Sampela Bikpela De Bilong Ol Israel

“Tripela taim long wanpela yia olgeta man tasol bilong yupela i mas i kam lotu long Bikpela long dispela wanpela ples bilong lotu. . . . Na yupela olgeta man wan wan i no ken i kam han nating long Bikpela.”​—⁠LO 16:⁠16.

 1. Yumi ken tok wanem long bung bilong ol bikpela de long taim bilong ol man i bin raitim Baibel?

TAIM yu tingim ol bikpela de, yu tingim wanem samting? Long ol bikpela de bilong sampela lain bilong bipo, ol i save kaikai na dring planti tumas na mekim pasin pamuk. Na i wankain tu long sampela bikpela de bilong nau. Tasol ol bikpela de bilong ol Israel em Lo bilong God i tok long en, ol i narapela kain. Tru, ol i taim bilong amamas, tasol yumi inap kolim ol dispela bikpela de olsem ‘ol bung bilong mekim lotu.’​—⁠Wok Pris 23:⁠2.

 2. (a) Tripela taim long olgeta yia ol man Israel i mas mekim wanem? (b) Ol ‘bikpela de’ olsem Lo 16:16 i kolim, ol i wanem samting?

² Ol man Israel i bin stap gut long God, ol i bin kisim amamas long i go long Jerusalem, em ples Jehova i bin makim, na ol i givim planti samting bilong helpim tripela bikpela bung bilong lotu. Planti taim ol meri pikinini bilong ol i save go wantaim ol. (Lo 16:16) Wanpela buk (Old Testament Word Studies) i kamapim insait bilong tok Hibru bilong dispela tok ‘bikpela de’ long Lo 16:16 olsem “taim bilong bikpela amamas . . . bilong makim wanpela taim bipo em God i bin amamas long ol, na long ol dispela taim ol i mekim ol ofa na ol bikpela kaikai.”a

Ol Gutpela Samting Bilong Ol Bikpela De

 3. Dispela 3-pela bung bilong lotu i bin kamap insait long wanpela yia, ol i kirapim ol Israel long tingim wanem ol blesing ol i bin kisim?

³ Ol Israel ol i lain bilong wokim gaden, olsem na ol i mas wetim Jehova i mekim gut long ol na salim ren i kam daun. Tripela bikpela bung long Lo Bilong Moses i kamap long wankain taim olsem taim bilong katim rais bali, long mun Mas samting, na taim bilong katim wit, long mun Epril samting, na taim bilong kisim ol narapela kaikai long gaden, long mun Septemba na Oktoba samting. Ol dispela taim em taim bilong bikpela amamas na tok tenkyu long Man bilong salim ren i kam long taim bilong en, na Man bilong wokim dispela graun i save kamapim planti kaikai. Tasol i gat planti samting moa bilong ol dispela bikpela bung.​—⁠Lo 11:​11-​14.

 4. Namba wan bung i bilong tingim wanem bikpela samting i bin kamap?

⁴ Namba wan bikpela bung i kamap long namba wan mun bilong kalenda bilong Baibel long bipo yet, kirap long Nisan 15 i go inap long Nisan 21, em i wankain olsem laspela hap bilong mun Mas o kirap bilong mun Epril. Ol i kolim dispela bung olsem Ol Bikpela De Bilong Bret i No Gat Yis, na dispela i kamap bihain stret long Pasova bilong Nisan 14, olsem na ol i kolim tu olsem “Bikpela De Bilong Tingim De God I Larim Ol Israel I Stap Gut.” (Luk 2:​41; Wok Pris 23:​5, 6) Dispela bung i kirapim ol Israel long tingim taim ol i bin stap nogut long Isip na God i kisim bek ol, olsem na dispela bret i no gat yis i makim dispela taim ol i bin stap nogut long Isip. (Lo 16:⁠3) Na dispela bung i kirapim ol long tingim taim ol i mas hariap lusim Isip na ol i no gat taim bilong putim yis long bret na wetim bret i solap. (Kisim Bek 12:34) Long taim bilong dispela bung i tambu long ol Israel i larim hap bret i gat yis i stap insait long haus bilong ol. Sapos wanpela bilong ol o bilong narapela kantri i stap wantaim ol i kaikai bret i gat yis long dispela taim, orait ol i mas kilim em i dai.​—⁠Kisim Bek 12:⁠19.

