Mi Bihainim Lek Bilong Papamama

EM STORI BILONG HILDA PADGETT

Wanpela nius i tok: “Mi dediketim pinis skin bilong mi long mekim wok bilong God Antap Tru, na mi no inap mekim wok bilong tupela bos.” Em wanpela tok mi bin mekim long Ministri Bilong Leba na Nesenel Sevis bilong Briten long 1941 bilong tokaut long wanem as na mi no bihainim tok bilong ol long mekim wok long haus sik long taim bilong Namba 2 Pait. Bihain liklik long en, kot i makim strafe bilong mi, em 3-pela mun long kalabus.

WANEM samting i mekim na dispela hevi i painim mi? Em i no wanpela tingting nating ol yangpela i save kisim, o pasin bikhet, nogat. As bilong en i bin kamap long taim mi pikinini yet.

Papa i Givim Bel Tru Long Kingdom

Mama i bin karim mi long Jun 5, 1914, long Hosfot, klostu long Lits, long hap not bilong Inglan. Papamama bilong mi, em Atkinson na Pattie Padgett, ol i save skulim ol pikinini long ol samting bilong lotu long Sande-skul, na ol i insait long lain bilong singsing long wanpela lotu bilong ol Metodis (Primitive Methodist) na papa i save pilaim musik ogan long haus lotu. Taim mi liklik pikinini yet, famili bilong mi i stap amamas. Wanpela samting tasol ol i gat hevi long en. Papa i tingting planti long pait i stap long olgeta hap. Em i nolaik tru long pait na bagarapim man, na em i bilip long tok bilong Baibel, olsem: “Yupela i no ken kilim i dai ol arapela manmeri.”​—⁠Kisim Bek 20:​13.

Long 1915 gavman i wok long kirapim olgeta yangpela man long go insait long ami long laik bilong ol yet, na bai gavman i no ken putim lo olsem ol i mas insait long en. Papa i tingting planti na em i sanap long ren long moningtaim i go inap apinun na wetim taim bilong em long putim nem na kamap soldia. Tasol long de bihain long en, bikpela senis tru i painim papa!

Em i mekim wok plama long wanpela bikpela haus na em i toktok wantaim ol narapela wokman long ol samting i kamap long graun. Wanpela man bilong wok long gaden em i givim liklik nius long papa (Gathering the Lord’s Jewels). Papa i kisim i go long haus na em i kaunim kaunim i stap. Em i tok: “Sapos dispela tok i tru, orait olgeta narapela tok i no stret.” Long de bihain em i askim dispela man long givim sampela save moa long em, na inap 3-pela wik em i stadi long Baibel i go winim biknait. Nau em i save, em i painim pinis tok i tru! Tok em i bin raitim long buk dairi bilong em long Sande, Janueri 2, 1916, i tok: “Mi go long lotu long moningtaim, mi go long I.B.S.A. [Intenesenel Baibel Studen Asosiesen, em nem bilong ol Witnes Bilong Jehova long Inglan bipo] long nait​—⁠mi stadi long Hibru 6:​9-20​—⁠em namba wan taim bilong mi long i go lukim ol brata.”

I no longtaim na ol wanblut na ol pren bilong papa long lotu ol i mekim pasin birua long papa. Ol i ting em i kamap longlong. Tasol papa i tingting pinis long samting em i laik mekim. Nambawan bikpela samting bilong em, em ol miting na stadi, na long Mas em i kisim baptais long wara bilong makim olsem em i dediket pinis long Jehova. Pastaim papa wanpela tasol i go long ol miting, na em i mekim inap sampela wik na nau mama i no sakim moa ol miting. Em i putim mi long liklik wilka bilong ol pikinini na em i wokabaut inap 8-pela kilomita i go long Lits, na em i kamap stret long taim miting i pinis. Papa i amamas tru long lukim em. Kirap long dispela taim, famili bilong mipela i wanbel long mekim wok bilong Jehova.

