Ofa Bilong Krais Em Rot Bilong God Long Kisim Bek Ol Man
“God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—JON 3:16.
1, 2. Stori long bikpela hevi i bin painim ol man bilong graun.
YU KEN tingting olsem yu gat wanpela bikpela sik na dokta i mas katim yu, na sapos nogat, bai yu dai. Orait bai yu ting olsem wanem sapos pe bilong dokta i bikpela tumas na yu no gat bikpela mani olsem bilong baim em? Na olsem wanem sapos yu wantaim famili na ol pren i bungim mani wantaim, tasol dispela mani tu i no inap? Bai yu tingting planti tru, long wanem, sapos dokta i no katim yu bai yu dai!
2 Dispela i makim pasin i bin kamap long ol man bilong graun. God i bin wokim tupela tumbuna bilong pastaim, em Adam na Iv, i gutpela olgeta. (Lo 32:4) Ol inap tingting long i stap oltaim oltaim na inapim laik bilong God, olsem: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” (Stat 1:28) Tasol Adam na Iv i bikhet long Man bilong wokim ol. (Stat 3:1-6) Pasin bikhet bilong tupela i kamapim sin long Adam na Iv na olgeta pikinini bilong tupela em ol i no kamap yet. Bihain gutpela man Jop i tok olsem: “Husat inap senisim mipela na mekim mipela i kamap klin long ai bilong yu? Nogat tru.”—Jop 14:4.
3. Olsem wanem dai i bin kisim olgeta man bilong graun?
3 Olsem na sin i kain olsem wanpela bikpela sik i bin kamap long yumi olgeta wan wan, long wanem, Baibel i tok, “yumi olgeta man yumi bin mekim sin.” Dispela sin i mekim na yumi save dai. Tru tumas, “sin i save givim pe long ol wokboi bilong en. Dispela pe em dai tasol.” (Rom 3:23; 6:23) I no gat wanpela man inap long abrusim. Olgeta man i save mekim sin, olsem na olgeta man i save dai. Yumi ol tumbuna pikinini bilong Adam, olsem na dispela pasin bilong i dai i stap pinis long skin bilong yumi taim mama i karim yumi. (Song 51:5) Pol i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Tasol dispela i no makim olsem yumi no inap wetim God i ken kisim bek yumi.
Pinisim Sin na Dai
4. Bilong wanem ol man yet i no inap pinisim sik na dai?
4 Wanem samting inap tru long pinisim sin na samting nogut em i save kamapim, em dai? I mas i gat wanpela samting i winim samting ol man inap givim. Man bilong raitim Song i tok: “Pe bilong baim bek man, em i antap tumas. Man i no inap baim God bai God i larim em i stap laip oltaim na em i no ken i dai.” (Song 49:8, 9) Tru, yumi inap skruim sampela yia moa long laip bilong yumi sapos yumi kisim gutpela kaikai bilong strongim skin na yumi kisim gutpela marasin samting, tasol i no gat wanpela man inap pinisim sin i stap long skin bilong em. I no gat wanpela man inap pasim skin long go lapun na kisim ol sik na pen bilong en, na kamapim bek skin i gutpela olgeta wankain olsem God i gat laik long en long pastaim tru. Pol i no giaman taim em i tok, sin bilong Adam i mekim na olgeta manmeri “i stap nogut na i save bagarap,” o olsem wanpela Baibel (The Jerusalem Bible) i tok, ol ‘i no inap winim mak olsem God i laikim.’ (Rom 8:20) Tasol gutpela tru, Man bilong wokim yumi em i no lusim yumi olgeta. Em i bin wokim rot bilong rausim sin na dai olgeta na i no ken kamap moa. Em i mekim olsem wanem?