⁵ Namba tu bikpela bung i kamap 7-pela wik (49 de) bihain long Nisan 16, na em i kamap long namba 6 de bilong namba 3 mun, em Sivan, em i olsem namba tu hap bilong mun Me. (Wok Pris 23:​15, 16) Ol i kolim dispela bikpela de olsem Bikpela De Bilong Amamas Long Kisim Kaikai Long Gaden (long taim bilong Jisas ol i kolim tu olsem Pentikos, insait bilong en long tok Grik i olsem “De Namba 50”), na em i kamap long klostu wankain taim bilong yia em ol Israel i bin go insait long kontrak bilong Lo long maunten Sainai. (Kisim Bek 19:​1, 2) Long dispela bikpela de ating ol Israel i bin stap gut long God ol i tingim bek gutpela samting i bin painim ol bipo, olsem God i bin makim ol i stap olsem lain holi bilong em. Ol i lain bilong God stret, olsem na ol i mas bihainim Lo bilong God, olsem wanpela lo i tok ol i mas mekim pasin sori long ol taranguman na bai ol dispela lain tu inap amamas long dispela bikpela de.​—⁠Wok Pris 23:22; Lo 16:​10-​12.

 6. Namba 3 bung i kirapim lain bilong God long tingim wanem samting i bin painim ol?

⁶ Laspela bilong dispela 3-pela bung ol i kolim Ol Bikpela De Bilong i Stap Long Haus Win. Em i kamap long namba 7 mun, em Tisri, o Etanim, kirap long namba 15 de na i go inap long namba 21 de, em i olsem namba wan hap bilong mun Oktoba. (Wok Pris 23:34) Long dispela taim lain bilong God i save stap ausait long haus bilong ol o ol i slip antap long rup bilong ol long ol haus win ol i wokim long han na lip bilong diwai. Dispela i kirapim ol long tingim taim ol i bin lusim Isip na ol i wokabaut inap 40 yia i go long Graun Bilong Promis, na insait long ol dispela yia ol Israel i mas lain long wetim God i givim kaikai samting long ol long olgeta wan wan de.​—⁠Wok Pris 23:​42, 43; Lo 8:​15, 16.

 7. Taim yumi stori long ol bikpela bung bilong lotu ol i bin mekim long Israel, dispela i helpim yumi olsem wanem?

⁷ Orait yumi ken stori long sampela bikpela bung em lain bilong God long bipo i bin mekim bilong makim ol bikpela samting i bin kamap. Dispela i mas strongim bel bilong yumi long nau, long wanem, God i singautim yumi tu long bung wantaim long olgeta wik na 3-pela taim long yia long ol bikpela na liklik kibung.​—⁠Hibru 10:24, 25.

Long Taim Bilong Ol King i Kamap Long Lain Bilong Devit

 8. (a) Wanem bikpela bung ol i bin mekim long taim bilong King Solomon? (b) Yumi inap wetim wanem gutpela samting tru bai kamap bihain, em Ol Bikpela De Bilong i Stap Long Haus Win i olsem piksa bilong en?

⁸ Taim King Solomon, em pikinini bilong Devit, i bosim Israel na ol i gat gutpela sindaun, wanpela bikpela bung tru i kamap long taim bilong Ol Bikpela De Bilong i Stap Long Haus Win. Long dispela taim “bikpela lain manmeri” bilong olgeta hap bilong Graun Bilong Promis ol i kam bilong mekim bung bilong Ol Bikpela De Bilong i Stap Long Haus Win na bilong dediketim haus bilong God. (2 Stori 7:⁠8) Taim dispela bikpela bung i pinis, King Solomon i salim ol Israel i go bek long ples bilong ol, na “taim ol i go ol i amamas tru, long wanem, ol i tingting long olgeta gutpela samting Bikpela i bin mekim long ol Israel, ol manmeri bilong en.” (1 King 8:​66) Dispela em i wanpela bikpela taim tru bilong ol Israel. Long nau ol wokboi bilong God i amamas long wetim gutpela samting tru bai kamap long pinis bilong Taim Bilong Wan Tausen Yia Bilong Krais Jisas i Stap King, em Man Solomon i piksa bilong em, na dispela bung bilong Ol Bikpela De Bilong i Stap Long Haus Win i olsem piksa bilong en. (KTH 20:​3, 7-​10, 14, 15) Long dispela taim bihain, ol manmeri i stap long olgeta hap bilong graun​—⁠sampela em ol lain i kirap bek pinis long matmat na ol lain i abrusim bagarap long Armagedon​—⁠ol bai stap wanbel na amamas long lotuim God Jehova.​—⁠Sekaraia 14:⁠16.

