Winim Hatwok Bilong i Stap Gut Long God
“Yupela i mas kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru [olsem ol i stap gut long God].”—EFESUS 4:24.
I GAT planti samting yumi mas mekim bilong winim hatwok bilong i stap gut long narapela. Tasol bikpela samting tru, em bilong winim hatwok bilong i stap gut long God Jehova. Jehova em i God tru, na em i bin mekim planti samting tru bilong helpim yumi, na yumi bin dediketim laip bilong yumi long em, olsem na yumi mas i stap gut long em. Olsem wanem yumi ken kamapim klia olsem yumi stap gut long God Jehova? Nambawan bikpela samting, em yumi mas i stap gut long bihainim ol stretpela lo bilong Jehova.
2 Bilong mekim olsem, yumi mas putim yau long tok bilong 1 Pita 1:15, 16: “God i singautim yupela pinis, em i holi na em i save mekim gutpela na stretpela pasin olgeta. Olsem na yupela i mas givim yupela yet long God na stap holi long olgeta wokabaut bilong yupela. Buk bilong God i tok olsem, ‘Yupela i mas i stap holi na bihainim gutpela stretpela pasin, long wanem, mi God bilong yupela, mi stap holi.’ ” Sapos yumi laik i stap gut long God Jehova, dispela bai kirapim yumi long bihainim tok bilong em long olgeta taim, na bai yumi mekim ol tingting na tok na pasin bilong yumi i stret wantaim laik bilong em. Na bel bilong yumi i mas i stap klin, olsem 1 Timoti 1:3-5 i tokim yumi: “Dispela wok God i tokim yumi long mekim [olsem no ken skulim ol man long ol narapela kain bilip o putim yau long ol stori giaman], em i bilong mekim ol manmeri i bilip tru long Jisas na i stap klin tru long ai bilong God, bai ol i save olsem ol i no gat asua long ai bilong en. Na dispela olgeta pasin bai i kirapim ol long laikim tru ol arapela.” Tru, yumi olgeta i save popaia, tasol yumi mas wok strong tru long i stap gut long God.
3 Sapos yumi stap gut long Jehova, dispela bai helpim yumi na bai yumi no tingim skin bilong yumi yet na lusim ol stretpela lo. Yes, pasin bilong i stap gut long God em bai helpim yumi na yumi no giaman tasol long bihainim stretpela pasin. Man bilong raitim Song em i tingim pasin bilong i stap gut long God na em i tok olsem: “Bikpela, yu mas skulim mi gut long pasin yu laik mi mekim, na oltaim bai mi bihainim laik bilong yu. Lainim mi gut bai mi tingting long yu wanpela tasol, na mi mekim wok bilong yu oltaim.” (Song 86:11) Bilong i stap gut long God, yumi mas bihainim ol lo em ol man bilong graun i no inap subim yumi long bihainim.
4 Pasin bilong i stap gut long God Jehova em bai helpim yumi na bai yumi no mekim ol samting inap mekim nogut long nem bilong em na long Kingdom. Olsem: Bikpela hevi i kamap namel long tupela Kristen na ol i mekim pasin kranki na tupela i go long wanpela haus kot bilong stretim dispela hevi. Jas i tok, ‘Yutupela wantaim i Witnes Bilong Jehova, a?’ Ating jas i tingting, bilong wanem tupela i mas kam long wanpela haus kot bilong stretim hevi namel long tupela? Sori, dispela i mekim nogut tru long nem bilong Jehova! Sapos tupela i bin i stap gut long God Jehova, bai tupela i putim gut yau long tok bilong aposel Pol, olsem: “Yupela i save bringim ol arapela manmeri bilong sios i go long kot, na dispela pasin bilong yupela i soim olsem yupela i pundaun pinis long bihainim pasin bilong Krais. Bilong wanem yupela i no larim ol i mekim nogut long yupela? Bilong wanem yupela i no larim ol i pulim ol samting bilong yupela?” (1 Korin 6:7) Tru tumas, bilong i stap gut long God Jehova, yumi mas redi long lusim sampela samting bilong yumi na bai yumi no bagarapim nem bilong Jehova na oganaisesen bilong em.
5 Na bilong i stap gut long God Jehova, yumi no ken pret long ol man. “Sapos man i pret long ol arapela man, pret bilong en i olsem wanpela umben em i taitim pinis na i pasim em yet. Tasol sapos man i bilip strong long Bikpela, bai em i stap gut.” (Sindaun 29:25) Olsem na taim ol man i mekim nogut long yumi, yumi no lusim ol lo bilong Jehova—yumi bihainim pasin bilong ol Witnes Bilong Jehova long ol kantri bipo i stap aninit long Rasia, na long Malawi, na Itiopia, na planti ol narapela kantri tu.
