Ol Man i Olsem “Presen” Bilong Lukautim Ol Sipsip Bilong Jehova
“Em i go antap tru, na em i kisim bikpela lain kalabus i go wantaim em. Na em i givim ol presen long ol man.”—EFESUS 4:8.
1. Wanpela sista Kristen i tok wanem long ol elda long kongrigesen bilong em?
“TENKYU tru long lukautim gut mipela. Pes bilong yupela i save lait, na yupela i mekim pasin sori long mipela na tingim gut mipela—yupela i no giaman long mekim olsem. Oltaim yupela i redi long putim gut yau long tok bilong mipela na kamapim sampela tok bilong Baibel bilong mekim gut bel bilong mipela. Mi beten olsem oltaim mi mas pilim tru wok bilong yupela.” Wanpela sista Kristen i raitim dispela tok long ol elda long kongrigesen bilong em. Tru tumas, em i pilim tru gutpela pasin sori ol dispela wasman Kristen i bin mekim long em.—1 Pita 5:2, 3.
2, 3. (a) Olsem Aisaia 32:1, 2 i tok, ol elda i gat pasin sori ol i save lukautim ol sipsip bilong Jehova olsem wanem? (b) Elda i mas mekim wanem na bai yumi ken tingim em i olsem wanpela presen?
2 Jehova i givim ol elda bilong lukautim ol sipsip bilong em. (Luk 12:32; Jon 10:16) Jehova i laikim tumas ol sipsip bilong em, olsem na em i bin baim ol long blut bilong Jisas i dia tumas. Olsem na Jehova i amamas taim ol elda i mekim pasin isi long ol. (Aposel 20:28, 29) Tingim tok profet i stori long ol dispela elda, o “bikman”: “Ol wan wan bikman bai i helpim gut ol manmeri i kam bilong kisim helpim bilong ol. Ol bai i stap olsem ol ples hait ol manmeri i ken i go na hait long en long taim bilong bikpela win na ren. Na bai ol i stap tu olsem wara i ran i go long ples drai na olsem bikpela ston i haitim san long ples drai na ol man i kam sindaun long ples kol bilong en na malolo long taim bilong hatpela san.” (Aisaia 32:1, 2) Tru tumas, ol i gat wok long lukautim gut ol sipsip bilong God, na givim nupela strong long ol, na mekim gut bel bilong ol. Olsem na taim ol elda i lukautim lain sipsip bilong God long pasin sori, em nau, ol i wok long mekim ol samting God i laik bai ol i mas mekim.
3 Ol kain elda olsem, Baibel i kolim ol olsem “presen.” (Efesus 4:8) Taim yumi tingim wanpela presen, yumi tingim samting narapela i givim long narapela bilong helpim em long samting em i sot long en o bilong amamasim em. Yumi ken ting elda i olsem presen taim em i mekim wok long ol save bilong em bilong helpim gut lain bilong God na helpim ol long i stap amamas. Em inap mekim dispela samting olsem wanem? Bekim bilong dispela askim, olsem i stap long ol tok bilong Pol long Efesus 4:7-16, em i litimapim gutpela pasin bilong Jehova olsem em i save sori long ol sipsip bilong em na em i tingim tru ol.
Ol Man i Olsem “Presen” —Ol i Kam Long We?
4. Bilong truim tok bilong Song 68:18, Jehova i bin “go antap” olsem wanem? Ol man i olsem “presen,” ol i husat?
4 Taim Pol i tok ol man i olsem “presen,” em i kamapim tok bilong King Devit em i bin tok long Jehova olsem: “God i bin i go antap long maunten i antap moa, na em i kisim bikpela lain kalabus i go wantaim em. Em i bin kisim ol presen bilong ol bikhetman i bin pait long em.” (Song 68:18) Ol Israel i sindaun long Graun Bilong Promis inap planti yia pinis, na nau, long tok piksa, Jehova i “go antap” long maunten Saion na em i makim Jerusalem olsem nambawan biktaun bilong kingdom bilong Israel na em i putim Devit olsem king. Tasol ol dispela man i olsem “presen” ol i husat? Em ol man ol Israel i bin daunim ol taim ol i bin pait na kisim Graun Bilong Promis. Bihain, sampela bilong dispela lain kalabus ol i mekim wok bilong helpim lain Livai long haus lotu.—Esra 8:20.
