Mekim i Stap Bilong Yu i Kamap Gutpela!
“Man i no save bihainim tok bilong ol man nogut, . . . dispela man i ken amamas tru. . . . Olgeta samting em i mekim i save kamap gutpela.”—SONG 1:1, 3.
1. (a) Planti yangpela i ting wanem samting inap mekim i stap bilong ol i kamap gutpela? (b) Baibel i tok wanem long man em olgeta samting em i mekim i save kamap gutpela?
SAPOS yu tok, yu laik bai i stap bilong yu i kamap gutpela, orait yu tingim wanem samting na yu tok olsem? Wanpela yangpela man i tok: “Nambawan bikpela samting mi bin putim olsem mak bilong winim, em mi laik kamap bikpela bisnisman.” Wanpela yangpela meri i tok: “Nambawan bikpela samting long mi, em mi laik kamapim wanpela famili i stap amamas tru.” Tasol narapela yangpela meri i tok: “Mi laik kisim wanpela naispela haus na wanpela gutpela ka . . . Mi tingting long inapim laik bilong mi yet tasol.” Tasol mani, famili, o wok bilong skin yu inap kisim planti mani long en, ol dispela samting i no rot tru bilong mekim i stap bilong yu i kamap gutpela. Song 1:1-3 i tok: “Man i no save bihainim tok bilong ol man nogut, . . . dispela man i ken amamas tru. Dispela man i save laikim tumas lo bilong God . . . Olgeta samting em i mekim i save kamap gutpela.”
2. Wanem samting i rot bilong mekim i stap bilong yu i kamap gutpela tru? Bilong stap amamas tru, yu mas mekim wanem?
2 Long dispela ves, Baibel i tok promis long samting i no gat wanpela man bilong graun inap givim long yu—em rot bilong mekim i stap bilong yu i kamap gutpela tru! Tasol em i no toktok long kisim planti mani. Baibel yet i toksave olsem: “Pasin bilong laikim tumas mani em i as bilong olgeta pasin nogut.” (1 Timoti 6:10) Rot bilong mekim i stap bilong yu i kamap gutpela tru i olsem: Mekim ol samting God i laikim, na bihainim lo bilong Jehova tu. Dispela tasol em i rot bilong stap belgut na amamas tru! Tru, ating yu no laik stap aninit long lo bilong Jehova na larim em i tokim yu long ol samting yu mas mekim, a? Tasol Jisas i tok: “Ol manmeri i save, ol i stap rabis [olsem sot] tru long ol samting bilong God, em ol i ken amamas.” (Matyu 5:3) Maski yu save long dispela samting o nogat, God i wokim yu na bai i gat ol samting bilong spirit yu mas kisim—na sampela samting olsem, em yu mas kisim save long God na save gut long ol samting em i laik mekim. Olsem na bilong stap amamas tru, yu mas kisim ol dispela samting bilong spirit na bihainim “lo bilong God”—i no gat narapela rot.
Yumi Mas i Gat Ol Lo Bilong God
3. Bilong wanem yumi mas amamas long larim Jehova i ‘bosim wokabaut bilong yumi’?
3 Profet Jeremaia i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Dispela tok i stret long olgeta manmeri, maski ol i yangpela o lapun. Yumi sot long gutpela tingting na save bilong bosim wokabaut bilong yumi yet, tasol i no dispela samting tasol; i no stret long yumi mekim olsem. Long Kamapim Tok Hait 4:11, Baibel i tok: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” Jehova i Man bilong wokim yumi, olsem na em i “as tru bilong laip.” (Song 36:9) Dispela i mekim na save bilong em i winim save bilong ol narapela long ol wok yumi mas mekim long i stap bilong yumi. Olsem na em i bin kamapim sampela lo—tasol ol i no bilong pasim yumi long painim amamas; ol i bilong helpim yumi. (Aisaia 48:17) Taim yumi givim baksait long lo bilong God, hevi i save kamap.
