Mi Lukluk na Tingting Long Prais
EM STORI BILONG EDITH MICHAEL
Long 1930 samting, mipela i sindaun klostu long taun Sen Lui, long Misuri, Amerika, na wanpela Witnes Bilong Jehova i kam. Long dispela taim stret, waia bilong pasim klos long en em i bruk, na ol klinpela waitpela klos bilong Mama i pundaun long graun malumalum. Em i kisim ol buk dispela meri i tilim—em i laik bai meri i lusim em—na em i putim ol long kabot na lusim tingting long ol.
MIPELA i stap long taim bilong hevi bilong mani na ol wok bisnis, na ol i pinisim Papa long wok. Wanpela taim em i laik save, i gat sampela buk i stap na em i ken kaunim? Mama i toksave long em long ol dispela buk. Em i kirap long kaunim, na bihain liklik em i tok: “Mama, dispela em tok i tru!”
Mama i tok: “Em wanpela lotu nating i laik kisim mani wankain olsem ol narapela lotu.” Tasol Papa i kirapim em long sindaun wantaim em na opim Baibel na lukim ol skripsa. Taim em i mekim olsem, em tu i save dispela em tok i tru. Bihain ol i wok long painim ol Witnes na ol i kisim save olsem ol i miting long wanpela haus bung ol i save baim—dispela haus i stap namel long Sen Lui, na sampela lain moa i save baim bilong mekim danis na pati samting long en.
Papa na Mama i kisim mi i go wantaim ol—mi gat tripela krismas. Ol i painim pinis dispela haus, tasol danis i stap. Papa i kisim save long taim bilong ol miting, na bihain mipela i go bek gen. Mipela i kirap tu long go long wanpela Baibel-stadi ol i mekim long olgeta wik na i stap klostu long haus bilong mipela. Ol i mekim long haus bilong dispela meri i bin kam lukim mipela pastaim. Meri i tok, “Yu no laik bringim ol pikinini man, a?” Mama i sem long tokim em ol i no gat su. Tasol bihain em i tokaut long dispela samting, na ol Witnes i kirap na givim su long ol brata bilong mi, na ol i kam long ol miting.
Ol i givim Mama wanpela hap teritori klostu long haus bilong mipela, na em i kirap autim tok long ol haus. Mi go wantaim em, tasol mi save hait baksait long em. Taim em i no lain yet long draivim ka, mipela i save wokabaut winim wanpela kilomita bilong kisim bas i go long ol miting long Sen Lui. Maski ais i pundaun, mipela i no save lusim wanpela miting.
Long 1934, Mama na Papa i kisim baptais. Mi tu mi laik baptais. Mi strong strong long Mama i larim mi, olsem na em i askim wanpela Witnes i lapun liklik long toktok wantaim mi long dispela samting. Em i kamapim planti askim na i mekim long wanpela kain pasin na bai mi inap kisim gut. Em i mekim pinis, na nau em i tokim papamama ol i no ken pasim mi long kisim baptais; nogut dispela i mekim na mi no kamap strong long spirit. Olsem na long yia bihain, taim mi gat sikspela krismas tasol, mi kisim baptais.
Mi laikim tru liklik buk Home and Happiness (Famili na Amamas); buk i stap wantaim mi olgeta taim, na taim mi laik slip mi putim aninit long pilo. Mi strong strong long Mama i mas kaunim dispela buk long mi, inap long taim mi inap kolim olgeta tok bilong en. Skin bilong buk long baksait i gat piksa bilong wanpela liklik meri long Paradais na em i stap wantaim laion. Mi tok mi yet mi dispela liklik meri. Dispela piksa i bin helpim mi long lukluk i go long prais bilong laip long nupela taim God bai kamapim.
Mi meri bilong sem, tasol maski skin i guria, oltaim mi save bekim sampela tok long Stadi Wastaua.
Sori tru, Papa i pret long ol bai pinisim em long wok, olsem na em i no bung moa wantaim ol Witnes. Ol brata tu bilong mi i mekim olsem.
