jerusalem na i hatwok long karim dispela hap bilong ol samting i kam? Sapos olsem, orait ol i ken kisim ol dispela wit na nupela wain na wel na ol animal na baim i go long ol man na i no hatwok long karim i kam mani ol i kisim. (Lo 12:4-18; 14:22-27) Long pinis bilong namba 3 na namba 6 yia bilong ol 7-pela 7-pela yia, ol i save putim dispela wanpela hap bilong ol samting long ol bakstua, na em bilong ol Livai, na ol man bilong narapela kantri i stap wantaim ol, na ol meri em man bilong ol i dai pinis, na ol manki em papa bilong ol i dai pinis.—Lo 14:28, 29; 26:12.
Long Lo bilong Moses i no gat lo i tok ol i mas kisim strafe sapos ol i no givim dispela wanpela hap bilong ol samting bilong ol long God. God Jehova i laik bai lo bilong bel bilong ol yet i kirapim ol long givim. Sampela taim ol i mas tokaut long em olsem ol i givim pinis olgeta samting em i laik bai ol i givim long em. (Lo 26:13-15) Sapos ol i haitim hap long haus, bai i olsem ol i stilim samting bilong God.—Malakai 3:7-9.
Pasin bilong tilim ol samting long 10-pela hap na givim wanpela hap long God, dispela pasin i no putim hevi long ol. Taim ol Israel i bihainim dispela lo bilong God, ol i save kisim planti samting moa. Dispela pasin i helpim lotu i tru, na i helpim ol Israel bambai ol i no ken tingting planti long olsem wanem bai ol inap kisim ol samting ol i mas givim bilong helpim lotu bilong ol. Dispela pasin bilong givim wanpela hap bilong ol samting long God i helpim olgeta manmeri long Israel. Tasol olsem wanem long ol Kristen? Ol i mas tilim ol samting bilong ol long 10-pela hap na givim wanpela hap long God o nogat?
Ol Kristen i Mas Givim Wanpela Hap Long God o Nogat?
Inap longtaim liklik ol misin i gat nem Kristen ol i save bihainim dispela pasin bilong givim wanpela hap long God. Wanpela buk (The Encyclopedia Americana) i tok: “Long yia 550 samting planti ol i kirap pinis long bihainim dispela pasin. Long Kibung bilong Tur long yia 567 na long namba 2 Kibung bilong Makon long yia 585, ol bisop i tok i gutpela sapos misin i bihainim dispela pasin. . . . Planti bikman bilong misin i paulim mani samting ol man i givim bilong helpim lotu, na taim misin i givim namba long ol man nating bilong kisim dispela mani o ol man nating i baim dispela namba long misin, ol dispela lain i paulim moa yet mani samting ol man i givim long lotu. Kirap long taim bilong Pop Gregori Namba 7 misin i tok ol man nating i no ken holim namba bilong kisim dispela mani samting long ol man. Olsem na planti man nating i kirap givim dispela namba bilong ol long ol haus bruder o long lain pris bilong bikpela haus lotu. Taim ol man i laik stretim lotu na ol i bruk na lusim lotu Katolik, ol i no pinisim dispela pasin bilong givim wanpela hap long God. Lotu Katolik i holim yet dispela pasin na ol man long ol kantri Talatala tu i holim.” Tasol bihain, long narapela narapela kantri, ol i pinisim dispela pasin o senisim isi isi, na long nau wan wan lotu tasol i bihainim yet.
Orait, olsem wanem? Ol Kristen i mas tilim olgeta samting bilong ol long 10-pela hap na givim wanpela hap long God? Wanpela buk (bilong Alexander Cruden) i tok: “Man bilong kisim bek yumi na ol aposel bilong em i no putim wanpela lo long dispela pasin bilong givim wanpela hap long God.” Tru tumas, i no gat lo i tok ol Kristen i mas bihainim dispela pasin. God yet i pinisim Lo bilong Moses wantaim dispela pasin Lo i makim bilong givim wanpela hap long God. Em i nilim long pos pen bilong Jisas. (Rom 6:14; Kolosi 2:13, 14) God i no makim hamas mani Kristen i mas givim bilong helpim kongrigesen, olsem na ol Kristen i save givim long laik bilong ol yet.
