Mekim Wok Bilong Jehova na Stap Amamas
“Sapos wanpela man i bilip long God bilong Jekop bai em i helpim em, na sapos dispela man i pas wantaim God, Bikpela bilong em, orait em i ken amamas.”—BUK SONG 146:5.
1, 2. Wanpela buk i tok wanem long kamapim as bilong amamas? Planti man long nau i ting olsem wanem long i stap amamas?
PASIN bilong amamas em wanem kain pasin tru? Inap planti handet yia pinis ol man bilong kamapim insait bilong ol tok, na ol saveman, na ol tisa bilong lotu i bin wok long stori long as bilong amamas. Tasol no gat wanpela i kamapim tok em olgeta man inap wanbel long en. Wanpela buk (Encyclopædia Britannica) i tok, ‘I hatwok tru long stori long amamas.’ Ol man i gat narapela narapela tingting long ol samting, na ol i gat narapela narapela tingting long amamas tu.
2 Planti man i ting, sapos ol i no gat sik, o ol i gat planti mani kago, o ol i gat ol gutpela poroman, bai ol inap i stap amamas. Tasol sampela ol i gat olgeta dispela samting na ol i no i stap amamas. Ol manmeri i dediket long God Jehova, em Baibel i givim narapela tingting long ol long pasin bilong i stap amamas.
Narapela Kain Tingting Long Amamas
3, 4. (a) Husat ol i ken amamas, olsem Jisas i tok? (b) Yumi ken kisim wanem save long tok Jisas i mekim long ol gutpela pasin bilong mekim man i amamas?
3 Taim Jisas i autim tok antap long maunten, em i no tok man i mas i gat strongpela skin o mani kago samting bambai em i ken i stap amamas. Em i tok, “ol man i save, ol i stap rabis tru long ol samting bilong God,” olsem na ol i laik tru long kisim, na ol i “laikim tumas long bihainim stretpela pasin,” ol dispela man i ken amamas tru. I gat dispela tupela samting bilong mekim man i ken amamas, na Jisas i tok tu: “Ol man i krai i stap, em ol i ken amamas. God bai i mekim gut bel bilong ol.” (Matyu 5:3-6) Dispela tok i olsem i pait long em yet, a? Tasol yumi save Jisas i no tok, taim wanpela famili o pren bilong man i dai, bilong en yet bel bilong dispela man i ken amamas. Nogat. Jisas i tok long ol man i krai na hevi, long wanem, ol i stap sinman na dispela i bagarapim ol.
4 Ol man i krai i stap, long wanem, sin i bagarapim ol, aposel Pol i tok, ol i wetim “God bai i pinisim dispela kalabus bilong bagarap.” (Rom 8:21, 22) Ol manmeri i bilip long wok God Jehova i bin mekim bilong tekewe sin long rot bilong ofa bilong Krais, na ol i bihainim laik bilong God, God i mekim gut bel bilong ol na ol i ken amamas. (Rom 4:6-8) Taim Jisas i autim tok antap long maunten em i tok, ol man bilong pasin daun na pasin marimari, na “ol man bel bilong ol i klin,” na “ol man i save mekim dai ol kros,” em ol i ken amamas. Em i tok promis olsem, maski ol man i mekim nogut long ol dispela kain man bai ol i stap amamas yet. (Matyu 5:5-11) Dispela tok i givim save long yumi olsem: Ol maniman na rabisman wantaim i mas bihainim ol dispela gutpela pasin bambai ol i ken i stap amamas.
As Bilong i Stap Amamas Tru
5. Wanem as bilong amamas bilong ol wokboi bilong God ol i dediket long em?
5 Kisim planti samting bilong skin, dispela i no as bilong i stap amamas tru. Saveman King Solomon i tok: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.” (Sindaun 10:22) Ol manmeri i save aninit long Jehova, em Nambawan Bikpela bilong heven na graun, ol i save kisim blesing long Jehova na long dispela as tasol ol i stap amamas. Man o meri i dediket long God na em i gat blesing bilong Jehova na em i pilim dispela blesing i stap long em, dispela man o meri i stap amamas tru. Long Baibel amamas i makim gutpela amamas i save kamap long bel bilong man i mekim wok bilong Jehova, em dispela i mekim na em i stap belgut na amamas.
