Maski Yu No Gat Poroman, No Ken Bel Hevi Tumas

SAPOS lapun o yangpela i pilim olsem em i stap wanpis, no gat poroman, dispela inap mekim em i bel hevi. Wanpela meri (Judith Viorst) i raitim tok olsem: “Man i pilim olsem em i no gat poroman, bel bilong em i save hevi tru. . . . Em i pilim olsem em i stap nating na i no gat wanpela gutpela samting inap kamap. Em i stap olsem pikinini i no gat mama.”​—⁠Nius Redbook, Septemba 1991.

Kain kain samting inap mekim na bai yu pilim olsem yu no gat poroman, olsem yu go sindaun long narapela hap na stap longwe long ol olpela pren, o yu katim marit, o wanpela long famili bilong yu i dai, o yu no inap toktok wantaim narapela. Maski man i stap namel long planti man, em bai pilim olsem em i stap wanpis.

Yu Ken Mekim Wanem?

Sapos yu bel hevi olsem, yu ting i no gat rot bilong stretim? O i gat sampela samting yu inap mekim, na bai dispela i no ken kamap olsem wanpela bikpela sik i laik bagarapim yu na yu laik bai yu dai tasol? I gat sampela samting yu ken mekim. Planti gutpela tok i stap bilong helpim yu, olsem long Baibel. Ol dispela tok inap strongim yu long winim dispela hevi.​—⁠Matyu 11:​28, 29.

Gutpela sapos yu kaunim stori bilong Rut, em wanpela yangpela meri i stap long Midel-Is inap 3,000 yia bipo. I gat as tru na em inap pilim olsem em i no gat poroman. Man bilong em i dai, na bihain em i go wantaim tambu mama bilong em long ples em i no save long en, em kantri Israel. (Rut 2:11) Em i lusim famili bilong em na ol olpela pren na em i stap long narapela kantri, tasol i no gat liklik tok long Baibel i makim olsem em i bel hevi na pilim olsem em i no gat poroman. Stori bilong em i stap long Buk Rut long Baibel na yu ken kaunim.

Olsem Rut, yu mas ting olsem gutpela samting inap kamap. Tingting bilong yu long ol samting i kamap, dispela inap mekim na bai yu bel hevi na pilim olsem yu no gat poroman. Tingim Ann. Em i lukautim papa inap 4-pela yia taim papa i gat bikpela sik. Taim papa i dai, Ann i pilim nogut tru. Em i tok: “Mi pilim olsem mi stap nating​—⁠no gat wanpela wok mi inap mekim, no gat wanpela man mi inap helpim. Tasol bihain mi stretim tingting​—⁠mi save sindaun bilong mi i senis na mi mas kirap mekim gutpela wok long nupela sindaun bilong mi bambai mi no ken bel hevi.” Sampela samting i kamap, em yu no inap senisim, tasol yu inap senisim tingting bilong yu.

Pasin bilong wok strong long mekim gutpela wok em i no inap pinisim bel hevi bilong yu olgeta, tasol em inap helpim yu. Irene i save long dispela. Em i marit inap 6-pela mun tasol na man bilong em i dai. Em i tok: “Mi save, taim mi no gat wok mi save bel hevi na pilim olsem mi no gat poroman, olsem na mi kirap mekim wok bilong helpim ol narapela i gat hevi.” Sapos yu helpim ol narapela, bai yu yet yu stap amamas. Sapos Kristen i bel hevi long em i no gat poroman, em i ken wok strong long wok bilong Bikpela na bai em i helpim tru ol narapela.​—⁠Aposel 20:35; 1 Korin 15:58.

Larim Ol Gutpela Pren i Helpim Yu

Wanpela nius i tok, ol pikinini i no gat poroman ol i pilim olsem “ol i no gat ol pren” na dispela i bagarapim bel bilong ol. (The New York Times Magazine, Epril 28, 1991) Dispela samting i bagarapim bel bilong planti man, ol lapun wantaim yangpela. Tasol insait long kongrigesen Kristen yu inap painim ol gutpela pren, em ol i tingim yu tru. Olsem na yu mas wok strong long kamap pren bilong sampela moa insait long kongrigesen, na larim ol i mekim ol samting ol inap mekim bilong helpim yu. Ol pren i sambai long helpim yu long taim bilong hevi.​—⁠Sindaun 17:17; 18:24.

Tasol yu mas save, bel hevi bilong yu inap mekim na bai ol pren i hatwok long helpim yu. Dispela i kamap olsem wanem? Wanpela man bilong raitim buk i tok: “Sampela man i no gat poroman . . . ol yet i mekim na ol man i no laik kamap pren bilong ol. Taim narapela i laik toktok wantaim ol, ol yet i mekim olgeta tok, o ol i mekim ol tok nogut, o ol tok i no stret ol i mekim. Long kain rot olsem, ol yet i mekim na ol narapela i no laik kamap pren bilong ol.”​—⁠Jeffrey Young long U.S.News & World Report, Septemba 17, 1984.

