Kamap Strong Long Rot Bilong Laikim Tru Ol Narapela
“Yupela i mas laikim God, Bikpela bilong yumi. Yupela i mas laikim em tru long bel bilong yupela na . . . long tingting bilong yupela.”—MATYU 22:37.
1. (a) Wanem sampela pasin ol Kristen i wok long kisim? (b) Wanem pasin Kristen em i nambawan? Bilong wanem?
WANPELA Kristen i mas mekim planti samting bilong kamap wanpela wokman i mekim gutpela wok. Buk Sindaun i kamapim klia olsem save, na pasin bilong klia gut long ol tok, na gutpela tingting ol i bikpela samting. (Sindaun 2:1-10) Aposel Pol i bin tok yumi mas i gat strongpela bilip na strong long wetim gutpela samting i kamap. (Rom 1:16, 17; Kolosi 1:5; Hibru 10:39) Na tu, pasin bilong sanap strong na bosim gut skin ol i bikpela samting. (Aposel 24:25; Hibru 10:36) Tasol i gat wanpela pasin sapos yu sot long en ol man i no inap tingim tumas ol gutpela pasin yu mekim, na ating ol dispela gutpela pasin i no inap helpim yu liklik. Dispela pasin em i pasin bilong laikim tru ol narapela.—1 Korin 13:1-3, 13.
2. Olsem wanem Jisas i kamapim klia olsem pasin bilong laikim tru ol narapela em i bikpela samting? Dispela i kamapim wanem ol askim?
2 Jisas i kamapim klia olsem pasin bilong laikim tru ol narapela em i bikpela samting taim em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Pasin bilong laikim tru ol narapela em i mak bilong ol Kristen tru, olsem na yumi mas tingim ol kain askim olsem: Wanem dispela pasin bilong laikim tru narapela? Bilong wanem em i bikpela samting tru na Jisas i tok em i nambawan pasin i makim ol disaipel bilong em? Yumi ken kamapim dispela pasin olsem wanem? Yumi mas laikim tru husat? Orait nau bai yumi skelim ol dispela askim.
Wanem Dispela Pasin Bilong Laikim Tru Narapela?
3. Wanem insait bilong dispela tok laikim tru narapela? Olsem wanem em i samting bilong tingting na bel bilong man?
3 Wanpela insait bilong dispela tok laikim tru narapela i olsem ‘yumi gat laik long pas gut wantaim narapela, yumi gat laik long mekim pasin sori long narapela o yumi laikim em tru.’ Dispela pasin i save kirapim ol man long mekim ol samting bilong helpim ol narapela, na sampela taim ol bai lusim planti samting bilong ol yet long mekim. Pasin bilong laikim narapela, em Baibel i stori long en, em i samting bilong tingting na bel bilong man. Tingting bilong yumi i insait long dispela samting, long wanem, yumi save yumi yet na ol man yumi laikim tru, ol i gat sampela pasin kranki, na tu, ol i gat sampela gutpela pasin. Na tingting bilong yumi i gat hap wok moa long dispela, long wanem, i gat sampela man em Kristen i save laikim tru ol, maski bel i no kirapim em long mekim—em i bin ritim Baibel na kisim save olsem God i laik bai em i laikim ol dispela manmeri. (Matyu 5:44; 1 Korin 16:14) Tasol yumi ken tok, pasin bilong laikim tru narapela i save kirap long bel bilong man. Pasin bilong laikim tru narapela olsem Baibel i stori long en i no samting bilong tingting tasol. Narapela i mas bilip tru na givim bel olgeta long narapela.—1 Pita 1:22.
