Skul Gileat—50 Yia Pinis na i Wok Strong Yet!
“LONG planti hap ol i no bin autim tumas tok bilong Kingdom.” Em N. H. Knorr i tok olsem long namba wan klas bilong skul Gileat long Februeri 1, 1943, em namba wan de bilong dispela skul. Na em i tok: “I gat planti tausen tausen manmeri moa yumi mas autim tok long ol, tasol i mas i gat planti wokman moa bilong mekim dispela wok. Long sori bilong Bikpela bai i gat sampela wokman moa i kamap.”
Na tru tumas, ol wokman i kamap—inap planti milion moa! Long 1943 i gat 129,070 manmeri i autim tok long 54 kantri. Tasol long 1992 dispela lain i go bikpela tru inap 4,472,787 na ol i autim tok long 229 kantri! Skul Gileat i bin helpim tru dispela wok bilong autim tok na em i go bikpela olsem. Dispela skul i stap 50 yia pinis na em i wok yet long lainim ol misineri long mekim wok long olgeta hap i sot long ol man bilong autim tok.
Long Mas 7, 1993 wanpela bung i kamap long Haus Kibung Bilong Jesi Siti, long Nu Jesi, bilong makim namba 94 klas bilong Skul Gileat i winim skul. Planti manmeri ol i kam long dispela bung, em Sosaiti i bin singautim ol, na lain bilong Betel long Bruklin ol tu i kam. Ol inap olsem 4,798 olgeta. Em i wanpela bikpela taim tru bilong ol, na em i gutpela taim tu bilong tingim ol samting i bin kamap insait long dispela 50 yia bilong Skul Gileat. Yu laik save long sampela tok samting i kamap long dispela bung?
Ol i mekim singsing bilong kirapim program na bihain long en George D. Gangas bilong Lain Bilong Bosim Ol Witnes em i mekim beten. Bihain siaman bilong bung, em Carey W. Barber, em i mekim liklik tok bilong kirapim program, na nau ol sumatin wantaim ol narapela ol i putim yau long ol tok i kamap.
Robert W. Wallen i mekim namba wan tok, “Yu No Stap Wanpis.” Em i tok, ‘Bihain bai sampela samting i kamap na bai yu pilim olsem yu stap wanpis tru, na yu stap longwe tru long famili na ol pren bilong yu.’ Orait, olsem wanem long dispela tok, “Yu no stap wanpis”? Em i tok: ‘Bai yupela olgeta wan wan inap toktok wantaim Jehova, na wantu dispela tok bai kamap long em.’ Em i tokim ol sumatin, beten em i bikpela samting tru na ol i mas amamas long ol inap mekim, na ol i mas beten long olgeta de. Olsem bai ol inap mekim wankain tok olsem Jisas, em i tok, ‘Mi no stap wanpis tru.’ (Jon 16:32) Dispela tok i strongim tru bel bilong ol sumatin!
Bihain Lyman A. Swingle bilong Lain Bilong Bosim Ol Witnes i mekim wanpela tok, “Holimpas Gutpela Samting Yu Wetim i Stap.” Em i tok, ol i mas i gat tupela pasin—pasin bilong sanap strong, na bilip na wetim gutpela samting bilong bihain. Em i tok, ‘Ol Kristen i mas sanap strong, long wanem, ol man bai tok bilas long ol, na birua long ol, na kalabusim ol, na ol inap kilim ol i dai tu. Tasol Jehova inap givim bikpela strong tru long ol Witnes i stap gut long em, winim strong bilong ol man, na bai ol i ken sanap strong. Dispela save inap strongim bel bilong ol, na yupela ol sumatin tu.’ Na em i tok, ‘pasin bilong bilip na wetim God i kisim bek yumi, em i save lukautim tingting bilong yumi na bai yumi inap long sanap strong na holimpas bilip, olsem strongpela hat bilong soldia i save lukautim em na em i no kisim bagarap.’—1 Tesalonaika 5:8.
