Autim Tok Long Bel Isi God i Save Givim
“Man i . . . bringim gutpela tok i kam, lek bilong em i naispela tru; em man bilong autim tok bilong bel isi.”—AISAIA 52:7, NW.
I GAT gutpela tok ol man i mas autim! Em tok bilong bel isi—bel isi tru. Em tok bilong rot bilong kisim bek ol man, na em i samting bilong Kingdom bilong God. Long bipo tru profet Aisaia i raitim sampela tok long bel isi, na dispela tok bilong em i no bin lus—yumi ken lukim long Aisaia 52:7 (NW), em i tok: “Man i ran i kam long ol ples maunten bilong bringim gutpela tok i kam, lek bilong em i naispela tru; em man bilong autim tok bilong bel isi, na gutpela tok bilong samting i gutpela moa, em man bilong autim tok long God i kisim bek ol, na em i tokim Saion olsem: ‘God bilong yu em i kamap king pinis!’ ”
2 Jehova i stiaim tingting bilong profet Aisaia long raitim dispela tok bilong helpim lain Israel bilong bipo na bilong helpim yumi long nau. Wanem insait bilong dispela tok? Taim Aisaia i raitim, ating longtaim ol Asiria i kisim lain bilong Israel, em kingdom long hap bilong not, i go kalabus pinis. Bihain, lain bilong Juda, em kingdom long hap bilong saut, bai i go kalabus long Babilon. Long dispela taim bipo, bikpela pen na hevi i bin painim dispela lain, long wanem, ol i no bin bihainim tok bilong Jehova na dispela i mekim na ol i no stap bel isi wantaim God. Olsem Jehova i tokim ol pinis, ol bikpela rong ol i mekim i wok long kamap olsem banis namel long ol na God bilong ol. (Aisaia 42:24; 59:2-4) Tasol long rot bilong Aisaia, Jehova i tok profet olsem, bihain ol dua bilong Babilon bai op. Lain bilong God bai kamap fri na ol inap i go bek long as ples bilong ol na wokim gen haus bilong Jehova. God bai kisim bek Saion, na ol bai lotuim gen trupela God long Jerusalem.—Aisaia 44:28; 52:1, 2.
3 Dispela tok promis Jehova i mekim long kisim bek lain bilong em, em i wanpela tok profet tu bilong bel isi. Taim ol Israel i go bek long graun Jehova i bin givim long ol, dispela bai kamapim klia olsem God i bin marimari long ol na ol i bin tanim bel, na em i makim olsem ol i stap wanbel gen wantaim God.—Aisaia 14:1; 48:17, 18.
“God Bilong Yu Em i Kamap King Pinis!”
4 Taim Jehova i kisim bek lain bilong em long Babilon long yia 537 B.C.E., i stret dispela toksave i ken i go long Saion, olsem: “God bilong yu em i kamap king pinis!” Tru, Jehova em i “King bilong oltaim.” (KTH 15:3, NW) Tasol taim em i kisim bek lain bilong em long dispela taim, dispela i kamapim klia gen olsem em i nambawan bos. Dispela samting em i mekim i narapela kain tru na i kamapim long ples klia bikpela strong bilong em, i winim tru nambawan strongpela gavman bilong graun i bin stap long dispela taim bipo, em strong bilong en i winim olgeta narapela gavman i bin kamap paslain long en. (Jeremaia 51:56, 57) Spirit bilong Jehova i stiaim ol samting, olsem na maski ol man i pasim tok long mekim ol narapela samting bilong bagarapim lain bilong em, ol i no inap. (Esta 9:24, 25) Planti taim Jehova i mekim ol samting long kain kain rot bilong kirapim ol king bilong Midia na Persia long wok gut wantaim em long kamapim laik bilong em yet. (Sekaraia 4:6) Ol gutpela samting tru i bin kamap long dispela taim bipo, ol i bin raitim long ol buk bilong Baibel olsem Esra, Nehemia, Esta, Hagai, Sekaraia, na yumi inap kaunim. Na taim yumi kaunim gen ol dispela tok, dispela i strongim tru bilip bilong yumi!