Wanpela hevi bilong papa i stap​—⁠em yet i bin putim nem long go insait long ami, tasol sampela wik bihain em i laik bihainim maus bilong bel na em i no laik i stap soldia o holim gan. Taim ol i singautim em i go long ami, em i no laik holim gan, olsem na long Julai 1916 em i sanap long kot bilong ami. Em i kot inap 5-pela taim, na long namba wan taim em i kisim 90 de long kalabus. Orait em i pinis long kalabus na em i kisim tupela wik malolo, na bihain em i kot gen na em i kisim 90 de kalabus gen. Orait bihain long namba 2 taim, ol i putim em long wanpela lain olsem dokta bilong ami. Long Februeri 12, 1917, em i kalap long sip bilong karim ol soldia na em i go long Ruan, long Frans. Buk dairi bilong em i tok, taim em i stap long dispela hap, em i les pinis long i stap bilong em. Em i save, em i wok long stretim skin bilong ol soldia na bai ol i ken i go bek long pait.

Orait, em i sakim dispela wok tu. Em i kot gen na em i kisim 5-pela yia kalabus long wanpela haus kalabus bilong ol ami bilong Briten long Ruan. Papa i wok long askim ol long putim em long haus kalabus nating i no bilong ami. Tasol em i kisim strafe long dispela​—⁠inap 3-pela mun ol i givim bret na wara tasol long em, na bihain long en ol i givim wankain kaikai long em olsem ol narapela kalabus i kisim. Orait taim skin bilong em i kamap gutpela gen, ol i givim bret na wara gen long em; ol i mekim mekim olsem. Long san ol i pasim hankap long tupela han bilong em wantaim long baksait, na long nait na long taim bilong kaikai ol i pasim han bilong em klostu long bel. Mak bilong ol hankap i stap long han i go inap long taim em i dai, long wanem, ol i pas tumas na ol i kaikaim skin bilong em na ol sua i kamap. Na em i gat sen long lek bilong em na ol i pasim long namel bilong em.

Ol bos bilong ami i wok strong tru long mekim kain kain samting na bai em i no strong moa long bilip, tasol ol i no inap​—⁠em i sanap strong yet. Ol i kisim Baibel na ol buk bilong em. Em i no inap kisim ol pas long famili o salim pas. Em i stap olsem inap tupela yia pinis na bihain em i tingting long mekim wanpela samting bilong kamapim bel bilong em, olsem em i no inap lusim bilip. Em i stap tambu long kaikai. Inap 7-pela de em i no kaikai o dring wara, olsem na skin bilong em i laik bagarap na ol i mas putim em long haus sik bilong ol ami. Em nau, em i kamapim pinis bel bilong em, tasol klostu em i dai long dispela. Sampela yia bihain em i tokaut olsem i no stret em i bin mekim olsem na klostu em i bagarapim laip bilong em, na em i no ken mekim moa dispela pasin.

Long Novemba 1918 pait i pinis na papa i stap yet long kalabus long Ruan. Tasol long yia antap ol i kisim em i go long wanpela haus kalabus nating long Inglan. Em i amamas nogut tru long kisim olgeta pas na karamap em mama i bin salim, na em i kisim bek Baibel na ol buk bilong em! Ol i kisim em i go long Haus Kalabus Winsesta, na em i bungim wanpela yangpela brata em wankain hevi i bin painim em long taim bilong pait. Dispela brata, em Frank Platt, bihain em i wok long Betel long Landon inap planti yia. Ol i pasim tok long bung long de bihain, tasol ol i salim Frank i go long narapela hap.

Long Epril 12, 1919, mama i kisim wanpela pas olsem: “Haleluya! Bai mi kam bek long yupela. Bai mi telefon long Landon pastaim.” Man! Em taim bilong amamas tru! Inap 3-pela yia i gat planti traim na hevi i bin painim papa, na tu, em i no stap wantaim famili. Namba wan samting long tingting bilong papa, em i laik go bungim ol brata long Betel long Landon. Orait em i kamap long Namba 34 Kreven Teris, na ol brata i mekim gut tru long em. Em i waswas na sev, na ol i givim klos na hat long em, na nau em i go bek long famili. Ating yu inap tingim bikpela amamas mipela famili i kisim long bung gen wantaim. Long dispela taim mi gat klostu 5-pela krismas, na mi no save long papa.