Tasol nogut yu klia long ol narapela. Peter, em wanpela man i winim pinis 50 krismas, em i mekim olsem. Meri bilong em i dai na bihain em i wok long lusim ol man na i stap wanpis, maski em i laik tru bai sampela i helpim em. Em i tok: “Sampela taim mi pilim olsem mi no laik bung wantaim ol man na toktok wantaim ol; mi laik i stap wanpela tasol na mi klia long ol.” Sapos sampela taim yu stap wanpela tasol, em gutpela. Tasol nogut yu stap wanpis planti taim. (Sindaun 18:⁠1) Peter i save long dispela. Em i tok: “Bihain mi lusim dispela pasin. Mi save, tru mi gat hevi, tasol ol pren i helpim mi na mi stretim sindaun bilong mi.”

Tasol yu no ken ting em wok bilong ol narapela long helpim yu. Yu no ken strong long ol i mekim. Sapos ol i mekim gutpela pasin long yu, amamas long dispela na tenkyu long ol. Tasol yu mas tingim tok bilong Sindaun 25:17: “Yu no ken i go long haus bilong wantok bilong yu oltaim. Nogut em i les long yu na em i no laikim yu moa.” Frances i tok, yumi mas was gut long dispela. Em i marit inap 35 yia na taim man bilong em i dai, em i pilim olsem em i stap wanpis tru. Tasol em i tok: “Nogut yu strong long ol narapela i mas mekim planti samting bilong helpim yu. Na nogut yu go oltaim long haus bilong ol bilong painim helpim.”

Jehova i Tingim Yu

Sapos sampela taim ol pren bilong yu long graun i no helpim yu olsem yu ting ol bai mekim, Pren bilong yu long heven, em God Jehova, em i stap. Yu ken save, em i tingim yu. Bilip strong long em, na askim em long lukautim yu. (Song 27:10; 91:​1, 2; Sindaun 3:​5, 6) Meri Moap, Rut, em i bin mekim olsem na em i kisim planti blesing. Em i kamap wanpela tumbuna bilong Krais Jisas!​—⁠Rut 2:12; 4:17; Matyu 1:​5, 16.

Beten oltaim long Jehova. (Song 34:4; 62:​7, 8) Margaret i mekim olsem na dispela i strongim em taim em i bel hevi na pilim olsem em i no gat poroman. Em i mekim wok painia wantaim man bilong em inap long man i dai taim em i yangpela yet. Margaret i tok: “Mi beten tokaut long Jehova long olgeta hevi na wari bilong mi. Dispela i helpim mi long kisim stretpela tingting taim mi bel hevi long mi no gat poroman. Na Jehova i harim beten na helpim mi na dispela i strongim mi tru.” Em i bihainim tok bilong aposel Pita na dispela i helpim em: “Yupela i mas daunim laik bilong yupela yet na stap aninit long strongpela han bilong God. Na long taim em yet i makim, em bai i litimapim yupela. God i save wari long yupela. Olsem na olgeta hevi yupela i karim, yupela i mas putim long han bilong en.”​—⁠1 Pita 5:​6, 7; Song 55:⁠22.

Sapos yu stap gut wantaim Jehova, yu inap abrusim wanpela hevi i painim planti man i no gat poroman​—⁠ol i save bel hevi long ol yet. Taim man bilong niusmeri Jeannette Kupfermann i dai long sik kensa, meri i tok em i bel hevi long em yet na pilim olsem i no gat wanpela gutpela wok em inap mekim. Em i tok, dispela kain tingting i mekim na planti meri, em man bilong ol i dai pinis, “ol i bel hevi nogut tru na tingting long kilim i dai skin bilong ol.”

Tasol yu mas save, Jehova i laikim yu tru. Em i no ting yu nogut tasol. (Jon 3:16) God bai helpim yu olsem em i bin helpim ol Israel long bipo. Em i tokim ol: “Mi no bin les long yupela na givim baksait long yupela. Nogat. Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela.”​—⁠Aisaia 41:​9, 10.

No Ken Ting God i Gat Asua

Bikpela samting em olsem: Yu no ken ting em asua bilong God na yu no gat poroman. God i no gat asua. Long bipo yet em i laik bai yu na olgeta narapela man i gat ol gutpela poroman na stap belgut. Taim em i wokim Adam, em i tok: “Em i no gutpela long dispela man i stap wanpis. Mi mas mekim kamap wanpela poroman bilong helpim em.” (Stat 2:18) Olsem na God i wokim Iv, em namba wan meri. Sapos Satan i no bin bikhet long God, bai man na meri na olgeta pikinini na tumbuna pikinini bilong ol i no ken i stap wanpis na bel hevi na pilim olsem ol i no gat poroman.