5 Tasol dispela samting i bin kamap long yia 537 B.C.E. na bihain long en, i no dispela samting tasol i mas kamap—i gat sampela samting moa. Taim Aisaia i raitim pinis dispela tok profet long sapta 52, olsem God bai kisim bek lain bilong em, bihain stret long en Aisaia i stori long Mesaia bai kam. (Aisaia 52:13–53:12) Long rot bilong Mesaia, em Krais Jisas, Jehova bai kamapim wanpela tok bilong kisim bek ol man na kamapim bel isi, na dispela em i bikpela samting tru, winim ol samting i bin kamap long yia 537 B.C.E.
Nambawan Man Tru Bilong Autim Tok Bilong Bel Isi
6 Krais Jisas em i nambawan man tru Jehova i bin salim bilong autim tok bilong bel isi. Em i Tok Bilong God, em i Mausman bilong Jehova yet. (Jon 1:14) Olsem na bihain long taim Jisas i kisim baptais long wara Jordan, em i go insait long haus lotu long Nasaret na em i sanap na kaunim ol tok bilong Aisaia sapta 61 i makim wok em i mas mekim. Dispela wok em i mas mekim i kamapim klia olsem dispela tok God i salim em bilong autim, em i tok tu long ol man i ken ‘lusim kalabus’ na ol i ken ‘lukluk gen,’ na ol i gat rot long mekim ol samting bambai Jehova i ken orait long ol. Tasol wok bilong Jisas long autim tok bilong bel isi, i no dispela wok tasol em i mas mekim. God i bin salim em i kam tu bilong givim wanpela samting i as bilong kamapim bel isi bilong i stap oltaim.—Luk 4:16-21.
7 Taim mama i karim Jisas, bikpela lain ensel i kamap long ol wasman i lukautim ol sipsip klostu long Betlehem, na ol i litimapim nem bilong God na ol i tok: “Litimapim nem bilong God i save stap antap tru. Na long graun ol manmeri God i belgut long ol, ol i ken i stap bel isi.” (Luk 2:8, 13, 14, NW) Yes, ol man Jehova i belgut long ol, ol bai stap bel isi, long wanem, ol i bilip long samting em i givim long rot bilong Pikinini bilong em bilong helpim ol man. Dispela bai mekim wanem long ol? Olsem: Maski ol man i gat sin, ol inap kamap klin long ai bilong God, na God inap orait long ol. (Rom 5:1) Bel bilong ol inap i stap isi—i no gat narapela rot long ol i ken stap olsem. Long taim God yet i makim, ol man bai lusim kalabus bilong olgeta samting nogut em sin bilong Adam i bin kamapim—sik na i dai tu. Bai i no gat ol aipas o yaupas o lek nogut moa. Skin i no gat strong, na sik bilong tingting, em ol samting i save bagarapim tru bel bilong man, ol dispela samting bai pinis olgeta na i no ken kamap moa long skin bilong ol. Bai ol inap i stap oltaim na skin bilong ol bai gutpela olgeta.—Aisaia 33:24; Matyu 9:35; Jon 3:16.
8 God i laik givim dispela bel isi long husat? Em i laik givim long olgeta man i bilip long Krais Jisas. Aposel Pol i tok, ‘God i laik mekim olgeta samting i kamap wanbel wantaim Krais. Olsem na em i larim Krais i dai long diwai, na blut bilong en i kapsait, na long dispela pasin God i daunim pasin birua bilong yumi.’ Na Pol i tok, “ol samting bilong heven”—em ol man bai kamap king wantaim Krais long heven—ol tu bai kamap wanbel wantaim God. Na “ol samting bilong graun” tu—em ol man ol bai i gat rot bilong i stap oltaim long dispela graun taim em i kamap Paradais—ol bai kamap wanbel wantaim God. (Kolosi 1:19, 20) Ol i bilip long pe bilong ofa bilong Krais, na ol i givim bel tru long bihainim tok bilong God, olsem na olgeta dispela manmeri ol inap i stap pren tru wantaim God.—Skelim wantaim Jems 2:22, 23.
