Askim

Baibel i tokim yumi: “Yupela i no ken pas wantaim ol [man i no bilip] na wok bung wantaim ol.” Orait, i stret sapos Kristen i go insait long wanpela bisnis wantaim man i no bilip, o nogat?

Yumi lukim dispela tok long 2 Korin 6:​14-16: “Yupela i no ken pas wantaim ol [man i no bilip] na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak? Ating Krais i save stap wanbel wantaim Satan, a? Man i bilip long Krais na man i no bilip, tupela i ken holim wanpela kain tingting, a?”

Tru, yumi no ken ting aposel Pol i mekim dispela tok bilong kamapim sampela tambu, olsem Kristen i no ken go insait long wanpela bisnis wantaim man i no bilip. Tasol dispela tok bilong Pol i sutim stret dispela samting na sampela samting moa yumi mekim.

Pol i bin givim dispela tok long ol brata Kristen i stap long Korin. Kain kain pasin nogut i pulap tru long dispela biktaun, olsem na ol Kristen i sindaun long dispela ples ol i mas was gut, nogut pasin pamuk samting na ol narapela kain pasin i pundaunim ol, na nogut ol i bagarap tu long ol samting bilong spirit. Sapos ol i no was gut, bai ol i no strong moa long i stap narapela kain long ol man bilong graun, olsem “lain manmeri i holi, em ol lain manmeri tru bilong God . . . God i bin makim bilong em yet.”​—⁠1 Pita 2:⁠9.

Paslain long taim Pol i bin raitim dispela tok long 2 Korin 6:​14-16, em i wok long stretim wanpela bikpela hevi i bin kamap namel long ol brata Kristen long Korin. Ol i larim wanpela man i stap namel long ol, em i bin mekim pasin nogut tru, olsem na Pol i tokim ol long rausim dispela sinman, long wanem, em i no tanim bel. (2 Korin 5:⁠1) Dispela bikpela rong i kamapim klia olsem sapos Kristen i no was gut na em i bung wantaim ol man bilong graun ol i mekim pasin nogut, dispela inap mekim na pasin bilong Kristen tu bai bagarap.

Ol Kristen long Korin i no ken bung wantaim dispela rauspela man, tasol yu ting ol i mas klia olgeta long ol man i no bilip? Ol i mas abrusim ol olgeta na no ken toktok wantaim man i no Kristen na bilong ol yet ol i mas i stap, olsem sampela Juda i bin i go sindaun long Kumran klostu long raunwara Detsi? Pol i bekim dispela askim. Em i tok: “Long narapela pas mi bin raitim long yupela, mi bin tok olsem, ‘Yupela i no ken stap wantaim ol man bilong mekim pasin pamuk.’ Mi no bin tok long yupela i mas lusim tru olgeta man bilong dispela graun i save mekim pasin pamuk . . . Sapos yupela i laik lusim tru ol dispela kain man, orait yupela i mas lusim dispela graun olgeta.”​—⁠1 Korin 5:​9, 10.

Dispela tok i klia tru. Pol i save, ol Kristen i stap long graun na ol i mas i stap na mekim wok namel long ol man i no bilip, em ol i mekim ol pasin i no stret, na ol lo bilong ol i narapela kain long lo ol Kristen i bihainim. Olsem na ol Kristen i mas was gut, nogut ol i bihainim pasin bilong ol dispela lain.

Orait, nau yumi ken skelim namba tu pas Pol i bin raitim long ol Korin. Em i tok, ol Kristen em God i bin makim ol long spirit holi ol inap tru long mekim wok bilong God, na ol i olsem maus bilong Krais. Na Pol i tok, ol i mas was gut, nogut ol i mekim wanpela samting i pundaunim narapela man, na nau ol man i toknogutim wok bilong ol. (2 Korin 4:​1–6:⁠3) Na Pol i tokim ol dispela Kristen, ol i mas givim bel long ol brata. (2 Korin 6:13) Bihain long dispela tok, Pol i tok: “Yupela i no ken pas wantaim ol [man i no bilip] na wok bung wantaim ol.”

Ol tok i stap klostu long dispela i kamapim klia olsem Pol i no makim wanpela samting stret, olsem wok bisnis o narapela wok na em i putim lo bilong dispela na ol Kristen i mas bihainim. Nogat. Em i laikim tumas ol brata na em i givim dispela tok long ol bilong helpim ol long skelim gut ol samting ol i laik mekim.

Na sapos Kristen i laik marit, dispela tok bilong Pol inap helpim em? Em inap tru. Long namba wan pas, Pol i tokim ol Korin i laik marit, ol “i mas maritim man [o meri] i bilip long Bikpela.” (1 Korin 7:39) Bilong strongim tok bilong em, em i mekim dispela tok yumi lukim long 2 Korin 6:​14-18. Sapos Kristen i laik maritim wanpela i no mekim wok bilong Jehova na i no wanpela disaipel bilong Krais, dispela Kristen i tingting long pas wantaim man o meri i no bilip. (Lukim Wok Pris 19:19; Lo 22:10.) Dispela inap mekim na planti hevi bai kamap insait long marit, na ol hevi bilong lotu tu, olsem: Ating nau o long bihain bai dispela man o meri i no bilip em bai kirap lotuim wanpela god giaman. Pol i tok: “Ating Krais i save stap wanbel wantaim Satan, a?”