5. Olsem wanem Lo God i bin givim long ol Israel i kamapim olsem em i save tingim tru stretpela pasin?
5 Jehova em i save “laikim olgeta gutpela pasin na olgeta samting i stret.” (Song 33:5) Lo em i bin givim long lain Israel i kamapim klia olsem em i save tingim tru pasin bilong skelim stret ol samting, na mekim wankain pasin long olgeta man taim em i skelim ol long kot. Olsem: Wanpela bilong ol dispela lo i tok, sapos wanpela man i kilim man i dai, orait ol “i mas kilim dispela man i dai.” Olsem na sapos wanpela Israel i kilim i dai wanpela man, ol i mas bagarapim laip bilong em yet, i olsem senis bilong dispela laip em i bin bagarapim. (Kisim Bek 21:23; Namba 35:21) Dispela bai inapim stretpela lo bilong God.—Skelim wantaim Kisim Bek 21:30.
6. (a) Olsem wanem yumi ken kolim Adam olsem man bilong kilim man i dai? (b) Dispela laip bilong Adam i bin lus, em i wanem kain laip? I mas i gat wanem kain ofa bilong inapim stretpela lo bilong dispela samting?
6 Taim Adam i mekim sin, em i kamap man bilong kilim man i dai. Olsem wanem em i bin kamap olsem? Em bai givim dispela sin bilong em—na dai tu—long olgeta tumbuna pikinini bilong em. Pasin bikhet bilong Adam i mekim na skin bilong yumi i wok long bagarap, i go i go olsem na bihain yumi dai na go long matmat. (Song 90:10) Na sin bilong Adam i bin mekim narapela samting i bikpela moa. Dispela laip bilong em yet na ol pikinini bilong em i bin lus, em i no laip bilong i stap inap 70 o 80 yia samting, nogat. Dispela laip i bin lus em laip i gutpela olgeta—olsem laip i stap oltaim oltaim. Olsem na sapos wanpela laip i mas lus olsem bekim bilong narapela laip i bin lus, ol i mas givim wanem kain laip bilong inapim stretpela lo bilong dispela samting? I mas i gat laip bilong wanpela man i gutpela olgeta—em laip i wankain olsem laip bilong Adam, olsem em inap kamapim ol pikinini i gutpela olgeta. Sapos i gat wanpela man i gutpela olgeta na em i givim skin bilong em olsem ofa, dispela bai inapim stretpela lo bilong God, na tu, em bai opim rot bambai sin na dai i ken pinis olgeta.
Inapim Pe Bilong Sin
7. Stori long dispela tok “pe bilong baim bek man.”
7 Pe bilong kisim bek yumi long dispela sin, Baibel i kolim olsem “pe bilong baim bek man.” (Song 49:8) Olsem: Sapos man i stilim wanpela pikinini, em bai singaut long wanpela pe em man i mas givim bilong kisim bek dispela pikinini. Tru, pe Jehova i bin givim i no bilong baim bek wanpela man ol i bin stilim, nogat. Tasol em i bin givim wanpela pe. Dispela tok “pe bilong baim bek man,” long tok Hibru i olsem “karamapim.” Bilong karamapim sin bilong ol man, dispela pe bilong baim bek man em i mas stret tru long mak bilong samting em i mas karamapim, o inapim—em laip bilong Adam i gutpela olgeta.
8. (a) Stori long lo bilong baim bek wanpela samting. (b) Olsem wanem dispela lo bilong baim bek samting em i stret long yumi ol sinman?
8 Dispela i stret wantaim wanpela lo i stap insait long Lo Bilong Moses—olsem lo bilong baim bek ol samting. Sapos wanpela Israel i kamap rabis na em i larim narapela man i no bilong lain Israel i baim em olsem wanpela wokboi nating, orait wanpela wanblut inap baim em bek, olsem em i mas givim pe ol i ting i stret wantaim dispela wokboi. (Wok Pris 25:47-49) Baibel i tok, yumi ol man i gat sin, olsem na yumi stap “wokboi bilong sin.” (Rom 6:6; 7:14, 25) I mas i gat wanem pe bilong baim bek yumi? Olsem yumi stori pinis, laip bilong wanpela man i gutpela olgeta i bin lus, olsem na i mas i gat laip bilong wanpela man i gutpela olgeta i olsem pe bilong baim bek dispela samting—pe i no ken antap o aninit long dispela mak.
