Darius—Wanpela King i Laikim Pasin i Stret
WANPELA king i gat nem em i stori long ol samting em i bin wokim, olsem: ‘Long hap is bilong Babilon, mi wokim wanpela strongpela banis. Na mi wokim wanpela baret wara i raunim dispela taun. Mi kisim kolta na brik na wokim wanpela bikpela banis, na olsem wanpela maunten, dispela banis i strongpela tru na man i no inap surikim.’ Tru tumas, King Nebukatnesar bilong Babilon i bin wokim planti samting na em i bin mekim bikpela wok bilong strongim dispela nambawan biktaun bilong gavman bilong em. Tasol dispela taun bilong Babilon i no stap strong olsem em i bin tingim pastaim.
Dispela i kamap ples klia long Oktoba 5, 539 B.C.E. King bilong Persia, em Sairus Namba 2, wantaim ami bilong Midia, em i daunim Babilon na kilim i dai king bilong Babilon, em Belsasar. Orait, husat bai kamap namba wan king bilong dispela taun em nau tasol ol i daunim? Profet bilong God, em Daniel, em i bin stap insait long dispela taun taim ol i daunim, na em i tok: “Darius bilong Midia i kamap king na i bosim dispela kantri. Darius i gat 62 krismas long taim em i kamap king bilong Babilon.”—Daniel 5:30, 31.
Darius em i husat? Em i kamap wanem kain king? Em i mekim wanem kain pasin long profet Daniel, em i bin stap kalabus long Babilon winim 70 yia?
STORI BILONG DISPELA KING
Yumi save liklik tasol long Darius bilong Midia. Ol Midia i no bin raitim planti stori. Na tu, ol planti handet tausen ston i gat rait long en ol man i bin kamautim taim ol i digim graun long hap bilong Midel-Is, ol dispela ston i no tokaut long olgeta samting i bin kamap long dispela taim bipo. Ol narapela stori ol i bin raitim bipo na i stap long nau, ol i no planti, na ol man i bin raitim 100 yia samting bihain long taim bilong Darius.
Tasol ol samting i kamapim klia olsem, taim king Sairus Namba 2 bilong Persia i daunim na kisim Ekbatana, em nambawan biktaun bilong Midia, ol Midia i lukim pasin bilong em na dispela i kirapim ol long stap gut long em. Bihain, ol Midia i wok gut wantaim ol Persia long mekim ol pait aninit long dispela lida. Robert Collins i stori long dispela tupela lain long buk bilong em (The Medes and Persians), olsem: ‘Long gutaim, ol Midia inap mekim wankain wok olsem ol Persia inap mekim. Planti taim ol i kisim bikpela wok i gat namba insait long gavman na ami bilong Persia. Taim ol narapela lain i toktok long ol Midia na ol Persia, tok bilong ol i no makim olsem narapela i bin daunim narapela.’ Ol Midia i bung wantaim ol Persia na tupela lain wantaim i kamap olsem Gavman Bilong Midia Wantaim Persia.—Daniel 5:28; 8:3, 4, 20.
Ol Midia i mekim bikpela wok tru bilong daunim Babilon. Baibel i tok, “Darius, pikinini bilong Serksis, em i man bilong kantri Midia,” em i kamap namba wan king bilong Gavman Bilong Midia Wantaim Persia i bosim Babilon. (Daniel 9:1) Darius i stap king, olsem na em i holim strong bilong kamapim ol lo, na ol dispela lo i kamap wanpela “lo bilong [ol] Midia na Persia, na i no gat wanpela man i ken senisim.” (Daniel 6:8) Ol tok bilong Baibel i stori long Darius i helpim yumi long save tu long pasin bilong em, na i gat wanem as na ol stori bilong dispela graun ol i no stori tumas long em.
EM I MEKIM GUT LONG DANIEL
Baibel i tok, taim Darius i kamap king pinis long Babilon, em i makim “120 ofisa bilong bosim ol distrik bilong kantri bilong en. Na em i makim Daniel wantaim tupela arapela man bilong bosim ol dispela ofisa.” (Daniel 6:1, 2) Tasol ol narapela ofisa ol i no amamas long Daniel i holim bikpela namba. Ating stretpela pasin bilong Daniel i pasim rot bilong ol long mekim pasin i no stret, olsem na ol i bel nogut long em. Na ating ol i bel kaskas tu long em, long wanem, king i laikim Daniel na em i ting long makim em long kamap praim-minista.
Bilong pinisim wok bilong Daniel, tupela wanwok ofisa bilong Daniel wantaim ol narapela ofisa ol i wokim wanpela lo bilong kotim Daniel long en. Ol i go lukim king na tokim em long raitim nem bilong em long wanpela pepa i tok, inap long 30 de ol man “i no ken prea long wanpela god o long wanpela man.” Ol i mas prea long Darius tasol. Na sapos man i brukim dispela lo, king i mas tromoi ol i go long hul bilong ol laion. Toktok bilong ol i kirapim tingting bilong king long bilip olsem olgeta narapela ofisa i gat namba bai orait long dispela lo, na dispela lo i olsem samting bilong makim ol i stap gut long king.—Daniel 6:1-3, 6-8.
Darius i raitim nem bilong em long dispela pepa ol i bin raitim lo long en, tasol i no longtaim na em i save dispela lo bai mekim nogut long Daniel. Daniel i beten yet long God Jehova, olsem na em i kamap namba wan man bilong sakim dispela lo. (Skelim wantaim Aposel 5:29.) Ol i tromoi gutpela man Daniel long hul bilong ol laion, maski king i bin wok long painim rot bilong abrusim dispela lo em i no inap senisim. Darius i tok em i bilip olsem God bilong Daniel em i gat strong bilong lukautim dispela profet na bai em i no ken bagarap.—Daniel 6:9-17.
Long dispela nait king i no kaikai, na em i no inap slip; orait tulait pinis em i hariap i go long hul. Em i amamas tru long lukim Daniel i stap laip na em i no bin kisim wanpela bagarap! Bilong bekim dispela rong, wantu king i tok na ol i kisim ol dispela man i bin sutim tok long Daniel, wantaim meri pikinini bilong ol, na tromoi ol i go daun long hul bilong ol laion. Na Darius i salim tok i go long ‘ol manmeri bilong kantri bilong em olsem olgeta i mas givim biknem long God bilong Daniel na ol i mas aninit long dispela God.’—Daniel 6:18-27.
Tru tumas, Darius i laikim God bilong Daniel na lotu bilong em na em i gat bikpela laik long stretim dispela rong i bin kamap. Tasol taim em i givim strafe long ol man i bin sutim tok long Daniel, ating dispela i mekim na ol narapela ofisa i stap yet ol i birua long em. Na tu, dispela tokaut bilong Darius olsem olgeta man long kingdom bilong em i mas ‘aninit long God bilong Daniel,’ ating dispela i mekim na ol strongpela pris bilong Babilon ol i bel nogut tru long em. Ating dispela i mekim na ol man bilong raitim stori bilong ol samting i bin kamap bipo ol i senisim sampela tok na bai ol i ken rausim olgeta tok i stori long Darius. Tasol dispela sotpela stori long buk bilong Daniel em i helpim yumi long save, Darius em i wanpela king i laik mekim pasin i stret long ol man.