Tok Profet Bilong God i Helpim Yumi Long Wetim Ol Gutpela Samting
EM I gutpela tru long yumi gat Tok Bilong God, em Baibel Holi, long wanem, dispela i helpim ol trupela Kristen long bilip tru na wetim ol gutpela samting i kamap long bihain. Ol i pas gut wantaim God Jehova, olsem na ol i wetim ol gutpela samting bai kamap long bihain. Olsem namba wan tok long “Tok Profet Bilong God” Kibung Distrik i kamapim, inap planti yia ol Witnes Bilong Jehova i bin stadi gut long ol tok profet bilong Baibel. Olsem na long ol dispela kibung Jehova i bin redim wanem gutpela samting bilong lain bilong em? Olgeta i kam long kibung ol i gat Baibel bilong ol yet, na ol i redi long kisim save long ol dispela samting. Mipela i raitim ol as tok bilong olgeta wan wan de bilong kibung olsem liklik het-tok.
DE NAMBA WAN: Wokabaut Long Lait Bilong Tok Bilong God
Wanpela tok nem bilong en, “Tok Bilong God i Bin Soim Rot Long Yumi,” i kamapim olsem ol manmeri bilong Jehova ol i olsem wanpela man i wokabaut i go long wanpela hap long nait na tudak i mekim na em i no inap lukim gut ol samting. Tasol isi isi ol samting i kamap ples klia taim san i wok long kam antap na bihain san i sanap stret, na em i lukim gut olgeta samting. Olsem Sindaun 4:18 i tok profet long en, lait bilong tok i tru bilong tok profet bilong God i mekim na rot bilong ol manmeri bilong Jehova i kamap klia tru. Ol i no paul nabaut na i stap tudak long ol samting bilong spirit.
As tok bilong kibung, nem bilong en, “Putim Yau Long Ol Tok Profet Bilong God,” i helpim ol manmeri long save olsem, ol man i lukluk long Jehova long helpim ol, ol i no kisim ol hevi olsem ol manmeri i bihainim ol giaman mesaia na giaman profet. Tasol i gat planti samting i makim olsem Krais Jisas em i Mesaia tru! Olsem: Taim bodi bilong Jisas i kamap narakain, dispela i olsem piksa bilong soim yumi olsem em bai kamap King bilong Kingdom bilong God. Taim Jisas i kamap King long heven long 1914, em i stap tu olsem “sta bilong moningtaim,” em 2 Pita 1:19 i stori long en. Na brata i mekim tok em i tok, “Em i Mesaia na Sta Bilong Moningtaim, na em i makim nupela de, o nupela taim, i kamap bilong helpim olgeta manmeri i bihainim tok bilong em.”
Bilong kirapim program bilong belo bek, wanpela tok nem bilong en, “Stap Olsem Lait,” em i stori moa long tok bilong Efesus 5:8. Long dispela ves aposel Pol i tokim yumi long “wokabaut olsem ol manmeri bilong lait.” I no long wok bilong ol long tokim ol arapela man long tok bilong God tasol na ol Kristen i stap olsem lait, nogat. Ol i stap olsem lait tu long pasin bilong ol long bihainim ol tok bilong Baibel olsem Jisas i bin mekim.
Bilong i stap kain lait olsem, yumi mas “Kisim Amamas Long Kaunim Tok Bilong God.” Wanpela tok i gat tripela hap bilong en, em i stori long dispela samting. Brata bilong mekim namba wan hap, em i kamapim tok bilong Abraham Lincoln, em i tok, Baibel em i “namba wan gutpela presen God i bin givim long ol man,” orait bihain brata i askim ol manmeri, pasin bilong ol long kaunim Baibel i kamapim olsem ol i pilim tru Tok bilong Jehova o nogat? Em i strongim ol manmeri long kaunim gut Baibel, ol i mas lusim sampela hap taim bilong lukim long tingting ol samting i kamap long stori bilong Baibel ol i wok long kaunim, na ol i mas bungim ol nupela save ol i lainim wantaim ol samting ol i save pinis long en.
