Amamas Long ‘Bihainim Dispela Tok Yupela i Kisim’
“Yupela i mas daunim yupela yet na kisim dispela tok God i bin planim long bel bilong yupela. Dispela tok em inap long kisim bek spirit bilong yupela. Tasol dispela tok yupela i kisim, em yupela i mas bihainim. Yupela i no ken harim nating tasol.”—JEMS 1:21, 22.
‘BIHAINIM dispela tok yupela i kisim.’ Em wanpela strongpela toksave, a? Kain tok olsem em i stap long “Pas Jems i Raitim” long Baibel, na ol bai putim insait long ol Haus Kingdom olsem yia-teks bilong ol Witnes Bilong Jehova long 1996.
2 Jems, em brata bilong Bikpela bilong yumi, Krais Jisas, em i bin mekim bikpela wok insait long kongrigesen Kristen bilong pastaim. Taim Jisas i kirap bek pinis, wanpela taim em i kamap long Jems, na bihain em i kamap long olgeta aposel. (1 Korin 15:7) Bihain, taim aposel Pita i lusim haus kalabus long rot bilong wanpela mirakel, em i bin tokim sampela Kristen ol i bung wantaim: “Yupela i mas tokim Jems na ol brata long ol dispela samting.” (Aposel 12:17) Tru, Jems i no wanpela aposel, tasol ating em i stap siaman long lain bilong bosim ol Kristen taim ol i bung long Jerusalem na ol aposel wantaim ol elda i pasim tok olsem ol man bilong ol narapela lain i kamap Kristen ol i no gat wok long katim skin. Jems i kamapim gen ol bikpela tok bilong dispela bung, na tok ol i pasim na spirit holi i strongim, ol i salim i go nabaut long olgeta kongrigesen.—Aposel 15:1-29.
3 Gutpela tingting bilong Jems long skelim gut dispela samting, em i gat strong na i kirapim ol Kristen long bihainim. Tasol long pasin daun Jems i tokaut olsem em i wokman nating bilong God na Bikpela Krais Jisas. (Jems 1:1) Pas bilong em, em spirit holi i stiaim em long raitim, i gat planti gutpela tok bilong stretim ol Kristen bilong nau na strongim bel bilong ol. Jems i pinisim wok bilong raitim dispela pas inap olsem 4-pela yia paslain long taim Jeneral Sestius Galus bilong Rom i kam long namba wan taim bilong mekim pait long Jerusalem. Long dispela taim ol i bin autim gutnius long planti hap, olsem “long olgeta manmeri i stap long graun.” (Kolosi 1:23) Dispela em i taim nogut bilong planti hevi, na ol wokman bilong Jehova i save pinis, klostu nau Jehova bai givim strafe long lain Juda.
4 Ol dispela Kristen i holim pinis Ol Skripsa Hibru na bikpela hap bilong Ol Skripsa Grik. Ol Kristen i bin raitim Baibel ol i kamapim planti planti tok bilong Ol Skripsa Hibru, olsem na yumi save ol i bilip tru long Tok Bilong God, em Baibel. Na yumi ol man bilong nau tu, yumi mas stadi long tok bilong Baibel na bihainim long olgeta samting yumi mekim. Yumi mas i gat strong bilong spirit na strongpela bel em tok bilong Baibel i save givim long yumi bambai yumi ken sanap strong.—Song 119:97; 1 Timoti 4:13.
5 Long nau ol man bilong graun i stap klostu tru long taim bilong “bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21) Bilong abrusim bagarap, yumi mas larim God i soim rot long yumi. Yumi inap mekim olsem wanem? Yumi mas kisim ol tok bilong Baibel em spirit bilong God i bin kamapim, na yumi mas putim gut long bel bilong yumi. Dispela bai kirapim yumi long ‘bihainim dispela tok yumi kisim,’ olsem ol gutpela wokman bilong Jehova long bipo ol i bin mekim. Oltaim yumi mas kaunim na stadi long tok bilong Baibel na mekim wok long en bilong litimapim nem bilong Jehova.—2 Timoti 2:15; 3:16, 17.