Autim Tok Long Olgeta De
Mama i larim ol painia, em ol Witnes i autim tok long olgeta de, long putim trela bilong ol insait long banis bilong mipela, na taim skul i pinis long apinun, mi save go wantaim ol long autim tok. I no longtaim na mi laik mekim wok painia, tasol Papa i no laik; em i ting mi mas kisim sampela skul moa bilong graun. Mama i toktok gut wantaim em na bihain em i orait long mi wok painia. Olsem na long Jun 1943, taim mi gat 14 krismas, mi kirap mekim wok autim tok long olgeta de. Bilong helpim famili long baim kaikai samting, mi kisim wok haptaim, na sampela taim mi wok olgeta de. Maski mi mekim ol dispela wok, mi save autim tok inap 150 aua long olgeta mun.
Bihain mi painim wanpela poroman painia, Dorothy Craden, em i bin kirap mekim wok painia long Janueri 1943, taim em i gat 17 krismas. Pastaim em i wanpela strongpela Katolik, tasol em i stadi Baibel inap 6-pela mun, na em i kisim baptais. Inap planti yia em i save strongim bel bilong mi, na mi tu mi strongim em. Mipela i pas gut wantaim olsem tupela susa tru.
Kirap long 1945, mipela i wok painia wantaim long hap bilong Misuri long ol liklik taun i no gat kongrigesen. Long Boling Grin, mipela i stretim wanpela haus bung; Mama i kam helpim mipela. Long olgeta wik, mipela i save go long ol haus long taun na singautim ol man long kam harim wanpela pablik-tok em mipela i bin askim ol brata long Sen Lui long kam mekim. Foti i go inap 50 manmeri i save kam long olgeta wik. Bihain mipela i go long Lusiana na mekim wankain samting; mipela i baim wanpela haus bung bilong ol Meson bilong mekim pablik-tok. Bilong helpim mipela long baim ol dispela haus, mipela i save putim ol bokis kontribusen, na long olgeta wik i gat mani inap long baim ol samting.
Bihain mipela i go long biktaun Meksiko, long Misuri, na baim rum long wanpela stua. Mipela i stretim gut na bai liklik kongrigesen long dispela hap i ken bung long en. Mitupela i slip long sampela rum ol i bin skruim long dispela stua. Na tu, mipela i bin helpim ol long stretim rot bilong putim ol pablik-tok long Meksiko. Bihain mipela i go long nambawan biktaun bilong provins, em Jefesen Siti, na olgeta moningtaim namel long wik mipela i go lukim ol bikman long ofis bilong ol. Mipela i sindaun wantaim Stella Willie long wanpela rum antap long Haus Kingdom; em i lukautim gut mipela olsem wanpela mama i lukautim pikinini.
Bihain mitripela i lusim Jefesen Siti na go long tupela taun Festus na Kristal Siti, narapela i stap klostu long narapela. Mipela i sindaun long wanpela haus kakaruk ol man i bin stretim na i kamap wanpela ples slip na i stap baksait long haus bilong wanpela famili i laik harim tok bilong Baibel. I no gat wanpela man i baptais, olsem na mipela yet i lukautim ol miting. Mipela i kisim wok haptaim—mipela i baim i go ol samting bilong penim long pes. Mipela i no gat planti samting bilong skin. Na mipela i sot long mani bilong stretim ol su i gat hul long en, olsem na long olgeta moningtaim mipela i save putim ol strongpela pepa insait long ol su, na long olgeta nait, mipela i save wasim dres bilong mipela wan wan yet—mipela wan wan i gat wanpela dres tasol.
Long kirap bilong yia 1948, taim mi gat 19 krismas, mitupela Dorothy i kisim pas i singautim mipela long go long namba 12 klas bilong Wastaua Baibel Skul Bilong Gileat bilong lain long kamap misineri. Mipela i skul inap 5-pela mun, na long Februeri 6, 1949, mipela i mekim bung bilong winim skul. Em i taim bilong bikpela amamas. Long dispela taim, papamama i sindaun long Kalifonia, tasol maski dispela hap i stap longwe tru, Mama i kam long dispela bung.
Mipela i Go Long Ples Wok
Ol i salim 28 misineri i winim skul i go long Itali—mitupela Dorothy na 4-pela moa i go long biktaun Milan. Long Mas 4, 1949, mipela i lusim Nu Yok long wanpela sip bilong Itali, em Vulcania. Sip i raun inap 11-pela de, na biksi i mekim na mipela planti i gat sik. Brata Benanti i kam bungim mipela long taun Jenoa na bringim mipela long tren i go bek wantaim em long Milan.