Narapela hap bilong dispela tok i gat tripela hap bilong en i stori olsem, sapos yumi laik kisim gut ol “strongpela kaikai” yumi mas stadi gut, yumi no ken ritim tasol ol tok. (Hibru 5:13, 14) Brata i mekim tok em i tok, sapos yumi ‘redim bel bilong yumi’ paslain long stadi, olsem pris Esra bilong Israel i bin mekim, stadi bai strongim yumi tru. (Esra 7:10) Tasol bilong wanem pasin bilong stadi em i bikpela samting tru? Long wanem, stadi inap helpim yumi long pas gut wantaim Jehova. Olsem na maski yumi mas bosim gut tingting bilong yumi na wok strong long mekim stadi, yumi mas tingim pasin bilong stadi long Baibel olsem wanpela naispela samting tru, na gutpela samting tru, na samting bilong givim nupela strong long yumi. Olsem wanem yumi inap makim hap taim bilong mekim gutpela stadi? Brata i mekim laspela hap em i tok, yumi no ken lusim nating taim long mekim ol wok i no bikpela samting tumas. (Efesus 5:16) Yes, bikpela samting bilong helpim yumi long painim hap taim bilong mekim stadi, em long mekim gut wok long taim bilong yumi.
Narapela tok nem bilong en, “God i Save Strongim Ol Man i No Gat Strong,” em i kamapim olsem, long nau skin bilong planti manmeri i save les. Bilong kisim dispela “bikpela strong” bilong helpim yumi long mekim wok autim tok, yumi mas bilip na wetim Jehova i helpim yumi, em i save “strongim ol man i no gat strong.” (2 Korin 4:7; Aisaia 40:29) Ol samting bilong strongim yumi i olsem: Tok bilong God long Baibel, pasin bilong beten, kongrigesen Kristen, pasin bilong autim tok long olgeta taim, ol wasman Kristen, na pasin bilong ol narapela long stap gut long wok, em ol i stap olsem gutpela piksa yumi ken bihainim. Narapela tok nem bilong en, “Tingim Taim Yumi Stap Long En na Stap Olsem Tisa,” i kamapim olsem ol Kristen i mas kamap tisa, na tu ol i mas i stap olsem man bilong autim tok, na ol i mas wok strong long kisim pasin bilong skulim gut ol man.—2 Timoti 4:2.
Laspela tok bilong dispela de, em “Ol Man i Pait Long God Ol i No Inap Win.” Dispela tok i kamapim olsem i no longtaim i go pinis, long sampela kantri, sampela lain i traim sutim tok long ol Witnes Bilong Jehova bambai ol man i tingim ol i olsem ol lain nogut. Tasol yumi no ken pret, long wanem, Aisaia 54:17 i tok: “I no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim kain kain tok long yu. Long dispela pasin mi save was gut long olgeta wokman bilong mi na mekim ol i win. Mi Bikpela, mi tok pinis.”
DE NAMBA TU: Ol Samting i Kamap Ples Klia Long Rot Bilong Ol Tok Profet Bilong Baibel
Taim brata i skelim pinis teks bilong de, ol manmeri i amamas long harim namba tu tok i gat tripela hap long en. Nem bilong dispela tok em “Stap Olsem Lait Bilong Givim Biknem Long Jehova.” Namba wan tok i kamapim olsem, bikpela samting ol Kristen i laik mekim, em long givim biknem long Jehova long rot bilong autim tok long olgeta hap. Narapela tok bihain long dispela i kamapim olsem yumi gat wok long stiaim ol gutpela man i kam long oganaisesen bilong God. Long wanem rot? Yumi ken lusim 5-pela o 10-pela minit paslain o bihain long taim bilong olgeta wan wan stadi na yumi ken stori long ol long olsem wanem oganaisesen bilong God i save mekim wok. Namba tri hap bilong dispela tok i kamapim olsem yumi gat wok long givim biknem long God long rot bilong ol gutpela pasin yumi mekim.
Narapela tok nem bilong en “Laikim Tumas Ol Tok Bilong Jehova i Save Kirapim Tingting,” na dispela tok i stori long sampela ves bilong Song 119. Tru tumas, i mas i gat sampela tok bilong helpim yumi long tingim gen ol tok yumi bin lainim, long wanem, yumi olgeta i save lusim tingting long ol samting. Olsem na em i bikpela samting tru long yumi mas kisim pasin bilong laikim tumas ol tok bilong Jehova, olsem man bilong raitim Song em i bin mekim!