Amamas na Sanap Strong
6 Taim Jems i kirapim tok long dispela pas, em i toktok long amamas—em i namba 2 pasin spirit bilong God i save kamapim long man. Jems i tok: “Ol brata bilong mi, sapos ol kain kain traim i kamap long yupela, orait yupela i ken ting olsem, em i samting bilong amamas tasol. Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi. . . . Olsem na bai yupela i stap gut, na yupela bai i no sot long wanpela pasin bilong God. Nogat. Pasin bilong yupela bai i gutpela na i stret olgeta.” (Jems 1:2-4; Galesia 5:22, 23) Olsem wanem yumi ken tok, ol traim na hevi i painim yumi em i “samting bilong amamas tasol”? Long bikpela tok bilong em long maunten, Jisas yet i tok: “Sapos ol i lukim yupela i stap long lain bilong mi, na ol i tok nogut long yupela na ol i mekim nogut long yupela na sutim kain kain tok giaman long yupela, orait yupela i ken amamas. Yupela i ken belgut na amamas tru, long wanem, bikpela pe i wetim yupela long heven. Ol man i bin mekim ol wankain pasin nogut long ol profet i bin i go paslain long yupela.” (Matyu 5:11, 12) Yumi save amamas na bel gut long lukim Jehova i blesim wok bilong yumi taim yumi taitim bun na wok i go bilong winim mak, em laip i stap oltaim oltaim.—Jon 17:3; 2 Timoti 4:7, 8; Hibru 11:8-10, 26, 35.
7 Jisas yet i bin sanap strong na karim hevi, long wanem, em i save “bihain em bai i stap gut na amamas moa yet.” (Hibru 12:1, 2) Jisas em i stap gutpela piksa tru bilong man i no save pret, na sapos yumi lukluk i go long em, orait yumi tu inap sanap strong na karim hevi! Olsem Jems i tok klostu long pinis bilong pas bilong em, Jehova i save givim gutpela pe long ol man i holimpas bilip. Jems i tok: “Harim. Yumi save tok olsem, ‘Ol man i bin strongim bel na karim hevi, ol i save stap gut na amamas i stap.’ Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em. Yes, yumi save, Bikpela em i save sori moa yet long yumi, na oltaim em i save marimari long yumi.” (Jems 5:11) Tingim gutpela pe Jop i bin kisim long pasin bilong holimpas bilip—skin bilong em i kamap gutpela gen na em i sindaun gen wantaim famili bilong em na em i stap amamas tru. Sapos yu sanap strong na karim hevi na holimpas bilip, bai yu tu inap kisim bikpela amamas long Paradais long nupela taim God i tok promis long kamapim, em gutpela samting tru bai painim ol man i amamas long mekim wok bilong Jehova long nau.
Wok Long Painim Gutpela Tingting
8 Taim yumi stadi gut long Baibel na yumi bihainim ol dispela tok, bai yumi kisim gutpela tingting na save bilong God na yumi inap long sanap strong na karim ol hevi namel long dispela pasin nogut bilong graun em Satan i bosim na nau i laik pinis. Olsem wanem yumi ken save, yumi inap painim gutpela tingting olsem? Jems i tok: “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. . . . Tasol dispela man i mas bilip tru na i beten long God. Em i no ken lusim bilip liklik na i ting olsem, ‘Ating God bai i givim dispela long mi, o nogat?’ Long wanem, man i gat tupela tingting, em i olsem solwara win i sakim na i kirap nabaut.” (Jems 1:5, 6) Yumi mas beten strong na bilip tru olsem Jehova bai harim beten bilong yumi, na em bai mekim ol samting bilong helpim yumi long taim na pasin em yet i makim.
9 Gutpela tingting na save bilong God em i wanpela presen Jehova yet i save givim long man. Jems i stori long ol kain presen olsem, na em i tok: “Olgeta gutpela samting yumi save kisim na olgeta presen i gutpela tru, em olgeta i save kam long heven. Papa i bin mekim kamap olgeta lait bilong skai, em i save salim dispela ol samting i kam daun long yumi. Dispela Papa em i no save senisim nabaut pasin bilong en.” Bihain Jems i stori long gutpela samting i kamap taim man i kisim gutpela tingting i kam long God, na em i tok: “Ating wanpela man namel long yupela em i gat gutpela tingting na save? Sapos kain man olsem i stap, orait wokabaut bilong en i mas kamap gutpela. . . . Ol man i kisim kain gutpela tingting na save i kam long God, ol i save mekim ol pasin olsem. Namba wan, ol i save bihainim klinpela tingting. Na namba 2, ol i save stap wanbel wantaim ol arapela, na ol i save isi long ol, na ol i save harim tok bilong ol arapela man. Ol i save sori tru long ol arapela na mekim gutpela pasin long ol. Ol i save mekim wankain pasin tasol long olgeta man. Na ol i no save giaman long bihainim gutpela pasin. Nogat. Ol i bihainim tru.”—Jems 1:17; 3:13-17.