9. Olsem wanem Jehova i bin wokim rot bilong karamapim sin?
9 Sin i stap pinis long skin bilong yumi ol man taim mama i karim yumi. I no gat wanpela man i wankain stret olsem Adam; i no gat wanpela man namel long yumi em inap givim pe i stret wantaim stretpela lo bilong God long baim bek man. Olsem tok piksa yumi bin mekim long kirap bilong dispela stori, i olsem yumi gat wanpela bikpela sik em inap bagarapim yumi, na yumi no gat mani bilong baim dokta long katim yumi na stretim dispela sik. Long kain taim olsem, bai yumi tenkyu tru sapos wanpela man i helpim yumi na em i putim mani inap long baim dokta, a? Em nau, Jehova i bin mekim olsem! Em i bin wokim rot bilong kisim bek yumi long sin i go inap oltaim oltaim. Em i amamas long givim samting long yumi em yumi yet i no inap tru long baim. Em i mekim olsem wanem? Pol i tok: “God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.” (Rom 6:23) Jon i tok, Jisas em i “Pikinini Sipsip Bilong God. Em i kam bilong tekewe sin bilong olgeta manmeri bilong graun.” (Jon 1:29) Orait nau yumi ken stori long olsem wanem Jehova i bin mekim wok long gutpela Pikinini bilong em bilong givim pe bilong baim bek ol man.
Pe Bilong “Baim Bek” Ol Man
10. Olsem wanem na bihain ol tok profet long wanpela “pikinini” i sutim Josep na Maria?
10 Taim pasin bikhet i bin kamap long Iden, kwiktaim Jehova i tokaut long laik bilong em long kamapim wanpela pikinini em bai baim bek ol man long kalabus bilong sin. (Stat 3:15) Long rot bilong sampela tok Jehova i kamapim, em i makim wanem lain bai kamapim dispela pikinini. Bihain ol dispela tok i sutim Josep na Maria, em ol i makim tupela long marit na ol i sindaun long Palestain. Long wanpela driman, ensel i tokim Josep olsem spirit holi i kam long Maria na em i gat bel. Ensel i tok: “Bai em i karim pikinini man, na yu mas kolim nem bilong en Jisas, long wanem, em bai i tekewe sin bilong ol manmeri bilong en na kisim bek ol.”—Matyu 1:20, 21.
11. (a) Olsem wanem Jehova i stretim rot bambai Pikinini bilong em i ken kamap olsem wanpela man bilong graun i gutpela olgeta? (b) Olsem wanem Jisas inap givim pe i stret bilong “baim bek” ol man?
11 Dispela pikinini i no wankain olsem ol narapela pikinini i save kamap long bel bilong mama, long wanem, taim Jisas i no kam daun yet long graun em i bin stap long heven. (Sindaun 8:22-31; Kolosi 1:15) Long strong bilong em Jehova i bin wokim wanpela mirakel na em i kisim laip bilong Jisas na putim i go insait long bel bilong Maria na bai dispela gutpela Pikinini bilong God inap kamap wanpela man bilong graun em meri i bin karim. (Jon 1:1-3, 14; Filipai 2:6, 7) Jehova i stiaim ol samting i go na bai sin bilong Adam i no ken pas long Jisas. Taim Maria i karim Jisas, skin bilong Jisas i gutpela olgeta. Olsem na em i holim wanpela samting em Adam i bin tromoi—em laip bilong man i gutpela olgeta. Em nau, wanpela man inap givim pe bilong baim sin! Jisas i bin mekim olsem long Nisan 14, long yia 33 C.E. Long dispela bikpela de Jisas i larim ol birua i kilim em i dai, na long dispela rot em i givim pe i stret bilong “baim bek” ol man.—1 Timoti 2:6.
Pe Bilong Laip Bilong Man i Gutpela Olgeta
12. (a) Stori long olsem wanem i dai bilong Jisas i narapela kain tru long i dai bilong Adam. (b) Olsem wanem Jisas i bin kamap “Papa bilong i stap oltaim oltaim” long ol man bilong bihainim tok?