6. Lain bilong Jehova ol i mas mekim wanem bambai ol inap i stap amamas tru?
6 Man o meri i mas i stap gut wantaim Jehova bambai em inap i stap amamas tru. Dispela kain man o meri i laikim tumas God Jehova na stap gut long em, na long dispela as em i stap amamas. Ol wokboi bilong Jehova i dediket long em ol i wanbel tru long tok bilong Pol, em i tok: “Namel long yumi i no gat wanpela man i save ting laip bilong en em i samting bilong em yet. . . . Nogat. Sapos yumi stap laip, em i samting bilong Bikpela. . . . Yumi bilong Bikpela tasol.” (Rom 14:7, 8) Olsem na man o meri i laik i stap amamas tru em i mas bihainim tok bilong Jehova na amamas long bihainim laik bilong Jehova. No gat narapela rot. Jisas i tok: “Ol man i harim tok bilong God na i bihainim, em ol i ken amamas.”—Luk 11:28.
Sampela Taim Tasol i Helpim Man Long i Stap Amamas
7, 8. (a) Ol samting bilong helpim man long i stap amamas i wanem tupela kain? (b) Yumi ken tok wanem long pasin bilong marit na kamapim pikinini?
7 Ol samting yumi stori pinis long en, em yumi ken tok ol i olsem ol “as” samting bilong helpim man long i stap amamas na “i no save senis,” long wanem, long olgeta taim ol i helpim ol wokboi bilong Jehova long i stap amamas. Tasol i gat sampela samting em sampela taim tasol ol i helpim man long i stap amamas, na sampela taim ol i helpim em long i stap amamas liklik tasol o ol i no helpim em long i stap amamas. Long taim bilong ol tumbuna bilong lain Israel na paslain long taim bilong ol Kristen, ol manmeri i save ting olsem ol i mas marit na kamapim pikinini bambai ol inap i stap amamas. Ol i ting dispela em i as tru bilong i stap amamas. Tingim tok Resel i bin mekim long man bilong em Jekop—em i krai long Jekop na i tok: “Yu givim pikinini long mi. Sapos nogat, bai mi dai.” (Stat 30:1) Ol i gat bikpela laik tru long kamapim pikinini, na long dispela taim bipo, dispela kain tingting i stret long laik bilong Jehova.—Stat 13:14-16; 22:17.
8 Lain bilong Jehova long bipo ol i ting marit na kamapim pikinini em blesing Jehova i givim long ol. Tasol long ol taim nogut i bin painim ol, ol i bin karim hevi long dispela na long sampela samting moa. (Skelim Buk Song 127, 128 wantaim Jeremaia 6:12; 11:22; Krai 2:19; 4:4, 5.) Olsem na sampela taim pasin bilong marit na kamapim pikinini i no helpim man long i stap amamas oltaim.
Ol Man Bilong Bipo Em Ol i No Bin Marit, Tasol Ol i Stap Amamas
9. Bilong wanem ol yangpela meri Israel i save go long olgeta yia na litimapim nem bilong pikinini meri bilong Jepta?
9 Planti wokboi bilong Jehova ol i no bin marit, tasol ol i bin i stap amamas. Pikinini meri bilong Jepta i tingim tok tru antap papa bilong em i bin mekim na em i no bin marit. Inap liklik taim em wantaim ol yangpela meri poroman bilong em, ol i bin krai sori long em i no inap marit. Tasol em i bin kisim bikpela amamas tru long mekim wok bilong Jehova long olgeta de long haus bilong Em. Ating em i wok wantaim “ol meri i save wok long dua bilong haus sel bilong God”! (Kisim Bek 38:8) Em i mekim gutpela wok olsem, na long olgeta yia ol yangpela meri Israel i save go na litimapim nem bilong em.—Hetman 11:37-40, lukim Baibel New World Translation.