4. I gat wanem as na planti yangpela i bagarapim i stap bilong ol?
4 Olsem: Yu ting i gat wanem as na planti yangpela i bagarapim i stap bilong ol long pasin bilong kisim drak, na pamuk, na kain samting olsem? Song 36:1, 2 i tok: “Sin i stap long bel bilong man nogut, na i givim sampela tok long em. Dispela kain man i no save pret liklik long God. Nogat tru. Em i givim baksait long God. Em i save hambak long em yet na i ting olsem, ‘Mi namba wan tru. God i no inap painimaut ol pasin nogut mi bin mekim, na em i no inap kotim mi.’ ” Ol i no “pret liklik long God,” olsem na planti yangpela i giamanim ol yet olsem pasin nogut bilong ol i no inap kamapim hevi long ol. Tasol bihain ol bai pilim tru wanpela lo i no save senis, em i olsem: “Yu planim pikinini bilong wanem kain kaikai, em dispela kain kaikai tasol bai i kamap long gaden bilong yu. Sapos wanpela man i bihainim ol laik bilong olpela bel bilong em yet, orait dispela pasin bilong olpela bel bai i kamapim kaikai nogut na em bai i bagarap olgeta. Tasol sapos em i bihainim pasin bilong Holi Spirit, orait Holi Spirit bai i kamapim laip long dispela man na em bai i stap gut oltaim oltaim.”—Galesia 6:7, 8.
Mekim Wok Long Ol Yia Bilong Yumi
5, 6. (a) Bilong wanem ol yangpela i mas tingim ol yia bilong ol? Olsem wanem ol inap mekim olsem? (b) Olsem wanem yumi inap ‘tingim Man bilong wokim yumi’?
5 Olsem wanem yu inap mekim i stap bilong yu i kamap gutpela na kisim ‘laip i stap gut oltaim oltaim’? Moses i tok: “Mipela i save stap inap 70 yia tasol. Na sapos mipela i gat strong, mipela i ken i stap inap 80 yia. . . . Dispela olgeta yia i pinis kwiktaim, na mipela tu i go pinis.” (Song 90:10) Ating yu no save tingim i dai bilong yu. Planti yangpela i mekim olsem ol i no inap bagarap. Tasol Moses i kamapim klia olsem ol man i no save stap planti yia. Yumi no save, bai yumi winim 70 o 80 krismas o nogat. “Taim nogut i save painim yumi olgeta,” na em i save painim tu ol yangpela i gat strongpela skin. (Saveman 9:11) Orait, bai yu mekim wanem long gutpela laip nau yu amamas long en? Moses i beten olsem: “Yu skulim mipela gut bai mipela i ken save olsem mipela i no inap i stap longpela taim long graun. Olsem na bai mipela i gat gutpela save tru.”—Song 90:12.
6 Yumi no save stap longpela taim, olsem na yumi mas tingim ol yia bilong yumi. Olsem wanem yumi ken mekim olsem? I no olsem yumi mas wok long tingim tingim hamas yia yumi inap i stap, nogat. Moses i beten long Jehova i mas skulim gut lain bilong Em long mekim wok long ol yia bilong ol bilong givim biknem long Em. Olsem wanem? Yu yet yu save mekim olsem long ol yia bilong yu—olsem tingim olgeta wan wan de i olsem rot bilong litimapim nem bilong God? Baibel i strongim bel bilong ol yangpela olsem: “Taim bilong yupela i stap yangpela i no longpela taim. Nogat. Em i olsem samting nating. Olsem na yupela i no ken tingting planti long ol samting i save givim hevi long yupela. Na yupela i no ken bihainim pasin i givim pen long bodi bilong yupela. God i bin wokim yumi olgeta. Olsem na long taim yupela i yangpela yet, yupela i mas tingim em.” (Saveman 11:10–12:1) Tru, bilong tingim Man bilong wokim yumi, yumi no ken lusim tingting olsem em i stap, tasol i no dispela samting tasol yumi mas mekim. Wanpela man bilong mekim pasin nogut i bin krai long Jisas olsem: “Taim yu kamap king, yu ken tingting long mi.” Tasol dispela man i no laik bai Jisas i tingting long nem bilong em tasol—em i laik bai Jisas i mekim wanpela samting, olsem kirapim em bek long matmat! (Luk 23:42; skelim wantaim Stat 40:14, 23; Jop 14:13.) Olsem tasol, bilong tingim Jehova yumi mas mekim sampela samting, olsem mekim ol samting em i laikim. Olsem wanem? Yu save tingim Jehova olsem?
No Ken Bel Kaskas Long Ol Man Bilong Mekim Rong
7. Bilong wanem sampela yangpela i no laik tingim Man bilong wokim ol? Stori long dispela.
7 Planti yangpela i no laik tingim Jehova, long wanem, ol i ting pasin bilong i stap olsem Witnes em i save pasim ol. Wanpela brata long Spen i tokaut long tingting bilong em long taim em i yangpela, olsem: “Pasin bilong dispela graun i pulim mi, long wanem, i olsem tok i tru i gat hatwok long en na i pasim mi. Mi mas sindaun longpela taim, mekim stadi, go long ol miting, pasim nektai, tasol mi no amamas long mekim ol dispela samting.” Olsem wanem? Sampela taim yu pilim olsem yu sot long sampela samting long wanem yu save bihainim laik bilong God? Ating bai yu kirap nogut long save olsem wanpela man bilong raitim Baibel em tu i bin pilim olsem. Plis opim Baibel na kaunim Song 73.