12 Dai bilong Jisas i narapela kain long i dai bilong Adam, na dispela i kamapim klia bikpela pe Jisas i givim bilong baim bek ol man. I stret Adam i mas i dai, long wanem, long laik bilong em yet em i sakim tok bilong Man bilong wokim em. (Stat 2:16, 17) Tasol Jisas i no gat asua na em i dai, long wanem, “em i no bin mekim sin.” (1 Pita 2:22) Olsem na taim Jisas i dai, em i holim wanpela samting i gat bikpela pe tru bilong en, em samting Adam i no bin holim long taim em i dai—Jisas em inap tru long holim laip olsem wanpela man i gutpela olgeta. Olsem na dai bilong Jisas i gat bikpela pe inap tru olsem wanpela ofa. Taim em i go antap long heven olsem wanpela spirit, em i givim pe bilong ofa bilong em long Jehova. (Hibru 9:24) Taim Jisas i mekim olsem, em i baim ol sinman bilong graun na em i kamap nupela Papa bilong ol, olsem senis bilong Adam. (1 Korin 15:45) I gat as na Jisas i holim nem olsem “Papa bilong i stap oltaim oltaim.” (Aisaia 9:6) Tingim dispela samting! Adam, em wanpela papa i gat sin, em i bin givim dai long olgeta pikinini bilong em. Orait Jisas, em wanpela Papa i gutpela olgeta, em i mekim wok long pe bilong ofa bilong em bilong givim laip oltaim oltaim long ol manmeri i bihainim tok.
13. (a) Mekim tok piksa long olsem wanem Jisas i bin pinisim dinau em Adam i bin kamapim. (b) Bilong wanem ofa bilong Jisas i no karamapim sin bilong tupela tumbuna bilong yumi bilong pastaim?
13 Tasol olsem wanem i dai bilong wanpela man tasol em inap long baim sin bilong planti man? (Matyu 20:28) Long wanpela stori bilong Wastaua inap sampela yia i go pinis, yumi bin mekim wanpela tok piksa long pe bilong baim bek ol man, olsem: “Tingim wanpela haus faktori i gat planti handet wokman long en. Wanpela maneja bilong dispela haus faktori i bin mekim pasin giaman na mani bilong bisnis i pinis na bisnis i bagarap; ol i pasim dispela haus faktori. Dispela i mekim na planti handet man ol i no gat wok mani na ol i no inap baim paua na wara na ol narapela samting. Meri pikinini bilong ol, na ol man i bin givim dinau long kampani, olgeta i kisim hevi long pasin nogut bilong dispela maneja long paulim mani! Orait nau wanpela maniman i kam na em i laik helpim kampani, na em i bekim olgeta dinau bilong dispela kampani na ol i opim gen haus faktori. Taim maniman i pinisim dinau bilong kampani, dispela i tekewe hevi bilong ol dispela planti wokman bilong kampani, na famili bilong ol, na ol man i bin givim dinau long kampani. Tasol olsem wanem long dispela maneja bilong pastaim? Em i kisim gutpela samting olsem ol narapela i kisim taim kampani i kamap gutpela gen? Nogat. Em i stap kalabus, olsem na em i pinis olgeta long dispela wok bilong em! Na i olsem tu long taim Jisas i pinisim dispela wanpela dinau bilong Adam—dispela i helpim planti milion tumbuna pikinini bilong Adam, tasol i no helpim Adam yet.”
14, 15. Olsem wanem yumi ken tok, long laik bilong ol yet Adam na Iv i bin mekim sin? Olsem wanem yumi no wankain olsem tupela?
14 Dispela pasin i stret, long wanem, long laik bilong tupela yet Adam na Iv i bin mekim sin. Ol yet i laik sakim tok bilong God. Tasol yumi no olsem. Taim mama i karim yumi, yumi gat sin. Em i no laik bilong yumi yet, nogat. Maski yumi wok strong tru, yumi no inap abrusim tru pasin bilong mekim sin. (1 Jon 1:8) Ating sampela taim yumi olsem aposel Pol, em i bin tok: “Taim mi laik mekim gutpela pasin, pasin nogut i save pasim rot bilong mi. Tru, long tingting bilong mi, mi laikim tumas lo bilong God. Tasol mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi. O sori, dispela hevi i bagarapim tru tingting bilong mi!”—Rom 7:21-24.