Orait, nau Ralph E. Walls i toktok long ‘Olsem Wanem Yumi Inap Ranawe i Go Long Wanpela “Bikpela Haus” na i Stap Gutpela?’ Wanem dispela ‘bikpela haus’? (Song 18:19) Em i tok, ‘I olsem God i kisim bek yumi na tingting wantaim bel i stap isi.’ Tasol God i mas kisim bek yumi long wanem samting? Em i tok, ‘Long yu yet—long ol pasin kranki bilong yu yet, na long ol samting ol man bilong graun i mekim long yu, em Satan i kirapim ol long mekim.’ (Song 118:5) Olsem wanem yumi inap ranawe i go hait long wanpela bikpela haus? ‘Long olgeta samting yumi mekim, yumi mas tingim tok bilong Jehova na beten long Jehova na kamapim ol hevi bilong yumi long em.’
Bihain long en, Don A. Adams i mekim wanpela tok, “Wanem Samting i Wetim Yu?” Yes, wanem samting i wetim ol dispela nupela misineri? Em i tok, pastaim ol i mas lain long mekim wok na sindaun long nupela hap, tasol ol bai kisim planti blesing tu. Em i stori long tupela misineri, em tupela marit, na taim tupela i lain pinis long nupela ples wok, tupela i raitim pas na i tok: “Tingim wanpela de yu bin kisim bikpela amamas tru long wok autim tok, winim olgeta narapela de. Orait, olgeta de bilong mipela i wankain olsem dispela. Mipela save karim planti buk na nius samting, tasol ol i pinis hariap, na planti man i askim mipela long stadi wantaim ol.” Nau brata i givim sampela tok long ol famili na pren bilong ol sumatin. Em i tok: ‘Yupela i no ken tingting planti long ol. Yupela ken raitim pas na strongim bel bilong ol.’—Sindaun 25:25.
Nau ol tisa i mekim sampela tok. Tok bilong Jack D. Redford, em ‘Yu No Ken Ting Ol Man i Mas Helpim Yu.’ Wanem samting bai helpim misineri long i stap wanbel wantaim ol narapela man? Em i tok, ‘No ken tingim ol pasin kranki bilong ol. No ken putim bikpela mak tumas ol i mas winim. No ken ting ol i mas mekim gut long yu oltaim. Lusim tingting long ol liklik pasin kranki bilong ol na dispela bai helpim yu long i stap wanbel wantaim ol narapela. Sapos yu mekim olsem, dispela i makim olsem yu kamap strong long spirit.’ (Sindaun 17:9) Sapos ol sumatin i bihainim dispela gutpela tok, bai ol inap mekim gutpela wok misineri long kantri ol bai go long en!
Long 2 Korin 4:7 Baibel i tok, “Dispela gutpela samting tru i stap long mipela . . . olsem . . . i stap insait long ol sospen graun.” Kuskus bilong Skul Gileat, em Ulysses V. Glass, i stori long dispela insait long tok bilong em, “Bilip Long Ol Brata Bilong Yu Ol i Bin Winim Ol Traim na Stap Gut Long Jehova.” Wanem ol dispela “sospen graun”? Em i tok, “Dispela i makim yumi ol man bilong graun i gat sin.” Wanem “dispela gutpela samting”? “Em wok Kristen bilong yumi long autim tok.” (2 Korin 4:1) Yumi mas mekim wanem long dispela gutpela samting yumi holim? “Yumi no ken holim nating i stap. Olsem na yupela ol nupela misineri, wanem wanem hap yupela i go long en, yupela mas tilim dispela gutpela samting long ol man, na lainim planti man moa long pasin bilong tilim long man.”
Nau Albert D. Schroeder i kirap mekim tok bilong em. Taim Skul Gileat i kamap nupela, em i stap kuskus bilong en. Em i toktok long “Fifti Yia Bilong God i Skulim Ol Man.” Em i tok, “Jehova i save long pasin bilong skulim gut ol man, na em i bin mekim olsem.” Brata Schroeder i toktok long tupela skul i bin kirap 50 yia bipo—em Skul Bilong Wok Autim Tok, na Skul Gileat. Em i tok, wanpela bikpela samting bilong helpim ol long kisim stretpela save, em Baibel New World Translation. Em i tokim ol sumatin: “Taim yu go long nupela ples wok, yu ken save tru, Sosaiti bai wok long givim planti stretpela save long yu long ol samting Jehova i laik mekim.”