9-11. (a) Wanem samting i mekim na wanpela bikpela bung tru i kamap long taim bilong King Hesekia? (b) Planti manmeri long 10-pela lain bilong not ol i mekim wanem na ol i stap olsem gutpela piksa? Dispela i kirapim yumi long tingim wanem samting long nau?

⁹ Narapela bikpela bung em Baibel i stori long en, em i kamap bihain long taim king nogut, em Ahas, i bin pasim dua bilong haus bilong God na em i pulim lain Juda long lusim Jehova na lotuim ol god giaman. Senis bilong Ahas em gutpela King Hesekia. Long namba wan yia bilong em i stap king, taim em i gat 25 krismas, Hesekia i kirapim wanpela bikpela wok bilong kamapim gen lotu tru bilong Jehova na stretim bek ol samting. Kwiktaim em i opim dua bilong haus bilong God na em i kirapim wok bilong stretim ol samting bilong en i bagarap. Orait nau king i salim ol pas i go long lain Israel long hap bilong not i stap olsem birua bilong lain Juda, na em i singautim ol i kam long bikpela bung bilong Pasova na bung bilong Ol Bikpela De Bilong Bret i No Gat Yis. Planti ol i kam, maski ol wantok i tok bilas long ol.​—⁠2 Stori 30:​1, 10, 11, 18.

¹⁰ Olsem wanem? Dispela bikpela bung i wok gut? Baibel i tok: “Ol manmeri i bung i stap long Jerusalem inap 7-pela de bilong Ol Bikpela De Bilong Bret I No Gat Yis, na olgeta i amamas tru. Na ol Livai na ol pris i kisim olkain gita samting long haus bilong Bikpela na ol i wok long paitim bilong litimapim nem bilong Bikpela.” (2 Stori 30:21) Ol dispela Israel i stap olsem gutpela piksa tru long lain bilong God long nau em planti ol i karim hevi bilong ol man i birua long ol na ol i raun long longwe rot bilong kam long ol kibung!

¹¹ Yumi ken tingim 3-pela “Givim Bel Long God” Kibung Distrik i bin kamap long Polan long 1989. I gat 166,518 manmeri ol i bung, na namel long ol i gat sampela lain bilong Rasia na ol narapela kantri long hap bilong Isten Yurop, em ol dispela kantri i bin tambuim wok bilong ol Witnes Bilong Jehova long dispela taim. Wanpela buk (Jehovah’s Witnesses​—⁠Proclaimers of God’s Kingdomb) i tok, “dispela em i namba wan taim ol i bin kam long wanpela bikpela bung i winim 15 o 20 manmeri bilong Jehova. Bel bilong ol i pilim tru taim ol i lukim planti tausen manmeri i sindaun long ol haus stediam, na ol i bung wantaim ol long mekim beten, na ol i bungim nek wantaim ol long mekim ol singsing i litimapim nem bilong Jehova.”​—⁠Pes 279.