8. Bilong wanem Asap i ‘mangal long ol samting bilong ol bikhetman’?
8 Orait nau yumi ken skelim gut ol tok bilong dispela Song. Ves 2 na 3 i tok: “Klostu mi laik pundaun long sin. Mi olsem lek i wel pinis na mi laik pundaun na lusim bilip. Long wanem, mi lukim ol man nogut i kamap maniman na mi mangal long ol samting bilong ol dispela bikhetman.” Het-tok bilong dispela Song i tok, Asap i raitim dispela Song. Em i bilong lain Livai na em i man bilong wokim musik, na em i bin stap long taim bilong King Devit. (1 Stori 25:1, 2; 2 Stori 29:30) Tru, em i mekim wok long tempel bilong God na dispela em wanpela gutpela wok tru, tasol em i “mangal,” olsem bel kaskas, long sindaun bilong ol man i save hambak long ol pasin nogut ol i mekim. I olsem hevi i no painim ol; ol i kisim gutpela sindaun na stap bel isi. I olsem ol gutpela samting i kamap long ol i winim ol samting “ol i gat laik long mekim.” (Ves 5, 7) Ol i hambak na stori long ‘ol pasin nogut ol i mekim.’ (Ves 8) “Ol i tok nogut long God i stap long heven” na “ol i strong tumas long ol manmeri i mas bihainim laik bilong ol”—ol i no litimapim nem bilong wanpela man, maski em i stap long heven o long graun.—Ves 9.
9. Wanem samting inap mekim na sampela yangpela Kristen long nau i kirap na kisim wankain tingting olsem bilong Asap?
9 Ating ol dispela tok i makim ol wanlain bilong yu long skul. Ating yu harim ol i hambak na stori long pasin pamuk ol i bin mekim, ol pati nogut ol i bin go long en, na ol strongpela dring na drak ol i bin kisim; ol i no sem liklik long stori long en. Dispela amamas ol i tok ol i kisim, taim yu skelim wantaim liklik rot yu yet yu wokabaut long en olsem wanpela Kristen, ating sampela taim yu “mangal long ol samting bilong ol dispela bikhetman.” (Matyu 7:13, 14) Asap i tok: “Mi bin lukaut gut na bel bilong mi i stap klin, na mi no bin mekim sampela sin. Ating dispela em i lus nating, a? Long wanem, God, yu givim pen long mi long san na long nait.” (Ves 13, 14) Em nau, em i kirap na tingting olsem pasin bilong bihainim laik bilong God na mekim stretpela pasin, dispela i no save helpim em.
10 Gutpela tru, Asap i no stap bel hevi longpela taim. Kwiktaim em i luksave olsem bel isi bilong ol man nogut i no bel isi tru na em i bilong sotpela taim tasol! Em i tok: “Yu mekim ol i wokabaut long rot i wel moa yet, na yu mekim ol i pundaun na ol i bagarap olgeta. Ol i bagarap kwiktaim tumas. Na dispela dai bilong ol em i nogut tru”! (Ves 18, 19) Planti wanlain bilong yu, ol tu i save wokabaut long “rot i wel moa yet.” Bihain, pasin nogut bilong ol bai mekim save long ol; ating sampela bai kisim nating bel, kisim wanpela sik bilong pamuk, kisim taim long kalabus, o i dai bai painim ol! Tasol samting i moa nogut—ol i stap longwe long God.—Jems 4:4.
10, 11. (a) Wanem samting i kirapim Asap long senisim tingting bilong em? (b) Olsem wanem ol man i mekim rong ol i “wokabaut long rot i wel moa yet”? Stori long dispela.
11 Wanpela yangpela Witnes long Spen i pilim tru dispela samting. Taim em i yangpela, em i giaman long bihainim stretpela pasin, tasol em i raun wantaim sampela yangpela i save givim baksait long God. I no longtaim na em i kirap laikim tru wanpela bilong ol—em i kalabus long ol drak. Meri yet i no kisim drak, tasol em i save baim ol drak bilong dispela yangpela man. Em i tok: “Na tu, mi bin helpim em long givim sut long em yet.” Gutpela tru, dispela sista i kisim bek gutpela tingting bilong em na em i kamap strong gen long spirit. Tasol bihain, em i kirap nogut taim em i kisim save olsem boipren bilong em i save kisim ol drak, em i bin dai long sik AIDS. Tru tumas, olsem man bilong raitim Song i tok, ol man i givim baksait long God, ol i wokabaut “long rot i wel moa yet.” Ating pasin bilong ol i mekim, na sampela bai dai long wanpela taim ol i no tingim. Na ol narapela, sapos ol i no senisim pasin bilong ol, bihain bagarap bai painim ol long “taim Bikpela Jisas wantaim olgeta strongpela ensel bilong en i lusim heven na i kamap ples klia. Em bai i kam long bikpela paia tru na em bai i mekim save long ol man i no laik save long God na i no bihainim gutnius bilong Jisas, Bikpela bilong yumi.”—2 Tesalonaika 1:7, 8.