6 Sapos yumi stap gut long God Jehova, bai yumi no prenim ol man i birua long em. Long dispela as disaipel Jems i tok: “Yupela i lusim God, olsem meri i lusim man bilong en na i go pamuk nabaut. Harim. Sapos man i laikim pasin bilong graun, em i mekim pasin birua long God. Ating yupela i no save long dispela, a? Olsem na sapos man i laik pren wantaim ol pasin bilong graun, em bai i kamap birua bilong God.” (Jems 4:4) Wanpela tok bilong King Devit i kamapim klia olsem em i stap gut long God, na yumi tu i laik mekim olsem. Devit i tok: “Bikpela, mi no laikim tru ol man i no laikim yu. Na mi bel nogut tru long ol man i save bikhet long yu. . . . Mi lukim ol i olsem ol birua bilong mi yet.” (Song 139:21, 22) Yumi no laik bung wantaim ol man bilong mekim rong, long wanem, yumi stap narapela kain long ol. Sapos yumi stap gut long God, bai yumi no bung wantaim ol dispela kain birua bilong Jehova, maski yumi bung tru wantaim ol o yumi mekim long rot bilong televisen.
Sambai Long Jehova
7 Sapos yumi stap gut long God Jehova, bai yumi sambai long em, olsem helpim tok bilong em. Elihu em i stap olsem gutpela piksa tru bilong dispela samting! Jop 32:2, 3 i tok: “Elihu i kros moa yet long Jop, long wanem, Jop i bin tok long em yet i mekim stretpela pasin na pasin bilong God i no stret. Na em i kros tu long tripela pren bilong Jop, long wanem, ol i no inap bekim gut tok bilong Jop. Ol i bin tok tasol olsem, [God, NW] i bin mekim pasin nogut na i gat asua.” Long Jop sapta 32 i go inap sapta 37, Elihu i sambai long Jehova, na em i tok: “Jop, yu sindaun isi pastaim, na bai mi skulim yu moa. Long wanem, mi gat sampela tok moa mi laik autim bilong strongim tok bilong God i bin wokim mi. . . . God i save mekim stretpela pasin oltaim. . . . Em i save lukautim gut ol stretpela manmeri.”—Jop 36:2-7.
8 Bilong wanem yumi mas sambai long Jehova? Long wanem, nau long dispela taim ol man i save mekim kain kain tok bilas long em. Ol i tok, em i no i stap tru, o em i wanpela man insait long God Triwan, o em i save kukim ol man long bikpaia inap oltaim oltaim, o em i laik mekim na bai olgeta man i tanim bel, tasol em i no wok strong long mekim olsem, o em i no save tingim ol man, na ol kain tok olsem. Bilong soim olsem yumi stap gut long Jehova, yumi save sambai long em na kamapim long ples klia olsem em i stap tru; em i gat gutpela na stretpela tingting, em i gat stretpela pasin, em i gat olgeta strong, em i God bilong mekim pasin sori; em i makim taim bilong mekim olgeta samting; na long taim stret olsem em i bin makim, em bai pinisim olgeta pasin nogut na kamapim Paradais long olgeta hap bilong graun. (Saveman 3:1) Bilong mekim olsem, long olgeta taim yumi mas wok long painim rot bilong tokaut long nem bilong Jehova na Kingdom bilong em.
Stap Gut Long Oganaisesen Bilong Jehova
9 Orait nau yumi ken toktok long pasin bilong i stap gut long oganaisesen bilong Jehova. I stret tru long yumi mas i stap gut long en na long “wokboi i gat gutpela tingting,” em ol Kristen i save kisim kaikai bilong spirit long rot bilong ol. (Matyu 24:45-47) Sapos wanpela tok i kamap long ol nius o buk samting bilong Sosaiti Was Taua na yumi no kisim gut o yumi no wanbel long en, bai yumi mekim wanem? Bai yumi bel nogut long dispela na yumi lusim oganaisesen? Sampela i bin mekim olsem taim Wastaua (tok Inglis) bilong planti yia bipo i tok, ol samting bilong nupela kontrak bai kamap insait long Taim Bilong Wan Tausen Yia. Na sampela ol i bel nogut long tok bilong wanpela Wastaua bipo long ol Kristen i no insait long ol samting bilong dispela graun. Ol man i pundaun long ol dispela tok, sapos ol i bin i stap gut long oganaisesen na ol brata bilong ol, bai ol i wetim Jehova i kamapim klia as bilong ol dispela tok, olsem em i bin mekim long taim stret bilong en. Olsem na ol man i stap gut long oganaisesen ol i save stap isi na wetim wokboi i gat gutpela tingting i kamapim sampela save moa long ol samting nau ol i no klia gut long en.