Milton G. Henschel (em presiden bilong Watch Tower Bible and Tract Society of Pennsylvania) i toktok long “Yumi No Man Bilong Winim Pait Tasol.” Em i kisim dispela tok long yia-teks bilong 1943: “Krais i bin givim bel . . . long yumi, na . . . oltaim em i save mekim yumi i win tru.” (Rom 8:37) Dispela yia-teks i stret tru long dispela taim bipo, long wanem, long taim bilong Namba 2 Pait ol man i bin mekim nogut tru long ol brata bilong yumi long planti kantri. Brata Henschel i kaunim sampela hap tok bilong Wastaua tok Inglis i bin kamapim dispela yia-teks na em i tok: ‘Dispela Wastaua [Janueri 15, 1943], namba wan klas i bin stadi long en long mun Februeri, na dispela i redim ol na ol inap save long samting bai painim ol bihain.’ Em i tok, planti sumatin i bin winim dispela skul insait long 50 yia i go pinis ol i kamapim klia olsem ol i man bilong winim pait. Orait, olsem wanem long dispela namba 94 klas? Em i tokim ol: “Stap klostu long Jehova, stap klostu long sori bilong em, olsem na bai yupela i win tru.”
Taim program bilong moningtaim i pinis, siaman i kaunim sampela tok ol brata bilong planti hap ol i salim i kam bilong tok gude na amamas long ol sumatin i winim skul. Nau taim i kamap bilong 48 marit i mas kisim pepa o setifiket bilong skul. Nau ol dispela sumatin i winim pinis skul! Ol i no sumatin moa! Ol i kam long 5-pela kantri, tasol ol bai go long 17 kantri—olsem Hong Kong, Taiwan, Mosambik, na sampela hap bilong Isten Yurop.
Long belo ol i malolo, na bilong kirapim program bilong apinun ol i mekim sotpela Stadi Wastaua, em Robert L. Butler i lukautim. Bihain ol sumatin i mekim sampela soim long sampela gutpela samting i painim ol long taim ol i bin skul na ol i autim tok. Long dispela program ol i kamapim klia bel bilong ol, ol i laikim tru wok bilong autim tok, na ating dispela yet i mekim na ol i kam long Skul Gileat.
Orait, nau ol manmeri i tingting—bai i gat wanpela hap program bilong makim namba 50 yia bilong Skul Gileat o olsem wanem? I gat.—Lukim blok, “Stori Long 50 Yia Bilong Skul Gileat.”
Fifti yia bipo, Brata Knorr i kamapim long ples klia olsem em i man bilong bilip. Em i bilip tru olsem Skul Gileat bai mekim gutpela wok, na em i kamapim dispela tingting long namba wan klas, em i tokim ol: ‘Mipela bilip tru olsem bikpela tok [bilong Kingdom] bai kirap long dispela skul na i go long olgeta hap, olsem bikpela “hip ston,” na em bai stap olsem mak bilong litimapim nem bilong God inap oltaim oltaim. Mi save yupela ol wokman bilong God bai bilip strong long God Antap Tru, long wanem, yupela i save, em bai stiaim yupela na soim rot long yupela taim hevi samting i painim yupela, na bai yupela i save tu olsem em i God bilong mekim gut long man.’a
Nau 50 yia i go pinis na Skul Gileat i wok strong yet! I gat 6,500 misineri bilong Skul Gileat i bin i go long ol narapela narapela hap, na nau ol sumatin bilong namba 94 klas i pinisim skul bilong ol. Mipela laik bai ol tu i ken bilip strong long God Antap Tru taim ol i wok long bungim dispela “hip ston” i go bikpela na em bai stap olsem mak bilong litimapim nem bilong God Jehova.
[Ol Futnot]
a Long tok Hibru insait bilong nem “Gileat” i olsem “Hip Ston.”—Stat 31:47, 48.