10. Jehova i tok Jeremaia i no ken mekim wanem? Olsem na ating Jeremaia i no bin i stap amamas o olsem wanem?
10 Profet Jeremaia i bin stap long wanpela taim bilong bikpela hevi i laik kamap na God i tok, Jeremaia i no ken marit na kamapim ol pikinini. (Jeremaia 16:1-4) Tasol God i bin “mekim gut tru” long Jeremaia, olsem em i tok promis long mekim long ol man “i bilip strong” long em na i save em tasol inap helpim ol. (Jeremaia 17:7) Winim 40 yia, Jeremaia i mekim wok profet—em i stap singel na em i stap gut long wok bilong Jehova. Baibel i no stori olsem bihain em i marit na kamapim pikinini, olsem na ating em i bin i stap singel i go inap long em i dai. Tasol yumi save Jeremaia i bin i stap amamas, wankain olsem liklik hap lain gutpela Juda ol i ‘amamas long olgeta gutpela samting Jehova i givim long ol.’—Jeremaia 31:12.
11. Husat sampela gutpela wokboi bilong Jehova i no gat poroman marit, tasol ol i bin i stap amamas?
11 I gat planti narapela tu ol i bin amamas long mekim wok bilong Jehova maski ol i no gat poroman marit. Sampela ol i singel, na sampela i bin marit, tasol poroman i dai. Olsem profet meri Ana, na ating Dokas o Tabita; na aposel Pol; na nambawan gutpela piksa olsem em Krais Jisas yet.
Singel na Amamas Long Nau
12. Sampela wokboi bilong Jehova long nau, em ol i dediket long Jehova na ol i stap amamas, ol i bin mekim wanem olsem Jisas i tok? Ol i ting long wanem samting na ol i mekim olsem?
12 Long nau planti tausen Witnes Bilong Jehova i stap gut long wok bilong God na ol i no gat poroman marit. Sampela ol i bin ‘kisim tok’ bilong Jisas, em i tok sampela ol inap long i stap singel. Sampela ol i “ting long mekim wok bilong kingdom” na ol i no bin marit. (Matyu 19:11, 12) Ol i mekim gutpela wok long pasin bilong i stap fri em God i givim long ol—ol i givim bikpela hap taim moa na bikpela hap strong moa bilong ol long mekim wok bilong Kingdom. Planti ol i mekim wok painia o wok misineri o ol i mekim wok long Betel long wanpela brens-ofis o long namba wan ofis bilong Sosaiti Was Taua.
13. Husat ol i stap olsem gutpela piksa na i kamapim klia olsem Kristen inap i stap singel na i stap amamas?
13 Wanpela gutpela lapun sista em i bin raitim stori bilong em na em i putim het-tok olsem: “Mi Wanpela Painia i Stap Singel na Amamas.” Narapela sista singel i bin wok inap olsem 50 yia long Betel, em i tok: “Mi amamas long i stap na wok bilong mi. Mi no bel hevi liklik long en. Sapos mi inap tingim gen wanem samting mi laik mekim, bai mi pasim tingting long mekim wankain wok tasol.”
14, 15. (a) Man o meri i mas mekim wanem, olsem Pol i tok, na bai em inap i stap singel? (b) Bilong wanem Pol i tok, sapos man o meri i stap singel, dispela bai “helpim” em na em bai “i stap amamas tasol”?