Taim mipela i kamap pinis long haus misineri long Milan, mipela i lukim sampela plaua em wanpela yangpela meri Itali i bin putim long ol rum wan wan bilong mipela. Sampela yia bihain, dispela meri, Maria Merafina, em i go long Gileat, na bihain em i kam bek long Itali, na mitupela i wok wantaim long wanpela haus misineri!
Long moningtaim bihain long mipela i kamap pinis long Milan, mipela i sanap klostu long windo long rum waswas na lukluk i go ausait. Mipela i lukim wanpela bikpela haus em bom i bin bagarapim. Wanpela balus bilong Amerika i bin popaia long tromoi bom na i kilim i dai 80 famili insait long dispela haus. Narapela taim ol i tromoi bom long wanpela haus faktori, tasol bom i abrus na i pundaun long skul na i kilim i dai 500 pikinini. Olsem na ol man long dispela hap ol i no amamas tumas long ol man bilong Amerika.
Ol manmeri i les long pait. Planti ol i tok, sapos narapela pait i kirap, bai ol i no go long ples bilong hait long ol bom, nogat; ol bai stap long haus tasol na opim ges na kilim i dai skin bilong ol yet. Mipela i tokim ol olsem mipela i no wanlain bilong gavman bilong Amerika o sampela narapela gavman ol man i kamapim, nogat; mipela i kam bilong tokim ol man long Kingdom bilong God, na dispela Kingdom bai pinisim olgeta pait na ol hevi na pen ol dispela pait i save kamapim.
Long biktaun Milan, i gat wanpela kongrigesen tasol, inap olsem 20 manmeri, na ol i save bung long haus misineri. Ol i no redim yet ol teritori bilong autim tok, olsem na mipela i kirap long autim tok long wanpela bikpela haus i gat planti rum insait long en. Long namba wan dua, mipela i bungim Mista Giandinotti; em i laik bai meri bilong em i lusim misin, olsem na em i kisim wanpela buk bilong mipela. Misis Giandinotti i gat gutpela bel, na em i gat planti askim. Em i tok: “Bai mi amamas taim yu save long tok ples Itali na bai yu inap lainim mi long ol tok bilong Baibel.”
Rup long rum bilong ol i antap moa yet na lait i no lait tumas, olsem na long nait, dispela meri i save sanapim sia antap long tebol bambai em i ken sindaun klostu long lait na kaunim Baibel. Em i askim mipela: “Sapos mi stadi wantaim yu long Baibel, bai mi inap go yet long lotu?” Mipela i tok em samting bilong em yet. Long Sande long moningtaim em i save go long lotu bilong em, na long apinun em i kam long ol miting bilong mipela. Bihain liklik em i tok, “Mi no ken go moa long lotu.”
Mipela i askim em: “Bilong wanem?”
“Long wanem, ol i no lainim ol man long Baibel—mi stadi Baibel wantaim yupela na mi painim pinis tok i tru.” Em i kisim baptais na em i stadi wantaim planti meri ol i save go lotu long olgeta de. Bihain em i tok, sapos mipela i bin tokim em long no ken go long lotu, ating bai em i no stadi moa wantaim mipela na nau bai em i no gat rot long save long tok i tru.
Nupela Ples Wok
Bihain ol i salim mitupela Dorothy, na 4-pela narapela misineri, i go mekim wok long biktaun Triest—long dispela taim i gat ami bilong Briten na Amerika i stap. Ol Witnes i 10-pela tasol, tasol bihain dispela lain i go bikpela. Mipela i autim tok long Triest inap 3-pela yia, na taim mipela i lusim dispela taun, i gat 40 pablisa bilong Kingdom i stap, na 10-pela ol i painia.
Bihain ol i salim mipela i go long biktaun Verona; i no gat kongrigesen long dispela hap. Tasol bihain misin i strong long gavman i rausim mipela, na mipela i lusim Verona. Ol i salim mitupela Dorothy i go long Rom. Mipela i baim wanpela rum i gat sia tebol samting long en, na mipela i autim tok long hap klostu long Vatiken. Taim mipela i stap long dispela hap, Dorothy i go long Lebanon bilong maritim John Chimiklis. Inap 12-pela yia mipela i bin wok wantaim, olsem na mi sori tru em i lusim mi.