Taim papa i lusim kalabus, namba wan miting em i go long en, em Memorial. Taim em i go antap long lata bilong go insait long haus bung, namba wan brata em i bungim, em Frank Platt, ol i bin salim em i kam long wanpela haus sik bilong ol ami long Lits. Tupela i amamas tru long toktok wantaim na stori long ol samting i bin painim ol. Kirap long dispela taim na i go inap long taim em i lusim haus sik, em i save kam planti taim long haus bilong mipela.

Mama i Stap Gut Long Wok Bilong God

Taim papa i stap kalabus, mama i mekim liklik wok mani long wasim klos bilong ol manmeri, long wanem, mani em i kisim long gavman i liklik tumas. Ol brata i bin mekim gut tru long mipela. Long olgeta tupela tupela wik, wanpela elda long kongrigesen i save givim skin pas long mama i gat mani insait olsem presen, na i no gat nem bilong ol brata i bin givim long em. Oltaim mama i save tok, pasin sori bilong ol brata i helpim em long pas gut long Jehova na sanap strong long dispela taim bilong hevi. Taim papa i kalabus, long olgeta taim em i bin i go long ol miting bilong kongrigesen. Nambawan bikpela traim i bin painim em, i olsem: Winim wanpela yia olgeta em i no save, papa i stap laip yet o em i dai pinis. Na long 1918 narapela bikpela hevi i kamap, em mitupela mama i bin kisim bikpela sik kus bilong Spen. Planti manmeri long hap bilong mipela ol i dai. Sampela i go bilong helpim ol narapela, na ol yet i kisim dispela sik na ol i dai. Long dispela taim bipo, kaikai i sot, na ating dispela i mekim na skin bilong ol man i no gat strong long sakim dispela sik.

Tok bilong aposel Pita i kamap tru long famili bilong mipela, em i tok: “Bai yupela i karim pen sotpela taim tasol, na bihain bai [God] yet i mekim yupela i orait gen, na strongim bilip bilong yupela na mekim yupela i sanap strong oltaim.” (1 Pita 5:10) Ol dispela bikpela hevi i bin painim papamama em i bin helpim ol long kisim strongpela bilip long Jehova, na ol i bilip tru olsem em i save tingim yumi, na i no gat wanpela samting inap tekewe yumi long sori bilong God. Mi bin kisim gutpela blesing tru na mi go bikpela insait long kain bilip olsem.​—⁠Rom 8:​38, 39; 1 Pita 5:⁠7.

Yangpela Yet na Mekim Wok Bilong God

Taim papa i lusim pinis kalabus, wok bilong Kingdom i kamap nambawan bikpela samting bilong mipela. Mi no inap tingim wanpela taim mi bin lusim nating miting​—⁠sik tasol i mekim na wan wan taim mi mas lusim. Taim papa i kam bek long mipela, bihain liklik em i baim kamera bilong em i go long ol man na paspas gol bilong mama tu, bambai mipela i gat mani bilong i go long wanpela kibung. Mipela i no gat mani bilong i go malolo long wanpela hap, tasol mipela i no save lusim wanpela kibung, na ol kibung i kamap long Landon tu.

Insait long 3-pela yia samting bihain long pait, em i taim bilong mipela i kisim nupela strong. Papa na mama i strong long bung wantaim ol brata sista. Mi inap tingim yet taim mi pikinini, na mipela i save go lukim ol narapela brata sista, na mi save sindaun na wokim ol piksa, na ol narapela i bikpela pinis ol i save toktok wantaim inap planti aua long ol nupela save ol i kisim long tok i tru. Ol i save toktok wantaim, na singsing wantaim musik ogan, na ol i bung wantaim, na ol i kisim bikpela amamas na nupela strong long dispela.

