Kisim Save Long “Tingting Bilong Krais”
“ ‘Husat i save long tingting bilong Bikpela, bai em inap long skulim Bikpela?’ Tasol tingting bilong Krais i stap long yumi.”—1 KORIN 2:16.
1, 2. Long Baibel, Jehova i kamapim wanem samting long Jisas?
JISAS i bin luk olsem wanem? Wanem kala bilong gras bilong em? skin bilong em? ai bilong em? Longpela bilong em inap olsem wanem? Hevi bilong em inap hamas kilo? Insait long planti handet yia i kam inap nau, ol piksa ol man i bin wokim long Jisas i narapela narapela kain tru. Long sampela piksa, em i man i gat strongpela skin, tasol long sampela piksa, skin bilong em i no strong na em i luk olsem em i sik.
2 Tasol Baibel i no stori long Jisas i bin luk olsem wanem. Jehova i kamapim samting i bikpela samting moa: em pasin bilong Jisas. Ol stori bilong 4-pela Gutnius i tokaut long ol tok na ol samting Jisas i bin mekim, na ol i kamapim tu bikpela tingting bilong em i bin stiaim ol tok na ol samting em i bin mekim. Ol dispela 4-pela stori em spirit bilong God i bin kirapim ol man long raitim, ol i helpim yumi long save long samting aposel Pol i kolim “tingting bilong Krais.” (1 Korin 2:16) Em i bikpela samting long yumi kisim save long ol tingting na pasin bilong Jisas. Bilong wanem? I gat tupela as.
3. Taim yumi kisim save long tingting bilong Krais, dispela i helpim yumi long save long wanem samting moa?
3 Namba wan as: Tingting bilong Krais i helpim yumi long save long tingting bilong God Jehova. Jisas i save gut tru long Papa bilong em, olsem na em inap tok: “I no gat wanpela man i save long Pikinini. Papa wanpela tasol i save long em. Na i no gat wanpela man i save long Papa. Pikinini tasol wantaim ol man Pikinini i soim Papa long ol, ol tasol i save long Papa.” (Luk 10:22) I olsem Jisas i tok, ‘Sapos yu laik save long Jehova, orait lukluk i kam long mi.’ (Jon 14:9) Olsem na taim yumi kisim save long tingting bilong Jisas em ol Gutnius i kamapim, i olsem yumi kisim save long tingting bilong Jehova. Dispela save i helpim yumi long kam klostu moa long dispela God bilong yumi.—Jems 4:8.
4. Bilong bihainim tru pasin bilong Krais, pastaim yumi mas lain long wanem samting? Bilong wanem?
4 Namba tu as: Sapos yumi save long tingting bilong Krais, dispela bai helpim yumi long ‘bihainim pasin bilong em.’ (1 Pita 2:21) Tasol bilong bihainim Jisas, i no olsem yumi kolim sampela tok bilong em na mekim ol samting em i bin mekim na em tasol, nogat. Tingting na bel bilong yumi i save stiaim ol tok na ol samting yumi mekim, olsem na bilong bihainim Krais, yumi mas wok long kisim “wankain tingting” olsem em i bin holim. (Filipai 2:5) Olsem na bilong bihainim tru pasin bilong Krais, pastaim yumi mas wok long kisim wankain tingting olsem em i bin holim, inap tru long skel bilong yumi man bilong graun. Orait nau yumi ken tingim sampela tok bilong 4-pela Gutnius, na kisim save long tingting bilong Krais. Pastaim bai yumi toktok long ol samting i bin stiaim tingting na bel bilong Jisas.
I Stap Bilong Em Taim Em i No Kamap Man Yet Long Graun
5, 6. (a) Ol poroman yumi bung wantaim ol inap mekim wanem long yumi? (b) Taim namba wan Pikinini bilong God i no kam daun yet long graun, em i bin bung wantaim husat? Dispela i bin mekim wanem long em?
5 Ol poroman yumi save bung wantaim ol inap mekim sampela samting long yumi, olsem stiaim tingting na bel na pasin bilong yumi, na yumi mekim samting i gutpela o samting i nogut.a (Sindaun 13:20) Tingim dispela Man Jisas i bin bung wantaim em long heven taim em i no kam daun yet long graun. Gutnius Jon i raitim i stori long i stap bilong Jisas olsem “Tok,” o Maus, bilong God, taim em i no kamap man yet long graun. Jon i tok: “Long pastaim tru Tok em i stap, na Tok em i stap wantaim God, na Tok em i wanpela god. Long pastaim tru em i stap wantaim God.” (Jon 1:1, 2, NW ) Jehova i no bin kamap nupela long wanpela taim, olsem na dispela tok, “pastaim tru” Tok i stap wantaim God, i mas makim dispela taim God i kirap na wokim ol samting.(Song 90:2) God i bin wokim Jisas “paslain long olgeta narapela samting.” Olsem na taim God i no wokim yet ol ensel na graun na ples antap, Jisas i bin i stap.—Kolosi 1:15, NW; KTH 3:14.