Orait nau ol i harim wanpela bikpela tok bilong kibung, em tok bilong baptais, nem bilong en “Pasin Bilong Bihainim Tok Bilong Baibel, Em Buk Bilong Tok Profet, i Save Bringim Man Long Baptais.” Brata i mekim tok em i tokim ol manmeri i laik kisim baptais olsem, ol i no inap bihainim pasin bilong Jisas long rot bilong baptais tasol, nogat; ol i mas bihainim gut lek bilong em tu. (1 Pita 2:21) Em wanpela gutpela samting tru long ol dispela nupela brata sista i insait long truim bilong tok bilong Jon 10:16. Long dispela ves Jisas i bin tok profet olsem em bai bungim ol “arapela sipsip” na ol bai wok wantaim ol disaipel bilong em, em God i bin makim ol long spirit holi.
Bilong kirapim program bilong belo bek, i gat wanpela tok nem bilong en, “Harim Gut Dispela Tok Spirit Holi i Autim.” Dispela tok i kamapim olsem spirit bilong Jehova i save toktok long yumi long rot bilong Baibel, na “wokboi i gat gutpela tingting,” na maus bilong bel bilong yumi em Baibel i bin lainim. (Matyu 24:45) Olsem na i no gat wok long ol Kristen i mas harim wanpela nek tru tru i kam daun long heven bilong tokim ol long ol samting ol i ken mekim bambai God i ken amamas long ol. Narapela tok nem bilong en, “Holimpas Ol Tok i Stret Wantaim Pasin Bilong Givim Bel Long God,” na dispela tok i bin kirapim ol Kristen long ol i no ken wok long kisim save long ol tingting nogut ol manmeri bilong dispela graun i save kamapim. Tru tumas, sapos yumi no was gut long laik bilong yumi long skelim olgeta samting, dispela inap kirapim yumi long skelim sampela tok bilong ol man i bin lusim bilip na givim baksait long God, na bilong sampela narapela wokman bilong Satan. Em i gutpela tru sapos yumi kaunim Baibel long olgeta taim, na tu, kaunim olgeta tok bilong Wastaua na Kirap!
Nem bilong narapela tok em “Yumi Mas Holimpas Dispela Stretpela Tok,” na dispela tok i kamapim olsem em i bikpela samting long yumi save gut tru long dispela “stretpela tok” bilong Baibel, o dispela bun bilong tok i tru. (2 Timoti 1:13) Taim yumi save gut long dispela stretpela tok, dispela em bikpela samting bilong helpim yumi long bihainim pasin bilong God, na tu, dispela i ken helpim yumi long luksave long ol samting i no stret wantaim tok i tru.
Tingim, yu wanpela gutpela samting tru long ai bilong Jehova. Em wanpela gutpela samting tru, a? Ol i kisim narapela tok long tok profet bilong Hagai, na nem bilong dispela tok em “ ‘Ol Gutpela Samting’ i Wok Long Pulap Long Haus Bilong Jehova.” Dispela tok i bin strongim tru olgeta, long wanem, em i bin helpim ol long save olsem olgeta wan wan manmeri bilong “bikpela lain” ol i olsem gutpela samting tru long ai bilong Jehova. (KTH 7:9) Olsem na Jehova bai lukautim ol, taim em i “seksekim” olgeta lain man long taim bilong “bikpela hevi tru.” (Hagai 2:7, 21, 22, NW; Matyu 24:21) Tasol long nau yet ol manmeri bilong Jehova i mas was i stap long ol samting bilong spirit, olsem narapela tok, “Ol Tok Profet Bilong Baibel i Kirapim Yumi Long Was i Stap” em i bin kamapim klia dispela samting. Brata i mekim tok em i kamapim tok bilong Jisas: “Yupela i mas was gut. Yupela i no save wanem de Bikpela bilong yupela bai i kam.” (Matyu 24:42) Olsem wanem yumi ken was i stap long ol samting bilong spirit? Yumi ken wok strong long mekim wok bilong Jehova, beten long olgeta taim, na wetim bikpela de bilong Jehova i kamap.
Nem bilong laspela tok bilong dispela de, em “Ol Tok Profet Long Taim Bilong Las De.” Inap sampela yia bihain, bai yumi tingim yet dispela tok. Bilong wanem? Long wanem, brata i mekim tok em i tokaut long wanpela nupela buk—Pay Attention to Daniel’s Prophecy! Brata i tok, “Dispela buk i gat 320 pes na ol gutpela piksa na i stori long olgeta sapta bilong Buk Daniel.” Dispela samting i kamapim klia olsem Jehova i wok long kamapim klia tok profet bilong em, na dispela i strongim bilip bilong yumi!