15 Tasol ofa bilong Jisas i mekim na yumi inap wetim gutpela samting i kamap! Olsem God i tok promis long en, Jisas em i dispela pikinini “olgeta lain bilong graun bai kisim blesing” long rot bilong em. (Stat 22:18, NW; Rom 8:20) Ofa bilong Jisas i opim dua bambai ol man i bilip long em ol i gat rot long kisim ol gutpela samting tru. Orait nau yumi ken stori long sampela samting olsem.
Ofa Bilong Krais i Helpim Yumi
16. Maski yumi gat sin, ofa bilong Jisas i mekim na nau yumi inap kisim wanem ol gutpela samting?
16 Jems, em wanpela man bilong raitim Baibel, em i tokaut olsem: “Planti taim yumi save tingting long mekim wanpela samting, na yumi save popaia.” (Jems 3:2) Tasol ofa bilong Krais i mekim na God inap lusim ol rong bilong yumi. Jon i tok: “Sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta. Em yet i bin mekim wok bilong tekewe sin bilong yumi.” (1 Jon 2:1, 2) Tru, yumi no ken ting sin em i liklik samting tasol. (Jut 4; skelim wantaim 1 Korin 9:27.) Tasol sapos yumi mekim wanpela rong, yumi inap kamapim long Jehova, long wanem, yumi bilip olsem em i ‘save rausim sin bilong yumi.’ (Song 86:5; 130:3, 4; Aisaia 1:18; 55:7; Aposel 3:19) Olsem na ofa bilong Krais i save helpim yumi long mekim wok bilong God wantaim klinpela bel na yumi inap beten long em long nem bilong Krais Jisas.—Jon 14:13, 14; Hibru 9:14.
17. Ofa bilong Jisas i mekim na yumi inap kisim wanem ol gutpela samting long bihain?
17 Ofa bilong Krais i opim rot na bai laik bilong God i ken kamap tru, olsem: Ol man i bihainim tok bilong em ol inap i stap oltaim oltaim long Paradais long graun. (Song 37:29) Pol i tok: “I gat planti promis bilong God i stap, na Krais i save tok “Yes” long dispela olgeta promis [olsem ol bai kamap tru long rot bilong em].” (2 Korin 1:20) Tru, dai i bin kamap “olsem king na i daunim olgeta man.” (Rom 5:17) Tasol long rot bilong ofa bilong baim bek ol man God bai pinisim dispela “birua.” (1 Korin 15:26; KTH 21:4) Na ofa bilong Jisas inap helpim tu ol man i dai pinis. Jisas i tok: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.”—Jon 5:28, 29; 1 Korin 15:20-22.
18. Sin i bin mekim wanem samting nogut long ol man? Long nupela taim God bai kamapim, dispela pasin bai senis olsem wanem?
18 Man! Tingim amamas bai yumi kisim taim i stap bilong yumi i kamap wankain olsem God i bin laikim long pastaim tru—bai i no gat ol dispela hevi i save daunim yumi long nau. Sin i bin mekim na yumi no stap stret wantaim God, na tu, yumi no stap stret wantaim tingting na bel na skin bilong yumi yet. Tasol Baibel i tok promis olsem, long nupela taim God bai kamapim, “i no gat man . . . bai i tok olsem, ‘Mi gat sik.’ ” Tru tumas, ol sik bilong skin na tingting bai i no ken painim moa ol man. Bilong wanem? Aisaia i tok: “Bikpela bai i lusim sin bilong ol manmeri.”—Aisaia 33:24.