10 Na ol man i stap gut long oganaisesen bilong Jehova long graun, ol i save klia olgeta long ol man i lusim bilip pinis na ol i bikhet na givim baksait long Jehova. Ol Kristen i stap gut long oganaisesen bilong Jehova ol i no laik save long tok bilong ol dispela kain man. Tru, ol man God Jehova i bin makim bilong lukautim wok bilong em long graun, ol i no gutpela olgeta—ol i save popaia. Tasol Baibel i tokim yumi long mekim wanem? Em i tok yumi mas lusim oganaisesen bilong God? Nogat. Sapos yumi laikim tru ol brata, yumi mas i stap gut long oganaisesen, na yumi mas wok yet long “laikim tru ol arapela manmeri bilong God.”—1 Pita 1:22.
Stap Gut Long Ol Elda
11 Sapos ol i mekim wanpela tok o wanpela samting insait long kongrigesen na yumi hatwok long save long as bilong en, pasin bilong i stap gut long ol brata bai helpim yumi na yumi no tingting nogut long ol na skelim as bilong dispela tok o pasin ol i mekim. I gutpela sapos yumi tingim ol gutpela pasin bilong ol elda na ol narapela wanbilip, na yumi no tingim ol liklik pasin kranki bilong ol, a? Tru tumas, yumi mas was gut long ol kain tingting nogut olsem, long wanem, dispela pasin i wankain olsem yumi no stap gut long ol elda! Pasin bilong i stap gut long ol brata bai helpim yumi long bihainim tok bilong Pol, em i tok yumi “no ken tok nogut long wanpela man.”—Taitus 3:1, 2.
12 Ol elda i laik i stap gut long ol brata, olsem na ol i mas tingim wanpela bikpela samting, olsem: Taim wanpela insait long kongrigesen i kamapim wanpela tok o hevi bilong em long wanpela elda, orait sapos elda i stap gut long dispela brata o sista, bai em i no kamapim dispela tok o hevi long ol narapela. Em bai bihainim tok bilong Sindaun 25:9 i tok: “Sapos yu bin harim tok hait long [wanpela] samting, yu no ken autim dispela tok.” Olsem na elda i no ken kamapim long meri bilong em tu!
13 Na i gat ol narapela samting tu i traim pasin bilong ol elda long i stap gut long oganaisesen. Olsem wanem? Ol bai mekim ol samting na bai ol man i ken laikim ol? O ol bai strongim bel na long pasin isi ol i stretim ol man i bin mekim rong, maski ol i wanblut o gutpela pren bilong ol? Ol brata i stap elda ol i laik i stap gut long oganaisesen bilong Jehova, na dispela bai kirapim ol long wok strong long helpim olgeta brata sista em ol i no strong long ol samting bilong spirit. (Galesia 6:1, 2) Yumi mekim gutpela pasin long ol wanwok elda, tasol sapos yumi mas tokaut stret long ol long wanpela samting, pasin bilong i stap gut long oganaisesen bilong Jehova bai kirapim yumi long mekim olsem; wankain olsem Pol i bin tokaut stret long aposel Pita. (Galesia 2:11-14) Tasol ol wasman bilong kongrigesen ol i mas was gut, nogut ol i no bihainim gutpela tingting na ol i mekim wanpela samting, o ol i no mekim wankain pasin long olgeta brata sista, o ol i mekim sampela hatpela pasin, na dispela i mekim na ol brata sista i stap aninit long ol, ol i hatwok long i stap gut long oganaisesen bilong Jehova.—Filipai 4:5.
14 Na i gat ol narapela samting yumi ken mekim bilong i stap gut long kongrigesen na ol elda bilong en. Sapos i gat sampela hevi i kamap insait long kongrigesen, dispela i givim rot long yumi long kamapim bel bilong yumi, em yumi stap gut long Jehova na ol man i stap olsem maus bilong em. (Lukim Wastaua [tok Inglis], Jun 15, 1987, pes 15-17.) Bilong i stap gut long kongrigesen, orait taim kongrigesen i rausim wanpela man, yumi mas sambai long ol elda na yumi no ken wok long skelim skelim olsem i gat as tru na ol i bin rausim em o nogat.