4. Olsem wanem pasin bilong laikim tru ol narapela i save mekim ol man i pas gut wantaim?
4 Ol man i save tingim ol yet tasol ol i no inap pas gut wantaim narapela na laikim em tru, long wanem, man i laikim tru narapela em i redi long putim laik bilong narapela i go pas long laik bilong em yet. (Filipai 2:2-4) Tok bilong Jisas olsem “amamas bilong man i givim samting long ol arapela man, dispela i winim amamas bilong man i kisim samting bilong em yet” em i tru moa yet taim pasin bilong laikim narapela i as na man i givim samting long em. (Aposel 20:35) Pasin bilong laikim tru ol narapela i save mekim ol man i pas gut tru. (Kolosi 3:14) Planti taim pasin pren i insait long pasin bilong laikim tru narapela, tasol pasin bilong laikim tru narapela em i strong moa, winim pasin pren. Pasin bilong man i laikim meri na meri i laikim man, olsem i stap namel long ol marit, sampela taim ol i save kolim olsem pasin bilong laikim tru narapela; tasol pasin bilong laikim narapela em Baibel i kirapim yumi long kamapim, em i save stap strong inap longpela taim, winim pasin bilong tingim naispela skin na yu laikim narapela. Insait long marit, taim narapela i laikim tru narapela, ol bai stap wantaim maski ol i lapun o wanpela i kisim bikpela bagarap long sik samting na ol i no inap mekim maritpasin moa.
Mas i Gat Pasin Bilong Laikim Tru Narapela
5. Bilong wanem ol Kristen ol i mas i gat pasin bilong laikim tru ol narapela?
5 Bilong wanem ol Kristen ol i mas i gat pasin bilong laikim tru ol narapela? Namba wan as em i olsem: Jisas i bin tokim ol disaipel bilong em long narapela i mas laikim tru narapela. Em i tok: “Sapos yupela i mekim olsem mi bin tokim yupela, orait yupela i stap pren bilong mi. Mi givim lo long yupela olsem. Yupela wan wan i mas laikim tru ol arapela.” (Jon 15:14, 17) Namba tu, em Jehova yet i as bilong pasin bilong laikim tru ol narapela, na yumi ol man i lotu long em yumi mas bihainim pasin bilong em. (Efesus 5:1; 1 Jon 4:16) Baibel i tok, bilong kisim laip oltaim yumi mas kisim save long Jehova na Jisas. Olsem wanem yumi inap tok yumi save long God sapos yumi no wok long bihainim pasin bilong em? Aposel Jon i tok: “God yet em i as bilong dispela pasin bilong laikim ol arapela. Olsem na man i no save laikim ol arapela, em i no save long God.”—1 Jon 4:8.
6. Olsem wanem pasin bilong laikim tru ol narapela inap helpim yumi long skelim stret ol samting long sindaun bilong yumi?
6 I gat namba tri as na pasin bilong laikim tru ol narapela em i bikpela samting: Em i save helpim yumi long skelim stret ol samting long sindaun bilong yumi na bai yumi bihainim gutpela tingting na mekim ol samting. Olsem: Yumi mas wok oltaim long kisim save long Tok Bilong God. Dispela kain save i olsem kaikai bilong Kristen. Dispela i save helpim em long kisim tingting bilong man i bikpela pinis na long mekim ol samting i stret wantaim laik bilong God. (Song 119:105; Matyu 4:4; 2 Timoti 3:15, 16) Tasol Pol i mekim tok lukaut olsem: “Save nating em i save kirapim pasin bilong bikhet. Tasol pasin bilong givim bel bilong yumi long ol arapela man, dispela i save mekim yumi i kamap strongpela Kristen.” (1 Korin 8:1) I no gat rong long kisim stretpela save, nogat. Hevi i save kamap, long wanem, yumi gat sin i stap long skin bilong yumi. (Stat 8:21) Sapos pasin bilong laikim tru narapela i no stap bilong helpim man long skelim stret ol samting, save man i kisim inap mekim na em bai kisim pasin antap na ting em i winim ol narapela. Tasol dispela samting i no inap kamap sapos pasin bilong laikim tru narapela i save kirapim em long mekim ol samting. “Man i save givim bel bilong en long ol arapela, . . . em i no save litimapim nem bilong em yet.” (1 Korin 13:4) Sapos pasin bilong laikim tru narapela i kirapim wanpela Kristen long mekim ol samting, em i no inap kisim pasin antap maski em i kisim bikpela save tru. Pasin bilong laikim tru narapela i mekim na em i gat pasin daun na em i no gat tingting long kisim biknem.—Song 138:6; Jems 4:6.
7, 8. Olsem wanem pasin bilong laikim tru narapela i save helpim yumi long tingim ol samting i bikpela samting tru?