6 Sampela saveman i tok, graun na ples antap i bin stap inap olsem 12 bilion yia. Sapos dispela tok i stret, orait namba wan Pikinini bilong God i bin stap planti bilion yia wantaim Papa bilong em, taim God i no wokim yet Adam. (Skelim wantaim Maika 5:2.) Olsem na narapela i laikim tru narapela na tupela i pas gut wantaim. Taim dispela namba wan Pikinini bilong God i no kam daun yet long graun, em i makim em yet olsem gutpela tingting na save, na em i tok: “Olgeta de mi bin mekim [Jehova] i amamas, long wanem, mi bin amamas tumas long lukim ol samting em i bin wokim.” (Sindaun 8:30) Em i bin bung inap planti bilion yia wantaim As bilong pasin sori na yumi ken ting dispela i bin mekim bikpela samting tru long Pikinini bilong God! (1 Jon 4:8) Dispela Pikinini i kisim save long ol tingting na pasin bilong Papa bilong em na em i bihainim—i no gat narapela man inap long mekim olsem.—Matyu 11:27.
I Stap Bilong Em Long Graun na Ol Samting i Stiaim Em
7. Wanem wanpela as na namba wan Pikinini bilong God i kam daun long graun?
7 Jehova i laik bai Pikinini bilong em i mas kamap Hetpris i gat pasin sori bambai em inap “sori long yumi” ol man i gat ol pasin kranki, olsem na i gat sampela samting moa Pikinini bilong God i mas lain long en. (Hibru 4:15) Em nau, bilong inapim ol mak bilong mekim dispela wok, em wanpela as na dispela Pikinini i kam long graun na kamap man. Em i gat skin bilong man, na hia long graun sampela hevi i kamap long Jisas em bipo em i bin lukluk tasol long en long taim em i stap long heven. Nau em yet inap pilim long bel ol samting i save painim ol man bilong graun. Sampela taim skin bilong em i les, na nek i drai, na em i hangre. (Matyu 4:2; Jon 4:6, 7) Na tu, em i karim kain kain pen na hevi. Dispela i “skulim em tru long pasin bilong bihainim tok” na em i kamap man i inapim tru mak bilong mekim wok Hetpris.—Hibru 5:8-10.
8. Yumi save long wanem ol samting bilong i stap bilong Jisas long graun taim em i pikinini?
8 Olsem wanem long i stap bilong Jisas long graun taim em i pikinini? Baibel i no stori planti long dispela. Matyu na Luk tasol i bin stori long ol samting i bin kamap taim mama i karim em. Ol man bilong raitim Gutnius ol i save Jisas i bin stap long heven taim em i no kam daun yet long graun. Dispela i stap bilong em long heven i helpim yumi long save long pasin bilong Jisas taim em i kamap man long graun. Hia long graun em i wanpela man tru. Tasol maski em man i gutpela olgeta, em i mas kamap bebi na go bikpela na wok long kisim save. (Luk 2:51, 52) Baibel i stori long sampela samting i bin painim Jisas taim em i pikinini na ating ol dispela samting i bin mekim sampela samting long em.
9. (a) Wanem samting i makim olsem Jisas i kamap insait long wanpela famili i stap rabis? (b) Ating Jisas i gat wanem kain sindaun taim em i wok long i go bikpela?
9 Yumi ken ting Jisas i bin kamap insait long wanpela famili i stap rabis. Samting i kamapim klia dispela samting em ofa Josep na Maria i bringim long tempel inap olsem 40 de bihain long Maria i karim em. Ol i no bringim wanpela pikinini sipsip man bilong mekim ofa em paia i kukim olgeta na wanpela balus bilong mekim ofa bilong tekewe sin; nogat; ol i bringim ‘tupela namba wan balus o tupela yangpela namba 2 balus’ i kam. (Luk 2:24) Olsem Lo Bilong Moses i tok, ol man i stap rabis ol inap mekim dispela kain ofa. (Wok Pris 12:6-8) Dispela famili i no gat planti samting, bihain em i go bikpela. Jisas i bin kamap long rot bilong mirakel, na bihain Josep na Maria i kamapim 6-pela pikinini bilong ol yet. (Matyu 13:55, 56) Olsem na Jisas i go bikpela insait long wanpela bikpela famili, na ating dispela famili i no gat planti samting bilong skin.