12. Wanem samting i mekim na wanpela bikpela bung i kamap long taim bilong King Josaia?

¹² Taim King Hesekia i dai pinis na ol Juda i stap aninit long King Manase na King Amon, ol i kirap gen long lotuim ol god giaman. Orait bihain narapela gutpela king i kamap, em yangpela man Josaia, em i strongim bel na em i kamapim bek lotu i tru. Taim em i gat 25 krismas, Josaia i putim tok long ol i mas stretim haus bilong God. (2 Stori 34:⁠8) Taim ol i wok long stretim, ol i painim buk i gat Lo Moses i bin raitim, em i stap insait long haus bilong God. Bel bilong King Josaia i pilim tru ol tok em i kaunim long Lo bilong God, na em i stretim rot bilong ol i mas kaunim long olgeta manmeri. (2 Stori 34:​14, 30) Orait nau, olsem Moses i bin raitim long Lo, Josaia i stretim rot bilong mekim bung bilong Pasova. Na king yet i givim planti samting bilong helpim dispela bung. Baibel i tok: “Ol i mekim dispela kaikai bilong Bikpela De Bilong Tingim De God I Larim Ol Israel I Stap Gut, i kamap gutpela tru. Em i winim ol kaikai ol Israel i bin mekim bipo . . . , stat long taim bilong profet Samuel.”​—⁠2 Stori 35:​7, 17, 18.

13. Ol bikpela bung bilong Hesekia na Josaia i kirapim yumi long tingim wanem samting long nau?

¹³ Ol samting Hesekia na Josaia i bin mekim bilong stretim bek lotu i tru i olsem piksa na i makim wok bilong kamapim bek lotu i tru, em i kamap namel long ol Kristen tru kirap long taim Krais Jisas i kamap King long yia 1914. Wankain olsem ol samting Josaia i bin mekim bilong stretim bek lotu i tru, ol Kristen i bihainim ol tok i stap long Baibel na ol i wok long kamapim bek lotu i tru. Na wankain olsem ol i bin mekim long taim bilong Hesekia na Josaia, bilong kamapim bek lotu i tru ol Kristen i wokim ol liklik na bikpela kibung, na long ol dispela kibung ol i kamapim klia insait bilong ol tok profet bilong Baibel na olsem wanem yumi ken bihainim ol lo bilong Baibel nau long dispela taim. Na narapela samting i kamapim bikpela amamas long ol dispela kibung, em ol bikpela lain i bin kisim baptais. Wankain olsem ol Israel long taim bilong Hesekia na Josaia em ol i bin tanim bel, ol dispela nupela man i kisim baptais ol i bin lusim ol pasin nogut bilong ol lain i holim nating nem Kristen na ol narapela lain bilong dispela graun bilong Satan. Long 1997, inap olsem 375,000 manmeri ol i bin kisim baptais bilong makim olsem ol i dediket long God holi, Jehova​—⁠em i olsem 1,000 long olgeta de.

Taim Ol i Lusim Kalabus na Kam Bek

14. Wanem samting i mekim na wanpela bikpela bung i kamap long yia 537 B.C.E.?

¹⁴ Taim Josaia i dai pinis, ol Juda i kirap gen long lotuim ol god giaman. Orait bihain, long yia 607 B.C.E., Jehova i givim strafe long lain bilong em na em i salim ol ami bilong Babilon i kam pait long Jerusalem. Dispela taun wantaim haus lotu bilong en i bagarap, na graun i stap nating, i no gat man long en. Bihain long en ol Juda i stap kalabus inap 70 yia long Babilon. Orait nau God i kirapim liklik hap lain Juda i bin tanim bel long go bek long Graun Bilong Promis bilong kamapim bek lotu i tru. Long namba 7 mun bilong yia 537 B.C.E. ol i kam kamap long Jerusalem, em i bagarap i stap. Namba wan samting ol i mekim, em ol i wokim wanpela alta bilong mekim ol ofa bilong olgeta de olsem kontrak bilong Lo i tok ol i mas mekim. Ol i bin kamap stret long taim bilong mekim narapela bikpela bung. “Ol i bihainim pasin bilong Ol Bikpela De Bilong I Stap Long Haus Win, na ol i mekim ol ofa long olgeta de olsem lo i tok.”​—⁠Esra 3:​1-4.

15. Liklik hap lain bilong Israel i kam bek long ples bilong ol long yia 537 B.C.E. ol i mas mekim wanem wok? Wanem pasin i stap long yia 1919 na i wankain olsem samting i bin painim ol dispela Israel?