10 Insait long ol lotu giaman bilong dispela graun, maski long ol kantri i tok ol i Kristen o long ol narapela kantri, em pasin bilong ol lain bilong lotu long mekim singsing bilong lotu, na harim ol beten ol i save kolim kolim planti taim, na ating ol bai harim wanpela tok. Tasol ol i no save kirapim ol dispela lain long autim tok bilong gutpela samting bai kamap bihain, long wanem, planti lotu i no ting gutpela taim bai kamap bihain. Ol i no save toktok long gutpela taim tru em Kingdom bilong God bai kamapim long graun, o ol i no klia gut long dispela tok. Jehova i tok profet long lain bilong ol lotu i gat nem Kristen: “Ol manmeri bilong mi i bin mekim tupela rong. Ol i givim baksait long mi. Mi olsem hul wara i gat wara bilong givim laip long ol, tasol ol i lusim mi. Na tu, ol yet i wokim ol tang bilong holim wara. Na ol dispela tang i bruk nabaut na wara i no inap i stap long ol.” (Jeremaia 2:13) Ol dispela tang i no gat wara bilong tok i tru. Ol i no gat gutpela tingting na save i kam long God.
11 Tasol insait long lain Witnes Bilong Jehova long nau i no olsem! Long bikpela strong em God i bin givim long ol, ol i wok strong long autim gutnius bilong Kingdom bilong God long olgeta hap bilong graun. Dispela gutpela tingting na save ol i autim, em Baibel i as bilong en. (Skelim wantaim Sindaun 1:20; Aisaia 40:29-31.) Tru tumas, ol i mekim wok long stretpela save na gutpela tingting taim ol i tokaut long ol man long ol gutpela samting tru God bilong yumi i laik mekim, em Man bilong wokim yumi. Yumi mas i gat laik long olgeta insait long kongrigesen “i ken save gut tru long laik bilong [God]” na kisim “olkain gutpela save na tingting, na dispela i ken pulap tru” long ol. (Kolosi 1:9) Sapos olgeta i gat dispela stretpela save na gutpela tingting, orait oltaim dispela bai kirapim ol yangpela na lapun tu long ‘bihainim dispela tok ol i kisim.’
12 “Gutpela tingting na save i kam long God” i toksave long yumi long ol sin inap mekim na bai God i no orait long yumi. Jems i tok: “Ol brata tru bilong mi, yupela i mas save gut long dispela samting. Yupela olgeta i mas putim yau kwik long harim tok, tasol yupela i no ken hariap long mekim toktok, na yupela i no ken kros kwik. Long wanem, belhat bilong man em i no save kamapim stretpela pasin bilong God.” Yes, yumi mas putim yau kwik, na laik tru, long harim ol tok God i givim long yumi bilong stretim yumi, na yumi mas bihainim. Tasol yumi mas was gut, nogut yumi mekim wok nogut long dispela “liklik hap tasol” bilong bodi, em maus bilong yumi. Yumi ken tok piksa long maus olsem: Long pasin bilong tok hambak, na tok baksait long man, na mekim tok i makim olsem yumi strong long bihainim tingting bilong yumi yet tasol, maus em inap “kirapim bikpela paia moa long bus na kukim olgeta diwai.” Olsem na taim yumi bung o toktok wantaim man, yumi mas wok long kisim pasin bilong mekim gutpela tok tasol na bosim maus bilong yumi.—Jems 1:19, 20; 3:5.
13 Jems i tok: “Olsem na olgeta kain pasin doti na olgeta kain pasin nogut i save kamap planti tumas, em yupela i mas rausim. Na yupela i mas daunim yupela yet na kisim dispela tok God i bin planim long bel bilong yupela. Dispela tok em inap long kisim bek spirit bilong yupela.” (Jems 1:21) Pasin bilong ol manmeri bilong dispela graun, olsem mangal, na tingim ol yet tasol, na mekim kain kain pasin nogut i gat sem, liklik taim bai i pinis. “Tasol man i bihainim tok bilong God, em bai i stap oltaim.” (1 Jon 2:15-17) Olsem na em i bikpela samting tru long yumi mas “kisim dispela tok God i bin planim long bel bilong [yumi]”! Gutpela tingting em Baibel i save givim long yumi, em i narapela kain olgeta long pasin nogut bilong dispela graun nau i laik pinis. Yumi no laik insait liklik long ol dispela pasin nogut. (1 Pita 2:1, 2) Pasin bilong laikim tumas tok i tru, na strongpela bilip, yumi mas putim ol dispela pasin long bel bilong yumi, na bai yumi ken pasim tok long bel olsem yumi no ken tru lusim ol stretpela lo bilong Jehova. Tasol olsem wanem? Yumi ken harim tasol ol tok bilong God long Baibel, o i gat sampela samting moa yumi mas mekim?