15 Na bilong i stap gut long kongrigesen, yumi mas i go long olgeta 5-pela miting sapos yumi inap. Na tu, yumi mas redim ol tok bai kamap long miting na bekim sampela tok bilong strongim ol narapela sapos i gat rot long mekim.—Hibru 10:24, 25.
Stap Gut Long Poroman Marit
16 Orait yumi mas i stap gut long husat moa? Sapos yumi marit pinis, yumi mas tingim ol tok promis yumi bin mekim long de bilong marit na yumi mas i stap gut long poroman marit bilong yumi. Sapos yumi mekim olsem, bai yumi mekim wankain gutpela pasin long meri o man bilong yumi olsem yumi mekim long ol narapela meri o man. Na yumi no kamapim ol pasin kranki bilong poroman bilong yumi long ol narapela. Yumi save, i no hatwok long toktok planti long ol narapela long ol dispela pasin bilong poroman, tasol i hatwok long toktok gut oltaim wantaim poroman bilong yumi, em samting yumi mas mekim bilong bihainim lo bilong Krais. (Matyu 7:12) Em wanpela bikpela traim bilong ol marit long i stap gut long poroman bilong ol olsem Kristen i mas mekim.
17 Bilong winim dispela traim na i stap gut long poroman, yumi mas abrusim pasin nogut, tasol yumi mas mekim narapela samting tu—yumi mas was gut long tingting na bel bilong yumi. (Song 19:14) Bel i save giamanim yumi, olsem na sapos bel i mangal long painim olkain amamas, bihain bai yumi laik tru long kisim ol dispela amamas. King Solomon i laik kirapim ol marit long i stap gut long poroman bilong ol, olsem na em i givim tok piksa long ol man marit olsem ol i mas ‘dring wara long hul wara bilong ol yet.’ (Sindaun 5:15) Na Jisas i tok: “Sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em.” (Matyu 5:28) Na sapos man marit i wok long lukim ol piksa bilong ol meri i stap skin nating o ol kain piksa nogut olsem, dispela inap kirapim bel bilong em na bai em i mekim pasin pamuk na em i no stap gut moa long meri bilong em. Na meri marit tu, sapos oltaim em i lukim ol stori nating bilong televisen i stori long ol meri marit i prenim narapela man, dispela inap pulim em long mekim pasin pamuk na em i no stap gut moa long man bilong em. Tasol taim yumi stap gut long poroman bilong yumi, dispela i save strongim marit bilong yumi na yumi pas gut wantaim, na narapela i helpim narapela long mekim ol pasin God Jehova i laikim.
Ol Samting Bilong Helpim Yumi
18 Wanem samting bai helpim yumi long i stap gut long Jehova, na oganaisesen bilong em, na kongrigesen, na poroman marit bilong yumi? Wanpela samting em olsem: Yumi mas save, sapos yumi stap gut long ol, orait yumi kamapim klia olsem i stret Jehova i stap Nambawan Bos bilong heven na graun. Yes, sapos yumi stap gut long Jehova na ol narapela em yumi kolim pinis, bai yumi kamapim bel bilong yumi olsem yumi tingim Jehova em i King bilong heven na graun. Olsem bai yumi ken amamas long yumi yet na yumi ken tingting long kisim laip i stap oltaim long nupela taim Jehova bai kamapim. Bilong i stap gut oltaim long Jehova na ol narapela em yumi kolim pinis, yumi ken tingim sampela ol i bin mekim olsem, kirap long Jehova na i kam inap long ol man em stori bilong ol i stap long Baibel na long ol buk na nius samting, na ol yiabuk tu, em Sosaiti Was Taua i wokim.
19 Sapos yumi bilip strong long Jehova na yumi pret long mekim wanpela samting em i no laikim, dispela bai helpim yumi long i stap gut long em na long oganaisesen bilong em na ol narapela tu. Bilong strongim bilip na pasin bilong pret long Jehova, yumi mas wok strong long stadi long Baibel na mekim wok Kristen bilong autim tok. Dispela bai helpim yumi long mekim ol samting i stret wantaim tok bilong Pol long Efesus 4:23, 24, em i tok: “Tingting bilong yupela i mas kamap nupela. Yupela i mas kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.”
