Askim

Yumi amamas tru long stadi yumi bin mekim long tok piksa bilong Jisas long ol sipsip na meme. Taim yumi tingim nupela save i stap long “Wastaua” bilong Oktoba 15, 1995, olsem wanem? Yumi inap long tok yet olsem ol Witnes Bilong Jehova long nau i insait long wok bilong tilim ol man?

Yumi ken tok yes. Tru, planti ol i bin tingim dispela samting, long wanem, Matyu 25:​31, 32 i tok: “Taim Pikinini Bilong Man i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap.” Wastaua bilong Oktoba 15, 1995, i kamapim klia i gat wanem as na ol dispela ves i makim ol samting bai kamap long taim bikpela hevi tru i kirap pinis. Jisas bai kam long bikpela lait wantaim olgeta ensel bilong em na em bai sindaun long sia king bilong em na skelim ol manmeri long kot. Orait long dispela taim em bai tilim ol man i go tupela lain. Em bai mekim olsem wanem? Em bai mekim kot na skelim ol man long pasin ol i bin mekim o ol i no bin mekim paslain long taim bilong bikpela hevi.

Yumi ken tingim ol kot bilong graun taim ol i mekim kot long wanpela man. Inap longpela taim liklik kot bai harim tok bilong ol man i olsem witnes bilong dispela samting, na bihain jas bai kolim strafe dispela man i mas kisim, o em i no ken kisim strafe. Orait, ol man i stap laip long nau​—⁠em bihain Jisas bai makim olsem ol i sipsip o meme​—⁠i olsem ol i stap long kot na i gat ol witnes i tokaut long ol samting ol i mekim, na inap longtaim pinis Jisas i wok long harim kot bilong ol, na kot i go yet. Tasol taim Jisas i sindaun long sia king bilong em, dispela wok bilong harim kot i pinis. Jisas bai redi long kolim pe ol man bai kisim. Jisas bai tilim ol man, em ol bai kisim bagarap bilong i stap oltaim oltaim, o ol bai kisim laip bilong i stap oltaim oltaim.

Wok bilong skelim ol man bilong kisim laip o bilong kisim bagarap em Matyu 25:32 i kolim, em bai kamap bihain, tasol dispela i no makim olsem bai i no gat wok bilong tilim ol man i kamap paslain long dispela taim. Long Matyu sapta 13, Baibel i kolim wanpela wok bilong tilim ol man i mas kamap paslain long dispela. Buk Wanbel Long Lotuim Dispela Wanpela God Tru, pes 179, 180, i stori gut long dispela samting aninit long het-tok “Tilim Ol Man i Go Tupela Lain.”a Buk i tok: “Jisas i stori long ol narapela bikpela samting tu i mas kamap long taim bilong pinis. Wanpela em wok bilong tilim ‘ol manmeri bilong kingdom’ na ‘ol manmeri bilong Satan’ i go tupela lain. Jisas i stori long dispela samting taim em i tok piksa long wanpela gaden na wanpela birua i kam tromoi pikinini bilong gras nogut long en.”

Buk i toktok long tok piksa bilong Jisas i stap long Matyu 13:24-30, na long ves 36-43 Jisas i kamapim insait bilong dispela tok piksa. Lukim ves 38 i tok, gutpela pikinini wit i makim ol manmeri bilong Kingdom, tasol gras nogut em ol manmeri bilong Satan. Ves 39 na 40 i soim olsem long “las de bilong dispela graun”​—⁠em dispela taim nau yumi stap long en​—⁠ol i bungim ol gras nogut. Ol i putim i go narapela na bihain ol i kukim olgeta.

Dispela tok piksa i toktok long ol Kristen God i bin makim ol (long tok piksa bilong sipsip na meme Baibel i kolim ol olsem brata bilong Jisas). Tasol dispela tok piksa i kamapim klia olsem nau long taim bilong yumi wanpela bikpela wok bilong tilim ol man i wok long kamap, na em bilong kamapim long ples klia olsem ol manmeri God i bin makim long spirit holi ol i stap narapela kain long ol man em ol i tok ol i Kristen tasol pasin bilong ol i kamapim klia olsem ol i “manmeri bilong Satan.”

Jisas i mekim sampela stori moa long wok bilong tilim ol man i go tupela lain. Tingim tok bilong em long bikpela rot i go long ples bilong lus: “Planti manmeri i save bihainim dispela rot.” (Matyu 7:13) Jisas i no stori long samting bai kamap bihain, taim em i skelim ol man long kot, nogat. Em i stori long wanpela samting i wok long kamap long nau, olsem wan wan man tasol i bihainim rot i liklik tru na i hatwok long i go insait, em rot i go long ples bilong kisim laip. Tingim tu olsem taim Jisas i salim ol aposel i go, em i tokim ol olsem ol bai painim sampela man i laik harim tok bilong ol. Tasol sampela bai i no laik harim tok, na ol aposel i mas rausim pipia graun i pas long lek bilong ol na bai ol dispela man “i ken save, ol i gat asua long dispela pasin ol i mekim.” (Luk 9:⁠5) Wankain samting i save painim ol Kristen long nau taim ol i autim tok. Sampela i save harim tok, tasol sampela i save sakim tok bilong God yumi autim.

Ol stori bilong dispela Wastaua long ol sipsip na meme i tok olsem: “Tok piksa i makim olsem taim bilong skelim ol lain manmeri i klostu. Tasol long dispela taim nau wanpela bikpela wok i kamap. Yumi ol Kristen i mekim wok bilong helpim ol man long kisim laip​—⁠wok yumi mekim long autim tok i save brukim ol man i go tupela lain. (Matyu 10:​32-​39).” Long ol dispela ves long Matyu sapta 10, Jisas i tok olsem, taim man i kamap disaipel bilong em, dispela bai brukim famili​—⁠papa bai birua long pikinini man, na pikinini meri bai birua long mama.

Ol brata bilong Krais em God i bin makim ol, ol i bin go pas long wok bilong autim tok bilong Kingdom long olgeta hap bilong bilong graun. Taim ol man i harim dispela tok na ol i mekim ol samting i makim olsem ol i laikim o nogat, ol i kamapim klia ol i wanem kain man. Yumi ol man i no inap tok, ‘dispela man em i wanpela sipsip, na dispela man em i wanpela meme,’ olsem Matyu sapta 25 i kolim​—⁠na i no stret tu long yumi tok olsem. Tasol taim yumi autim gutnius long ol man, dispela i givim rot long ol long kamapim bel bilong ol nau long dispela taim​—⁠olsem ol i wanem kain man na ol i gat wanem tingting long ol brata bilong Krais. Olsem na ol man i helpim ol brata bilong Krais na ol man i no laik helpim ol, ol i bruk tupela lain na ol i wok long kamap ples klia moa yet, kain olsem long taim ol i mekim kot long wanpela man na ol samting i wok long kamap ples klia long kot. (Malakai 3:​18) Olsem Wastaua i tok, klostu nau na Jisas bai sindaun long sia king bilong em na kolim pe ol man bai kisim​—⁠na em bai skelim ol man long kot na tilim ol i go tupela lain​—⁠ol i bilong kisim laip o ol i bilong kisim bagarap.

[Futnot]