5. (a) Olsem wanem Pol i makim olsem tok bilong Song 68:18 i gat truim bilong en insait long kongrigesen Kristen? (b) Olsem wanem Jisas i bin “go antap”?
5 Long pas Pol i salim long ol Efesus, em i makim olsem dispela tok bilong man bilong raitim Song em i gat bikpela truim insait long kongrigesen Kristen. Pol i kamapim tok bilong Song 68:18, olsem: “Krais i givim bikpela presen moa long yumi, na olsem tasol God i bin marimari moa yet long yumi olgeta wan wan. Buk bilong God i tok olsem, ‘Em i go antap tru, na em i kisim bikpela lain kalabus i go wantaim em. Na em i givim ol presen long ol man.’ ” (Efesus 4:7, 8) Pol i makim truim bilong dispela song long Jisas olsem mausman bilong God. Long pasin bilong stap gut long God, Jisas i “winim pinis strong bilong dispela graun.” (Jon 16:33) Na tu, God i kirapim bek em long matmat, na dispela i mekim na em i winim indai na Satan. (Aposel 2:24; Hibru 2:14) Jisas i kirap bek pinis, na long yia 33 C.E. em i “go antap tru long olgeta heven”—olsem winim olgeta ensel long heven. (Efesus 4:9, 10; Filipai 2:9-11) Olsem wanpela man i daunim ol birua, Jisas i kisim sampela “kalabus” long lain birua. Em i mekim dispela samting olsem wanem?
6. Jisas i kamap pinis long heven, na long Pentikos bilong yia 33 C.E., em i kirap long kisim ol samting long haus bilong Satan olsem wanem? Jisas i mekim wanem long ol “kalabus”?
6 Taim Jisas i stap long graun, em i kamapim strong bilong em bilong bosim Satan—em i kisim bek ol man i stap kalabus long ol spirit nogut. I olsem Jisas i bin go insait long haus bilong Satan, na pasim baklain long em, na kisim ol samting bilong em. (Matyu 12:22-29) Tingim dispela samting: Taim Jisas i kirap bek pinis na em i kisim “bikpela namba na strong bilong bosim olgeta samting long heven na long graun,” orait nau em inap kisim planti samting! (Matyu 28:18) Jisas i kamap pinis long heven, na long Pentikos bilong yia 33 C.E., olsem mausman bilong God, em i kirap long kisim olgeta samting long haus bilong Satan taim em i “kisim bikpela lain kalabus i go wantaim em”—em ol man i bin kalabus longpela taim long sin na indai na Satan i bosim ol. Ol dispela “kalabus” i amamas long kamap ‘wokboi nating bilong Krais, na bel bilong ol i amamas long bihainim laik bilong God.’ (Efesus 6:6) I olsem Jisas i pulim ol long han bilong Satan, na em i mekim wok bilong Jehova na givim ol long kongrigesen olsem “presen.” Tingim bikpela kros bilong Satan taim em i lukim Jisas i kisim ol!
7. (a) Ol man i olsem “presen” ol i save mekim wanem ol wok insait long kongrigesen? (b) Jehova i bin givim rot long olgeta wan wan man i holim wok elda long mekim wanem?
7 Olsem wanem? Yumi lukim ol man i olsem “presen” long kongrigesen long nau? Tru tumas, yumi lukim! Ol i mekim wok olsem elda, na ol i wok strong long ‘autim gutnius na mekim wok [wasman] na skulim ol manmeri’ long 87,000 kongrigesen bilong lain bilong God long olgeta hap bilong graun. (Efesus 4:11) Satan bai amamas sapos ol i mekim nogut long lain sipsip. Tasol God i no bin givim ol dispela man long kongrigesen, long rot bilong Jisas, bilong ol i ken mekim olsem, nogat. Jehova i laik bai ol i mas lukautim gut kongrigesen, na em bai skelim ol long pasin ol i mekim long ol dispela sipsip em i givim long ol. (Hibru 13:17) Sapos yu wanpela elda, Jehova i bin givim rot long yu long kamapim long ples klia olsem yu wanpela “presen,” o blesing, long ol brata bilong yu. Yu ken mekim olsem long rot bilong inapim 4-pela bikpela samting.