9 Em i bikpela samting tru long i stap bel isi wantaim God! Sapos yumi no stap bel isi wantaim God, orait yumi no inap i stap bel isi tru wantaim ol narapela man. Pasin bilong i stap bel isi wantaim Jehova em i as bilong bel isi tru i ken kamap long graun. (Aisaia 57:19-21) Jisas em i King Bilong Kamapim Gutpela Sindaun na Bel Isi, na i stret em i stap olsem. (Aisaia 9:6) Long rot bilong em ol manmeri inap kamap wanbel wantaim God, na tu, Jehova i bin givim strong na namba long em bilong mekim wok king. (Daniel 7:13, 14) Wok bilong Jisas long bosim ol manmeri bai kamapim gutpela samting, olsem Jehova i tok promis pinis: “Ol manmeri bai i sindaun gut oltaim.”—Aisaia 9:7; Song 72:7.
10 Olgeta manmeri i sot long dispela tok bilong God long bel isi na ol i mas harim. Jisas yet i givim bel long autim dispela tok, na em i stap olsem gutpela piksa bilong yumi ken bihainim. Em i autim tok long hap bilong tempel long Jerusalem, long maunten, long rot, long wanpela meri Samaria em i bin bungim long hul wara, na long haus bilong ol man. Long olgeta hap i gat man i stap, Jisas i painim rot bilong autim tok bilong bel isi na Kingdom bilong God.—Matyu 4:18, 19; 5:1, 2; 9:9; 26:55; Mak 6:34; Luk 19:1-10; Jon 4:5-26.
Lain Long Bihainim Lek Bilong Krais
11 Jisas i lainim ol disaipel bilong em long autim tok bilong God long bel isi bai kamap. Ol i save Jisas em i man bilong “autim stret olgeta tok bilong God,” na ol tu i gat wok long autim tok. (KTH 3:14; Aisaia 43:10-12) Ol i bihainim Krais olsem Gopas bilong ol.
12 Aposel Pol i stori gut long olsem wanem dispela wok bilong autim tok i bikpela samting. Em i tok: “Buk bilong God i gat tok long dispela samting olsem, ‘Ol man i bilip long em, ol bai i no inap kisim sem.’ ” Em i olsem: Man i bilip long Krais Jisas em i Nambawan Rot bilong Jehova long kisim bek ol man, em i no ken bel hevi. Na God i no ken tingim man i bilong wanem wanem lain, long wanem, Pol i tok moa olsem: “Ol Juda na Grik i wankain tasol. Bikpela wanpela tasol em i Bikpela bilong yumi olgeta. Na em i save mekim gut tru long olgeta manmeri i singaut long em na askim em long helpim ol. Olsem na ‘olgeta manmeri i askim Bikpela long helpim ol, em bai i kisim bek ol.’ ” (Rom 10:11-13) Tasol olsem wanem ol man inap save long dispela rot bilong kisim bek ol?
13 Pol i tokaut klia long dispela samting taim em i kamapim sampela askim em olgeta wan wan Kristen i mas tingim. Em i askim olsem: “Sapos ol [man] i no bilip long em, olsem wanem bai ol i askim em long helpim ol? Na sapos ol i no harim tok long em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim? Na sapos ol i no salim ol man i go bilong autim tok, olsem wanem bai ol i autim?” (Rom 10:14, 15) Stori bilong Baibel long ol Kristen bilong pastaim i tokaut klia tru olsem ol man na meri, ol yangpela na lapun, ol i bihainim pasin bilong Krais na ol aposel bilong em. Ol i givim bel long autim gutnius. Ol i bihainim pasin bilong Jisas na ol i autim tok long olgeta hap i gat man i stap. Ol i no laik bai wanpela man i lus long harim tok, olsem na ol i autim tok long ol ples ol man i save bung long en na long ol haus tu.—Aposel 17:17; 20:20.