Kirap na ‘Bihainim Dispela Tok’
14 Jems 1:22 i tok: “Dispela tok yupela i kisim, em yupela i mas bihainim. Yupela i no ken harim nating tasol. Nogat. Sapos yupela i harim nating, orait yupela i giamanim yupela yet.” “Dispela tok yupela i kisim, em yupela i mas bihainim”! Jems i kamapim strong tru dispela tok insait long pas bilong em. Yumi mas harim, na bihain yumi mas ‘mekim olgeta samting olsem God i tokim yumi’! (Stat 6:22) Long nau planti man i save tok, sapos yumi harim wanpela tok bilong lotu o yumi mekim sampela pasin bilong lotu long wan wan taim, dispela em inap, na ol i no mekim narapela samting. Ol i ting, sapos ol i mekim pasin ol yet i ting i gutpela, dispela em inap. Tasol Krais Jisas i tok: “Sapos wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en na bihainim mi.” (Matyu 16:24) Olgeta Kristen tru i mas daunim sampela laik bilong ol yet na sanap strong na karim hevi taim ol i bihainim laik bilong God olsem Jisas i bin mekim. Long ol Kristen, laik bilong God long nau i wankain olsem long taim Jisas i kirap bek pinis na em i tokim ol disaipel: “Yupela i mas i go mekim olgeta lain manmeri i kamap disaipel bilong mi.” (Matyu 28:19) Olsem wanem long yu? Yu mekim dispela wok?
15 Sapos yumi wok long lukim gut tok bilong Baibel, em bai i olsem glas bilong lukim pes bilong yumi long en, na bai yumi inap lukim olsem yumi wanem kain man. Jems i tok: “Sapos wanpela man i glasim gut dispela lo na i bihainim tru tok bilong en, orait God bai i mekim olgeta wok bilong dispela man i kamap gutpela tru. Tasol em i no ken harim nating na lusim tingting hariap.” (Jems 1:23-25) Tru tumas, dispela man bai i amamas long ‘bihainim dispela tok.’ Na yumi ol Kristen i mas ‘bihainim dispela tok’ long olgeta samting yumi save mekim—dispela em i bikpela samting. Yumi no ken giamanim yumi yet na ting sapos yumi go long lotu tasol, em inap. Jems i tok olsem yumi mas bihainim sampela pasin bilong trupela lotu ating sampela Kristen i no save mekim, maski ol i wok strong tru long mekim wok bilong God. Jems i tok: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol. Narapela samting tu, yumi mas lukautim gut wokabaut bilong yumi yet, bai pasin bilong dispela graun i no ken mekim yumi i kamap doti long ai bilong God.”—Jems 1:27.
16 Sapos yumi tok, ‘Mi bilip long God,’ na yumi no mekim sampela samting moa, dispela i no inap. Olsem Jems 2:19 i tok: “Yu save bilip olsem, ‘Wanpela God tasol i stap.’ Em i gutpela. Ol spirit nogut ol tu i save bilip olsem, na ol i guria nogut.” Jems i tokaut strong olsem: “Sapos bilip i stap nating, na em i no kamapim gutpela pasin long laip bilong man i bilip, orait dispela bilip em i samting nating.” Na Jems i stori long Abraham na em i tok: “Bilip bilong Abraham na gutpela pasin bilong en i bin poroman wantaim, na dispela gutpela pasin em inapim tru bilip bilong em.” (Jems 2:17, 20-22) Sampela gutpela pasin bilong Abraham i olsem: Em i helpim lain bilong em ol i gat hevi, na em i givim kaikai na mekim gut long ol man i kam lukim em, na em i redi long kilim Aisak olsem ofa, na em i tokaut long strongpela bilip bilong em long dispela promis bilong God long kamapim “dispela taun i stap strong tru,” em Kingdom bilong Mesaia bai kamap bihain. (Stat 14:16; 18:1-5; 22:1-18; Hibru 11:8-10, 13, 14; 13:2) Olsem na i stret tru long “God i kolim Abraham olsem, ‘Pren bilong mi.’ ” (Jems 2:23) Na Jehova inap kolim yumi tu olsem ‘pren bilong em’ sapos yumi tokaut long bilip bilong yumi na long dispela Kingdom bilong Jehova yumi wetim i stap, em bai kamapim stretpela pasin.