14 Tingim dispela tok bilong em, “pasim tingting.” Pol i tok: “Sapos wanpela man i strong long bel bilong en, na i no gat wanpela samting i hariapim em, na em inap long bosim laik bilong em yet, na sapos em i pasim tingting pinis long em . . . bai i stap singel tasol, orait dispela pasin i gutpela.” (1 Korin 7:37, 38) Bilong wanem dispela pasin “i gutpela”? Pol i stori long as bilong dispela, olsem: “Mi no laik bai ol wari bilong dispela graun i pulim nabaut tingting bilong yupela. Man i no marit, em i . . . laik mekim pasin Bikpela i laikim. . . . Ol yangpela meri na ol arapela meri i no marit, ol i [gat bikpela tingting] long pasin bilong Bikpela. . . . Mi mekim dispela tok bilong helpim yupela . . . bai yupela i bihainim ol pasin i stret na mekim wok bilong Bikpela oltaim. Mi no laik bai wanpela samting i ken pulim nabaut tingting bilong yupela.”—1 Korin 7:32-35.
15 Olsem wanem? Sapos man o meri i “mekim wok bilong Bikpela oltaim,” na em i no larim wanpela samting i “pulim nabaut” tingting bilong em bambai em i ken “mekim pasin Bikpela i laikim,” dispela inap helpim em long i stap amamas? Pol i ting olsem. Em i stori long meri Kristen, man bilong em i dai pinis, na em i tok: “Sapos em i laik maritim wanpela man, orait em i ken maritim em. Tasol em i mas maritim man i bilip long Bikpela. Tasol mi yet mi ting olsem, sapos em i no marit gen, em bai i stap amamas tasol. Mi ting Spirit bilong God i stap long mi, na mi autim ol dispela tok.”—1 Korin 7:39, 40.
Gutpela Samting Bilong Pasin Bilong i Stap Singel
16. Ol Witnes i no marit, dispela i helpim ol olsem wanem?
16 Sapos em i laik bilong man o meri yet na em i no marit, o sapos i no gat rot na em i no marit, dispela inap helpim em long planti samting. Planti taim ol singel i gat bikpela hap taim moa bilong stadi long Baibel na tingim gut ol dispela tok bilong God ol i lainim. Sapos ol i mekim gutpela wok olsem, dispela bai helpim ol long tingim moa yet ol samting bilong spirit. Ol singel i no gat poroman bilong kamapim hevi bilong ol long em, olsem na planti ol i lain long kamapim hevi bilong ol long Jehova na wetim em i soim rot long ol long olgeta samting. (Buk Song 37:5) Dispela i helpim ol long pas moa yet wantaim Jehova.
17, 18. (a) Ol wokboi bilong Jehova i stap singel, i gat wanem ol rot i op long ol bilong mekim bikpela wok moa long wok bilong Jehova? (b) Sampela wokboi bilong Jehova i no marit ol i stori olsem wanem long amamas bilong ol?
17 Ol Kristen i no marit ol inap mekim bikpela wok moa long wok bilong Jehova bilong litimapim nem bilong em. Ol brata i singel o poroman marit bilong ol i dai pinis, ol tasol inap i go long Skul Bilong Lainim Wok Bilong Lukautim Kongrigesen. Ol sista singel tu i gat rot bilong mekim bikpela wok moa. Dispela lapun sista i raitim stori bilong em, em yumi stori pinis long em, em i bin orait long i go mekim wok bilong Jehova long wanpela kantri long Afrika. Em i stori long dispela na em i tok, taim em i go ‘em i winim pinis 50 krismas na skin bilong em i no strong tumas.’ Em i go i stap long dispela kantri, na taim gavman i tambuim wok bilong ol Witnes na rausim olgeta misineri, em i no i go. Em i stap yet long dispela kantri na mekim wok painia, maski em i winim pinis 80 krismas. Olsem wanem? Em i stap amamas? Long stori bilong em, em i tok: “Mi singel olsem na mi stap fri liklik na mi inap mekim wok long dispela bilong mekim bikpela wok moa long autim tok, na dispela i bin mekim mi i stap amamas tru. . . . Ol yia i kamap i go pinis na nau mi pas moa yet long Jehova. Mi meri na mi singel na mi stap long wanpela kantri bilong Afrika, tasol nau mi save, Jehova em i Man bilong lukautim mi.”