7 Pol i raitim tok long ol Filipai olsem: “Oltaim mi save beten olsem, pasin bilong laikim tru ol narapela na stretpela save na gutpela tingting em i ken pulap moa yet long yupela. Olsem bai yupela inap long skelim gut wanem ol samting i bikpela samting tru, na bai yupela i stap klin tru na i no pundaunim ol narapela inap long de bilong Krais.” (Filipai 1:9, 10, NW ) Pasin Kristen bilong laikim tru narapela bai helpim yumi long bihainim dispela tok bilong skelim gut wanem ol samting i bikpela samting tru. Olsem: Tingim tok Pol i givim long Timoti: “Sapos man i laik i stap wasman bilong sios, em i laikim gutpela wok.” (1 Timoti 3:1) Long yia bilong wok bilong 2000, namba bilong ol nupela kongrigesen long olgeta hap i go antap olsem 1,502, olsem na namba bilong olgeta kongrigesen em 91,487. Olsem na i gat wok long sampela elda moa, na ol brata i wok long winim mak long kamap elda, yumi laik tok amamas long ol.
8 Tasol ol brata i laik i stap wasman ol bai skelim stret ol samting sapos ol i tingting long as na ol i laik mekim dispela wok. Tasol bikpela namba o nem em i no bikpela samting. Ol elda em ol i save laikim tru Jehova na ol brata na dispela i kirapim ol long mekim wok, Jehova i save amamas long ol. Ol i no tingting long kisim nem o namba. Aposel Pita i givim tok long ol elda bilong kongrigesen long bihainim gutpela tingting, na bihain em i tok ol i mas “bihainim pasin bilong daunim [ol] yet.” Em i tokim olgeta long kongrigesen olsem: “Daunim laik bilong yupela yet na stap aninit long strongpela han bilong God.” (1 Pita 5:1-6) Ol brata i laik mekim wok elda, i gutpela sapos ol i tingim pasin bilong planti ol elda long olgeta hap, ol i stap olsem gutpela piksa long wok strong na mekim pasin daun, na long dispela rot ol i stap olsem wanpela blesing long ol kongrigesen bilong ol.—Hibru 13:7.
Gutpela Laik i Save Helpim Yumi Long Sanap Strong
9. Bilong wanem ol Kristen i wok long tingim ol gutpela samting Jehova i tok promis long mekim?
9 I gat narapela rot na yumi ken luksave olsem pasin bilong laikim tru narapela i mas kirapim yumi long mekim ol samting. Ol man em pasin bilong laikim tru narapela i save kirapim ol long wokabaut long pasin bilong God, Baibel i tok promis long ol bai kisim ol gutpela samting long nau na ol samting i gutpela moa yet long bihain. (1 Timoti 4:8) Kristen i save bilip strong long ol dispela promis na em i bilip tru olsem “God i save mekim gut tru long ol man i wok long painim em,” dispela bai helpim em long sanap strong long bilip. (Hibru 11:6) Planti bilong yumi i gat bikpela laik long lukim truim bilong ol promis bilong God, na yumi mekim wankain tok olsem aposel Jon: “I tru. Bikpela Jisas, yu kam.” (KTH 22:20) Yes, taim yumi tingim tru long bel ol blesing yumi inap kisim sapos yumi stap gut long God, dispela i save strongim yumi long sanap strong na karim hevi. I wankain tu long Jisas, em i tingting long “bihain em bai i stap gut na amamas moa yet,” na dispela tingting i bin helpim em long sanap strong.—Hibru 12:1, 2.
10, 11. Taim pasin bilong laikim tru ol narapela i kirapim yumi long mekim ol samting, olsem wanem dispela i helpim yumi long sanap strong na karim hevi?