Long 1955 ol i kisim wanpela nupela haus misineri long narapela hap long Rom, long wanpela rot ol i kolim Rot Nu Apian. Wanpela bilong ol 4-pela misineri i stap long dispela haus, em Maria Merafina, em dispela meri i bin putim ol plaua long rum bilong mipela long dispela nait stret mipela i bin kam long Milan. Wanpela nupela kongrigesen i kamap long dispela hap bilong taun. Bihain long kibung intenesenel long Rom, mi amamas long go long kibung long Nurembek long Jemani. Mi amamas nogut tru long bungim ol brata sista i bin karim bikpela hevi aninit long gavman nogut bilong Hitler!
Go Bek Long Amerika
Long 1956, mi gat sik, olsem na mi go bek long Amerika. Tasol mi wok long lukluk yet long prais bilong mekim wok bilong Jehova long nau na long olgeta taim bihain long nupela taim em bai kamapim. Mi gat tingting long go bek long Itali. Tasol mi bungim Orville Michael, em i wok long nambawan hetkota bilong ol Witnes Bilong Jehova long Bruklin, Nu Yok. Bihain long kibung intenesenel long Nu Yok Siti long 1958, mitupela i marit.
Bihain liklik mipela i go long Frant Royal, Vejinia, na mipela i amamas long wok wantaim wanpela liklik kongrigesen. Mipela i stap long wanpela liklik haus long baksait bilong Haus Kingdom. Long Mas 1960, mipela i go bek long Bruklin bilong kisim wok mani bilong stretim ol dinau bilong mipela. Mipela i kisim wok long nait long ol narapela narapela haus mani na bai mipela inap mekim yet wok bilong God long olgeta de.
Taim mipela i stap long Bruklin, papa bilong mi i dai, na mama bilong man bilong mi i kisim sik strok. Olsem na mitupela i pasim tok long go long Origen na bai mipela inap stap klostu long tupela mama bilong mipela. Mitupela i kisim wok haptaim na mekim yet wok painia long dispela hap. Long 1964, mipela na tupela mama i kisim ka na brukim Amerika—mipela i laik go long miting bilong olgeta yia bilong Sosaiti Was Taua long Pitsbek, Pensilvenia.
Taim mipela i raun long Rod Ailan, wanpela wasman sekit, Arlen Meier, na meri bilong em, ol i kirapim mipela long i go stap long nambawan taun bilong provins, em Providens, long wanem, i no gat planti pablisa bilong Kingdom long dispela hap. Tupela mama i strongim mipela long kisim dispela nupela wok, olsem na taim mipela i kamap gen long Origen, mipela i baim planti samting bilong haus i go long ol man, na mipela i lusim Origen na i go.
Go Bek Long Skul Gileat
Long 1965, mipela i go long wanpela kibung long Yanki Stediam. Mipela i wokim pepa bilong i go long Skul Gileat olsem tupela marit. Wanpela mun bihain, mipela i kirap nogut long kisim ol aplikesen, em mipela i mas salim i go bek insait long 30 de. Mi tingting planti, nogut mi go long wanpela longwe kantri, long wanem, Mama i sik liklik. Tasol Mama i strongim mi olsem: “Wokim ol dispela aplikesen. Yu mas kisim olgeta wok Jehova i givim long yu!”
Em nau, bel bilong mi i no gat tok moa. Mipela i wokim ol aplikesen na salim i go bek. Mipela i kirap nogut long ol i singautim mipela long go long namba 42 klas, em i kirap long Epril 25, 1966! Long dispela taim, Skul Gileat i stap long Bruklin, Nu Yok. Inap olsem 5-pela mun bihain, long Septemba 11, 1966, mipela ol 106 i winim skul.
Kisim Wok Long Ajentina
Tupela de bihain long bung bilong winim skul, mipela i kisim balus bilong Peru na go long Ajentina. Mipela i kamap pinis long Buenos Aires, na wasman bilong brens-ofis, Charles Eisenhower, i bungim mipela long ples balus. Em i helpim mipela long stretim ol samting wantaim ol lain bilong kastam, na nau em i kisim mipela i go long brens-ofis. Mipela i gat wanpela de tasol bilong stretim ol samting; orait nau skul i kirap bilong lainim mipela long tok Spen. Mipela i stadi long tok Spen inap 11-pela aua long olgeta de inap wanpela mun. Long namba 2 mun, mipela i stadi long dispela tok ples inap 4-pela aua long olgeta de na mipela i kirap long mekim wok autim tok.