¹⁵ I gat wanpela bikpela wok i stap yet em dispela lain i bin kam bek ol i mas mekim​—⁠ol i mas wokim gen haus bilong God na wokim gen Jerusalem wantaim banis bilong en. Ol narapela lain i stap nabaut klostu long ol, ol i bel kaskas long ol na mekim pasin birua long ol. Taim ol i wok long wokim haus bilong God, “wok i no go het hariap.” (Sekaraia 4:​10) Samting i kamap long dispela taim i wankain olsem samting i painim ol Kristen i bin stap gut long God long 1919, em God i bin makim ol long spirit holi. Long dispela bikpela yia, ol i lusim kalabus bilong spirit ol i bin stap long en long Bikpela Babilon, em olgeta lotu giaman long graun. Ol dispela Kristen ol inap olsem sampela tausen tasol, na ol lain bilong dispela graun i birua long ol. Olsem wanem? Ol birua bilong God ol inap pasim wok bilong kamapim strong lotu i tru? Bekim bilong dispela askim i kirapim yumi long tingim tupela laspela bung Ol Skripsa Hibru i stori long en.

16. Wanpela bikpela bung i bin kamap long yia 515 B.C.E., em i bikpela samting olsem wanem?

¹⁶ Long mun Adar bilong yia 515 B.C.E., ol i wokim pinis haus bilong God, em klostu tru long taim bilong mekim bung bilong mun Nisan. Baibel i tok: “Ol i amamas inap 7-pela de na bihainim pasin bilong Ol Bikpela De Bilong Bret I No Gat Yis. Amamas bilong ol i bikpela moa, long wanem, Bikpela i mekim king bilong Asiria i belgut long ol na em i helpim ol long wokim gen haus bilong God, Bikpela bilong ol.”​—⁠Esra 6:​22.

17, 18. (a) Wanem bikpela bung i bin kamap long yia 455 B.C.E.? (b) Olsem wanem ol samting long nau i klostu wankain olsem bipo?

¹⁷ Orait 60 yia bihain, long yia 455 B.C.E., narapela bikpela bung i kamap. Long dispela yia, bung bilong Ol Bikpela De Bilong i Stap Long Haus Win i makim olsem ol i pinisim wok bilong wokim gen banis bilong Jerusalem. Baibel i tok: “Olgeta manmeri i bin lusim Babilon na i kam bek, ol i wokim ol haus win na i stap long en. Bipo tru long taim bilong Josua, pikinini man bilong Nun, ol Israel i save wokim dispela kain haus win. Tasol bihain long taim Josua i dai pinis, ol i lusim dispela pasin i kam inap nau. Na nau ol Israel i kirapim dispela pasin gen. Olsem na bel bilong olgeta manmeri i gutpela na ol i amamas tru.”​—⁠Nehemia 8:​17.

¹⁸ Maski ol birua i strong tru long bagarapim wok bilong ol, ol i kamapim bek lotu tru bilong God! Na wankain pasin i kamap long nau. Maski ol man i mekim nogut long ol na birua long lain bilong God, dispela bikpela wok bilong autim gutnius bilong Kingdom bilong God em i go kamap long olgeta hap bilong graun, na toksave bilong kot bilong God bai painim ol man, ol i autim long olgeta hap. (Matyu 24:14) Wok bilong putim mak long ol manmeri bilong lain 144,000 ol i stap yet long graun, dispela wok i laik pinis nau. Ol i bin bungim olsem 5 milion “arapela sipsip,” olsem poroman bilong ol, em ol i bilong olgeta lain, na ol i kamap “wanpela lain sipsip tasol” wantaim dispela liklik hap lain God i bin makim na ol i stap yet long graun. (Jon 10:16; KTH 7:​3, 9, 10) Em wanpela gutpela truim bilong ol samting dispela bung bilong Ol Bikpela De Bilong i Stap Long Haus Win i makim! Na dispela bikpela wok bilong bungim ol man, ol bai mekim yet i go, na long nupela taim dispela wok bai stap yet, taim ol i singautim ol man i bin kirap bek long matmat long kam bung wantaim ol long mekim bung bilong Ol Bikpela De Bilong i Stap Long Haus Win, em dispela bung bilong bipo i olsem piksa bilong en.​—⁠Sekaraia 14:​16-​19.