10 Tasol olsem wanem sapos yumi tingting tasol long laik bilong yumi long i stap long nupela taim na dispela i kirapim yumi long mekim wok bilong Jehova? Sapos olsem, ating bai yumi les kwik o yumi bel nogut taim ol hevi i kamap, o ol samting i no kamap olsem yumi laik bai i kamap o long taim yumi laikim. Long kain taim olsem yumi inap slek na isi isi yumi lusim tok i tru. (Hibru 2:1; 3:12) Pol i stori long wanpela poroman bilong em long bipo i bin lusim em, nem bilong em Demas. Bilong wanem em i lusim Pol? Long wanem, “em i laikim tumas ol pasin bilong dispela graun.” (2 Timoti 4:10) Ol man i save tingim ol yet tasol na ol i mekim wok bilong God, ol tu inap bihainim pasin bilong Demas. Ol samting bilong dispela graun ol inap kisim long nau inap pulim ol, na ol i no laik lusim sampela samting bilong ol long nau bilong kisim ol gutpela samting bai kamap bihain.
11 Tru, i stret yumi gat laik long kisim ol blesing long bihain na yumi laik bai ol hevi yumi karim i mas pinis, tasol pasin bilong laikim tru narapela i save helpim yumi long pilim moa yet wanem samting i mas i stap nambawan long i stap bilong yumi. Laik bilong Jehova em i nambawan samting, laik bilong yumi nogat. (Luk 22:41, 42) Tru tumas, pasin bilong laikim tru ol narapela i save strongim yumi. Dispela pasin i save helpim yumi long i stap isi na wetim God bilong yumi, na amamas long ol gutpela samting em i givim long yumi, na yumi bilip strong olsem long taim stret em i makim bai yumi kisim olgeta samting em i bin promis long en—na planti samting moa. (Song 145:16; 2 Korin 12:8, 9) Na taim yumi wet i stap, pasin bilong laikim tru narapela i helpim yumi na yumi no tingim yumi yet na mekim wok, long wanem, man i save laikim tru ol narapela “em i no save tingting tumas long em yet.”—1 Korin 13:4, 5.
Ol Kristen i Mas Laikim Tru Husat?
12. Olsem Jisas i tok, yumi mas laikim tru husat?
12 Taim Jisas i kolim tupela tok em i kisim long Lo Bilong Moses, em i bin givim wanpela lo olsem yumi mas laikim tru husat. Em i tok: “Yupela i mas laikim God, Bikpela bilong yumi. Yupela i mas laikim em tru long bel bilong yupela na . . . long tingting bilong yupela,” na “Yu mas laikim ol wantok olsem yu laikim yu yet.”—Matyu 22:37-39.
13. Olsem wanem yumi ken lain long laikim tru Jehova maski yumi no inap lukim em?
13 Ol tok bilong Jisas i kamapim long ples klia olsem pasin bilong laikim tru Jehova em i nambawan bikpela samting. Tasol taim mama i karim yumi, yumi no save laikim tru Jehova. Yumi mas wok long kisim dispela laik. Taim yumi kisim save long em long namba wan taim, ol samting yumi harim i kirapim yumi long i go klostu long em. Isi isi yumi bin kisim save long olsem wanem em i bin redim dispela graun bilong ol man i ken sindaun long en. (Stat 2:5-23) Yumi kisim save long pasin em i mekim long ol man, em i no bin lusim yumi taim Adam na Iv i mekim sin, nogat, em i stretim rot bilong kisim bek yumi. (Stat 3:1-5, 15) Em i mekim gutpela pasin long ol man i stap gut long em, na bihain em i givim dispela wanpela Pikinini bilong em bilong tekewe sin bilong yumi. (Jon 3:16, 36) Taim yumi kisim ol dispela save, yumi amamas moa long ol samting Jehova i mekim bilong helpim yumi. (Aisaia 25:1) King Devit i tok em i laikim tumas Jehova, long wanem, long pasin sori Jehova i lukautim em. (Song 116:1-9) Long nau, Jehova i save lukautim yumi, na soim rot long yumi, na strongim yumi, na strongim bel bilong yumi. Taim yumi wok long kisim save long em, yumi save laikim em moa yet.—Song 31:23; Sefanaia 3:17; Rom 8:28.
Olsem Wanem Yumi Ken Kamapim Olsem Yumi Laikim Tru Narapela?