Papamama i strong long skulim mi long bihainim tok bilong Baibel. Long skul mi stap narapela kain tru. Maski mi gat 5-pela krismas tasol, mi save karim “Nupela Testamen” bilong mi i go long skul na mi save kaunim taim ol wanklas i lain long buk lotu olsem katakismo. Bihain tisa i sanapim mi long ai bilong olgeta manki bilong skul olsem wanpela pikinini i bihainim maus bilong bel na em i no laik insait long ol samting bilong pait, long wanem, long bikpela de bilong ol, em De Bilong Tingim Bek,a mi no laik insait long ol bilaspasin bilong en. Tasol mi no bel hevi long papamama i lainim mi long bihainim tok bilong Jehova. Dispela samting i bin lukautim mi, na i helpim mi long i stap gut long ‘liklik rot.’ Maski papamama i go we​—⁠long miting o long autim tok​—⁠mi save go wantaim ol.​—⁠Matyu 7:​13, 14.

Mi tingim yet namba wan taim mi wanpela tasol mi autim tok. Mi gat 12-pela krismas tasol. Taim mi gat olsem 16 krismas, long wanpela Sande long moningtaim mi tokim papamama, bai mi stap long haus. Tupela i no krosim mi o subim mi long i go autim tok, olsem na mi sindaun long gaden na stadi long Baibel, na bel bilong mi i no stap isi. Mi mekim olsem inap wanpela o tupela wik, na bihain mi tokim papa: “Ating bai mi go wantaim yu nau long moningtaim!” Kirap long dispela taim, mi wok long kamap strong long spirit.

Yia 1931 em i wanpela gutpela yia tru! Mipela i kisim nupela nem olsem Witnes Bilong Jehova, na tu, mi kisim baptais long wanpela kibung nesenel long haus Aleksandra Palas, long Landon. Mi no inap lusim tingting long dispela de. Mipela i pasim ol longpela blakpela klos, na klos bilong mi i gat wara long en, long wanem, narapela i bin pasim bilong kisim baptais paslain long mi!

Taim mi pikinini yet mi gat bikpela tingting long kamap painia. Taim mi wok long i go bikpela, mi ting mi mas mekim bikpela wok moa bilong Jehova. Olsem na long Mas 1933, taim mi gat 18 krismas, mi go insait long wok painia.

Wanpela bikpela amamas bilong mipela, em ol “Wik Painia” i save kamap long sampela biktaun. Long dispela taim inap olsem 12-pela painia bai kam na ol bai stap wantaim ol brata bilong dispela ples na wok wantaim long autim tok. Mipela i givim liklik buk long ol bikman bilong lotu na ol narapela man i gat namba. Mipela i mas strongim bel tru bilong i go toktok wantaim ol. Planti ol i tok bilas long mipela, na sampela ol i pasim dua strong long pes bilong mipela. Tasol mipela i no tingim; mipela i givim bel tru long mekim dispela wok, olsem na mipela i amamas long karim hevi long nem bilong Krais.​—⁠Matyu 5:​11, 12.

Long Lits, mipela i kisim wanpela kain wilka bilong liklik pikinini, na wilwil bilong pikinini, na motabaik bilong papa, na bihain ka bilong em tu, na mipela wokim bilong karim ol pikap i gat masin bikmaus long en. Tupela brata i save karim dispela masin i go long wanpela rot na putim wanpela plet singsing bilong kirapim ol man long kam sanap long dua bilong haus bilong ol, na bihain tupela bai putim narapela plet i gat wanpela tok inap 5-pela minit, em Brata Rutherford i mekim. Orait, dispela tok i pinis na nau tupela bai go long narapela rot na mekim gen, na mipela ol pablisa bai kam long dispela rot ol i lusim pinis na tilim ol buk na nius bilong Baibel.

