Lidia—Gutpela Meri i Save Lotuim God

KIRAP long bipo yet ol wokman bilong trupela God i save mekim gut long ol man, olsem singautim ol i kam long haus bilong ol. (Stat 18:​1-8; 19:​1-3) Dispela kain pasin bilong mekim gut long ol man, em i save kirap long bel bilong man na i kirapim em long laikim na mekim gutpela pasin long ol man bilong narapela ples, na long nau tu dispela gutpela pasin em i wanpela mak bilong lotu Kristen tru. Olgeta man i laik lotu long God long pasin em i laikim, ol i mas i gat dispela pasin.​—⁠Hibru 13:2; 1 Pita 4:⁠9.

Wanpela meri, em Lidia, em i stap olsem gutpela piksa tru long pasin bilong mekim gut long ol man. Taim ol misineri Kristen i go long Filipai, Lidia i “strong tumas” long ol i mas i stap long haus bilong em. (Aposel 16:15) Baibel i mekim liklik stori tasol long Lidia, tasol dispela liklik stori inap strongim bel bilong yumi. Em inap strongim yumi olsem wanem? Lidia em i husat? Yumi save long wanem ol stori bilong em?

“Wok Bisnis Long Retpela Laplap”

Lidia i sindaun long Filipai, em nambawan biktaun bilong Masedonia. Tasol em i bilong Taiataira, em i wanpela biktaun long hap bilong Lidia, long Esia Maina long hap bilong wes. Long dispela as, sampela i ting ol i bin givim dispela nem “Lidia” long em long Filipai. Yumi ken tok, em i “meri bilong Lidia,” olsem dispela meri em Krais Jisas i bin autim tok long em, ol i bin kolim em “meri bilong Samaria.” (Jon 4:⁠9) Lidia i save wok bisnis long “retpela laplap.” (Aposel 16:​12, 14) Long Taiataira na Filipai long bipo, i gat ol man bilong wokim pen bilong laplap. I gat sampela stori bilong dispela long ol ston i gat rait long en, em ol man i bin kamautim taim ol i digim graun bilong painim ol samting bilong bipo. Yumi ken ting olsem Lidia i bin lusim ples bilong em na go long Filipai bilong mekim dispela wok bisnis bilong em long retpela laplap, o wanpela kampani long Taiataira i save wokim ol pen bilong laplap ol i salim em i go long Filipai bilong mekim wok olsem maus bilong dispela kampani.

I gat kain kain samting ol inap kisim dispela kain retpela pen long en. Wanpela i gat bikpela pe tru, em ol i bin kisim long ol samting bilong solwara olsem gam o kramsel samting. Wanpela man bilong raitim stori em i bin stap long taim bilong ol aposel, nem bilong em Masel, em i tok, bilong baim wanpela longpela saket ol i bin penim long retpela pen bilong Tair (long dispela ples tu ol i bin wokim dispela kain pen), man i mas tromoi olsem 2,500 denari samting, em wankain olsem pe bilong wanpela wokboi em i bin wok inap 2,500 de. Yumi save, i no planti man inap baim ol kain gutpela klos olsem​—⁠em samting ol maniman tasol inap baim. Olsem na yumi ken ting, Lidia i gat planti mani liklik na gutpela sindaun. Tasol maski em i gat planti samting o nogat, em inap givim ples slip long aposel Pol wantaim ol poroman bilong em​—⁠olsem Luk, Sailas, Timoti, na ating sampela moa.

Pol i Autim Tok Long Filipai

Long yia 50 C.E. samting, em namba wan taim Pol i bin go long Yurop, na em i kirap autim tok long Filipai.a Taim Pol i kamap long wanpela taun bipo em i no bin go long en, em i save go long haus lotu bilong ol Juda na autim tok long ol Juda na ol man bilong ol narapela lain i bihainim lotu Juda, em ol i save bung long ol dispela haus lotu. (Skelim wantaim Aposel 13:​4, 5, 13, 14; 14:⁠1.) Tasol olsem sampela i tok, lo bilong ol Rom i tambuim ol Juda long mekim lotu bilong ol insait long “ples holi” bilong Filipai. Olsem na taim ol misineri i stap “sampela de” long dispela taun, long de Sabat ol i go long wanpela wara, em ol i ting klostu long dispela wara i gat ples bilong mekim beten. (Aposel 16:​12, 13) Ating dispela wara em wara Gengitis. Long dispela hap ol misineri i painim ol meri tasol, na wanpela bilong ol em Lidia.

“Em i Save Lotu Long God”

Lidia “i save lotu long God,” tasol ating em i bihainim lotu Juda na em i wok long painim tok i tru bilong lotu. Lidia i gat gutpela wok mani, tasol em i no wok long kisim planti samting bilong skin. Em i makim taim bilong mekim ol samting bilong spirit. “Bikpela i tanim bel bilong em, na em i putim yau long dispela tok Pol i mekim.” Lidia i kisim dispela tok i tru na “em i kisim baptais, na ol wanhaus bilong en wantaim.”​—⁠Aposel 16:​14, 15.