Taim Ol i Mas “Stretim Bek” Narapela
8. Sampela taim yumi olgeta i gat wok long stretim bek wanem ol samting?
8 Namba wan samting: Pol i tok, Jehova i givim ol man olsem “presen” bilong ‘helpim ol manmeri bilong God.’ (Efesus 4:12) Wanpela tok Grik ol i kisim dispela tok “helpim” long en, i olsem “stretim bek.” Yumi ol sinman bilong graun, olsem na sampela taim yumi olgeta i gat wok long stretim bek tingting o pasin bilong yumi na bai i stret wantaim tingting na laik bilong God. Long pasin sori Jehova i bin givim ol man olsem “presen” bilong helpim yumi long stretim ol samting yumi mas stretim. Ol i save mekim olsem wanem?
9. Elda i ken mekim wanem bilong stretim bek sipsip i bin mekim rong?
9 Sampela taim elda i mas helpim sipsip i bin mekim rong—ating em i bin popaia na “mekim sin.” Elda i ken mekim wanem bilong helpim em? Galesia 6:1 i tok, em “i mas mekim pasin isi long dispela man na helpim em long stretim pasin bilong em.” Olsem na taim elda i givim tok long man, em i no ken krosim em na mekim sampela hatpela tok. Ol tok elda i givim i mas strongim bel bilong man—nogut dispela tok i “pretim” em. (2 Korin 10:9; skelim wantaim Jop 33:7.) Ating dispela man i sem pinis, olsem na wasman i gat pasin sori em i no ken bagarapim tingting na bel bilong em. Taim elda i mas givim strongpela tok tu long narapela, sapos pasin sori i kirapim em long mekim na em i givim long pasin sori, ating kain tok olsem bai stretim tingting o pasin bilong dispela man i bin mekim rong, na em bai kamap orait gen.—2 Timoti 4:2.
10. Wanem ol samting i insait long wok bilong stretim bek man?
10 Taim Jehova i givim ol man olsem “presen” bilong stretim bek yumi, em i laik bai ol i mas strongim yumi long spirit na ol i mas stap olsem gutpela piksa inap tru long yumi ken bihainim. (1 Korin 16:17, 18; Filipai 3:17) Wok bilong stretim bek narapela i no bilong stretim man i bin mekim rong tasol, nogat. Em i bilong helpim man i stap gut long God long bihainim yet stretpela rot.a Long nau, i gat planti samting i save mekim man i bel hevi, olsem na planti man i mas i gat samting bilong strongim bel bilong ol. Ating sampela i mas i gat narapela bilong helpim ol long pasin isi long mekim tingting bilong ol i kamap stret wantaim tingting bilong God. Olsem: Sampela gutpela Kristen i save pilim olsem ol i no inap o ol i no gutpela. Kain man olsem i stap bel hevi ating em i pilim olsem Jehova i no ken laikim em na maski em i wok strong long mekim wok bilong God, God i no inap orait long wok bilong em. (1 Tesalonaika 5:14) Tasol dispela kain tingting i no stret wantaim tingting bilong God long ol man i lotuim em. Nogat tru!
11. Ol elda i ken mekim wanem bilong helpim man em i pilim olsem em i no gutpela?
11 Yupela ol elda i ken mekim wanem bilong helpim kain man olsem? Long gutpela pasin sori, kamapim sampela tok bilong Baibel i kamapim klia olsem Jehova i save tingim olgeta wan wan wokboi bilong em, na helpim ol long save, ol dispela tok i makim ol yet. (Luk 12:6, 7, 24) Na helpim ol long save, Jehova i bin “bringim [ol] i kam” bilong mekim wok bilong em, olsem na em i mas lukim sampela gutpela pasin long ol. (Jon 6:44) Tokim ol, i no ol tasol i gat dispela tingting—planti gutpela wokboi bilong Jehova ol tu i bin kisim kain tingting olsem. Wanpela taim, profet Elaija i gat bikpela bel hevi tru na em i laik bai em i ken i dai. (1 King 19:1-4) Long taim bilong ol aposel, sampela Kristen God i bin makim ol long spirit holi ol i pilim olsem bel bilong ol i “kotim” ol. (1 Jon 3:20) Sapos ol i save olsem ol gutpela man i bin stap long taim bilong raitim Baibel ol i “man wankain olsem yumi,” dispela inap mekim gut bel bilong ol. (Jems 5:17) Na yupela ken stori long sampela gutpela stori i stap long Wastaua na Kirap! bilong strongim bel bilong ol man i bel hevi. Taim yupela i mekim wok long pasin sori bilong strongim bek bilip bilong kain man olsem, God i save lukim—em dispela Man i bin givim yupela olsem “presen.”—Hibru 6:10.