DE NAMBA TRI: Ol Tok Profet Bilong God i No Save Popaia
Bilong kirapim laspela de bilong kibung, yumi bin harim wanpela tok i gat tripela hap bilong en, “Ol Tok Profet Bilong Kamap Tru Long Taim God i Makim.” Ol dispela tripela tok i bin skelim tripela tokaut em profet Habakuk i bin mekim long ol lain manmeri long strafe bilong Jehova bai painim ol. Namba wan tokaut i go long ol bikhetlain Juda na namba tu i go long hatpela gavman bilong Babilon. Na laspela tokaut, truim bilong em i no kamap yet, na dispela i makim taim Jehova bai bagarapim ol man nogut. Taim laspela brata i stori long Armagedon, em i kirapim tingting bilong ol manmeri long pret long God, taim em i tok: “Tru tumas, ol man bai kirap nogut tru taim Jehova i kamapim bikpela strong bilong em.”
“Amamas Long Ol Gutpela Samting Bilong Spirit Yumi Bin Kisim,” em nem bilong wanpela gutpela pilai bilong kibung. Em wanpela gutpela pilai bilong helpim ol man long skelim gut bel bilong ol, na dispela pilai i stori long narapela narapela pasin bilong Jekop na Iso long tingim ol samting bilong spirit. Iso i no tingim gutpela samting em i kisim pinis, olsem na Jekop i kisim na em i bin lukautim gut dispela samting. Brata i mekim tok, em i askim ol man i kam long kibung, “Jehova i bin givim wanem ol samting [gutpela samting bilong spirit] long yumi?” Em i bekim olsem, “Tok i tru bilong em long Baibel; tingting long kisim laip i stap oltaim oltaim; stap olsem maus bilong em long autim gutnius.”
Nem bilong narapela tok em, “Yu Ting Olsem Wanem Long Ol Gutpela Samting Yumi Kisim?” Taim yumi putim wok bilong Jehova na ol wok bilong spirit i stap olsem namba wan samting long laip bilong yumi, winim ol samting bilong yumi yet na ol samting bilong skin, yumi kamapim olsem yumi tingim gut ol samting bilong spirit yumi kisim. Taim yumi mekim olsem, yumi pas gut wantaim Jehova long olgeta samting yumi mekim long i stap bilong yumi, na dispela i narapela kain long pasin bilong Adam, Iso, na ol Israel i no bin stap gut long God.
Pablik-tok, “Olgeta Samting Bai Kamap Gutpela—Olsem God i Tok Profet Long En,” i bin stori gut long fopela tok profet bilong “nupela skai” na “nupela graun.” (Aisaia 65:17-25; 66:22-24; 2 Pita 3:13; KTH 21:1, 3-5) Olsem na yumi save, Jehova i tingim wanpela bikpela truim bilong ol dispela tok profet, winim namba wan truim long taim ol manmeri bilong em i lusim kalabus na i go bek gen long 537 B.C.E. Yes, em i bin tingim Kingdom bilong em (“nupela skai”) na ol manmeri bilong graun em ol bai stap aninit long dispela Kingdom (“nupela graun”), na ol bai sindaun long gutpela ples paradais em bai kamap long olgeta hap.
Wanpela gutpela tok bilong pinisim kibung i bin kirapim tru olgeta, em “Ol Samting Yumi Wet Long En Taim Tok Bilong God i Stiaim Yumi.” Dispela tok i helpim olgeta long save olsem, “taim i sotpela nau” bilong pinisim wok bilong autim tok bilong Kingdom. (1 Korin 7: 29) Yes, yumi stap nau long pinis bilong truim bilong tok Jehova i bin mekim long pinisim Satan na olgeta pasin nogut bilong dispela graun. I gutpela yumi mekim wankain tok olsem man bilong raitim Song, em i tok: “Yumi wetim Bikpela i helpim yumi. Bikpela tasol i save helpim yumi. Em i olsem hap plang bilong pait na yumi hait long em.” (Song 33:20) Ol man i wetim ol samting em tok profet bilong God i as bilong en, ol bai kisim ol gutpela samting tru long bihain!
[Piksa long pes 7]
Wanpela gutpela pilai i bin helpim olgeta long pilim tru ol samting bilong spirit em ol wokboi bilong Jehova ol i gat
[Piksa long pes 7]
Planti manmeri i putim yau long ol tok profet bilong God, ol i bin kisim baptais