Jehova i larim pasin nogut i stap inap liklik taim, olsem na kain kain pen na bel hevi i kamap planti. Tasol yu no ken lusim tingting: Em bilong liklik taim tasol. Sapos yu tingim ol blesing God bai givim long yu long nupela taim, bai yu inap karim dispela hevi long yu no gat poroman. Na inap long taim dispela nupela taim i kamap, God bai sambai long yu na mekim isi bel bilong yu.​—⁠Song 18:2; Filipai 4:​6, 7.

Sapos yu save long dispela samting, dispela inap strongim yu. Taim man bilong Frances (yumi stori pinis long em) i dai, tok bilong Song 4:8 i strongim tru Frances long nait: “Bikpela, yu tasol yu save lukautim mi . . . Mi no save pret . . . Taim mi go long bet, wantu mi save slip i dai.” Tingim long bel ol gutpela tok olsem i stap long Buk Song. Tingim gutpela pasin God i mekim bilong lukautim yu, olsem Song 23:​1-3 i stori long en.

Olsem Wanem Yumi Ken Helpim Man i No Gat Poroman?

Gutpela rot em olsem: Yumi mas mekim pasin sori long ol. Planti taim Baibel i kirapim yumi long laikim tru ol brata, na helpim ol long taim ol i gat hevi. Aposel Pol i tok: “Yupela i mas . . . laikim ol tru olsem ol brata bilong yupela stret.” (Rom 12:10) Baibel i tok: “Dispela pasin bilong givim bel bilong yumi long ol arapela, em i no inap pinis.” (1 Korin 13:⁠8) Olsem wanem yumi ken mekim pasin sori long ol man i bel hevi long i stap wanpis?

Yumi no ken givim baksait long ol; yumi mas tingim ol na wok long helpim ol long taim yumi inap mekim. Yumi mas mekim pasin olsem Jop. Em i tok em i bin helpim ‘ol rabisman taim ol i singaut bilong kisim helpim, na ol pikinini, papa bilong ol i dai pinis, na ol narapela i no gat man bilong helpim ol, na em i bin helpim ol meri wanpis na ol i stap amamas.’ (Jop 29:​12, 13) Ol elda long kongrigesen na ol gutpela pren i ken mekim gutpela pasin olsem na helpim ol dispela lain long save, ol i pilim hevi bilong ol, na laikim ol, na ol i ken mekim gut bel bilong ol. Ol i ken putim gut yau taim ol i laik toktok.​—⁠1 Pita 3:⁠8.

Planti taim ol liklik samting ol pren i mekim i helpim tru ol man i bel hevi long ol i no gat poroman. Olsem: Sapos poroman bilong brata o sista Kristen i dai, pasin sori ol pren tru i mekim inap helpim ol. Yu ken mekim ol liklik samting, olsem singautim ol i kam kaikai wantaim yu, na putim yau taim ol i laik toktok, na mekim ol gutpela tok bilong strongim ol. Ol dispela samting i save helpim ol tru long daunim bel hevi bilong ol.​—⁠Hibru 13:16.

Yumi olgeta i save bel hevi sampela taim na pilim olsem yumi no gat poroman. Tasol yu no ken larim dispela i daunim yu. Kirap mekim ol gutpela wok. Larim ol pren i helpim yu taim ol inap. Bilip tru long God Jehova. Tingim gut tok promis bilong Song 34:19: “Planti hevi i save kamap long stretpela man, tasol Bikpela i save helpim em na ol dispela hevi i no daunim em.” Askim Jehova long helpim yu, na maski yu no gat poroman, bai yu no bel hevi tumas.

[Blok long pes 24]

ROT BILONG DAUNIM BEL HEVI LONG NO GAT POROMAN

▪ Oltaim tingim Jehova

▪ Kaunim Baibel bilong mekim isi bel bilong yu

▪ Tingim ol gutpela samting ol Kristen i wetim

▪ Wok strong long mekim ol gutpela wok

▪ Kisim sampela pren moa

▪ Larim ol pren i helpim yu

▪ No ken klia long ol narapela; wok long helpim ol

▪ Bilip tru olsem Jehova i tingim yu

[Blok long pes 24]

BILONG HELPIM MAN I NO GAT POROMAN

▪ Pilim hevi bilong em, sori long em, strongim bel bilong em

▪ Putim yau taim em i laik toktok

▪ No ken les long mekim ol liklik samting bilong helpim em

[Piksa long pes 23]

Rut i gat planti hevi, tasol i no gat samting i makim olsem em i bel hevi tumas