Ol Man i Dai Pinis Ol Bai Kirap Bek Tru!
“Mi bilip na mi wet long God bai i kirapim bek ol man i dai pinis.”—APOSEL 24:15.
1. I gat wanem as na yumi ken bilip olsem ol man i dai pinis bai kirap bek?
JEHOVA i bin mekim ol samting na bai i gat gutpela as na yumi ken bilip tru olsem ol man i dai pinis ol bai kirap bek. Em i bin tok promis olsem ol daiman bai kisim laip gen. Na laik bilong em long ol man i dai pinis bai kamap tru. (Aisaia 55:11; Luk 18:27) God i soim pinis olsem em i gat strong long kirapim bek ol man i dai pinis.
2. Pasin bilong bilip long kirap bek inap helpim yumi olsem wanem?
2 Pasin bilong bilip olsem God bai kirapim bek ol man i dai pinis long rot bilong Pikinini bilong em, Jisas Krais, em inap strongim yumi long taim bilong hevi. Na taim yumi bilip tru long kirap bek, dispela inap helpim yumi long stap gut long Papa bilong yumi long heven, maski yumi mas i dai bilong mekim olsem. Bilip bilong yumi long ol man i dai pinis bai kirap bek em bai kamap strong moa taim yumi skelim ol stori bilong Baibel long ol man i bin kisim laip gen. Olgeta dispela mirakel i bin kamap long rot bilong strong bilong Bikpela King Jehova.
Ol Man i Dai Pinis Ol i Kirap Bek
3. Taim pikinini man bilong meri wanpis bilong Sarefat em i dai, Elaija i bin kisim strong long mekim wanem?
3 Aposel Pol i stori long bilip bilong ol witnes bilong Jehova i bin stap paslain long taim bilong ol Kristen, na em i tok: “Ol man i dai pinis ol i kirap bek, na mama bilong ol i kisim ol bek gen.” (Hibru 11:35; 12:1) Wanpela bilong ol dispela meri em i wanpela rabismeri, man bilong en i dai pinis, na em i stap long taun Sarefat long hap bilong Fonisia. Em i bin mekim gut long profet bilong God, em Elaija, olsem na long rot bilong mirakel, plaua na wel bilong em i no pinis long taim bilong bikpela hangre; long dispela taim dispela meri wanpis na pikinini man bilong em ol inap i dai long hangre. Bihain dispela pikinini i dai, na Elaija i slipim em long wanpela bet, na em i slip antap long pikinini inap 3-pela taim, na em i beten askim God olsem: “God, Bikpela bilong mi, yu ken givim laip long dispela pikinini gen.” God i mekim olsem, na dispela pikinini man i kisim laip gen. (1 King 17:8-24) Tingim bikpela amamas bilong dispela meri wanpis taim em i kisim gutpela samting tru long bilip bilong em—em i lukim namba wan daiman i kirap bek—em pikinini bilong em yet!
4. Elisa i bin wokim wanem mirakel long Sunem?
4 Narapela meri em wanpela bilong famili bilong em i kirap bek, em i stap long taun Sunem. Em i meri bilong wanpela lapun man, na em i mekim gut long Elisa na long wokboi bilong em. Bihain em i karim wanpela pikinini man, olsem pe bilong gutpela pasin em i bin mekim. Tasol inap sampela yia bihain, em i singautim Elisa i kam long haus bilong em, long wanem, dispela pikinini man em i dai pinis. Orait Elisa i beten na mekim sampela samting long dispela pikinini, na “bodi bilong manki i kamap hat liklik. Na manki i kus 7-pela taim na i opim ai bilong en.” Yumi ken save, taim dispela manki hia i kirap bek, em wantaim mama bilong em ol i amamas tru. (2 King 4:8-37; 8:1-6) Tasol bai ol i amamas moa yet taim ol i kirap bek long graun na kisim “laip i gutpela moa”—long dispela taim ol i ken tingting long i stap oltaim na no ken i dai gen! Em i wanpela bikpela as na yumi ken tok tenkyu long God bilong kirapim bek ol man i dai pinis, em Jehova!—Hibru 11:35.