[Blok long pes 25]
Ol Samting Bilong Ol Sumatin
Hamas Sumatin: 48
Hamas Kantri ol i kam long en: 5
Hamas kantri ol bai go long en: 17
Krismas bilong ol, averes: 32
Hamas yia long tok i tru: 15.3
Hamas yia long wok painia, averes: 9.6
[Blok long pes 26, 27]
STORI LONG 50 YIA BILONG SKUL GILEAT
Gutpela rot bilong tingim gen ol wok bilong Skul Gileat em bilong harim stori bilong ol sumatin bilong pastaim na ol tisa na ol narapela i gat wok long kirapim dispela skul. Ol manmeri i amamas tru long harim dispela hap program, “Stori Long 50 Yia Bilong Skul Gileat,” em Theodore Jaracz i lukautim.
Wanem ol samting i kamap na ol i kamapim dispela skul? Brata Schroeder i stori long dispela na em i tok, em wantaim tupela tisa moa bilong skul ol i gat 4-pela mun tasol bilong redim ol samting bilong skul. Tasol em i tok, “Long Mande, Februeri 1, 1943, mipela i redi long dediketim dispela skul.”
Orait, olsem wanem long namba wan lain nupela misineri em Sosaiti i salim ol i go? Brata Henschel i stori long en na i tok: “Sosaiti i bungim olgeta kago bilong ol long ol bikpela bokis. Orait, taim kago bilong ol i kamap pinis long kantri ol misineri i go long en, ol i opim na kamautim olgeta samting bilong ol, na ol i kisim ol dispela bikpela bokis na wokim ol tebol bet samting long en.” Bihain Sosaiti i kamapim sampela haus misineri na putim ol samting long en bilong helpim ol misineri.
Orait, nau sampela misineri bilong ol klas bilong bipo em ol i wok long Betel long Bruklin ol i stori long taim ol i bin mekim wok misineri, na ol i stori long tingting bilong ol long dispela wok. Ol manmeri i laikim tru stori bilong ol.
“Taim mi kisim pas bilong singautim mi i kam long namba wan klas, mi kisim save olsem mama bilong mi i gat sik kensa. Tasol em i bin kirap mekim wok painia taim em i gat 16 krismas, olsem na em i strong long mi mas i go long dispela skul. Mi amamas na bel hevi wantaim, tasol mi bilip long Jehova na mi go long Saut Lansing. Mi amamas tru long i stap long dispela skul na lain long ol samting. Taim mi pinisim skul na mi mekim wok misineri, mama i dai na pinisim wok bilong em long graun.”—Stori bilong Charlotte Schroeder, em i bin wok misineri long Meksiko na El Salvado.
“Mi tingting olsem: Jehova i bin lukautim mi long ples mi stap long en, olsem na maski mi go we, mi stap long graun bilong em, olsem na em bai lukautim mi. Olsem na taim ol i singautim mi long i kam long namba wan klas, mi amamas na mi orait long en.”—Stori bilong Julia Wildman, em i bin wok misineri long Meksiko na El Salvado.
“Dispela wok i gutpela wok tru! Mipela inap autim tok long olgeta haus! Long namba wan mun mi tilim 107 buk na mi mekim 19 Baibel-stadi. Tru, i gat sampela samting long sindaun bilong mipela em mipela i mas lain long en, olsem ples i hat, na i gat planti binatang nabaut. Tasol mipela i amamas tru long mekim wok long dispela hap. Bai mi tingim inap long olgeta taim bihain.”—Stori bilong Mary Adams, bilong namba 2 klas, em i bin wok misineri long Kuba.
“Alaska em i ples kol, na mipela i mas lain long sindaun long kain ples olsem. Long hap bilong not em i kol nogut tru. Bilong kamap long ples bilong ol lain Indian na sampela liklik ples i stap insait tru long hap bilong saut-is, mipela i mas kisim bot o balus.”—Stori bilong John Errichetti, bilong namba 3 klas.