17 Ol man i ‘bihainim dispela tok,’ God i “kolim ol stretpela man”; tasol “long bilip nating tasol God i no save kolim man em i stretpela man.” (Jems 2:24) Rahap i bin harim stori bilong ol strongpela wok Jehova i bin mekim na em i bilip long dispela “tok,” na bihain em i mekim ol wok i kamapim bilip bilong em. Em i haitim ol Israel i kam bilong lukstil long ples na em i helpim ol long ranawe, na bihain em i kisim ol wanhaus bilong papa bilong em na bungim ol insait long haus bilong em na bai ol i ken abrusim bagarap. Long taim bilong kirap bek long matmat, em bai amamas tru long kisim save olsem em i bin kamap wanpela tumbuna bilong Mesaia! (Josua 2:11; 6:25; Matyu 1:5) Long Hibru sapta 11, i gat wanpela bikpela lista bilong ol narapela manmeri ol i ‘bihainim dispela tok’ na ol i mekim ol wok i kamapim bilip bilong ol, na Jehova bai givim gutpela pe tru long ol. Na yumi no ken lusim tingting long Jop—taim em i karim bikpela hevi tru, em i tok: “Mi litimapim nem bilong [Jehova].” Olsem yumi stori pinis, long dispela bilip na wok bilong em, em i kisim gutpela pe tru. (Jop 1:21; 31:6; 42:10; Jems 5:11) Na long nau tu, sapos yumi sanap strong na karim hevi olsem man i ‘bihainim dispela tok,’ Jehova bai amamas na orait long yumi.
18 Yumi ken tingim ol brata bilong yumi long Isten Yurop, inap planti yia ol i bin sanap strong na karim hevi. Nau gavman i tekewe planti tambu i bin i stap long ol, olsem na ol i kirap na wok strong tru long ‘bihainim dispela tok.’ Ol misineri na painia i stap long ol kantri klostu, ol i kam long dispela hap bilong helpim ol long skulim ol man na stretim ol wok bilong kongrigesen samting. Brens long Finlan na ol narapela brens bilong Sosaiti Was Taua i stap klostu, ol i bin salim ol saveman bilong wokim ol haus samting, na ol brata i stap long olgeta hap ol i givim mani long laik bilong ol yet long wokim ol nupela brens-ofis na Haus Kingdom.—Skelim wantaim 2 Korin 8:14, 15.
19 Inap planti yia ol dispela brata i karim bikpela hevi bilong planti tambu i stap long ol, tasol nau ol i givim bel tru long wok bilong autim tok! Ol i save taitim bun na wok strong tru bilong inapim ol dispela yia ol i bin kisim taim nogut na ol i no gat rot long mekim bikpela wok olsem. (1 Timoti 4:10; 2 Timoti 4:2) Long hap bilong Albenia ol i daunim tru ol brata na ol i karim bikpela pen na hevi, tasol long mun Epril i go pinis, insait long 3-pela de tasol ol i tilim olgeta Kingdom Nius ol i bin kisim, nem bilong nius, “Bilong Wanem Yumi Gat Planti Hevi?” Em i gutpela wok tru ol i mekim bihain long Memorial bilong tingim i dai bilong Jisas, em 3,491 manmeri i bin kam bung—em i bikpela lain tru, winim moa yet namba bilong ol pablisa, ol inap olsem 538.
20 Long ol narapela kantri tu inap sampela yia nau, i gat planti manmeri tru i save bung long Memorial, winim 10,000,000. Long planti hap, taim ol nupela man i kam bung na ol i lukim ol samting i kamap long Memorial, dispela i strongim bilip bilong ol na ol i kirap ‘bihainim dispela tok,’ olsem mekim wok bilong autim tok. Olsem wanem? Yumi inap kirapim sampela nupela man moa long winim mak bilong mekim dispela gutpela wok?