5. Olsem wanem Elisa i insait long wanpela mirakel bihain long taim em i dai?
5 Bihain long taim Elisa i dai na ol i planim em, God i givim strong long ol bun bilong em long rot bilong spirit holi. Baibel i tok: “Sampela Israel i laik planim bodi bilong wanpela man. Tasol ol i lukim sampela Moap i kam, olsem na kwiktaim ol i tromoi bodi bilong dispela man long hul ol bun bilong Elisa i stap long en, na ol i ranawe. Taim bodi bilong dispela man i go pas long ol bun bilong Elisa, orait laip i kam bek gen long bodi bilong dispela man, na em i kirap.” (2 King 13:20, 21) Ating dispela man i kirap nogut na em i amamas nogut tru, a? Na tingim bikpela amamas bai kamap taim ol famili bilong yumi bai kirap bek, em dispela samting i stret wantaim laik bilong God Jehova!
Pikinini Bilong God i Kirapim Bek Ol Man i Dai Pinis
6. Jisas i wokim wanem mirakel klostu long taun Nain? Dispela stori inap mekim wanem long yumi?
6 Pikinini bilong God, Jisas Krais, em i bin kamapim ol gutpela as na yumi ken bilip tru olsem ol man i dai pinis ol bai kirap bek, na ol inap i stap oltaim oltaim. Samting i bin kamap klostu long taun Nain na em inap helpim yumi long save, kain mirakel olsem inap kamap long rot bilong strong i kam long God. Wanpela taim Jisas i bungim ol man i krai sori na ol i karim bodi bilong wanpela yangpela man i go ausait long taun bambai ol i ken planim em. Em i pikinini bilong wanpela meri, man bilong en i dai pinis, na em i no gat ol narapela pikinini. Jisas i tokim meri: “Yu no ken krai.” Orait nau Jisas i putim han long bet ol i karim bodi long en, na em i tok: “Yangpela man, mi tokim yu, yu kirap.” Na em i kirap sindaun na em i toktok. (Luk 7:11-15) Dispela mirakel i strongim bilip bilong yumi olsem ol man i dai pinis ol bai kirap bek tru.
7. Wanem samting i kamap long pikinini meri bilong Jairus?
7 Tingim tu stori bilong Jairus, em i wanpela hetman bilong haus lotu long Kaperneam. Em i askim Jisas long kam na helpim pikinini meri bilong em i gat 12-pela krismas, em klostu em i laik i dai. I no longtaim na ol i toksave olsem dispela pikinini meri em i dai pinis. Jairus i bel hevi tru na Jisas i tokim em long bilip tasol, na Jisas i wokabaut i go wantaim em long haus bilong em i gat ol manmeri i krai sori i stap. Ol i lap taim Jisas i tokim ol: “Dispela pikinini em i no i dai. Em i slip tasol.” Em i dai tru, tasol Jisas i laik soim ol olsem ol man i dai pinis ol inap kirap bek, wankain olsem ol man i slip i dai ol inap kirap. Em i holim han bilong pikinini, na em i tok: “Liklik meri, mi tokim yu, yu kirap.” Wantu em i kirap, na papamama bilong em “ol i kirap nogut tru” na ol i amamas. (Mak 5:35-43; Luk 8:49-56) Tru tumas, ol manmeri bai “kirap nogut tru” taim famili bilong ol i kirap bek na kisim laip long paradais long graun.
8. Jisas i mekim wanem long matmat bilong Lasarus?
8 Lasarus i bin stap long matmat inap 4-pela de taim Jisas i go long matmat bilong em na tokim ol man long rausim ston i stap long maus bilong matmat. Jisas i beten long ai bilong ol man bambai ol i ken save em i mas kisim strong i kam long God, na em i singaut strong olsem: “Lasarus, yu kam ausait.” Na tru tumas, em i kam ausait! Laplap i pasim yet han na lek, na laplap i karamapim pes bilong em. Jisas i tok: “Lusim laplap na larim em i wokabaut.” Taim ol i lukim dispela mirakel, planti man em ol i bin kam long mekim gut bel bilong tupela susa bilong Lasarus, Maria na Marta, ol i bilip long Jisas. (Jon 11:1-45) Ating dispela stori i mekim na yu strong long wetim taim ol famili bilong yu bai kirap bek long matmat long nupela taim God bai kamapim, a?