Helpim Lain Sipsip Long “Kamap Strong”
12. Dispela tok ‘bodi bilong Krais i kamap strong’ i makim wanem samting? Wanem samting i olsem rot bilong helpim lain sipsip long kamap strong?
12 Namba tu samting: God i givim ol man olsem “presen” bilong helpim ‘bodi bilong Krais long kamap strong na i stap gut.’ (Efesus 4:12) Dispela tok bilong Pol, “kamap strong,” i kirapim yumi long tingim wok bilong wokim haus, na “bodi bilong Krais” em i makim ol man—em ol man bilong lain Kristen God i bin makim ol. (1 Korin 12:27; Efesus 5:23, 29, 30) Ol elda i mas helpim ol brata bilong ol long kamap strong long ol samting bilong spirit. Ol i laik ‘strongim bilip bilong ol; ol i no laik bagarapim’ lain sipsip. (2 Korin 10:8) Pasin bilong sori em i olsem rot bilong helpim lain sipsip long kamap strong, long wanem, ‘pasin bilong givim bel i save mekim yumi i kamap strongpela Kristen.’—1 Korin 8:1.
13. Pasin bilong pilim tru hevi bilong narapela i olsem wanem? Bilong wanem i bikpela samting long ol elda i mas kamapim dispela pasin long ol narapela?
13 Wanpela pasin i insait long pasin bilong sori na i helpim ol elda long ‘strongim’ lain sipsip, em pasin bilong pilim tru hevi bilong ol. Dispela pasin i olsem: Yumi yet i mas kamap olsem dispela man i gat hevi—yumi mas pilim tru tingting bilong em, na save olsem i gat sampela samting em i no inap mekim. (1 Pita 3:8) Bilong wanem i bikpela samting long ol elda i mas i gat dispela pasin? Bikpela samting tru i olsem: Jehova yet i God bilong pilim tru hevi bilong narapela—em dispela Man i bin givim ol man olsem “presen” long yumi. Taim ol wokboi bilong em i kisim pen o hevi, em i bel sori long ol. (Kisim Bek 3:7; Aisaia 63:9) Em i save tingim ol samting ol i no inap mekim. (Song 103:14) Orait, olsem wanem ol elda i ken soim olsem ol i pilim tru hevi bilong narapela?
14. Ol elda inap pilim tru hevi bilong ol narapela long wanem ol rot?
14 Taim wanpela man i bel hevi i kam long ol, ol i save putim gut yau na pilim gut tingting bilong em. Ol i wok strong long tingim gut i stap bilong ol brata bilong ol, na pasin bilong ol, na sindaun bilong ol. Olsem na taim ol elda i givim sampela tok bilong Baibel long ol bilong strongim ol, ol sipsip i no hatwok long kisim, long wanem, ol i save dispela tok i kam long ol wasman i save tingim ol na pilim tru ol hevi bilong ol. (Sindaun 16:23) Na tu, pasin bilong pilim tru hevi bilong narapela bai kirapim ol elda long tingim ol samting ol narapela i no inap mekim na ol samting dispela inap mekim long ol. Olsem: Ating bel bilong sampela Kristen i gat tok, long wanem, ol i no inap mekim sampela wok moa bilong God—ating ol i lapun o ol i gat sik. Tasol ating sampela i mas kisim tok bilong strongim ol na bai wok bilong ol long autim tok i ken kamap gutpela moa. (Hibru 5:12; 6:1) Pasin bilong pilim tru hevi bilong ol narapela bai kirapim ol elda long painim sampela tok bilong strongim ol—em ol “tok i swit long yau bilong ol.” (Saveman 12:10) Taim ol sipsip bilong Jehova i stap strong na bel bilong ol i kirapim ol long mekim wok, pasin bilong laikim tru God bai kirapim ol long wok strong moa long mekim wok bilong em!