14 I no olgeta man i amamas long harim tok ol Kristen i autim, nogat. Tasol tok bilong Aisaia 52:7 em Pol i kolim, em i stret tru. Pastaim Pol i mekim askim olsem: “Sapos ol i no salim ol man i go bilong autim tok, olsem wanem bai ol i autim?” Orait bihain Pol i tok moa: “Buk bilong God i tok olsem, ‘Ol manmeri i autim gutnius bilong ol gutpela samting, lek bilong ol i naispela tru!’ ” (NW) Ating yumi planti i no tingim lek bilong yumi i naispela tru, a? Olsem na wanem insait bilong dispela tok? Taim man i go autim tok long ol narapela, lek bilong em i karim em i go. Olsem na lek i makim dispela man yet. Na yumi save, planti man i harim gutpela tok ol aposel na ol narapela disaipel bilong Krais Jisas i bin autim, ol i ting ol dispela Kristen i naispela manmeri tru. (Aposel 16:13-15) Tasol samting i winim dispela i olsem: Ol i gutpela samting tru long ai bilong God.
15 Ol disaipel bilong Jisas i autim tok bilong bel isi, na ol i autim dispela tok long pasin isi. Jisas i givim tok long ol disaipel olsem: “Sapos yupela i go insait long wanpela haus, orait pastaim yupela i mas tok olsem, ‘Ol manmeri bilong dispela haus i ken i stap bel isi.’ Na sapos wanpela man bilong bel isi i stap long dispela haus, orait gutpela tok bilong yupela i ken i go i stap long dispela man. Tasol sapos i no gat kain man olsem i stap, orait gutpela tok bilong yupela bai i kam bek long yupela yet.” (Luk 10:5, 6) Taim ol Juda i bungim wanpela man, ol i save tok sha·lohmʹ, olsem “bel isi.” Tasol i no dispela tok tasol Jisas i tokim ol long mekim. Ol disaipel ol i mausman bilong Krais na ol i tok strong long ol man, olsem: “Lusim pasin birua na kamap wanbel wantaim God.” (2 Korin 5:20) Olsem Jisas i bin tokim ol long mekim, ol i tokim ol man long Kingdom bilong God na long ol samting dispela Kingdom bai mekim bilong helpim ol dispela man yet. Ol man i putim gut yau, ol i kisim blesing; ol man i sakim dispela tok, ol i lus long kisim blesing.
16 Long nau ol Witnes Bilong Jehova i mekim wok autim tok long wankain pasin. Gutpela tok ol i bringim long ol man, i no bilong ol yet; em i bilong dispela Man i bin salim ol i go. Ol i gat wok bilong autim dispela tok. Ol man i bihainim dispela tok, ol i gat rot long kisim ol gutpela blesing tru. Sapos ol i sakim, ol i sakim pasin bilong i stap bel isi wantaim God Jehova na Pikinini bilong em, Krais Jisas.—Luk 10:16.
Bel Isi Long Taim Bilong Planti Hevi
17 Maski ol man i mekim wanem, ol wokman bilong Jehova i no ken lusim tingting olsem ol i man bilong autim tok long bel isi God i save givim. Ol man bilong dispela graun i save tok pait na kamapim kros bilong ol long rot bilong sutim tok i go long ol narapela, o bikmaus na tok nogut long man i skrapim bel bilong ol. Ating bipo yumi sampela i bin mekim pasin olsem, tasol sapos yumi kisim pinis ol nupela pasin na nau yumi no bilong dispela graun, orait yumi no ken bihainim pasin bilong ol man bilong dispela graun. (Efesus 4:23, 24, 31; Jems 1:19, 20) Maski ol narapela i mekim wanem samting, bai yumi bihainim tok bilong Baibel, olsem: “Oltaim yupela i mas painim rot bilong i stap wanbel wantaim olgeta man.”—Rom 12:18.
18 Sampela taim wok bilong yumi long autim tok i mekim na yumi mas sanap long ai bilong ol wokman bilong gavman. Ol inap mekim wok long namba bilong ol na ‘askim yumi’ long tokaut olsem i gat wanem as na yumi mekim sampela wok o yumi no mekim sampela wok. Ating ol i laik save, bilong wanem yumi autim dispela tok yumi save autim—em tok i kamapim rong bilong ol lotu giaman na i tokim ol man olsem pasin bilong dispela graun bilong nau bai i pinis. Yumi daun long pasin Krais i mekim na i olsem piksa bilong yumi ken bihainim, na dispela bai kirapim yumi long mekim tok long pasin isi na pasin daun. (1 Pita 2:23; 3:15) Planti taim ol pris pasto o ating ol bos bilong ol dispela wokman bilong gavman ol i subim ol long mekim kain samting olsem long yumi. Sapos yumi bekim tok long pasin isi, ating dispela inap helpim ol long save, wok bilong yumi i no bilong mekim nogut long ol o bagarapim bel isi bilong ol man bilong ples. Sapos ol i kisim dispela tok yumi bekim long ol, dispela inap kirapim ol long tingim gut yumi, na wok gut wantaim yumi, na stap bel isi wantaim yumi.—Taitus 3:1, 2.