9. Bilong wanem yumi ken bilip tru olsem nau Jisas inap kirapim bek ol man i dai pinis?
9 Taim Jon Bilong Baptais i stap long kalabus, Jisas i salim dispela gutpela tok i go long em: “Ol aipas ol i lukluk gen, . . . ol man i dai pinis, ol i kirap gen.” (Matyu 11:4-6) Taim Jisas i stap long graun em i bin kirapim bek ol man i dai pinis, olsem na em inap tru long mekim dispela samting olsem wanpela strongpela spirit i kisim strong long God. Jisas i tok, “kirap bek, em mi yet. Na laip, em mi yet.” Na klostu nau “olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” Dispela save em i mekim gut bel bilong yumi, a?—Jon 5:28, 29; 11:25.
Ol Narapela Man i Kirap Bek
10. Bai yu stori olsem wanem long namba wan taim wanpela aposel i kirapim bek man i dai pinis?
10 Taim Jisas i salim ol aposel bilong em long autim tok bilong Kingdom, em i tok: “Kirapim ol man i dai pinis.” (Matyu 10:5-8) Tru, bilong mekim olsem ol i mas bilip na wetim God i givim strong long ol. Long yia 36 C.E. long Jopa, wanpela meri i save daun long God, em Dorkas (Tabita), em i dai. Em i bin mekim gut long ol narapela, olsem samapim klos bilong ol meri em man bilong ol i dai pinis na ol i sot long ol samting, na ol dispela meri i krai sori taim Dorkas i dai. Ol disaipel i redim skin bilong em bilong planim, na ol i singautim aposel Pita i kam, ating ol i laik bai em i ken mekim gut bel bilong ol manmeri. (Aposel 9:32-38) Em i tokim olgeta long lusim rum na go ausait, na em i beten na tok: “Tabita, yu kirap.” Tabita i opim ai bilong em, na em i kirap sindaun na holim han bilong Pita, na Pita i kirapim em na em i sanap. Dispela em i namba wan taim Baibel i tok long wanpela aposel i kirapim bek man i dai pinis, na dispela i mekim na planti ol i kamap bilipman. (Aposel 9:39-42) Em nau, dispela em i narapela as na yumi ken bilip tru olsem ol man i dai pinis bai kirap bek.
11. Wanem laspela stori bilong Baibel long wanpela man i dai na i kirap bek?
11 Laspela stori bilong Baibel long man i kirap bek, em i kamap long taun Troas. Taim aposel Pol i go long dispela hap long namba tri raun bilong em long mekim wok misineri, em i mekim wanpela tok na em i pulim tok i go i go inap long biknait. Ating ol lam i mekim na ples i hat na ol manmeri i pas pas, olsem na wanpela yangpela man nem bilong em Yutikus, em i sindaun long windo antap long namba 3 plua, skin bilong em i les na em i slip na pundaun i kam daun. Ol i “kisim em, tasol em i dai pinis,” em i no hap i dai tasol. Pol i slip antap long Yutikus na holim em, na em i tokim ol man: “Yupela i no ken kirap nogut. Laip i stap yet long em.” Insait bilong tok bilong Pol em olsem, man hia i kisim laip gen. Ol manmeri i bung i stap, bel bilong ol “i gutpela tumas.” (Aposel 20:7-12) Long nau, ol wokman bilong God ol i amamas tru long save olsem taim God i truim tok promis bilong em, ol wanwok bilong ol i bin mekim wok bilong God na ol i dai pinis, ol bai kirap bek.