10. Wanem samting i soim olsem Maria na Josep i stap aninit long God?
10 Papamama bilong Jisas ol i stap aninit long God na ol i lukautim em gut. Mama bilong em, Maria, em i meri i gat gutpela pasin. Taim ensel Gebriel i bungim Maria, em i tok: “Gude, meri. Bikpela i stap wantaim yu, na em i bin blesim yu na mekim gut long yu.” (Luk 1:28) Josep tu i save givim bel long God. Long olgeta yia em i save wokabaut 150 kilomita i go long Jerusalem bilong lukim Pasova. Maria tu em i go, maski ol man tasol i mas i go. (Kisim Bek 23:17; Luk 2:41) Long wanpela taim olsem, Josep na Maria i wok long painim Jisas i gat 12-pela krismas na ol i lukim em i stap wantaim ol tisa long tempel. Papamama bilong Jisas i tingting planti long em, tasol em i tokim ol olsem: “Ating yutupela i no save, mi mas i stap long haus bilong Papa bilong mi?” (Luk 2:49) “Papa”—em wanpela tok yangpela Jisas i laikim tumas. Papamama i bin tokim em olsem Jehova em i Papa tru bilong em. Na tu, yumi ken ting olsem Josep em i gutpela waspapa long Jisas. Jehova i no ken makim wanpela man i gat hatpela pasin long mekim bikpela long gutpela pikinini bilong Em, a?
11. Jisas i skul long mekim wanem kain wok? Long taim bilong ol man i bin raitim Baibel, ol man i mas mekim wanem bilong mekim dispela wok?
11 Long ol yia Jisas i stap long Nasaret, em i lain long mekim wok kamda. Ating waspapa bilong em, Josep, i skulim em long dispela wok. Jisas i save gut long dispela wok, olsem na ol man i save kolim em “kamda.” (Mak 6:3) Long taim bilong ol man i bin raitim Baibel, ol kamda i save wokim ol haus, ol tebol na sia na bang samting, na ol tul bilong gaden. Long buk bilong em (Dialogue With Trypho), Jastin Matir, em i stap bihain liklik long taim bilong ol aposel, em i stori long Jisas olsem: ‘Em i save mekim wok kamda, olsem wokim hap plang bilong brukim graun, na hap plang ol man i save putim long nek bilong ol bulmakau.’ Dispela wok i gat hatwok long en, long wanem, ating ol kamda bilong bipo ol i no inap baim hap diwai. Ating ol yet i mas painim wanpela diwai, na katim, na karim hap diwai i go bek long haus. Olsem na ating Jisas i save pinis long ol hevi bilong mekim wok mani, na long stretim tok wantaim ol man i kam baim samting long em, na long lukautim famili long ol samting bilong skin.
12. Wanem samting i makim olsem Josep i dai paslain long taim Jisas i dai? Olsem na Jisas i mas mekim wanem?
12 Yumi ken ting olsem Josep i dai paslain long taim Jisas i dai, olsem na Jisas olsem namba wan pikinini, em i lukautim famili.b Wanpela nius (Zion’s Watch Tower) bilong Janueri 1, 1900, i tok: ‘Ol stori bilong bipo i tok olsem Josep i dai taim Jisas i manki yet na em i kirap mekim wok kamda na lukautim famili. Baibel i helpim dispela tok. Mak 6:3 i tok Jisas em i wanpela kamda, na i stori long mama na ol brata bilong em, tasol Josep nogat. Olsem na inap 18 yia, kirap long taim samting i bin kamap em Luk 2:41-49 i stori long en na i go inap long taim em i kisim baptais, ating Bikpela bilong yumi i mekim ol wok bilong skin.’ Maria na ol pikinini bilong em, na Jisas tu, ating ol i save pinis long bikpela bel hevi ol man i save kisim taim wanpela gutpela poroman marit na papa i dai.
13. Taim Jisas i kirap mekim wok bilong em long autim tok, olsem wanem em inap mekim long save na gutpela tingting, na long pasin sori, winim ol narapela man?