Ol i Strongim Pasin Wanbel
15. Wanem tupela samting i insait long dispela tok, “bilip tru na stap wanbel tru”?
15 Namba 3 samting: God i givim ol man olsem “presen” bilong helpim yumi olgeta long ‘i go i go inap long yumi bilip tru na stap wanbel tru na save tru long Pikinini Bilong God.’ (Efesus 4:13) Dispela tok “bilip tru na stap wanbel tru” i makim olsem ol i mas stap wanbel long ol bilip, na tu, ol bilipman i mas i stap wanbel wantaim. Em nau, dispela em i narapela as na God i bin givim ol man olsem “presen” long yumi—bilong strongim pasin wanbel namel long lain bilong em. Ol i mekim olsem wanem?
16. Bilong wanem i bikpela samting long ol elda yet i mas holimpas pasin bilong ol long stap wanbel?
16 Pastaim, ol yet i mas holimpas pasin bilong ol long i stap wanbel. Sapos lain wasman i bruk, dispela inap nogutim ol sipsip. Hap taim ol inap mekim wok long en bilong lukautim lain sipsip, ating nau i lus nating, long wanem, ol miting bilong ol i pulim bikpela hap taim na ol i tok pait long ol liklik samting. (1 Timoti 2:8) Tru, ating olgeta elda i no wanbel long sampela samting ol i toktok long en, long wanem, pasin bilong ol i narapela narapela kain. Tasol pasin wanbel i no olsem ol i no ken holim narapela narapela tingting o kamapim dispela tingting long stretpela pasin taim ol i toktok wantaim, nogat. Ol elda i save holimpas pasin wanbel bilong ol olsem: Taim wanpela i toktok, ol narapela i save mekim pasin daun na harim gut tingting bilong em; harim pinis, orait nau ol i skelim. Na sapos samting lain elda i laik pasim tok long en i no kalapim wanpela lo bilong Baibel, orait ol elda wan wan i mas redi long daun long en na wanbel long ol samting ol i pasim tingting long en. Pasin bilong daun long narapela i soim olsem, “gutpela tingting na save i kam long God” i save stiaim ol na i helpim ol long i ‘stap wanbel wantaim ol arapela, na isi long ol.’—Jems 3:17, 18.
17. Ol elda i ken mekim wanem bilong helpim kongrigesen long holimpas pasin wanbel?
17 Na ol elda i wok tu long strongim pasin wanbel insait long kongrigesen. Taim sampela samting bilong brukim lain i kamap na i laik bagarapim bel isi bilong kongrigesen—olsem pasin bilong tok baksait, pasin bilong tingting nogut long narapela, o pasin bilong tok pait—kwiktaim ol elda i save givim tok long ol sipsip bilong helpim ol. (Filipai 2:2, 3) Olsem: Ating ol elda i save long sampela i save skelim skelim pasin bilong narapela, o ol i insait long samting bilong narapela i no stret ol i insait long en. (1 Timoti 5:13; 1 Pita 4:15) Ol elda bai wok long helpim kain man olsem long save, pasin em i mekim i no stret wantaim ol tok God i bin skulim yumi long en, na olgeta wan wan i mas “karim hevi bilong pasin ol yet i mekim.” (Galesia 6:5, 7; 1 Tesalonaika 4:9-12) Ol elda bai mekim wok long Baibel bilong soim olsem, Jehova i no putim lo bilong bosim olgeta samting yumi mekim, nogat; long planti samting, ol wan wan Kristen i mas bihainim maus bilong bel na yumi no ken kotim ol long samting ol i mekim. (Matyu 7:1, 2; Jems 4:10-12) Bilong stap wanbel wantaim long mekim wok, pasin bilong bilip na daun long narapela i mas stap insait long kongrigesen. Long rot bilong sampela tok bilong Baibel ol i givim long yumi taim yumi mas kisim, ol man i olsem “presen” ol i helpim yumi long stap wanbel wantaim ol narapela.—Rom 14:19.