Mipela i stap long Buenos Aires inap 5-pela mun na nau ol i salim mipela i go long Rosario, em wanpela bikpela taun i stap longwe inap 4-pela aua long tren. Mipela i mekim wok inap 15-pela mun long dispela taun, na nau ol i salim mipela i go long Santiago del Estero long hap not, em wanpela biktaun i stap long ples hat long hap bilong wesan. Long Janueri 1973, taim mipela i stap long dispela hap, mama bilong mi i dai. Inap 4-pela yia mi no bin lukim em. Samting i strongim mi long dispela taim mi krai sori, i olsem: Mi bilip strong long kirap bek, na tu, mi save, em laik bilong Mama na mi no bin lusim ples wok bilong mi.—Jon 5:28, 29; Aposel 24:15.
Ol man long Santiago del Estero ol i mekim gutpela pasin long mipela olsem pren, na i no hatwok long kirapim ol nupela Baibel-stadi. Taim mipela kam nupela long 1968, i gat 20 o 30 tasol i kam long ol miting; tasol 8-pela yia bihain, winim 100 i insait long kongrigesen bilong mipela. Na tu, long ol taun i stap klostu, i gat tupela nupela kongrigesen na i gat 25 i go inap 50 pablisa.
Go Bek Gen Long Amerika
Mipela i gat sik, olsem na long 1976 ol i salim mipela i go bek long Amerika—long Fayetvil, Not Karolaina—bilong mekim wok painia salim. I gat planti man long dispela hap i save tok Spen, ol i bin kam long Sentral na Saut Amerika, Ripablik Dominika, Pueto Riko, na Spen tu. Mipela i gat planti Baibel-stadi, na bihain i gat wanpela kongrigesen long tok Spen i kamap. Klostu 8-pela yia mipela i mekim wok long dispela hap.
Tasol tambu meri bilong mi i lapun na hap skin bilong em i bagarap, olsem na mipela laik stap long hap i klostu long em. Em i stap long Potlan, Origen, olsem na mipela i kisim nupela ples wok—ol i salim mipela i go wok wantaim kongrigesen tok Spen long Vankuva, Wosington, em i no longwe tumas long Potlan. Taim mipela i kam nupela long Disemba 1983, kongrigesen i liklik, tasol nau planti nupela man i wok long kam.
Long Jun 1996, mi bin mekim wok bilong God long olgeta de inap 53 yia, na long Janueri 1, 1996, man bilong mi i bin mekim olsem inap 55 yia. Insait long ol dispela planti yia, mi bin amamas long helpim planti handet manmeri long kisim save long ol tok i tru bilong Baibel na ol i dediket long Jehova. Planti ol i mekim wok elda na wok painia samting.
Sampela taim ol man i laik save, mi bel hevi mi no gat pikinini o olsem wanem? Tasol Jehova i bin mekim gut long mi, na mi gat planti pikinini na tumbuna pikinini bilong spirit. Tru tumas, i stap bilong mi i gat as bilong en na mi bin kisim planti gutpela blesing long mekim wok bilong Jehova. Mi pilim wankain olsem pikinini meri bilong Jepta—inap planti yia em i wok long tempel na em i no gat pikinini, long wanem, em i mekim wanpela gutpela wok tru.—Hetman 11:38-40.
Mi tingim yet dispela taim mi liklik yet na mi dediket long Jehova. Dispela piksa bilong Paradais i klia yet long tingting bilong mi, wankain olsem taim mi liklik. Mi lukluk na tingting yet long prais bilong laip oltaim long nupela taim God bai kamapim. Tru tumas, mi gat laik long mekim wok bilong Jehova inap oltaim oltaim—i no long 50 yia tasol—aninit long Kingdom bilong em.
[Piksa long pes 23]
Dorothy Craden, han bilong em i stap long sol bilong mi, na ol wanwok painia long 1943
[Piksa long pes 23]
Long Rom, Itali, wantaim ol wanwok misineri long 1953
[Piksa long pes 25]
Mi wantaim man bilong mi