Long Taim Bilong Ol Aposel

¹⁹ Sampela bikpela bung bilong lotu em Baibel i stori long en, em ol bung em Pikinini Bilong God, Krais Jisas, i bin go long en. Yumi ken tingim taim Jisas i go long bung bilong Ol Bikpela De Bilong i Stap Long Haus Win, long yia 32 C.E. Long dispela taim em i bin skulim ol man long sampela bikpela tok i tru na em i kamapim ol tok bilong Ol Skripsa Hibru bilong strongim ol tok bilong em. (Jon 7:​2, 14, 37-​39) Long dispela bung ol i save laitim 4-pela traipela lam i stap long wanpela ples bung insait long banis bilong haus lotu. Ol dispela lait i stap na ol manmeri i kisim amamas long ol samting ol i mekim long dispela bung i save go inap long biknait. Ating Jisas i tingim ol dispela traipela lait taim em i tok: “Mi yet mi lait bilong graun. Man i bihainim mi, em bai i no inap wokabaut long tudak. Nogat. Em bai i gat lait bilong laip.”​—⁠Jon 8:​12.

20. Wanem bikpela samting tru i bin kamap long Pasova long yia 33 C.E.?

²⁰ Na yumi ken tingim bung bilong Pasova na bung bilong Ol Bikpela De Bilong Bret i No Gat Yis, em ol i bin kamap long dispela bikpela yia 33 C.E. Long dispela de Pasova, ol birua i bin kilim Jisas i dai na em i kamap olsem Pikinini Sipsip ol i bin ofaim long de Pasova, em i dai bilong “tekewe sin bilong olgeta manmeri bilong graun.” (Jon 1:​29; 1 Korin 5:⁠7) Tripela de bihain, long Nisan 16, God i kirapim bek Jisas na em i kisim wanpela bodi spirit i no inap i dai. Dispela i kamap stret long taim ol i mas ofaim namba wan rais bali ol i bin kisim long gaden, olsem Lo Bilong Moses i tok long mekim. Olsem na taim Bikpela bilong yumi Krais Jisas i kirap bek, em i kamap olsem “namba wan kaikai i redi long gaden,” long wanem, “em i kirap paslain long ol arapela man i dai pinis.”​—⁠1 Korin 15:⁠20.

21. Wanem samting i kamap long Pentikos bilong yia 33 C.E.?

²¹ Wanpela bung bilong lotu i gat bikpela samting tru i bin kamap long en, em bung bilong Pentikos i kamap long yia 33 C.E. Long dispela de planti Juda na ol man bilong ol narapela lain i bihainim lotu Juda ol i kam bung long Jerusalem, na inap olsem 120 disaipel bilong Jisas ol tu i stap. Taim ol i wok long mekim dispela bung, Bikpela Krais Jisas, em i kirap bek pinis long matmat, em i kapsaitim spirit holi bilong God i kam daun long dispela 120 disaipel. (Aposel 1:​15; 2:​1-4, 33) Long dispela pasin God i makim ol na ol i kamap nupela lain bilong God stret long rot bilong nupela kontrak em Krais Jisas i stap namelman bilong en. Long dispela bung, hetpris Juda i kisim tupela bret i gat yis em ol i wokim long namba wan wit ol i bin kisim long gaden, na em i givim long God olsem ofa. (Wok Pris 23:​15-​17) Ol dispela bret i gat yis i olsem piksa na i makim 144,000 manmeri bilong graun ol i gat sin, em Jisas ‘i bin baim ol bilong givim ol long God’ bambai ol i ken mekim wok olsem “pris bilong lain bilong king . . . na bai ol i stap king na bosim ol manmeri bilong graun.” (KTH 5:​9, 10; 14:​1, 3) Ol dispela king long heven ol i bilong tupela lain bilong ol sinman bilong graun, em ol Juda na ol narapela lain, na ating dispela tupela bret i gat yis i makim dispela samting tu.

22. (a) Bilong wanem ol Kristen i no save mekim bung bilong ol bikpela de bilong lotu i stap long kontrak bilong Lo? (b) Long stori i kamap bihain long dispela, bai yumi toktok long wanem samting?