Lukautim Lain Sipsip
18, 19. (a) Ol man i olsem “presen” ol i save lukautim yumi na bai husat i no ken bagarapim yumi? (b) Wanem narapela samting inap bagarapim ol sipsip, na ol elda i mas lukautim gut ol? Ol elda i save mekim wanem wok bilong lukautim ol sipsip?
18 Namba 4 samting: Jehova i givim ol man olsem “presen” bilong ol i ken lukautim yumi na bai ‘ol tok bilong ol grisman i save tumas long olgeta pasin bilong trik na giaman, i no inap sakim yumi nabaut olsem win.’ (Efesus 4:14) Long tok Grik, dispela tok “trik” i makim ‘pasin bilong trik na giaman man i mekim taim em i pilai satu.’ Dispela i kirapim yumi long tingim pasin ol man i bikhet na givim baksait long lotu i tru ol i save mekim wok long en, a? Long rot bilong kain kain tok gris, ol i save paulim ol tok bilong Baibel bilong pulim ol Kristen tru na bai ol i lusim bilip. Ol elda i mas lukaut gut long ol dispela man i kain olsem “weldok nogut tru”!—Aposel 20:29, 30.
19 I gat sampela samting moa inap bagarapim ol sipsip bilong Jehova na ol elda i mas lukautim gut ol. Devit, em wanpela wasman bilong bipo, em i no pret long lukautim ol sipsip bilong papa bilong em taim ol animal nogut i kam na i laik bagarapim ol. (1 Samuel 17:34-36) Long nau tu, ating sampela taim bai kamap na ol wasman Kristen i mas strongim bel na bai ol inap lukautim gut ol sipsip bilong Jehova, na ol i mas mekim moa yet long ol sipsip i no gat strong—nogut sampela man i mekim nogut long ol o daunim ol. Kwiktaim ol elda bai rausim long kongrigesen ol man i bikhet na mekim rong, em long laik bilong ol yet ol i mekim pasin bilong trik na giaman bilong helpim pasin nogut bilong ol.b—1 Korin 5:9-13; skelim wantaim Song 101:7.
20. Ol man i olsem “presen” ol i lukautim yumi olsem wanem na yumi stap bel isi?
20 Yumi tenkyu tru i gat ol man i olsem “presen”! Ol i mekim gutpela pasin sori long yumi na yumi stap bel isi, long wanem, long pasin isi ol i stretim bek yumi, na long pasin sori ol i strongim yumi, na ol i helpim yumi long holimpas pasin wanbel, na ol i strongim bel bilong ol na lukautim gut yumi. Tasol ol dispela man i olsem “presen” ol i mas i gat wanem tingting long wok bilong ol insait long kongrigesen? Na yumi ken mekim wanem bilong soim olsem yumi pilim tru ol samting ol i mekim? Stori i kam bihain long dispela bai bekim ol dispela askim.
[Ol Futnot]
a Long Baibel Grik Septuagint, dispela tok ol i tanim olsem “stretim bek,” em i stap tu long Song 17[16]:5. Long dispela ves, gutpela man Devit i beten long Jehova i ken helpim em long wokabaut long rot bilong em.
b Lukim “Askim” long Wastaua, Me 1, 1980, pes 21, 22, na “Yumi Mas Nolaik Tru Long Pasin Nogut” long Wastaua, Janueri 1, 1997, pes 26-29.
Yu Inap Tingim?
◻ Ol man i olsem “presen,” ol i husat? Long rot bilong Krais, bilong wanem God i bin givim ol long kongrigesen?
◻ Ol elda i save mekim wanem bilong inapim wok bilong ol long stretim bek ol sipsip?
◻ Ol elda i ken mekim wanem bilong strongim ol wanbilip bilong ol?
◻ Ol elda i ken mekim wanem bilong helpim kongrigesen long holimpas pasin wanbel?
[Piksa long pes 10]
Pasin bilong pilim tru hevi bilong narapela i helpim ol elda long strongim ol man i bel hevi
[Piksa long pes 10]
Pasin wanbel namel long ol elda i save strongim pasin wanbel insait long kongrigesen