18 Yumi ken tingim tu tok bilong wanpela brata i bin wok inap planti yia long namba wan ofis bilong Sosaiti Was Taua. Em i no bin marit, na em i wet long kisim laip long heven, olsem na bihain tu em i no inap marit, tasol em i bin i stap amamas. Taim em i gat 79 krismas em i bin raitim tok olsem: “Long olgeta de mi save beten askim gutpela Papa bilong yumi i stap long heven long helpim mi na givim gutpela tingting long mi, bambai mi inap mekim ol samting bilong i stap strong long spirit na long skin, na bai mi inap mekim yet wok holi bilong em. Inap 49 yia pinis mi bin mekim wok bilong Jehova na insait long ol dispela planti yia mi bin i stap belgut na amamas, na Jehova i bin mekim gut long mi. Long marimari bilong Jehova, mi laik bai mi inap mekim yet wok bilong litimapim nem bilong em na givim biknem long em na helpim lain bilong em. . . . Mi amamas long Jehova na dispela i helpim mi long sanap strong long bilip, na wetim taim bilong ol birua bilong Jehova i no i stap moa, na bai strong na lait bilong em i pulap long olgeta hap bilong graun.”—Namba 14:21; Nehemia 8:10; The Watchtower, Novemba 15, 1968, pes 699-702.
Wanem Samting Inap Helpim Yumi Long i Stap Amamas Tru?
19. Wanem samting i mekim na bai yumi inap i stap amamas oltaim oltaim?
19 Yumi mas i stap pren bilong Jehova, na em i mas orait long yumi, na mekim gut long yumi—em ol samting bilong helpim yumi long i stap amamas tru inap oltaim oltaim. Taim ol wokboi bilong Jehova i gat dispela stretpela tingting long ol samting bilong helpim man long i stap amamas tru, sapos ol i marit bai ol i save, marit bilong ol i no nambawan bikpela samting long i stap bilong ol. Ol i save bihainim tok bilong Pol, em i tok: “Ol brata, mi tok olsem, taim i sotpela nau. Olsem na long dispela hap taim i stap yet, ol man i gat meri ol i mas i stap olsem ol i no gat meri.” (1 Korin 7:29) I no olsem man marit i no ken tingim meri bilong em. Nogat. Ol man marit i strongpela Kristen, ol i save tingim wok bilong Jehova pastaim, na gutpela meri bilong ol i save tingim God na laikim tru man bilong ol na helpim gut man bilong ol, ol tu i save tingim wok bilong Jehova i nambawan bikpela samting. Sampela ol i save wok wantaim man bilong ol long mekim wok painia samting.—Sindaun 31:10-12, 28; Matyu 6:33.
20. Planti Kristen i gat wanem tingting long ol gutpela wok samting ol i kisim long marit bilong ol?
20 Ol brata i marit na ol i mekim wok sekit o wok distrik, o ol i wok long Betel, o ol i elda long kongrigesen—o yumi ken tok, olgeta Kristen i marit na ol i tingim Kingdom pastaim—pasin bilong mekim wok long samting bilong graun, “dispela wok i no bikpela samting long laip bilong ol.” Wok bilong Jehova i bikpela samting long laip bilong ol, long wanem, ol i dediket long em, na ol i save tingim dispela samting na mekim ol gutpela wok bilong ol insait long marit. (1 Korin 7:31) Tasol ol i stap amamas. Olsem wanem ol inap i stap amamas? Long wanem, as tru bilong amamas bilong ol i no marit bilong ol, em wok bilong Jehova ol i mekim. Planti man marit na meri marit—na ol pikinini bilong ol tu—ol i amamas long dispela samting.
21, 22. (a) Yumi ken amamas tru long wanem samting, olsem Jeremaia 9:23, 24 i tok? (b) Sindaun 3:13-18 i kolim wanem ol samting inap helpim yumi long i stap amamas?
