Redi Long Stap Long Taim Bilong Wan Tausen Yia Em God Yet i Bin Makim!
TAIM Bilong Wan Tausen Yia Bilong Krais i Stap King bai kamapim planti gutpela blesing long ol man. Long pasin sori Jisas bai helpim ol long kamap gutpela olgeta long skin. Tingim ol samting dispela inap mekim long yu yet. Bai yu no gat sik! Long olgeta de, taim yu kirap long moningtaim, bel bilong yu i stap gutpela, winim asde. Em gutpela tru, a? Planti milion man, meri, pikinini, i tingting long stap long dispela taim bilong amamas. Ol i wetim dispela taim na beten long en i mas i kam. Save bilong Baibel ol i bin kisim em i strongim ol long bilip olsem ol inap kisim ol dispela blesing.
Tasol taim dispela Wan Tausen Yia Bilong Krais i no kirap yet, em i mas bagarapim olgeta man i birua long wok king bilong em. Em bai mekim dispela samting long taim bilong wanpela pait em Baibel i kolim Armagedon. (KTH 16:16) Ol Kristen tru i no ken insait long dispela pait. Em pait bilong God. Na dispela pait i no ken kamap long wanpela hap bilong graun tasol, nogat. Baibel i tok em i mas kamap long olgeta hap bilong graun. Olgeta man i birua long wok king bilong Krais ol bai kisim bagarap. I no gat wanpela bilong ol inap abrusim dispela bagarap!—Jeremaia 25:33.
Orait nau Jisas bai kirap mekim save long Satan na ol spirit nogut bilong em. Long tingting bilong yu, tingim samting em man bilong raitim Buk Kamapim Tok Hait i bin lukim, olsem: “Mi lukim wanpela ensel [Krais Jisas] i lusim heven na i kam daun. Long han bilong en em i holim ki bilong hul i no gat as. Na em i holim bikpela sen tu. Em i holimpas dispela bikpela snek, em snek bilong bipo tru, em Satan, dispela ‘Man I Save Kotim Olgeta Man.’ Na ensel i pasim em long sen na em bai i stap olsem inap long 1,000 yia.” (KTH 20:1, 2) Bihain, Satan wantaim ol spirit nogut bai pinis olgeta.—Matyu 25:41.
‘Planti manmeri tru i no inap man i kaunim namba bilong ol,’ ol bai abrusim bagarap long Armagedon. (KTH 7:9) Krais bai bringim ol i go long ‘ol hul i gat wara bilong givim laip,’ wankain olsem wasman i save bringim ol sipsip i go long ol wara i helpim ol long i stap laip. (KTH 7:17) Dispela lain i abrusim bagarap long Armagedon ol bai wok long kamap strong long ol samting bilong spirit—Satan na ol ensel nogut i no inap pasim ol—na isi isi Jisas bai helpim ol long daunim ol laik nogut bilong skin i go inap long taim ol i kamap gutpela olgeta!
Long gutpela pasin sori Krais bai mekim wok king, na sindaun bilong ol man bai wok long kamap gutpela. Long rot bilong Krais Jisas, God Jehova bai pinisim olgeta samting i kamapim pen na hevi. Em “bai i mekim drai wara i stap long ai bilong . . . ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen.” (KTH 21:4) Profet Aisaia tu i tok long dispela taim, olsem: “Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.” (Aisaia 35:5, 6) Na ol manmeri i dai pinis, em “ol manmeri i gat nem na ol manmeri nating,” ol bai kamap laip gen na ol i ken tingting long stap oltaim na no ken i dai gen!—KTH 20:12.
Long nau God i wok long bungim dispela lain “planti manmeri tru,” em ol bai abrusim bagarap long Armagedon. Ol i wok long redi long Taim Bilong Wan Tausen Yia Bilong Krais i Stap King. Ol i no save long wanem de stret dispela taim bai kirap, tasol ol i bilip strong olsem dispela taim bai kamap long taim stret olsem God i makim pinis. Yu yet inap i stap namel long ol, tasol yu tu i mas redi—i no long rot bilong salim ol samting bilong yu na go i stap long narapela hap, nogat—long rot bilong stadi long Baibel yu mas kisim stretpela save long God Jehova na long ol samting em i laik mekim. Ol Witnes Bilong Jehova bai amamas long soim yu long olsem wanem stadi bilong Baibel inap helpim yu na famili bilong yu—ol i no singaut long mani long mekim dispela samting. Na lain i wokim dispela nius bai amamas long givim sampela save moa long yu.
[Blok long pes 7]
Wan Tausen Yia—Em Namba Stret o Tok Piksa?
Planti tok bilong Buk Kamapim Tok Hait em i tok piksa, olsem na i gat wanpela askim i kamap. Olsem wanem long Taim Bilong Wan Tausen Yia Bilong Krais i Stap King, em Kamapim Tok Hait i stori long en? Em namba stret o tok piksa tasol?
Planti samting i makim olsem dispela taim bilong wan tausen yia em i 1,000 yia stret. Tingim: Tok bilong aposel Pol i makim olsem Taim Bilong Wan Tausen Yia Bilong Krais i Stap King na God bai mekim kot long ol man, dispela taim i olsem wanpela de. (Aposel 17:31; KTH 20:4) Aposel Pita i tok, long tingting bilong Jehova, wanpela de (24 aua) i olsem 1,000 yia. (2 Pita 3:8) Dispela i makim olsem dispela “de” bilong kot em i 1,000 yia stret. Na tu, inap 4-pela taim long Baibel bilong pastaim, Kamapim Tok Hait 20:3, 5-7 i stori long “dispela 1,000 yia”—em i no stori long “wanpela 1,000 yia.” Em nau, yumi ken ting olsem dispela Wan Tausen Yia em i wanpela hap taim stret.