19 Ol Witnes Bilong Jehova long olgeta hap ol i gat nem olsem ol i no save insait long ol kros pait bilong ol man bilong dispela graun. Ol i no go insait long kros pait bilong ol man i birua long ol man bilong narapela skin o lotu o lain politik. (Jon 17:14) Baibel i tokim yumi long “stap aninit long ol gavman,” olsem na yumi no ken tingting liklik long go insait long sampela pasin bilong bikhet long gavman o toktok planti long sampela lo em gavman i putim. (Rom 13:1) Ol Witnes Bilong Jehova i no bin insait long wanpela lain i laik daunim gavman. Ol i tingim ol lo Jehova i bin givim long ol wokman Kristen bilong em, olsem na ol i no tingting liklik long insait long pasin bilong kapsaitim blut bilong man o insait long kros pait bilong ol man, maski em i wanem kain pait! Ol Kristen tru i no toktok tasol long bel isi; ol i bihainim pasin i stret wantaim dispela tok ol i autim.
20 Tasol ol wokman bilong ol lotu i holim nating nem Kristen, ol i narapela kain long ol Kristen tru—ol i no man bilong autim tok bilong bel isi. Ol lotu bilong Bikpela Babilon—em ol lotu i holim nating nem Kristen na ol lotu ol i no kolim Kristen—ol i orait, na helpim, na go pas long ol pait bilong ol lain man. Na ol i bin kirapim ol man long mekim nogut long ol gutpela wokman bilong Jehova na kilim sampela i dai tu. Olsem na Kamapim Tok Hait 18:24 i tok long Bikpela Babilon olsem: “God i lukim dispela taun i gat asua bilong kilim i dai ol profet na ol manmeri bilong en. Na olgeta man bilong graun ol birua i bin kilim ol i dai, asua bilong dispela tu em i stap long Babilon tasol.”
21 Tasol trupela lotu i no olsem ol lotu i holim nating nem Kristen na ol narapela lotu bilong Bikpela Babilon—trupela lotu i save helpim ol man long i stap wanbel. Krais Jisas i tokim ol disaipel tru bilong em olsem: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Ol i save laikim tru ol wanlotu bilong ol, maski ol i bilong kain kain lain na sindaun na skin, em ol dispela samting i save mekim na ol narapela manmeri i no pas gut wantaim—ol i bruk bruk. Long nau planti milion manmeri long olgeta hap ol i lukim dispela pasin na ol i tokim ol wokman bilong Jehova em i makim ol pinis: “Mipela i harim olsem God i stap wantaim yupela . . . Olsem na mipela i laik kamap wanlain wantaim yupela.”—Sekaraia 8:23.
22 Yumi ol Witnes Bilong Jehova i amamas tru long ol bikpela wok yumi mekim pinis, tasol dispela wok i no pinis yet. Taim fama i planim pikinini kaikai na givim wara long en, em i no save lusim wok bilong em. Em i wok yet i go, na long taim bilong kamautim na bungim ol dispela kaikai, em i save taitim bun tru. Long taim bilong kisim ol kaikai bilong gaden, em i mas wok strong tru inap long dispela wok i pinis. Na nau long dispela taim, i gat bikpela wok moa yet long bungim ol man, olsem kaikai bilong gaden, ol i kam lotuim trupela God. Dispela em i taim bilong amamas. (Aisaia 9:3) Tru, taim yumi mekim dispela wok, sampela man i birua long yumi na sampela i les na i no laik harim tok. Na yumi wan wan i gat ol hevi yumi mas karim, olsem bikpela sik, o sampela hevi insait long famili, o hevi long mani. Tasol yumi laikim tumas Jehova, na dispela i kirapim yumi long wok yet long autim tok. Dispela tok God i bin givim long yumi bilong autim, ol man i sot tru long en na ol i mas harim. Em i wanpela tok bilong bel isi. Tru tumas, em dispela tok Jisas yet i bin autim—em gutpela tok bilong Kingdom bilong God.