21 Olsem ol dispela Kristen i bin wok strong long taim bilong ol aposel, na planti ol narapela Kristen i kam inap long nau, yumi mas pasim tok long bel olsem yumi bai taitim bun na wok strong tru long “kisim dispela samting bai i kamap bihain,” em laip i stap oltaim oltaim—maski yumi kisim dispela laip long Kingdom bilong heven o long dispela graun aninit long Kingdom. (Filipai 3:12-14) Yumi mas taitim bun na wok strong moa long kisim dispela gutpela samting tru. Nau i no taim bilong surik na kamap gen olsem man bilong harim nating tasol—nau em i taim tru bilong “kirap na mekim wok.” (Hagai 2:4; Hibru 6:11, 12) Yumi ‘kisim pinis dispela tok God i bin planim long bel bilong yumi,’ olsem na yumi mas kamap man bilong ‘amamas long bihainim dispela tok’ nau na i go inap oltaim oltaim long bihain.
Bai Yu Bekim Olsem Wanem?
◻ Olsem wanem yumi ken amamas long sanap strong na karim hevi?
◻ Wanem dispela “gutpela tingting na save i kam long God”? Yumi ken painim olsem wanem?
◻ Bilong wanem yumi mas ‘bihainim dispela tok’ na yumi “no ken harim nating tasol”?
◻ Wanem ol ripot i mas kirapim yumi long ‘bihainim dispela tok’?
[Askim Bilong Stadi]
1. Yumi mas ting olsem wanem long yia-teks bilong 1996?
2, 3. Olsem wanem na i stret Jems i raitim dispela pas i gat nem bilong em i stap long en?
4. Wanem samting i makim olsem ol Kristen bilong pastaim i bilip tru long Tok Bilong God?
5. Bilong wanem i mas i gat samting bilong soim rot moa yet long yumi ol man bilong nau? Yumi inap painim we?
6. Taim ol hevi i painim yumi, bilong wanem yumi mas amamas?
7. (a) Wanem samting inap helpim yumi long sanap strong na karim hevi? (b) Olsem Jop, yumi inap kisim wanem gutpela pe?
8. Olsem wanem yumi inap painim gutpela tingting na save i kam long God na em inap helpim gut yumi? Beten inap helpim yumi olsem wanem?
9. Jems i tok wanem long gutpela tingting na save bilong God na ol samting i kamap taim man i bihainim dispela gutpela tingting?
10. Olsem wanem lotu giaman i narapela kain long lotu i tru?
11, 12. (a) Gutpela tingting na save bilong God i mas kirapim yumi long mekim wanem? (b) Gutpela tingting na save bilong God i givim wanem toksave long yumi?
13. Bilong wanem em i bikpela samting long yumi mas ‘kisim dispela tok God i bin planim long bel bilong yumi’?
14. Olsem wanem yumi ken kamap man bilong “harim” na “bihainim” Tok Bilong God?
15. (a) Jems i mekim wanem tok piksa bilong soim yumi olsem wanem yumi ken amamas long ‘bihainim dispela tok’? (b) Bilong wanem yumi no ken ting, sapos yumi go long lotu tasol, em inap?
16. Olsem wanem Abraham i kamap ‘pren bilong Jehova’? Olsem wanem yumi inap kamap pren bilong Em?
17. (a) Rahap i mekim wanem na God i kolim em “stretpela meri”? Em i kisim wanem gutpela pe? (b) Long Baibel i gat wanem bikpela lista bilong ol manmeri i ‘bihainim dispela tok’? (c) Jop i kisim wanem gutpela pe? Em i mekim wanem na em i kisim dispela pe?
18, 19. Ol brata i bin karim bikpela hevi bilong planti tambu i stap long ol, olsem wanem ol i kirap na ‘bihainim dispela tok’? Wanem gutpela samting i kamap long wok bilong ol?
20. Namba bilong ol manmeri i bung long Memorial inap sampela yia nau i makim wanem samting? Olsem wanem yumi inap helpim planti bilong ol dispela man?
21. Yumi mas mekim wanem, olsem yia-teks bilong yumi i makim? Yumi tingting long kisim wanem samting?
[Piksa long pes 17]
Taim God i skulim yumi, yumi mas putim gut long bel bilong yumi
[Piksa long pes 18]
Jop i kisim gutpela pe long pasin bilong holimpas bilip—em i kamap gutpela gen na i stap amamas wantaim famili bilong em