12. Olsem wanem wanpela yangpela long Japan i kisim save olsem pasin bilong bel kaskas long sindaun bilong ol man i mekim rong, em pasin kranki?
12 Olsem na em i pasin kranki tru sapos yumi bel kaskas long sindaun bilong “ol man i no laik save long God”! Mobeta yumi mangal long i stap wankain olsem ol man i save long Jehova na ol i gat tingting long i stap oltaim. Wanpela yangpela brata long Japan i kisim wankain tingting. Taim em i stap yangpela, em tu i laik “stap fri moa.” Em i tok: “Mi ting mi lus long sampela samting. Tasol bihain mi kisim save olsem i stap bilong mi bai i nogut tru sapos mi no save long tok i tru. Mi tingting olsem bai mi stap 70 o 80 krismas na bihain mi dai. Tasol Jehova i tok promis long yumi inap kisim laip i stap oltaim oltaim! Dispela tingting i helpim mi long pilim tru samting mi kisim pinis.” Tasol maski yumi save pinis long dispela samting, sapos yumi stap namel long ol man i no bihainim ol lo bilong God, bai i hatwok tru long stap gut long em. Wanem sampela samting yu ken mekim bilong sakim ol dispela samting inap pulim yu?
Tingim Gut Ol Lain Yu Laik Poromanim Ol!
13, 14. Bilong wanem i bikpela samting long yumi mas tingim gut ol lain yumi laik poroman wantaim ol?
13 Orait yumi ken lukim gen Song 1:1-3 i stori long man em olgeta samting em i mekim i kamap gutpela tasol: “Man i no save bihainim tok bilong ol man nogut, na i no save wokabaut long rot bilong ol man bilong mekim sin, na i no save sindaun wantaim ol man bilong tok bilas long God, dispela man i ken amamas tru. Dispela man i save laikim tumas lo bilong God, na em i save tingting long dispela lo long san na long nait. Dispela man i olsem diwai ol man i bin planim klostu long wara. Em i save karim kaikai long taim bilong em stret, na lip bilong en i no save drai. Olgeta samting em i mekim i save kamap gutpela.”
14 Pastaim yu mas save olsem ol poroman bilong yu inap stiaim yu i go long gutpela rot o rot nogut. Sindaun 13:20 i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” Tasol i no olsem yu no ken mekim pasin pren o gutpela pasin long ol yangpela i no Witnes Bilong Jehova, o yu ken mekim ol tok i sutim bel bilong ol o daunim ol, nogat. Baibel i strong long yumi mas laikim tru ol narapela na “painim rot bilong i stap wanbel wantaim olgeta man.” (Rom 12:18; Matyu 22:39) Tasol sapos yu bung tumas wantaim ol man i no bihainim ol lo bilong Baibel, ating dispela inap pulim yu long “bihainim tok” bilong ol.
Kaunim Baibel i Save Helpim Yu
15. Olsem wanem ol yangpela inap kisim pasin bilong laikim tumas long kaunim Baibel?
15 Man bilong raitim Song i lukim tu olsem, man i save amamas long kaunim lo bilong God “long san na long nait,” ol samting em i mekim i save kamap gutpela. (Song 1:1, 2) Tru, i hatwok liklik long kaunim Baibel, na i gat “sampela tok i stap long [en] i no klia tumas.” (2 Pita 3:16) Tasol yu no ken ting pasin bilong kaunim Baibel i hatwok tumas. I gat rot long yu ken “laikim tumas long kisim gutpela susu” i kam long Tok Bilong God. (1 Pita 2:2) Kaunim liklik hap long olgeta wan wan de. Sapos i gat sampela tok yu no kisim gut, orait wok long painim save long ol narapela buk samting i kamapim klia dispela tok. Bihain, tingim ol tok yu bin kaunim. (Song 77:11, 12) Sapos yu hatwok long putim tingting bilong yu long ol tok, orait kolim isi long maus. Bihain bai yu gat laik tru long kaunim Baibel. Wanpela yangpela sista long Brasil i tok: “Long olgeta taim i olsem Jehova i stap longwe long mi. Tasol inap sampela mun pinis mi bin wok long kamap strong long pasin bilong mekim stadi bilong mi yet na kaunim Baibel. Nau mi pilim olsem mi stap klostu moa long Jehova. Mi tingim em olsem wanpela man i stap tru.”