20 Sapos yumi pilim tru ol gutpela pasin bilong Jehova, dispela bai helpim yumi long i stap gut long em. Na bikpela samting tru, sapos yumi laikim tumas Papa bilong yumi long heven na yumi tenkyu tru long em long ol gutpela samting em i bin mekim bilong helpim yumi, na yumi laikim em tru long bel olgeta bilong yumi, na long tingting na strong olgeta bilong yumi, dispela bai helpim yumi long i stap gut long em. Na sapos yumi gat dispela mak Jisas i tok bai makim ol disaipel bilong em, olsem yumi laikim tru ol brata, dispela bai helpim yumi long i stap gut long olgeta Kristen insait long kongrigesen na long famili bilong yumi. Sapos yumi no stap gut long ol, dispela i makim olsem yumi tingim yumi yet tasol. Sapos yumi stap gut long ol, dispela i makim olsem yumi no tingim yumi yet tasol.—Mak 12:30, 31; Jon 13:34, 35.
21 Orait yumi ken tok olsem: Pasin bilong i stap gut long narapela, em wanpela pasin tru bilong God Jehova, na Krais Jisas, na olgeta wokman tru bilong Jehova. Sapos yumi laik i stap pren tru bilong God Jehova, yumi mas i stap gut long em—olsem yumi mas bihainim ol stretpela lo bilong em, na givim baksait tru long ol birua bilong em, na autim tok bilong em long ol haus na long kain kain taim na ples, na long dispela pasin yumi sambai long Jehova. Na yumi mas i stap gut long oganaisesen bilong Jehova. Yumi mas i stap gut long kongrigesen bilong yumi, na poroman marit bilong yumi. Sapos yumi mekim olsem, bai yumi insait long wok bilong kamapim klia olsem i stret Jehova i stap King bilong heven na graun, na yumi helpim em long dispela bikpela tok i bin kamap. Olsem bai em i ken orait long yumi na bai yumi kisim prais olsem laip i stap oltaim. Tok Pol i mekim long pasin bilong givim bel long God, em i stret tu long pasin bilong i stap gut long Jehova na ol narapela. Em bai helpim yumi long dispela laip nau yumi stap long en, na long laip bai yumi kisim bihain.—Song 18:25; 1 Timoti 4:8.
Bai Yu Bekim Olsem Wanem?
◻ Yumi ken mekim wanem bilong i stap gut long God?
◻ Yumi mas mekim wanem bilong i stap gut long oganaisesen bilong Jehova?
◻ Olsem wanem ol elda i ken i stap gut long ol brata sista na long oganaisesen?
◻ Ol marit Kristen i mas mekim wanem bilong i stap gut long poroman bilong ol?
◻ Wanem ol pasin bai helpim yumi long i stap gut long Jehova na ol narapela?
[Askim Bilong Stadi]
1. Bilong wanem yumi mas i stap gut long Jehova?
2, 3. Olsem wanem pasin bilong i stap gut long Jehova i poroman wantaim stretpela pasin?
4, 5. Sapos yumi stap gut long Jehova, bai yumi was gut, nogut yumi mekim wanem?
6. Sapos yumi stap gut long Jehova, bai yumi no bung wantaim husat?
7. Sapos yumi stap gut long Jehova, bai yumi mekim wanem long em? Elihu i bin mekim dispela pasin olsem wanem?
8. Bilong wanem yumi mas sambai long Jehova?
9. Bipo wanem sampela tok i bin mekim na ol i kamapim klia olsem ol i no stap gut long oganaisesen bilong Jehova?
10. Sapos yumi stap gut long oganaisesen bilong Jehova, bai yumi no laik save long wanem ol tok?
11. Sapos yumi stap gut long ol elda, bai yumi was gut, nogut yumi kisim wanem kain tingting?
12, 13. Wanem ol samting i traim pasin bilong ol elda long i stap gut long ol brata na long oganaisesen?
14, 15. Wanem ol samting inap traim pasin bilong ol brata sista long i stap gut long kongrigesen na ol elda?
16, 17. Wanem ol samting i traim pasin bilong ol marit long i stap gut long poroman bilong ol?
18. Bilong helpim yumi long i stap gut long Jehova na ol narapela, yumi mas tingim wanem samting?
19. Olsem wanem long bilip na pasin bilong i stap gut long Jehova?
20. Wanem pasin bai helpim yumi long i stap gut long Jehova na ol narapela em yumi gat wok long i stap gut long ol?
21. Yumi ken tok wanem long pasin bilong i stap gut long narapela?
[Piksa long pes 17]
Sapos elda i stap gut long ol brata sista bilong kongrigesen, bai em i no kamapim ol tok o hevi bilong ol long ol narapela
[Ol Piksa long pes 18]
Sapos ol marit i stap gut long poroman bilong ol, dispela bai helpim ol long pas gut wantaim