Kirap Bek—Inap Longtaim Pinis Ol Man i Bin Bilip Long En
12. Taim Pol i sanap long ai bilong wanpela gavena bilong Rom, em i kamapim wanem bilip bilong em?
12 Taim Pol i sanap long ai bilong Feliks, em wanpela gavena bilong Rom, Pol i tokaut olsem: “Mi bilip long olgeta tok i stap long lo na olgeta tok ol profet i bin raitim. Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.” (Aposel 24:14, 15) Olsem wanem sampela hap bilong Baibel, olsem Lo Bilong Moses, i stori long ol man i dai pinis ol bai kirap bek?
13. Olsem wanem yumi ken tok taim God i mekim namba wan tok profet, tok bilong em i makim olsem ol man i dai pinis bai kirap bek?
13 Taim God i mekim namba wan tok profet bilong em long Iden, tok bilong em i makim olsem ol man i dai pinis bai kirap bek. Taim em i mekim kot long “dispela snek bilong bipo yet,” em Satan, God i tok: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri. Bai [em] i krungutim het bilong yu, na bai yu kaikaim lek bilong [em].” (KTH 12:9; Stat 3:14, 15) Dispela tok long snek bai kaikaim lek bilong pikinini bilong meri, em i makim olsem ol bai kilim i dai Jisas Krais. Na sapos dispela Pikinini i mas krungutim het bilong snek long bihain, orait Krais i mas kirap bek bambai em i ken mekim dispela samting.
14. Olsem wanem yumi ken tok Jehova ‘em i no God bilong ol man i dai pinis, em i God bilong ol man i stap laip’?
14 Jisas i tok: “Moses tu i bin soim yumi olsem ol man i dai pinis, ol i save kirap bek long matmat. Long dispela stori bilong liklik diwai i paia, em i bin tok olsem, Bikpela em i stap God bilong Abraham na bilong Aisak na bilong Jekop. Dispela i soim yumi olsem God em i no God bilong ol man i dai pinis. Nogat. Em i God bilong ol man i stap laip. Long ai bilong em, olgeta manmeri i stap laip.” (Luk 20:27, 37, 38; Kisim Bek 3:6) Abraham, Aisak, na Jekop ol i dai pinis, tasol laik bilong God long kirapim ol bek bai kamap tru, olsem na long tingting bilong God i olsem ol i stap laip.
15. Bilong wanem i gat as na Abraham inap bilip olsem ol man i dai pinis bai kirap bek?
15 I gat as na Abraham i bilip long kirap bek, long wanem, taim em na meri bilong em, Sara, ol i lapun tru na ol i no inap kamapim pikinini moa, God i wokim mirakel na kirapim bek strong bilong ol long kamapim pikinini. I olsem God i kirapim bek man i dai pinis. (Stat 18:9-11; 21:1-3; Hibru 11:11, 12) Taim pikinini man bilong ol, Aisak, i gat 25 krismas samting, God i tokim Abraham long kilim em i dai olsem ofa. Tasol taim Abraham i laik kilim Aisak i dai, ensel bilong Jehova i pasim han bilong em. Abraham i ting “sapos Aisak i dai, maski, God em inap long kirapim em bek. Olsem na tru tumas, yumi inap tok bokis long dispela samting i bin kamap na tok olsem, Abraham i kisim bek pikinini bilong en long matmat.”—Hibru 11:17-19; Stat 22:1-18.
16. Nau Abraham i slip long matmat na em i wet long wanem samting?
16 Abraham i ting ol man i dai pinis bai kirap bek taim Mesaia, em dispela Pikinini God i bin tok promis long en, bai bosim graun. Taim Pikinini bilong God em i no kam daun yet long graun, em i save long bilip bilong Abraham. Olsem na taim em i stap man long graun, Jisas Krais i tokim ol Juda: “Taim tumbuna bilong yupela Abraham em i tingting long lukim taim bilong mi, em i bin amamas.” (Jon 8:56-58; Sindaun 8:30, 31) Nau Abraham i slip long matmat, na em i wet long taim Kingdom bilong God long han bilong Krais bai bosim graun na ol man i dai pinis bai kirap bek.—Hibru 11:8-10, 13.