Wanem Bekim Bilong Yu?
◻ Wanem truim bilong Aisaia 52:7 i bin kamap long Israel bilong bipo?
◻ Olsem wanem Jisas em i nambawan man tru bilong autim tok bilong bel isi?
◻ Olsem wanem aposel Pol i bungim Aisaia 52:7 wantaim wok ol Kristen i mekim?
◻ Long taim bilong yumi, ol man bilong autim tok bilong bel isi ol i mas mekim wanem?
[Askim Bilong Stadi]
1, 2. (a) Olsem Aisaia 52:7 i tok profet long en, ol i mas autim wanem gutpela tok? (b) Dispela tok profet bilong Aisaia i makim wanem samting bilong ol Israel bilong bipo?
3. Tok promis long God bai kisim bek ol Israel, olsem wanem em i wanpela tok profet bilong bel isi tu?
4. (a) Olsem wanem yumi ken tok, long yia 537 B.C.E. ‘Jehova i kamap king pinis’? (b) Olsem wanem Jehova i stiaim ol samting bilong helpim lain bilong em long bihain?
5. Aisaia 52:13–53:12 i makim wanem ol bikpela samting i mas kamap bihain?
6. Husat i nambawan man tru Jehova i bin salim bilong autim tok bilong bel isi? Em i makim wanem wok em yet i mas mekim?
7. Long rot bilong Krais Jisas ol man inap i stap bel isi wantaim God, na wanem samting i save kamap long dispela?
8. God i laik givim bel isi long husat?
9. (a) Pasin bilong i stap bel isi wantaim God i save mekim wanem long i stap bilong yumi wantaim ol narapela? (b) Jehova i tingting long kamapim bel isi bilong i stap oltaim long olgeta hap, olsem na em i givim wanem namba long Pikinini bilong em?
10. Olsem wanem Jisas i stap olsem gutpela piksa bilong autim tok bilong God, em tok bilong bel isi?
11. Jisas i lainim ol disaipel bilong em long mekim wanem wok?
12. Olsem wanem Pol i soim yumi olsem wok bilong autim tok em i bikpela samting?
13. I mas i gat wanem samting bambai ol man inap harim gutnius? Olsem na ol Kristen bilong pastaim i mekim wanem?
14. Dispela tok olsem ol man i autim gutpela tok, “lek” bilong ol i “naispela tru,” em i kamap tru olsem wanem?
15, 16. (a) Olsem wanem ol Kristen bilong pastaim i bin kamapim klia olsem ol i man bilong autim tru tok bilong bel isi? (b) Wanem samting inap helpim yumi long mekim wok bilong yumi long autim tok long wankain pasin olsem ol Kristen bilong pastaim i bin mekim?
17. Maski ol man i toknogutim yumi, yumi mas mekim wanem kain pasin? Bilong wanem yumi mas mekim olsem?
18. Sapos wanpela wokman bilong gavman i mekim hatpela pasin long yumi, yumi mas mekim wanem? Bilong wanem yumi mas mekim olsem?
19. Ol Witnes Bilong Jehova i no save insait long wanem ol pasin?
20. Bikpela Babilon i bin mekim wanem na i narapela kain long bel isi?
21. Planti man i gat gutpela bel ol i mekim wanem long taim ol i lukim pasin bilong lain bilong Jehova i narapela kain long pasin bilong ol man bilong lotu giaman?
22. Yumi ting olsem wanem long wok bilong autim tok em yumi mas mekim yet?
[Ol Piksa long pes 13]
Olsem Jisas, ol Witnes Bilong Jehova i man bilong autim tok long bel isi God i save givim
[Ol Piksa long pes 15]
Ol Witnes Bilong Jehova i save stap bel isi, maski ol man i laik harim tok bilong Kingdom o ol i no laik harim