Stap Tambu Long Kaikai—Yu Ting Em i Bilong Bipo Tasol?
MRUDULABEN, wanpela meri India i gat 78 krismas na em i gat planti samting bilong skin, em i tok: “Long olgeta Mande, kirap long taim mi gat 13 krismas samting, mi save stap tambu long kaikai.” Dispela em i hap wok lotu bilong em, olsem wanpela rot bilong helpim marit bilong em long i stap gutpela na skin bilong ol pikinini i stap strong, na tu, em i bilong lukautim man bilong em na bai hevi i no ken painim em. Nau man bilong em i dai pinis, tasol long olgeta Mande em i save stap tambu yet long kaikai na bai em i no ken sik tumas, na ol pikinini bilong em i ken kisim planti samting bilong skin. Wankain olsem dispela meri, klostu olgeta meri Hindu ol i bihainim pasin bilong i stap tambu long kaikai.
Prakash, wanpela bisnisman i lapun liklik na i stap long Mumbai (Bombe), India, em i tok, long olgeta yia, long olgeta Mande bilong mun Sawan (Savan), em i stap tambu long kaikai. Long kalenda bilong ol Hindu, dispela mun em i olsem bikpela samting bilong lotu. Prakash i stori olsem: “Ol samting bilong lotu i as na mi kirap bihainim pasin bilong stap tambu long kaikai, tasol nau i gat narapela as na mi bai mekim yet; em i save helpim skin bilong mi long stap strong. Mun Sawan i save kamap klostu long taim bilong bikpela ren i laik pinis, olsem na taim mi no kaikai, dispela i helpim skin bilong mi long rausim ol sik em ol man i save kisim long taim bilong ren.”
Sampela i pilim olsem pasin bilong stap tambu long kaikai em i save helpim skin na tingting bilong man na helpim em long ol samting bilong spirit. Em olsem buk Grolier International Encyclopedia i tok: “Ol saveman long nau i kisim save olsem pasin bilong i stap tambu long kaikai em inap helpim skin bilong man, na taim man i mekim stret, dispela inap helpim em long tingim gut ol samting na pilim tru, winim bilong bipo.” Ol man i tok, saveman bilong Grik, em Pleto, em i save stap tambu long kaikai i go inap 10-pela de samting, na tu, saveman bilong bungim ol namba, em Paitagoras, em i save tokim ol sumatin bilong em long ol i mas stap tambu long kaikai paslain long taim em i laik skulim ol.
Long sampela man, pasin bilong i stap tambu long kaikai i olsem: Inap wanpela hap taim ol i makim pinis, ol i no kaikai o dring wara liklik; tasol sampela, taim ol i stap tambu long kaikai, ol i dring wara. Na planti man i ting sapos oltaim ol i lusim kaikai bilong moningtaim o belo samting o lusim sampela kain kaikai, dispela em i olsem pasin bilong i stap tambu long kaikai. Tasol sapos longtaim tru man i no kaikai na i no gat man i bosim dispela samting em i mekim, bodi bilong em inap bagarap. Wanpela niusman, Parul Sheth, i tok, taim bodi i mekim wok pinis long ol kabohaidret long skin bilong en, nau bodi i wok long senisim ol protin bilong masol i kamap glukos, na bihain bodi i kisim ol gris long skin. Taim bodi i senisim ol gris i kamap glukos, sampela marasin nogut ol i kolim keton i kamap long bodi. Taim ol keton i kamap planti, ol i go kamap long kru long het na bagarapim ol liklik rop wailis. Sheth i tok, “Nau pasin bilong stap tambu long kaikai em inap bagarapim yu tru. Ating tingting bilong yu i no wok gut moa, na yu no save yu stap we . . . [Em inap mekim na] tingting bilong yu i dai, na bihain moa bai yu dai tru.”
Wanpela Helpim na Wanpela Samting Bilong Lotu
Ol man i bin mekim bikpela wok long pasin bilong i stap tambu long kaikai bilong kamapim laik bilong ol long ol samting bilong wok politik o bilong helpim sindaun bilong ol man. Wanpela man long India i bin mekim bikpela wok long dispela pasin, em Mohandas K. Gandhi. Planti handet milion manmeri ol i laikim em na em i gat nem, olsem na em i mekim wok long pasin bilong i stap tambu long kaikai bilong pulim planti Hindu bilong India long bihainim tingting bilong em. Gandhi i stori long taim em i stap tambu long kaikai bilong stretim wanpela kros i bin kamap namel long ol wokman na papa bilong ol faktori, na em i tok: “Dispela i mekim na kros i dai na ol i kamap wanbel. Papa bilong ol faktori i bel sori . . . Mi stap tambu long kaikai inap 3-pela de tasol na ol i pinisim straik.” Taim presiden bilong Saut Afrika, em Nelson Mandela, i bin kalabus inap sampela yia long wok politik bilong em, em i stap tambu long kaikai inap 5-pela de.
Tasol ol samting bilong lotu i as na planti man i stap tambu long kaikai. Pasin bilong i stap tambu long kaikai em i wanpela bikpela wok lotu bilong ol Hindu. Buk Fast and Festivals of India i tok, long sampela de ol i makim pinis, “ol i no kaikai wanpela samting . . . na wara tu ol i no kisim. Ol man wantaim ol meri ol i stap tambu tru long kaikai na wara . . . bambai ol i ken kisim amamas na planti samting bilong skin, na ol rong na ol sin bilong ol i ken tekewe.”
Planti man bilong lotu Jain ol i bihainim pasin bilong i stap tambu long kaikai. Nius The Sunday Times of India Review i tok: “Long Bombe [Mumbai], wanpela muni [olsem saveman] bilong lotu Jain em i bin dring tupela kap wara tasol ol i boilim pinis, long olgeta wan wan de—inap 201 de. Em i lusim 33 kilogram.” Tasol sampela man i stap tambu olgeta long kaikai i go i go na ol i dai; ol i ting long dispela rot bai God i kisim bek ol.
Ol manmeri i bikpela pinis na bihainim lotu Islam, ol i mas i stap tambu long kaikai long taim bilong mun Ramadan. Long olgeta de long dispela mun, kirap long taim san i kam antap na i go inap san i go daun, ol i tambu long kaikai na wara. Insait long dispela mun, sapos man i gat sik o em i raun long wanpela hap, orait bihain em i mas inapim ol de em i no bin i stap tambu long kaikai. Taim bilong Len em inap 40 de paslain long taim bilong Ista, na sampela bilong ol lotu i gat nem Kristen ol i stap tambu long sampela kaikai insait long dispela hap taim. Planti lain bilong lotu ol i stap tambu long kaikai long sampela narapela de.
Tru tumas, pasin bilong i stap tambu long kaikai em i stap yet. Planti lotu i bihainim dispela pasin, olsem na sampela askim i kamap, olsem: God i laik bai yumi mas i stap tambu long kaikai? I gat sampela taim na Kristen inap tingting long i stap tambu long kaikai? Dispela samting inap helpim ol? Stori i kamap bihain long dispela bai stori long ol dispela askim.
[Piksa long pes 4]
Mohandas K. Gandhi i bin mekim wok long pasin bilong i stap tambu long kaikai bilong kamapim laik bilong em long ol samting bilong wok politik na bilong helpim sindaun bilong ol man
[Piksa long pes 4]
Ol man bilong lotu Islam ol i save stap tambu long kaikai long mun Ramadan
[Kredit Lain]
Garo Nalbandian