16. Yumi ken mekim wanem na bai ol miting bilong kongrigesen i ken helpim tru yumi?
16 Pasin bilong go long ol miting bilong kongrigesen em tu i mekim bikpela wok bilong helpim yu long kamap strong long ol samting bilong spirit. Sapos yu “harim gut tok,” ol dispela tok bai strongim bel bilong yu. (Luk 8:18) Olsem wanem? Sampela taim yu les long ol miting? Sapos olsem, askim yu yet, ‘Mi yet mi save mekim wanem bilong helpim ol miting long kamap gutpela? Mi save putim gut yau? Mi save redim ol tok bilong ol miting? Mi kamapim sampela bekim?’ Baibel i tok yumi mas “tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol . . . [na] strongim bel bilong ol.” (Hibru 10:24, 25) Bilong mekim olsem, yu mas bekim sampela tok! Tasol bilong yu ken bekim tok, pastaim yu mas stadi. Wanpela yangpela sista i tok: “Sapos mi redi gut pastaim, mi no hatwok tumas long bekim tok long taim bilong miting.”
Wok Yu Mekim Bai Kamap Gutpela Sapos Yu Bihainim Rot God i Makim
17. Olsem wanem man i wok strong long kaunim Baibel em i olsem “diwai ol man i bin planim klostu long wara”?
17 Man bilong raitim Song i tok moa long man em olgeta samting em i mekim i save kamap gutpela. Em i tok dispela man i olsem “diwai ol man i bin planim klostu long wara.” Ating dispela wara i makim ol baret wara i save givim wara long ol diwai prut long gaden. (Aisaia 44:4) Man i kaunim Baibel long olgeta de, i olsem em i pas long wanpela wara em oltaim i save helpim em na givim nupela strong long em. (Jeremaia 17:8) Long olgeta de bai yu kisim strong bilong helpim yu long karim ol hevi. Yu bin lain long tingting bilong Jehova, olsem na yu bai bihainim gutpela tingting taim yu skelim ol samting yu mas mekim.
18. Ol yangpela i mas mekim wanem na bai wok bilong Jehova ol i mekim i ken kamap gutpela?
18 Sampela taim, i olsem i hatwok long mekim wok bilong Jehova. Tasol yu no ken pilim olsem i hatwok tumas. (Lo 30:11) Baibel i tok promis olsem sapos namba wan tingting bilong yu i bilong mekim ol samting Jehova i laikim na mekim em i belgut tru, orait bihain ‘olgeta samting yu mekim bai kamap gutpela’! (Sindaun 27:11) Na tingim dispela tu: Yu no stap wanpis. Jehova na Krais Jisas bai helpim yu. (Matyu 28:20; Hibru 13:5) Ol i save long ol hevi i painim yu, na ol i no ken lusim yu. (Song 55:22) “Ol arapela manmeri bilong God,” na papamama bilong yu sapos ol i aninit long God, ol tu bai helpim yu. (1 Pita 2:17) I gat ol dispela helpim, na sapos yu yet yu wok strong na tingting strong long mekim, bai yu inap amamas tru long i stap bilong yu, na i no long nau tasol—bai yu amamas long en i go inap long olgeta taim bihain!
Ol Askim Bilong Tingim Gen
◻ Olsem wanem yu inap mekim i stap bilong yu i kamap gutpela tru?
◻ Bilong wanem yumi mas larim Jehova i stiaim wokabaut bilong yumi?
◻ Olsem wanem ol yangpela inap tingim gut ol yia bilong ol?
◻ Sapos yumi bel kaskas long ol samting bilong man i mekim rong, olsem wanem dispela i pasin kranki?
◻ Olsem wanem pasin bilong kaunim Baibel long olgeta de na go oltaim long ol miting inap helpim ol yangpela long amamas tru long i stap bilong ol?
[Piksa long pes 20]
Planti yangpela i “no pret liklik long God,” olsem na ol i bihainim pasin i bagarapim skin bilong ol yet
[Piksa long pes 22]
Planti taim ol yangpela i lusim tingting olsem samting ol i mekim, bihain ol bai kisim hevi long en
[Piksa long pes 23]
Lain long laikim tumas pasin bilong kaunim Baibel
[Piksa long pes 23]
Bai yu amamas moa long ol miting sapos yu bekim sampela tok