Yu Ting Yu Gat Wanpela Wasangelo?
YU TING i gat wanpela ensel bilong was long yu? Planti man i ting olsem. Ol man i tok i gat wanpela meri long hap wes bilong Kanada na em i save gut long ol ensel. Dispela meri i tok sapos yu givim namba wan na namba tu nem bilong yu long em na 200 dola, em inap helpim yu long save husat i wasangelo bilong yu. Pastaim, em i tingting strong taim em i lukluk i go long lait bilong wanpela kandel. Bihain, em i lukim samting olsem driman na long dispela driman ensel bilong yu i givim sampela tok long dispela meri na em i mas givim long yu. Na tu, em i droim wanpela piksa na bai yu ken save ensel bilong yu i luk olsem wanem.
Sampela i tingim dispela samting i wankain olsem stori bilong wanpela king bilong Frans, em Lui Namba 9. Ol man i tok em i baim sampela gras i bin pundaun long pul bilong Nambawan Ensel Maikel, em gras i gat bikpela pe. Tru, planti man i no bilipim dispela stori, tasol wantu ol i redi long bilipim tok bilong dispela meri Kanada.
Planti Man i Tingting Strong Long Ol Ensel
Nau long dispela taim, planti man i tingting strong long ol ensel. Long televisen na ol piksa wokabaut na ol buk na nius, ol i stori long ol ensel i save mekim gut bel bilong man i gat bikpela sik, na mekim gut bel bilong man em wanpela long famili bilong em i dai pinis, na givim gutpela tingting na save long man, na helpim man long abrusim bagarap. Long Amerika, 20 milion manmeri i save lukim wanpela stori i kamap long televisen wanpela taim long olgeta wik na i stori long wanpela ensel i gat wok long helpim ol man. Wanpela stua bilong ol buk i gat 400 buk ol i stori long ol ensel tasol.
I no longtaim i go pinis ol i bin wokim wanpela buk i stori long ol samting ol wasangelo i bin mekim bilong helpim ol soldia long abrusim bagarap long taim bilong pait. Na i gat toksave long sampela ka i tok ol wasangelo i lukautim draiva bilong ka. Na i gat ol oganaisesen na kibung samting i gat wok long kirapim ol man long kisim save long ol ensel, na sampela man i tok, ol dispela lain i save helpim ol man long toktok wantaim ol ensel.
Eileen Freeman i raitim 3-pela buk i stori long ol ensel na em i wokim wanpela nius i stori long ol ensel tasol, na em i tok: ‘Mi ting, long olgeta wan wan ensel long heven, i gat wanpela wasangelo hia long graun. Wok bilong ol wasangelo i no bilong litimapim nem bilong God long heven na em tasol, nogat; bikpela wok bilong ol em bilong lukautim ol man na ol narapela samting i gat laip hia long graun. Taim yumi kamap nupela insait long bel bilong mama, ol i makim wanpela wasangelo bilong lukautim yumi wan wan; em i was long yumi long taim yumi wok long kamap bikpela insait long bel bilong mama, na long taim mama i karim yumi na i go inap long taim yumi dai na lusim graun na i go long gutpela ples long heven.’ Em nau, dispela i kamapim gut tingting bilong planti man long ol wasangelo.
Yumi stap long taim nogut, olsem na dispela bilip olsem yumi gat wanpela wasangelo na em i gat wok bilong lukautim yumi, dispela inap mekim gut bel bilong yumi. Tasol Tok Bilong God, em Baibel, i tok wanem long dispela samting? Yu ting i stret yumi ken traim toktok wantaim ol ensel? Ol pasin yumi bihainim na ol samting bilong lotu yumi bilip long en, yu ting em i bikpela samting long ol? Ol inap helpim yumi olsem wanem? Stori i kamap bihain long dispela bai bekim ol dispela askim.