Lo Bilong Moses na Buk Song i Tok Long Kirap Bek
17. Olsem wanem “olgeta tok i stap long lo” i makim kirap bek bilong Jisas Krais?
17 Bilip bilong Pol long kirap bek i stret wantaim “olgeta tok i stap long lo.” God i tokim ol Israel: “Yupela i mas kisim namba wan mekpas wit yupela i pasim, na yupela i mas karim i go long ol pris. Na [long Nisan 16] pris i mas holim dispela mekpas wit long han na mekim i go i kam long ai bilong mi, na bai mi ken orait long yupela.” (Wok Pris 23:9-14) Ating Pol i tingim dispela lo taim em i tok: “Krais i dai pinis, na tru tumas God i bin kirapim em bek. Em i kirap paslain long ol arapela man i dai pinis, olsem namba wan kaikai i redi long gaden.” Jisas i “kirap paslain long ol arapela” long Nisan 16, 33 C.E. Bihain, taim em i kam i stap, lain bilong Krais em God i bin makim, olsem ol ‘namba tu kaikai i redi long gaden,’ ol bai kirap bek.—1 Korin 15:20-23; 2 Korin 1:21; 1 Jon 2:20, 27.
18. Olsem wanem Pita i soim olsem Buk Song i tok profet long Jisas bai kirap bek?
18 Buk Song tu i strongim tok bilong kirap bek long matmat. Long de Pentikos bilong yia 33 C.E., aposel Pita i kamapim tok bilong Song 16:8-11, olsem: “Devit tu i bin tok olsem long [Krais], ‘Mi lukim Bikpela i stap klostu tru long mi oltaim. Em i stap klostu na i givim strong long mi, olsem na i no gat wanpela samting i ken mekim mi i pret na guria. Olsem na bel bilong mi i gutpela tru, na mi mekim tok bilong amamas. Mi wetim ol gutpela samting God i laik mekim long mi. Bai yu no larim mi i stap long ples bilong ol man i dai pinis. Na bai yu no larim man yu bin makim bilong yu yet i sting long matmat.’ ” Pita i tok moa: “[Devit] i save pinis long samting God i laik mekim, na em i tok long dispela man God i makim bilong kisim bek ol manmeri bilong en, em bai i kirap bek long matmat. Orait dispela man Jisas, God i kirapim em pinis long matmat.”—Aposel 2:25-32.
19, 20. Wanem taim Pita i kamapim tok bilong Song 118:22? Olsem wanem dispela tok i kamapim ol samting bilong indai na kirap bek bilong Jisas?
19 Sampela de bihain, Pita i sanap long ai bilong kaunsil na em i kamapim gen sampela tok bilong Buk Song. Taim ol i askim em long olsem wanem em i bin oraitim wanpela lek nogut, Pita i tok: “Yupela olgeta i mas save, na olgeta lain Israel tu ol i mas save, long nem bilong Jisas Krais bilong Nasaret, dispela man lek nogut i bin kamap orait na nau em i sanap long ai bilong yupela. Yupela i bin nilim Jisas long diwai . . . , tasol God i kirapim em bek long matmat. Jisas em i ‘dispela ston yupela ol kamda i bin ting em i nogut na yupela i bin rausim. Tasol nau em i kamap nambawan ston bilong strongim banis bilong haus.’ I no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut. Em wanpela tasol God i bin makim bilong kisim bek yumi.”—Aposel 4:10-12.
20 Long dispela taim Pita i kamapim tok bilong Song 118:22, na em i stori long ol samting bilong indai na kirap bek bilong Jisas. Ol bikman bilong lotu ol i stiaim ol Juda na ol i sakim Jisas. (Jon 19:14-18; Aposel 3:14, 15) Taim ‘ol kamda i rausim ston,’ ol i kilim Krais i dai, tasol taim “em i kamap nambawan ston bilong strongim banis bilong haus,” dispela i makim olsem em i kirap bek olsem spirit long heven. Olsem man bilong raitim Song em i tok, “Bikpela yet i mekim dispela samting i kamap.” (Song 118:23) Bilong mekim dispela “ston” i kamap Nambawan Ston bilong strongim banis, God i makim em long kamap King.—Efesus 1:19, 20.