21 Profet Jeremaia i tok: “Bikpela i tok olsem, ‘Saveman i no ken amamas long save bilong en. Na strongpela man i no ken amamas long strong bilong en. Na maniman i no ken amamas long mani bilong en. Nogat. Man i laik amamas, em i mas amamas long wanpela samting tasol. Em i mas amamas long em i save long mi, Bikpela. Oltaim mi save laikim tumas olgeta manmeri bilong graun na mi save mekim gutpela na stretpela pasin long ol. Mi Bikpela, mi save amamas long mekim dispela kain pasin.’ ”—Jeremaia 9:23, 24.
22 Maski yumi singel o yumi marit, as tru bilong amamas bilong yumi em olsem: Yumi mas amamas, long wanem, yumi save long Jehova na yumi bilip olsem em i mekim gut long yumi, long wanem, yumi mekim wok bilong em. Na yumi ken amamas, long wanem, yumi kisim pinis gutpela tingting na yumi save long ol lo tru bilong stretpela pasin, em ol pasin Jehova i laikim. King Solomon i bin maritim planti meri, tasol em i no ting marit tasol em i rot bilong i stap amamas. Nogat. Em i tok: “Man i kisim gutpela tingting na save, em i ken amamas tru, long wanem, gutpela na stretpela tingting i winim tru silva na gol na ol gutpela ston i dia tumas. Na tu em i winim olgeta arapela samting yu laikim tumas. Gutpela tingting bai i helpim yu na yu inap i stap longpela taim long graun. Na em bai i givim biknem na planti samting long yu. Gutpela tingting bai i mekim yu belgut oltaim na mekim sindaun bilong yu i kamap gutpela. Gutpela tingting i olsem diwai bilong givim laip. Olsem na ol man i holim pas gutpela tingting, ol i gat laip i gutpela tru na ol i amamas.”—Sindaun 3:13-18.
23, 24. Olsem wanem yumi ken save, long nupela taim bihain bai olgeta gutpela wokboi bilong Jehova i stap amamas?
23 Ol marit long lain bilong yumi i mas amamas oltaim oltaim long mekim wok bilong God. Na ol gutpela brata sista bilong yumi i stap singel, long wanem, em laik bilong ol o ol i no gat rot bilong kisim poroman, ol i mas amamas long mekim wok bilong Jehova long nau na long olgeta taim bihain. (Luk 18:29, 30; 2 Pita 3:11-13) Long nupela taim God bai kamapim, bai “ol buk” i op. (Kamapim Tok Hait 20:12) Ol dispela buk bai i gat ol nupela lo em ol bai helpim ol man i bihainim tok long i stap amamas.
24 God bilong yumi em i “as bilong pasin tru bilong amamas,” olsem na yumi ken bilip olsem em i redim pinis ol gutpela samting tru bilong yumi bilong bihain, na bai yumi inap i stap amamas olgeta. (1 Timoti 1:11) God bai wok long “givim kaikai samting long olgeta inap long ol i stap gut.” (Buk Song 145:16) Tru tumas, long nau na long olgeta taim bihain, man i mekim wok bilong Jehova em inap i stap amamas tru.
Bai Yu Bekim Wanem Tok?
◻ Wanem as bilong amamas bilong ol wokboi bilong Jehova i dediket long em?
◻ Long taim bilong Baibel, husat sampela ol i bin mekim wok bilong Jehova na ol i no marit, tasol ol i stap amamas?
◻ Bilong wanem Pol i tok i gutpela sapos man o meri i stap singel? Sampela Kristen i bin mekim wanem na maski ol i stap singel, ol i stap amamas?
◻ Wanem samting i mekim na bai yumi inap i stap amamas oltaim oltaim?
◻ I gat wanem as na yumi ken bilip olsem long nupela taim olgeta manmeri i stap gut long God bai ol i stap amamas?
[Piksa long pes 16]
Planti sista singel i mekim wok bilong Jehova oltaim, olsem mekim wok painia, na ol i stap amamas
[Piksa long pes 18]
Mekim wok bilong Jehova em nambawan rot bilong i stap amamas