Inap planti yia, long olgeta Sande long apinun bihain long miting, mipela i save go long wanpela ples bung long taun, em ol man i save sanap long en na mekim pablik-tok. Mipela i go bilong harim wanpela tok bilong Brata Rutherford i stap long pikap na i save go inap wanpela aua, na mipela i save givim tanget long ol man, na sapos sampela i laikim, mipela i save go lukim ol. Bihain ol man i save gut long mipela. Na ol polis tu i mekim gut long mipela. Wanpela taim long apinun mipela i bung i stap na mipela i harim pairap bilong ol kundu na ben bilong wokim musik. I no longtaim na wanpela lain Fasis i mats i kam long rot. Ol i mats i kam raunim mipela na ol i sanap baksait long mipela na holim plak i go antap. Ol i pasim musik na i no gat pairap liklik, na nau nek bilong Brata Rutherford i singaut strong olsem: “Sapos ol i laik, ol i ken salut long plak bilong ol na litimapim nem bilong ol man. Mipela bai lotuim na litimapim nem bilong Jehova tasol, em God bilong mipela!” Mipela tingting: Wanem samting bai kamap nau? Tasol i no gat wanpela samting i kamap. Ol i mas sanap tasol na harim dispela tok, na ol polis i strong long ol i mas pasim maus na bai mipela i ken harim ol narapela hap bilong pablik-tok.

Long dispela taim bipo, mipela i mekim wok long ol pikap bilong helpim mipela long autim tok long ol man. Taim mipela i sanap long dua bilong ol man na wokim pikap, mipela i save lukluk tasol long plet bilong kirapim ol man long putim yau na harim wanpela tok bilong Baibel inap 5-pela minit. Sampela man bilong haus ol i singautim mipela i kam insait long haus na ol i amamas long mipela i kam bek na putim sampela plet moa i gat ol tok long en.

Long 1939 mipela i gat bikpela wok tru na planti hevi tu​—⁠planti man ol i birua na pait long mipela. Paslain long taim bilong wanpela kibung bilong mipela, planti man i bung wantaim na mekim nogut long ol brata na singaut bikmaus long ol. Olsem na long taim bilong kibung ol i makim wanpela lain brata i raun wantaim ka na autim tok long ol hap ol i save mekim nogut long mipela, na ol sista wantaim ol narapela brata ol i go long ol hap ol i no save mekim nogut long mipela. Mi wok wantaim wanpela grup long wanpela rot, na mi bihainim wanpela liklik rot bilong i go autim tok long ol haus i stap baksait long rot. Taim mi sanap long dua, mi harim bikpela pairap​—⁠ol man i bikmaus na singaut singaut long rot. Mi wok long toktok wantaim man bilong haus i go inap long taim dispela pairap i pinis. Orait nau mi wokabaut i go kamap long bikpela rot na bungim ol brata sista. Ol i bin wok long painim mi na ol i tingting planti! Tasol taim mipela i miting long apinun, ol dispela lain i laik bagarapim miting bilong mipela, tasol ol brata i bringim ol i go ausait.

Namba Tu Pait i Kirap

Nau gavman i putim lo long olgeta yangpela man i mas i go insait long ami. Planti yangpela brata i kalabus olsem 3-pela mun i go inap 12-pela mun. Long dispela taim papa i kisim wanpela gutpela wok, em bilong i go na lukim ol brata insait long kalabus. Long olgeta Sande em i save mekim Stadi Wastaua long haus kalabus long hap bilong em. Olgeta Trinde long apinun em i save go lukim ol brata i stap insait long liklik rum kalabus bilong ol. Em yet i bin kisim bikpela hevi na i stap longtaim long kalabus long Namba Wan Pait, olsem na em i amamas tru long helpim ol brata em wankain hevi i painim ol. Em i mekim olsem inap 20 yia samting, i go inap long taim em i dai long 1959.

I kam inap long 1941, mipela i lain pinis long karim hevi bilong kros na pasin birua em planti man i save mekim long mipela, long wanem, mipela i no insait long ol samting bilong pait. Taim ol i mekim olsem, i hatwok long sanap long rot na holim ol nius. Tasol mipela i amamas long helpim ol refyuji ol i slip long sampela haus long hap bilong mipela. Ol lain bilong Latvia, Polan, Estonia, Jemani​—⁠ai bilong ol i lait tru taim ol i lukim Wastaua o Kirap! long tok ples bilong ol yet!