Givim Ol Gutpela Samting Bilong Yu Long Jehova Bilong Givim Biknem Long Em
Sapos long laik bilong Kristen yet em i tilim mani bilong em long 10-pela hap na givim wanpela hap bilong helpim lotu i tru, i no gat sampela tok long Baibel i makim dispela i no stret. Nogat. Wanpela manki bilong Papua Niugini, em i gat 15 krismas, em i salim mani i kam, olsem kontribusen, na long pas em i salim wantaim, em i tok: “Taim mi liklik, papa i save tokim mi, ‘Taim yu kirap mekim wok mani, yu mas givim namba wan kaikai bilong dispela wok long Jehova.’ Mi save tingim tok bilong Sindaun 3:1, 9, em i tok yumi mas givim namba wan kaikai i redi long gaden long Jehova bilong givim biknem long em. Mi tok promis long mekim olsem, na nau mi mas truim tok promis bilong mi. Olsem na mi amamas tru long salim dispela mani i kam bilong helpim wok bilong Kingdom.” Baibel i no tok ol Kristen i mas tok promis long givim olsem. Tasol taim Kristen i givim, dispela i kamapim klia olsem em i gat bikpela laik long helpim lotu i tru.
Tasol sampela Kristen i no laik makim hamas mani stret ol i laik givim bilong helpim lotu bilong God Jehova. Olsem: Tupela lapun sista i stap long wanpela kibung bilong ol Witnes Bilong Jehova na tupela i toktok wantaim long mani ol i ken givim bilong helpim wok bilong Kingdom. Wanpela i gat 87 krismas na em i tok, em i laik save, sapos em i baim kaikai long kibung, em i mas tromoi hamas mani, na bai em i ken givim kontribusen inap olsem. Narapela sista, em i gat 90 krismas, em i tok: ‘Maski, no ken skelim olsem. Givim inap long laik bilong yu na skruim liklik hap moa.’ Em i gat gutpela tingting, a?
Lain bilong Jehova ol i dediket long em na ol i tok pinis long givim olgeta samting bilong ol long em. Olsem na ol i amamas long givim mani na ol narapela samting tu bilong helpim lotu bilong Jehova. (Lukim 2 Korin 8:12.) Pasin Kristen bilong givim samting long God i opim rot bilong kamapim klia olsem yumi laikim tru lotu bilong God Jehova. Dispela pasin i no kirapim yumi long givim wanpela hap tasol. Nogat. Yumi ken givim long laik bilong yumi, na ating sampela taim bel bilong yumi bai kirapim yumi long givim planti hap moa bilong helpim wok bilong Kingdom.—Matyu 6:33.
Aposel Pol i tok: “Yupela olgeta wan wan i mas tingting gut pastaim na save gut long wanem samting yupela i laik givim. Nogut wanpela man i bel hevi long givim samting, na nogut em i ting ol man i strong tumas long em i mas givim. Dispela pasin bilong givim em i no gutpela. God i save laikim man i amamas na i givim samting long laik bilong em yet.” (2 Korin 9:7) Sapos yu amamas long givim samting na yu givim planti samting bilong helpim lotu i tru, bai yu stap gutpela, long wanem, wanpela savetok i tok olsem: “Yu mas kisim ol namba wan hap kaikai i mau long gaden bilong yu na givim long Bikpela olsem ofa, na dispela bai i givim biknem long em. Sapos yu mekim olsem, orait Bikpela bai i mekim gaden bilong yu i karim planti kaikai moa. Na bai yu inap pulapim tru haus kaikai bilong yu, na bai tang wain bilong yu i pulap tru na hap wain i kapsait.”—Sindaun 3:9, 10.
Olgeta gol, na silva, na ol bulmakau i stap long wan tausen maunten, na ol narapela planti planti gutpela samting, olgeta i bilong Jehova, olsem na i no gat wanpela samting moa yumi inap givim long em. (Buk Song 50:10-12) Yumi no inap bekim olgeta gutpela pasin Jehova i bin mekim bilong helpim yumi. Nogat tru. Tasol yumi ken mekim ol samting bilong tenkyu long em na makim olsem yumi pilim tru ol dispela gutpela pasin em i bin mekim. Na yumi ken tenkyu long em long yumi inap mekim wok bilong em na litimapim nem bilong em. Na yumi ken save, planti gutpela samting bai painim ol man i givim planti samting bilong helpim lotu i tru na bilong givim biknem long God Jehova, em Man bilong laikim tru yumi na givim planti samting long yumi.—2 Korin 9:11.