14. Olsem wanem yumi inap kamapim klia olsem yumi laikim God tru na yumi no giaman?
14 Planti manmeri long olgeta hap ol i tok ol i laikim tru God, tasol pasin ol i bihainim i kamapim klia olsem tok bilong ol i giaman. Olsem wanem bai yumi save olsem yumi laikim tru Jehova? Yumi ken toktok wantaim em long rot bilong beten na tokim em long ol samting i stap long bel na tingting bilong yumi. Na tu, yumi ken bihainim ol pasin i save kamapim klia olsem yumi laikim em tru. Aposel Jon i tok: “Sapos wanpela man i bihainim tok bilong God, orait em i save tru long givim bel bilong en long God, na long dispela pasin yumi save olsem, yumi pas wantaim God.” (1 Jon 2:5; 5:3) Baibel i save tokim yumi long bung wantaim na bihainim klinpela na stretpela pasin long sindaun bilong yumi. Yumi abrusim pasin bilong tupela maus, na yumi mekim tok tru tasol, na tingting long ol samting i gutpela tasol. (2 Korin 7:1; Efesus 4:15; 1 Timoti 1:5; Hibru 10:23-25) Yumi kamapim pasin bilong laikim narapela taim yumi givim mani samting bilong helpim ol man i sot. (1 Jon 3:17, 18) Na yumi no save surik long tokim ol narapela long Jehova. Yumi mas insait long wok bilong autim gutnius bilong Kingdom long olgeta hap. (Matyu 24:14; Rom 10:10) Taim yumi bihainim tok bilong Baibel long ol dispela samting, dispela i makim olsem yumi laikim tru Jehova.
15, 16. Pasin bilong laikim tru Jehova i bin mekim wanem long i stap bilong planti man long yia i go pinis?
15 Pasin bilong laikim tru Jehova i save helpim ol man long bihainim gutpela tingting. Long yia i go pinis, kain pasin olsem i bin kirapim 288,907 manmeri long dediketim laip bilong ol long em na kisim baptais long wara bilong makim dispela samting. (Matyu 28:19, 20) Dediket bilong ol i gat as bilong en. Em i makim wanpela senis long sindaun bilong ol. Olsem: Gazmend em i wanpela hapman bilong pilai basketbal long kantri Albenia. Inap sampela yia em wantaim meri bilong em ol i bin stadi long Baibel na maski i gat ol samting i laik pasim rot bilong ol, bihain ol i kamap pablisa. Long yia i go pinis, Gazmend i kisim baptais, em i wanpela bilong 366 manmeri ol i kisim baptais long Albenia long yia bilong wok bilong 2000. Wanpela niuspepa i stori long Gazmend na i tok: “I stap bilong em i gat as bilong en, olsem na em wantaim famili bilong em ol i stap amamas tru long nau, winim olgeta narapela taim bipo. Long nau em i no tingting long ol samting em inap kisim, nogat, em i tingting long wanem ol samting em inap givim bilong helpim ol narapela.”
16 Olsem tasol wanpela samting i kamap bilong traim wanpela sista i baptais nupela na em i wok long wanpela kampani bilong wokim bensin long Guam. Inap sampela yia em i wok long kisim bikpela namba moa long dispela kampani, na nau ol i laik makim em i kamap nambatu bilong presiden bilong kampani, em namba wan taim ol i makim wanpela meri long holim dispela wok. Tasol nau em i dediket pinis long Jehova. Olsem na em i toktok gut wantaim man bilong em na sista i tokim kampani olsem em i no laik kisim dispela wok, na em i stretim rot bilong kisim wanpela wok haptaim bambai em inap winim mak bilong autim tok long olgeta de, olsem wanpela painia. Pasin bilong laikim tru Jehova i kirapim em long mekim wok bilong em olsem wanpela painia na em i no laik mekim wok bilong kisim mani samting bilong dispela graun. Tru tumas, pasin bilong laikim tru Jehova i bin kirapim 805,205 long olgeta hap long mekim kain kain wok painia long yia bilong wok bilong 2000. Ol dispela painia ol i kamapim klia olsem ol i laikim tru God na ol i bilip long em!