“Taim ol i singautim mi bilong i go long Skul Gileat, i olsem Jehova i singautim mi long rot bilong oganaisesen bilong em long strongim mipela long spirit na soim mipela long wanpela gutpela wok tru mipela inap mekim.”—Stori bilong Mildred Barr, bilong namba 11 klas, em i bin wok misineri long Aialan.
Sampela gutpela stori moa i kamap—Lucille Henschel (namba 14 klas, em i bin wok misineri long Veneswela), Margareta Klein (namba 20 klas, em i bin wok misineri long Bolivia), Lucille Coultrup (namba 24 klas, em i bin wok misineri long Peru), Lorraine Wallen (namba 27 klas, em i bin wok misineri long Brasil), William na Sandra Malenfant (namba 34 klas, tupela i bin wok misineri long Moroko), Gerrit Lösch (bilong namba 41 klas, em i bin wok misineri long Ostria), David Splane (namba 42 klas, em i bin wok misineri long Senegal).
Olsem wanem long ol brata i mekim wok tisa long dispela skul? Sampela bilong dispela lain tu i kamapim stori bilong ol—Russell Kurzen, Karl Adams, Harold Jackson, Fred Rusk, Harry Peloyan, Jack Redford, Ulysses Glass. Ol i tok, ol i pilim tru dispela gutpela wok tisa ol i bin kisim.
Lloyd Barry em i bin mekim wok misineri long Japan na em i stori long gutpela wok i kamap long rot bilong ol misineri i bin lain long Skul Gileat. Long 1949, i gat 15 misineri i bin i go long Japan, na long dispela taim i gat olsem 10-pela pablisa tasol long Japan. Tasol 44 yia bihain i gat 175,000 manmeri ol i autim tok bilong Kingdom long dispela kantri! Nau Robert Wallen i stori long wok bilong sampela misineri long helpim ol man long kam insait long tok i tru. Wanpela sista misineri em i bin wok long Panama inap 45 yia samting, na em i bin helpim 125 manmeri long kam insait long tok i tru na ol i dediket na kisim baptais.
Planti manmeri i sindaun harim ol tok, bipo ol i sumatin bilong skul Gileat na ol i mekim wok misineri. Orait, nau ol i singautim dispela lain i kam antap long pletfom. Bikpela lain tru i wok long kam antap—i gat 89 i wok long Betel na i gat sampela ol i bin i kam bilong lukim dispela bung. Ol i wokabaut i kam sanap long pletfom. Bihain ol brata i bin mekim wok tisa long skul ol i kam sanap wantaim ol, na nau dispela ol sumatin bilong namba 94 klas ol i kam antap na sanap wantaim ol—ol inap olsem 160 olgeta!
Nau Brata Jaracz i mekim wanpela askim: “Yupela ting Skul Gileat i bin mekim gutpela wok bilong lainim ol misineri long autim tok long ol narapela kantri?” Em yet i bekim na i tok, “Yumi tingim ol samting i kamap insait long 50 yia i go pinis na yumi ken tok, ‘Yes, em i bin mekim gutpela wok tru!’ ”
[Piksa long pes 25]
Namba 94 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba 1 lain i sanap paslain, na namba 6 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) De La Garza, C.; Borg, E.; Arriaga, E.; Chooh, E.; Purves, D.; Fosberry, A.; Delgado, A.; Drescher, L. (2) Scott, V.; Fridlund, L.; Kettula, S.; Copeland, D.; Arriaga, J.; Thidé, J.; Olsson, E.; Widegren, S. (3) Delgado, F.; Keegan, S.; Leinonen, A.; Finnigan, E.; Fosberry, F.; Halbrook, J.; Berglund, A.; Jones, P. (4) Watson, B.; Frias, C.; Chooh, B.; Halbrook, J.; Purves, J.; Finnigan, S.; Jones, A.; Cuccia, M. (5) Scott, G.; Copeland, D.; Drescher, B.; De La Garza, R.; Leinonen, I.; Keegan, D.; Watson, T.; Kettula, M. (6) Widegren, J.; Borg, S.; Cuccia, L.; Berglund, A.; Olsson, B.; Frias, J.; Fridlund, T.; Thidé, P.