Bilip Bilong Kirap Bek i Strongim Yumi
21, 22. Jop i tok em i wet long wanem samting bai kamap, olsem Jop 14:13-15 i tok long en? Olsem wanem dispela inap mekim gut bel bilong ol man bilong nau i krai sori long man i dai pinis?
21 Tru, yumi yet i no bin lukim wanpela man i dai pinis i kirap bek, tasol yumi bin skelim sampela stori bilong Baibel i strongim bilip bilong yumi long ol bai kirap bek. Olsem na yumi ken wet long wankain gutpela samting i kamap olsem stretpela man Jop i bin tok long en. Taim em i karim hevi, em i krai long God olsem: “God, i gutpela sapos yu haitim mi long ples bilong ol man i dai pinis, . . . na yu ken makim wanpela taim bilong tingim mi gen. Na bai mi wet i stap inap long taim yu makim bilong mi i stap long dispela ples, em i pinis. . . Bai yu laikim tumas bai mi stap klostu long yu gen. Olsem na bai yu singautim mi na bai mi lusim dispela ples na kam long yu.” (Jop 14:13-15) God i gat bikpela laik long kirapim bek Jop. Olsem na yumi gat gutpela samting tru bilong wetim, a?
22 Wanpela bilong famili i save daun long God em inap kisim bikpela sik, olsem Jop i bin kisim, na em inap i dai tu. Ating famili bai krai sori olsem Jisas i bin krai taim Lasarus i dai. (Jon 11:35) Tasol God bai singautim ol man i dai pinis i stap long tingting bilong em na ol bai kirap bek—yumi save long dispela na em i mekim gut bel bilong yumi! I olsem ol i bin stap long wanpela longwe hap na nau ol i kam bek—tasol ol i no gat sik na skin bilong ol i no bagarap, nogat; skin bilong ol i gutpela tru.
23. Sampela ol i tok wanem bilong kamapim olsem ol i bilip tru long kirap bek?
23 Indai bilong wanpela gutpela lapun Kristen i kirapim ol wanbilip bilong em long raitim tok olsem: “Mipela i laik tok olsem mipela i sori tru long mama bilong yu i dai. I no longtaim na bai yumi tok amamas long em taim em i kam bek—bai em i gat gutpela na strongpela skin!” Papamama em pikinini man bilong ol i dai, ol i tok: “Mipela i wet tru long taim Jason bai kirap bek! Em bai lukluk raun na lukim dispela Paradais em i bin wet long en. . . . Dispela em i wanpela bikpela samting bilong kirapim mipela ol man i laikim em tru long wok strong bambai mipela tu i ken stap long dispela Paradais.” Tru tumas, yumi ken amamas tru long ol man i dai pinis bai kirap bek tru!
Wanem Bekim Bilong Yu?
• Pasin bilong bilip long God bai kirapim bek ol man i dai pinis em inap helpim yumi olsem wanem?
• Wanem ol stori bilong Baibel i kamapim olsem i gat as na yumi ken bilip olsem ol man i dai pinis bai kirap bek?
• Olsem wanem yumi ken tok, inap longpela taim pinis ol man i bin bilip olsem ol man i dai pinis bai kirap bek?
• Yumi ken wet long wanem samting bai painim ol man i dai pinis?
[Piksa long pes 10]
Elaija i kisim strong long Jehova, na em i kirapim bek yangpela pikinini man bilong wanpela meri, man bilong em i dai pinis
[Piksa long pes 12]
Taim Jisas i kirapim bek pikinini meri bilong Jairus, papamama bilong dispela pikinini ol i amamas nogut tru
[Piksa long pes 15]
Long de Pentikos bilong yia 33 C.E., aposel Pita i no pret long tokaut olsem Jisas i bin kirap bek long matmat