Bel i Kirapim Ol Long Laikim Tru Jisas
17. Jisas i mekim wanem na em i stap olsem gutpela piksa long pasin bilong laikim tru narapela?
17 Jisas em i stap olsem gutpela piksa tru bilong man em pasin bilong laikim tru narapela i kirapim em. Taim em i no kam daun yet long graun, em i laikim tru Papa bilong em na ol manmeri bilong graun. Em man i makim stret gutpela tingting na save, na em i tok: “Long taim Bikpela i mekim ol dispela wok, mi stap wantaim em na em i makim mi olsem saveman i bosim wok. Olgeta de mi bin mekim em i amamas, long wanem, mi bin amamas tumas long lukim ol samting em i bin wokim. Mi bin amamas long lukim dispela graun na ol manmeri i stap long en, olsem na mi bin amamas i stap oltaim long ai bilong Bikpela.” (Sindaun 8:30, 31) Jisas i laikim tru ol narapela, olsem na dispela i kirapim em long lusim heven na kamap liklik bebi i no inap helpim em yet. Em i mekim gutpela pasin na em i isi long ol man i gat pasin daun na em i kisim bikpela pen long han bilong ol birua bilong Jehova. Bihain em i dai long diwai pos bilong helpim olgeta man. (Jon 3:35; 14:30, 31; 15:12, 13; Filipai 2:5-11) Em i stap olsem gutpela piksa long larim pasin i stret i kirapim em long mekim ol samting!
18. (a) Yumi ken mekim wanem bilong kisim pasin bilong laikim tru Jisas? (b) Yumi ken mekim wanem bilong kamapim long ples klia olsem yumi laikim tru Jisas?
18 Taim ol man i gat gutpela bel ol i ritim ol stori bilong Jisas i stap long 4-pela Gutnius na ol i tingim gut long bel ol gutpela samting ol i kisim long rot bilong ol samting Jisas i bin mekim, dispela i kirapim ol long laikim em moa yet. Yumi long nau i olsem ol dispela lain Pita i toktok long ol, em i tok: “Yupela i no bin lukim [Jisas] yet, tasol yupela i save laikim em na givim bel bilong yupela long em.” (1 Pita 1:8) Yumi kamapim pasin bilong yumi long laikim tru Jisas taim yumi bilip long em na bihainim pasin bilong em long daunim laik bilong em yet. (1 Korin 11:1; 1 Tesalonaika 1:6; 1 Pita 2:21-25) Long Epril 19, 2000, 14,872,086 i bung long Memorial bilong tingim i dai bilong Jisas, na tok i kamap long dispela bung i bin kirapim ol long tingim as na yumi laikim tru Jisas. Em bikpela lain tru i bung! Dispela i strongim yumi long save olsem i gat bikpela lain man ol i gat laik long kisim save long ol samting God i mekim bilong kisim bek ol man long rot bilong ofa bilong Jisas! Tru tumas, pasin bilong Jehova na Jisas long laikim tru yumi na yumi laikim tru tupela, dispela i save strongim yumi.
19. Wanem ol askim long pasin bilong laikim tru ol narapela bai yumi stori long en long bihain?
19 Jisas i tok yumi mas laikim tru Jehova long bel, na laip, na tingting, na long strong bilong yumi. Tasol em i tok tu olsem yumi mas laikim ol wantok olsem yumi laikim yumi yet. (Mak 12:29-31) Husat i insait long dispela lain olsem “ol wantok”? Na olsem wanem pasin bilong laikim tru ol i helpim yumi long skelim stret ol samting na bihainim stretpela tingting na mekim ol samting? Stori i kamap bihain long dispela bai bekim ol dispela askim.
Yu Tingim Yet?
• Bilong wanem yumi mas i gat pasin bilong laikim tru ol narapela?
• Olsem wanem yumi inap lain long laikim tru Jehova?
• Olsem wanem pasin bilong yumi i kamapim klia olsem yumi laikim tru Jehova?
• Yumi ken mekim wanem bilong kamapim long ples klia olsem yumi laikim tru Jisas?
[Ol Piksa long pes 10, 11]
Pasin bilong laikim tru narapela i helpim yumi long i stap isi na wetim gutpela samting i kamap
[Piksa long pes 12]
Bikpela ofa Jisas i mekim i kirapim yumi long laikim em tru