Ofa Bilong Krais i Kamapim Sori Bilong God
19. Yumi tingim ofa bilong Krais na yumi wan wan i mas mekim wanem?
19 Jehova i laikim tumas ol man na dispela i kirapim em long salim Pikinini bilong em i kam long graun. (Rom 5:8; 1 Jon 4:9) Na Jisas tu i laikim tumas ol man na dispela i kirapim em long “kisim ples bilong olgeta manmeri na i dai.” (Hibru 2:9; Jon 15:13) Olsem na i gat as na Pol i tok: “Krais i bin givim bel bilong en long mipela, na dispela i save kirapim mipela long wok, long wanem, . . . wanpela man i bin kisim ples bilong yumi olgeta na i dai . . . Dispela man i mekim olsem bilong helpim yumi ol man i stap laip, bai yumi no ken tingting moa long yumi yet na wokabaut. Nogat. Yumi ken tingting long dispela man i kisim ples bilong yumi na i dai pinis, na i kirap bek tu. Yumi ken tingting long em na wokabaut.” (2 Korin 5:14, 15) Sapos yumi pilim tru dispela samting Jisas i bin mekim bilong helpim yumi, bai yumi mekim ol samting i kamapim olsem yumi bilip long dispela ofa. Long wanem, ofa bilong baim bek ol man em i wokim rot na bai yumi ken lusim kalabus bilong i dai! Yumi no laik bai ol samting yumi mekim i kamapim olsem yumi tingim ofa bilong Jisas i liklik samting tasol.—Hibru 10:29.
20. I gat wanem sampela rot na yumi bihainim “tok” bilong Jisas?
20 Yumi ken mekim wanem bilong kamapim olsem yumi pilim tru dispela ofa bilong baim bek ol man? Klostu long taim ol i kam holim Jisas, em i tok: “Sapos man i laikim mi tru, em bai i bihainim gut tok bilong mi.” (Jon 14:23) Wanpela “tok” bilong Jisas, em dispela tok bilong em olsem yumi mas wok strong long mekim wok em i bin givim long yumi, olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol.” (Matyu 28:19) Bilong bihainim tok bilong Jisas, i gat narapela samting tu yumi mas mekim—yumi mas laikim tru ol brata spirit bilong yumi.—Jon 13:34, 35.
21. Bilong wanem yumi mas i go long bung bilong tingim i dai bilong Krais long Epril 1?
21 Wanpela gutpela rot tru yumi ken soim olsem yumi pilim tru ofa bilong baim bek ol man, em yumi ken i go long bung bilong tingim i dai bilong Krais, long dispela yia em bai kamap long Epril 1.a Dispela tu em wanpela “tok” bilong Jisas, long wanem, taim em i kamapim dispela bung, em i tokim lain bilong em: “Yupela i mas mekim olsem bilong tingim mi.” (Luk 22:19) Taim yumi go long dispela bikpela bung na yumi putim gut yau long olgeta tok Krais i bin givim long yumi, bai yumi kamapim klia olsem yumi bilip tru olsem ofa bilong Jisas em i rot bilong God long kisim bek ol man. Tru tumas, ‘i no gat narapela man inap kisim bek yumi.’—Aposel 4:12.
[Futnot]
a Long dispela yia, Epril 1 i olsem Nisan 14 bilong yia 33 C.E., em de Jisas i bin i dai. Askim ol Witnes Bilong Jehova long wanem taim na wanem ples ol bai mekim dispela bung.
Yu Inap Tingim?
◻ Bilong wanem ol man bilong graun i no inap mekim wanpela samting bilong tekewe sin bilong ol?
◻ Olsem wanem Jisas i olsem pe i stret bilong “baim bek” ol man?
◻ Jisas em inap tru long holim laip olsem wanpela man i gutpela olgeta, tasol em i mekim wanem wok long en bilong helpim yumi?
◻ Ofa bilong Krais i mekim na ol man i kisim wanem ol gutpela samting?
[Piksa long pes 15]
Wanpela man i gutpela olgeta—em wankain stret olsem Adam—em tasol bai inapim stretpela lo bilong God
[Piksa long pes 16]
Jisas em inap tru long holim laip olsem wanpela man i gutpela olgeta, olsem na indai bilong em i gat strong olsem wanpela ofa