Baibel i no tokaut olsem ol dispela wanhaus bilong Lidia ol i husat. Na Baibel i no stori long man bilong em, olsem na ating em i singel o man bilong em i dai pinis. Ating “ol wanhaus bilong en” em ol wanblut, tasol dispela tok “ol wanhaus” em inap makim tu ol wokboi o wokmeri nating o ol narapela wokboi. Tasol olgeta tok Lidia i lainim, em i wok strong long autim dispela tok long ol lain i sindaun long haus bilong em. Na ating em i bin kisim bikpela amamas tru taim ol i bilip long dispela tok na ol i kirap bihainim trupela bilip!

“Em i Strong Tumas Long Mipela”

Taim ol misineri i no bin bungim yet Lidia, ating ol i mas baim rum long ol haus pasindia long mani bilong ol yet. Tasol Lidia i amamas long em inap givim ples slip long ol. Em i strong tumas long ol i mas i kam, na dispela i makim olsem Pol na ol poroman bilong em i no tok orait hariap long go long haus bilong em. Bilong wanem? Long wanem, Pol i laik “autim gutnius nating long ol manmeri” na em i no laik kisim pe long en, nogut em i mekim wok nogut long namba em i holim long dispela wok, na tu, em i no laik givim hevi long wanpela man. (1 Korin 9:​18; 2 Korin 12:14) Tasol Luk i tok moa olsem: “Em i kisim baptais, na ol wanhaus bilong en wantaim . . . na em i tokim mipela, ‘Sapos yupela i ting mi bilip tru long Bikpela, orait yupela i ken i kam i stap long haus bilong mi.’ Na em i strong tumas long mipela, na mipela i bihainim tok bilong em.” (Aposel 16:15) Lidia i tingting strong olsem em i mas i stap gut long Jehova, na taim em i singautim ol i kam i stap long haus bilong em, ating dispela i kamapim strongpela bilip bilong em. (Skelim wantaim 1 Pita 4:⁠9.) Lidia i stap olsem gutpela piksa tru! Orait, olsem wanem long yumi? Ol samting bilong skin yumi holim, yumi save mekim wok long en bilong helpim wok bilong autim gutnius?

Ol Brata Long Filipai

Bihain Pol i rausim spirit nogut long wokmeri nating na em wantaim Sailas i kalabus. Orait taim tupela i lusim kalabus, ol i go bek long haus bilong Lidia na ol i bungim sampela brata i stap long haus. (Aposel 16:40) Ating ol bilipman long dispela nupela kongrigesen long Filipai ol i save mekim ol miting bilong ol long haus bilong Lidia. I stret yumi ken ting, bihain tu haus bilong em i stap olsem ples ol i bung long en bilong mekim wok bilong God long dispela taun.

Dispela pasin bilong Lidia long mekim gut long ol misineri, em pasin bilong olgeta long dispela kongrigesen. Maski ol Kristen long Filipai i stap rabis, sampela taim ol i bin salim ol samting long Pol em i sot long en, na Pol i amamas tru long dispela.​—⁠2 Korin 8:​1, 2; 11:9; Filipai 4:​10, 15, 16.

Long pas Pol i salim long ol Filipai long yia 60-​61 C.E. samting, em i no bin kolim nem bilong Lidia. Baibel i no mekim sampela stori moa long em bihain long dispela stori i stap long Aposel sapta 16. Tasol sotpela stori Baibel i mekim long dispela strongpela meri i save kirapim yumi na yumi laik bihainim dispela pasin bilong mekim gut long ol man. (Rom 12:13) Yumi tenkyu tru long yumi gat ol Kristen olsem Lidia i stap namel long yumi! Pasin bilong ol i save strongim pasin bilong mekim gut long narapela na pasin pren insait long kongrigesen, na dispela i save givim biknem long God Jehova.

[Futnot]

[Blok long pes 28]

I Stap Bilong Ol Juda Long Filipai

Ol Juda na ol man bilong ol narapela lain i bihainim lotu Juda long Filipai, ating ol i gat hatwok long i stap bilong ol. Ating sampela i bel nogut long ol Juda. Yumi ken ting olsem, long wanem, klostu long taim Pol i go long Filipai, King Klodius i bin rausim ol Juda long Rom.​—⁠Skelim wantaim Aposel 18:⁠2.

Taim Pol na Sailas i oraitim dispela wokmeri i gat spirit nogut i stap long em, ol man i holimpas tupela na kisim ol i go long kot. Nau ol bos bilong dispela wokmeri i no gat rot long kisim bikpela mani long wok bilong em, olsem na ol i laik kirapim bel bilong ol wanples em ol i no save laikim ol Juda, na ol dispela bos i tokim ol: “Dispela tupela man i bilong lain Juda. Tupela i wok long kirapim trabel long taun bilong yumi. Na tupela i laik pulim ol manmeri long bihainim sampela pasin em i tambu long yumi ol man bilong kantri Rom i mekim.” Olsem na ol i paitim Pol na Sailas long kanda na putim tupela long kalabus. (Aposel 16:​16-​24) Long kain ples olsem, ol man i laik lotuim Jehova, em God bilong ol Juda, na mekim long ples klia, ol i mas i gat strongpela bel na i no pret. Tasol ating Lidia i no tingting planti long i stap narapela kain.

[Ol Piksa long pes 27]

Ol brukpela haus samting bilong bipo long Filipai