Orait, olsem wanem long narapela samting​—⁠olsem go insait long wanpela bisnis wantaim man i no bilip? Ating Kristen i ting em i mas painim mani bilong lukautim meri pikinini, na bilong mekim olsem em i mas go insait long bisnis wantaim wanpela man i no Kristen. (1 Timoti 5:⁠8) Tingim sampela samting inap kamap:

Ating Kristen i laik kirapim bisnis long baim olkain samting i go long ol man. Tasol bilong mekim olsem em i mas wok bung wantaim wanpela man i gat mani bilong baim ol dispela samting. Narapela Kristen i laik kisim wanpela fam (o lukautim sampela animal samting olsem wok bisnis), tasol em i no gat graun. Wanpela man i gat graun na em i orait long Kristen i baim long yia samting sapos em i ken kisim hap winmani bilong bisnis. O ating Kristen i laik kirapim bisnis long wok plama, tasol gavman i no orait long givim laisens long em. Tasol wanpela wanblut i no bilip, em i gat laisens, olsem na tupela i wok bung long dispela bisnis.​—⁠Mak 12:⁠17.

Ol dispela samting inap kamap, na i gat sampela samting moa inap kamap olsem. Tasol mipela i no tok, em i gutpela o em i nogut. Mipela i kamapim na bai yu ken save, bilong wanem yumi no ken sakim dispela tok bilong Pol long 2 Korin 6:​14-18.

Sapos Kristen i go insait long bisnis wantaim wanpela man i no bilip, maski em i wanblut o nogat, sampela hevi na traim inap painim em. Ating man i no bilip em bai ting, em inap kisim bikpela winmani sapos em i no raitim long buk olgeta mani ol i kisim long bisnis, o em i no raitim hamas wokman bilong ol i stap na ol i kisim hamas pe, maski dispela pasin i kalapim lo bilong gavman. O taim ol i oda long sampela samting na wanpela man i kisim i kam, wanbisnis i orait long givim hait hap pe long dispela man, em bilong ol samting i no stap long pepa bilong makim pe bilong en. Orait, olsem wanem long Kristen? Em bai insait long dispela pasin giaman o sampela pasin moa i kain olsem? Na taim tupela i mas sainim nem long pepa bilong takis o narapela pepa ol i mas kamapim ol samting bilong dispela bisnis long en, Kristen bai mekim wanem?​—⁠Kisim Bek 23:1; Rom 13:​1, 7.

O ating wanbisnis i laik kisim ol samting bilong ol man i baim long ol bikpela de bilong ol, na salim kat long ol man long nem bilong dispela kampani, na hangamapim ol bilas bilong makim dispela bikpela de. Pol i askim olsem: “Olsem wanem, bai yumi bungim haus bilong God wantaim haus lotu bilong ol giaman god? Yupela i save, yumi yet yumi stap haus bilong God bilong i stap oltaim.” Na nau Pol i kamapim tok bilong Jehova olsem: “ ‘Yupela i mas lusim ol . . . nogut yupela i pas long ol samting i no klin long ai bilong God. Na bai mi yet mi kisim yupela.’ ” (2 Korin 6:​16, 17) Olsem na planti Kristen i save kisim wanpela kain wok mani i no gat planti hevi o traim long en.​—⁠Hibru 13:​5, 6, 18.

Kongrigesen i no gat wok long skelim olgeta samting ol Kristen i mekim, maski ol i wokman tasol o ol i gat wanpela bisnis. Tru, sapos kongrigesen i save Kristen i insait long wanpela rong, olsem em i laik helpim ol samting bilong lotu giaman, o em i bin mekim pasin giaman o paulim mani long wok bilong em, kongrigesen i mas kirap na mekim ol samting bilong holim strong lo bilong Jehova.

Olsem na dispela tok God i bin stiaim Pol long raitim, olsem “Yupela i no ken pas wantaim ol [man i no bilip],” em inap helpim ol Kristen long abrusim hevi, na tu, i no gat wok long ol elda i mas mekim kot long ol. Ol Kristen i gat gutpela tingting ol bai tingim gut dispela tok na i no ken insait kwik long wanpela wok inap pulim ol long kalapim lo bilong Baibel. Sapos Kristen i ting em i mas wok bisnis wantaim man i no bilip, ol narapela Kristen i no ken kirap kwik na skelim em, long wanem, em yet i mas karim hevi bilong dispela samting em i mekim. Tru, Pol i no putim lo stret i tok Kristen i no ken wok bisnis wantaim man i no bilip, tasol yumi no ken sakim tok bilong em, long wanem, em tok bilong God, na God i kirapim Pol long raitim long Baibel bilong helpim yumi. Olsem na sapos yumi gat gutpela tingting bai yumi harim gut dispela tok.