Orait nau mi yet mi kisim hevi long mi no laik insait long ol samting bilong Namba 2 Pait. Long olgeta de ol i save lokim mi insait long liklik rum kalabus bilong mi inap 19 aua. I stap bilong mi long haus kalabus i gat hatwok. Long namba wan i go inap namba 3 de i hatwok tru, long wanem, mi stap wanpis. Long namba 4 de ol i singautim mi i go long ofis bilong bos bilong haus kalabus na mi bungim tupela meri moa ol i sanap i stap. Wanpela meri i tok isi long mi olsem: “Yu kalabus long wanem samting?” Mi tok: “Sapos mi tokim yu, bai yu kirap nogut.” Em i tok isi: “Yu wanpela JW?” Dispela narapela meri i harim na em i askim mitupela wantaim: “Yutupela i JW?” Em nau, mipela 3-pela i amamas tru na narapela i holimpas narapela. Mipela i no stap wanpis moa!

Amamas Long Wok Painia

Taim mi lusim kalabus, mi mekim yet wok painia, na wanpela yangpela meri i gat 16 krismas na nau tasol em i pinis long skul, em i kirap wok painia wantaim mi. Mipela i go long wanpela naispela taun tru, em Ilkli, long Yoksia. Inap 6-pela mun mipela i wok strong long painim wanpela haus bilong mekim miting long en, tasol nogat. Bihain mipela i baim long mun wanpela liklik haus ka, na mipela wokim i kamap Haus Kingdom. Papa i helpim mipela, na em i putim paua na masin bilong hatim haus. Na em i penim na mekim gut haus. Inap planti yia, wanpela kongrigesen i stap klostu ol i helpim mipela​—⁠long olgeta wik ol i salim wanpela brata i kam mekim pablik-tok. Jehova i blesim mipela na wok bilong mipela i kamap gutpela, na grup i wok long i go bikpela, na bihain kongrigesen i kamap.

Long Janueri 1959, sik i kisim papa wantu tasol. Ol i singautim mi i go bek long ples, na long Epril em i dai. Long ol yia bihain long en, mi gat hatwok tru. Skin bilong mama i no gat strong moa, na em i no inap tingim gut ol samting, na dispela i givim bikpela hatwok long mi. Tasol spirit bilong Jehova i strongim mi na mi inap lukautim mama i go inap long taim em i dai long 1963.

Long ol dispela planti yia mi bin mekim wok bilong Jehova, mi bin kisim planti blesing tru na mi no inap kaunim. Kongrigesen long ples bilong mi i go bikpela na ol i brukim inap 4-pela taim, na ol i salim sampela pablisa na painia bilong kongrigesen na sampela olsem misineri i go long ol narapela kantri, olsem Bolivia na Laos na Yuganda. Ol samting i bin mekim na mi no marit na kamapim famili. Tasol mi no bel hevi long dispela. Mi gat planti wok tru long mekim. Tru mi no gat sampela famili bilong mi yet, tasol mi gat planti pikinini na bubu pikinini insait long lain bilong Bikpela.​—⁠Mak 10:​29, 30.

Mi save singautim ol yangpela i kam long haus bilong kisim gutpela amamas bilong Kristen. Mipela i save redim stadi bilong Wastaua. Na mipela i save mekim sampela stori bilong wok autim tok mipela i mekim, na mekim sampela singsing bilong Kingdom, olsem papamama i bin mekim bipo. Taim mi bung wantaim ol yangpela i save amamas, dispela i helpim mi long i stap yangpela long tingting na i stap amamas. I no gat narapela samting mi inap mekim i winim wok painia. Mi tenkyu tru long Jehova long mi inap bihainim lek bilong papamama. Mi beten long mi ken mekim yet wok bilong Jehova inap oltaim oltaim.

[Ol Futnot]

[Piksa long pes 23]

Hilda Padgett wantaim papamama, em Atkinson na Pattie

[Piksa long pes 23]

Em dispela liklik nius i bin kirapim papa na em i laik harim tok i tru