²² Taim nupela kontrak i kirap mekim wok long Pentikos bilong yia 33 C.E., dispela i makim olsem long ai bilong God olpela kontrak bilong Lo i no gat wok moa bilong en. (2 Korin 3:​14; Hibru 9:​15; 10:16) Tasol i no olsem ol Kristen God i bin makim ol i no gat lo bilong bihainim. Ol i stap aninit long lo bilong God em Krais Jisas i bin skulim ol man long en na God i bin raitim long bel bilong ol. (Galesia 6:⁠2) Dispela 3-pela bung bilong ol bikpela de bilong lotu i bin kamap long olgeta yia, ol i stap long olpela kontrak bilong Lo, olsem na ol Kristen i no save mekim ol dispela bung. (Kolosi 2:​16, 17) Tasol taim yumi skelim tingting bilong ol wokboi bilong God i bin stap paslain long taim bilong ol Kristen, em ol i ting olsem wanem long ol dispela bikpela de bilong ol na ol narapela miting bilong lotu ol i mekim, dispela inap skulim yumi long sampela samting. Long stori i kamap bihain long dispela, bai yumi toktok long sampela manmeri ol i stap olsem gutpela piksa, na dispela bai kirapim yumi olgeta long pilim tru olsem yumi mas i go oltaim long ol bung bilong ol Kristen.

[Ol Futnot]

Ol Askim Bilong Tingim Gen

◻ Tripela bikpela bung bilong ol Israel i bilong mekim wanem wok?

◻ Wanem wankain pasin i bin kamap long bikpela bung long taim bilong Hesekia na long taim bilong Josaia?

◻ Long 455 B.C.E. ol i mekim bikpela bung bilong makim wanem samting? Dispela i save strongim bel bilong yumi olsem wanem?

◻ Bung bilong Pasova na Pentikos long yia 33 C.E. i bikpela samting olsem wanem?

 5. Ating namba tu bung i bin kirapim ol long tingim wanem gutpela samting i bin painim ol? Husat tu ol inap insait long dispela amamas?

19. Wanem bikpela samting tru i bin kamap long bung bilong Ol Bikpela De Bilong i Stap Long Haus Win long yia 32 C.E.?

[Blok long pes 12]

Wanpela Bung Bilong Skulim Yumi Long Nau

Bilong kisim ol gutpela samting long ofa bilong Jisas bilong tekewe sin bilong ol man, i stap bilong yumi i mas stret wantaim ol samting dispela bung bilong Ol Bikpela De Bilong Bret i No Gat Yis i makim. Long nau dispela bikpela bung i makim bikpela amamas bilong ol Kristen God i bin makim, em God i bin kisim bek ol long dispela pasin nogut i stap long graun, na ofa bilong Jisas i bin tekewe sin bilong ol. (Galesia 1:4; Kolosi 1:​13, 14) Dispela bung ol i bin mekim bipo em i stap inap 7-pela de​—⁠em wanpela namba long Baibel i makim samting em inap tru long ol samting bilong spirit. Ol samting dispela bikpela bung i makim i kamap insait long hap taim em ol Kristen God i bin makim ol i stap long graun, na long “pasin bilong klinpela bel na tok tru” ol man i mas insait long amamas bilong ol dispela de. Olsem na long olgeta taim yumi mas was gut long “yis.” Baibel i save tok piksa long yis bilong makim ol tok giaman ol i skulim ol man long en, na pasin bilong tupela maus, na pasin nogut. Ol manmeri i lotu tru long Jehova ol i mas nolaik tru long dispela kain yis, na ol i no ken larim dispela yis i bagarapim pasin bilong ol yet na bagarapim klinpela pasin bilong kongrigesen Kristen.​—⁠1 Korin 5:​6-8; Matyu 16:​6, 12.

[Piksa long pes 9]

Ol i bin ofaim namba wan mekpas rais bali long olgeta yia long Nisan 16, em de Jisas i kirap bek long matmat

[Piksa long pes 10]

Taim Jisas i kolim em yet olsem “lait bilong graun,” ating em i bin tingim ol lait ol i save laitim long ol bikpela de bilong lotu