13 Tru tumas, taim Jisas i kamap long graun, i stap bilong em i gat hatwok long en. Ol hevi i save painim em wankain olsem i save painim olgeta man. Long 29 C.E., taim i kamap pinis bilong Jisas i mas mekim wok God i bin givim em long mekim. Long laspela hap bilong dispela yia, em i kisim baptais long wara na em i kamap Pikinini spirit bilong God. ‘Heven i op long em,’ na dispela i makim olsem em inap tingting bek long i stap bilong em bipo long heven, na ol tingting tu bilong em, taim em i no kamap man yet long graun. (Luk 3:21, 22) Olsem na taim Jisas i kirap mekim wok bilong em long autim tok, em i mekim long gutpela save na tingting, na long pasin sori—winim ol narapela man. Em nau, i gat as tru na ol man i raitim Gutnius ol i bin stori planti long ol samting i bin kamap long taim Jisas i mekim wok bilong em. Tasol ol i no inap raitim olgeta tok na samting em i bin mekim. (Jon 21:25) Tasol samting God i kirapim ol long raitim em i helpim yumi long save long tingting bilong nambawan man tru i bin i stap long graun.
Jisas Em i Wanem Kain Man?
14. Olsem wanem ol Gutnius i kamapim Jisas olsem man bilong sori tru long ol narapela na man i save pilim tru ol samting long bel bilong em?
14 Ol Gutnius i kamapim pasin bilong Jisas olsem em i man bilong sori tru long ol narapela na em i save pilim tru ol samting long bel bilong em. Em i kamapim kain kain pasin olsem: sori tru long lepraman (Mak 1:40, 41); krai long ol man i no bihainim tok bilong em (Luk 19:41, 42); kros long ol man bilong mangalim mani ol i wok bisnis long senisim mani (Jon 2:13-17). Jisas em i pilim tru hevi bilong ol man, na em inap krai, na em i no haitim ol samting i stap insait long bel bilong em. Taim gutpela pren bilong em Lasarus i dai, em i lukim Maria, susa bilong Lasarus, i krai i stap na em i pilim tru dispela samting long bel bilong em na em tu i krai, na em i krai long ai bilong ol narapela.—Jon 11:32-36.
15. Olsem wanem bel sori bilong Jisas i kamap ples klia long pasin em i mekim long ol narapela na long tingting bilong em long ol?
15 Bel sori bilong Jisas i kamap ples klia long tingting bilong em long ol narapela na long pasin em i mekim long ol. Em i tingim ol rabisman na ol man ol narapela i daunim ol, na em i helpim ol long “kisim malolo.” (Matyu 11:4, 5, 28-30) Em i givim hap taim bilong em long helpim ol manmeri i stap nogut, maski em wanpela meri i save karim blut oltaim na em i putim han long klos bilong Jisas, o wanpela rabisman i aipas. (Matyu 9:20-22; Mak 10:46-52) Tru, Jisas i wok long painim ol gutpela pasin long ol narapela na mekim gutpela tok amamas long ol, tasol em i redi tu long stretim ol man taim ol i mekim rong. (Matyu 16:23; Jon 1:47; 8:44) Long taim bilong Jisas, ol meri i no gat rot long mekim planti samting, tasol Jisas i tingim ol olsem meri i gat nem. (Jon 4:9, 27) Olsem na yumi ken save long as na sampela meri i redi long givim ol samting bilong ol yet bilong helpim Jisas.—Luk 8:3.
16. Wanem samting i soim olsem Jisas i gat stretpela tingting long ol samting bilong skin?
16 Jisas i holim stretpela tingting long i stap bilong em. Ol samting bilong skin i no namba wan bikpela samting long em—em i no gat planti samting bilong skin. Em i tok “em i no gat ples bilong slip.” (Matyu 8:20) Tasol Jisas i save mekim ol samting bilong helpim ol narapela long i stap amamas. Taim em i go long kaikai bilong marit—kain bung olsem i gat musik na singsing na amamas—em i no go bilong pasim ol man long kisim amamas, nogat. Jisas i wokim namba wan mirakel bilong em long dispela bung. Taim wain i pinis, em i tanim wara i kamap gutpela wain, em wanpela dring i save mekim ‘bel bilong man i amamas.’ (Song 104:15; Jon 2:1-11) Olsem na amamas i stap yet, na tupela nupela marit i no kisim sem long wain i pinis. Narapela samting i soim olsem Jisas i holim stretpela tingting long ol samting i olsem: Fopela Gutnius i kolim planti tok moa yet i makim olsem Jisas i bin wok strong na lusim planti aua long mekim wok bilong em long autim tok.—Jon 4:34.