[Blok long pes 29]
BILONG GIVIM MANI SAMTING BILONG HELPIM WOK BILONG KINGDOM
◻ OL KONTRIBUSEN BILONG HELPIM WOK LONG OLGETA HAP: Planti ol i save makim hamas mani ol i laik givim olsem kontribusen na ol i save putim dispela mani i stap na taim ol i go long Haus Kingdom ol i putim long wanpela bokis kontribusen i gat nem olsem: “Ol Kontribusen Bilong Helpim Wok Bilong Sosaiti Long Olgeta Hap.” Long olgeta mun kongrigesen i save salim ol mani bilong dispela bokis kontribusen i go long brens-ofis.
◻ OLSEM PRESEN: Sapos yu laik yu ken salim mani i go stret long Watch Tower Bible and Tract Society of Pennsylvania, 25 Columbia Heights, Brooklyn, New York 11201, o long brens-ofis bilong Sosaiti long hap bilong yu. Yu ken givim bis o narapela samting i gat bikpela pe bilong en, olsem kontribusen. Taim yu givim mani o narapela samting olsem, yu mas salim pas tu wantaim i tokaut klia olsem yu givim nating dispela samting olsem presen.
◻ OLSEM DINAU: Yu ken givim mani long Sosaiti Was Taua olsem dinau bilong mekim wok long en i go inap long taim yu dai, na sapos yu yet yu sot na yu laik kisim bek dispela mani, yu ken kisim.
◻ INSURENS: Sapos yu baim laip-insurens, orait yu ken raitim nem bilong Sosaiti Was Taua bilong kisim dispela mani taim yu dai, o sapos yu baim insurens bilong kisim mani taim yu lapun na yu pinis long wok, orait yu ken raitim nem bilong Sosaiti bilong kisim dispela mani sapos yu dai taim yu no lapun yet.
◻ MANI LONG BENG: Sapos yu gat sampela mani long beng, yu ken bihainim lo bilong beng long hap bilong yu na pasim tok wantaim ol long givim dispela mani long Sosaiti Was Taua bilong mekim wok long en taim yu stap laip yet o bilong kisim long taim yu dai. Sapos yu mekim olsem, gutpela sapos yu toksave long Sosaiti.
◻ OL SEA SAMTING: Sapos yu gat sea samting long wanpela kampani, yu ken givim nating long Sosaiti Was Taua olsem presen stret, o yu ken givim long Sosaiti na wokim rot bambai yu kisim yet interes o winmani bilong en.
◻ HAUS SAMTING: Sapos yu gat haus samting yu inap baim i go long ol man, yu ken givim long Sosaiti Was Taua olsem presen stret, o bilong yu ken i stap long en i go inap long yu dai na nau Sosaiti i ken kisim tru. Sapos yu laik mekim olsem, gutpela sapos yu toksave long Sosaiti pastaim.
◻ RAITIM PEPA: Yu ken i go long loya na raitim pepa na makim Sosaiti Was Taua (Watch Tower Bible and Tract Society of Pennsylvania) bilong kisim mani o haus samting bilong yu taim yu dai. O sapos i gat sampela mani samting beng o narapela lain i holim na em bilong yu kisim bihain, yu ken raitim pepa na tokaut olsem, sapos yu dai paslain long taim bilong kisim dispela mani, orait ol i ken givim long Sosaiti. Long sampela kantri, sapos yu tok long givim mani olsem long wanpela lotu, bai yu abrusim sampela takis. Sapos yu raitim pepa olsem, yu ken raitim tupela na salim wanpela long Sosaiti.
Sapos yu laik kisim sampela save moa long ol dispela samting, yu ken raitim pas long International Bible Students Association of Papua New Guinea Inc., Box 636, Boroko, N.C.D.