17. Bilong wanem yumi no ken kirap nogut olsem Jisas em i Nambawan Tisa? Ol tok em i skulim ol man long en i kamapim wanem samting?
17 Jisas em i Nambawan Tisa. Planti samting em i skulim ol man long en, em i mekim long rot bilong ol samting ol man, na em tu, i save lukim long olgeta de. (Matyu 13:33; Luk 15:8) Em i win tru long skulim ol man—ol tok bilong em i klia na i helpim gut ol man na i no hatwok long kisim gut. Tasol bikpela samting moa, em ol tok em i skulim ol man long en. Ol tok bilong em i kamapim klia em i gat bikpela laik long helpim ol man long save long tingting na pasin bilong Jehova.—Jon 17:6-8.
18, 19. (a) Jisas i mekim wok long wanem ol tok piksa bilong stori long Papa bilong em? (b) Stori i kamap bihain long dispela bai toktok long wanem samting?
18 Planti taim Jisas i mekim wok long ol tok piksa bilong helpim ol man long save gut long Papa bilong em—em ol tok piksa ol man i no inap lusim kwik tingting long en. Tru, em inap stori long marimari bilong God, tasol dispela i narapela kain long mekim tok piksa long Jehova em i olsem wanpela papa i lusim tingting long rong pikinini i bin mekim na taim em i lukim pikinini i wokabaut i kam long em, bel bilong em i sori tumas long em na em “i ran i go, na i holimpas pikinini na i givim kis long em.” (Luk 15:11-24) Jisas i no bihainim ol bikman bilong lotu em ol i lukim ol man nating i olsem pipia lain tasol. Jisas i tok Papa bilong em i olsem wanpela God ol man i no pret long toktok wantaim em—em i laikim beten bilong man bilong kisim takis i daunim em yet, tasol beten bilong hambak Farisi nogat. (Luk 18:9-14) Jisas i kamapim klia olsem Jehova em i God bilong tingim tru ol man—em i save long taim wanpela liklik pisin i pundaun long graun. Jisas i tokim ol disaipel bilong em: “Yupela i no ken pret. Yupela i winim planti lain liklik pisin.” (Matyu 10:29, 31) Olsem na yumi ken save long as na ol manmeri i kirap nogut tru “long skul” bilong em na ol i kam long em. (Matyu 7:28, 29) Wanpela taim, “bikpela lain manmeri” ol i stap wantaim em inap tripela de, maski ol i no kaikai!—Mak 8:1, 2.
19 Yumi ken tenkyu olsem Jehova i bin kamapim long Baibel tingting bilong Krais! Tasol olsem wanem yumi inap kisim na kamapim tingting bilong Krais long ol samting yumi mekim long ol narapela? Stori i kam bihain long dispela bai toktok long dispela.
[Ol Futnot]
a Ol ensel inap kisim pasin bilong ol lain ol i bung wantaim ol, olsem Kamapim Tok Hait 12:3, 4 i makim. Long ol dispela ves, “snek” i makim Satan, na em i bin pulim ol narapela “sta,” o ol pikinini spirit, long bihainim em long rot bilong bikhet.—Skelim wantaim Jop 38:7.
b Laspela taim Baibel i stori long Josep, em long taim Jisas i gat 12-pela krismas na Josep i lukim em long tempel. Baibel i no toktok long Josep i stap long kaikai bilong marit long Kana, long taim Jisas i kirap mekim wok bilong em long autim tok. (Jon 2:1-3) Long yia 33 C.E., taim Jisas i hangamap long diwai, em i tokim aposel Jon long lukautim Maria. Sapos Josep i stap laip yet, ating Jisas i no ken mekim olsem.—Jon 19:26, 27.
Yu Inap Tingim?
• Bilong wanem em bikpela samting long yumi kisim save long “tingting bilong Krais”?
• Taim Jisas i no kamap man yet long graun, em i bung wantaim husat?
• Taim Jisas i stap long graun, wanem sampela samting i bin kamap long em na i stiaim em?
• Fopela Gutnius i kamapim wanem ol pasin bilong Jisas?
[Piksa long pes 10]
Jisas i go bikpela insait long wanpela bikpela famili, na ating ol i no gat planti samting bilong skin
[Ol Piksa long pes 12]
Ol tisa i kirap nogut tru long save bilong Jisas i gat 12-pela krismas na long ol tok em i bekim long ol