Kam Long Jehova Paslain Long De Bilong Belhat Bilong Em
“Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.”—SEFANAIA 2:3.
1. Taim Sefanaia i kirap mekim wok profet, Juda i stap olsem wanem long ol samting bilong spirit?
SEFANAIA i bin kirapim wok profet bilong em long wanpela taim nogut bilong hevi long Juda. Lain Juda i stap nogut long ol samting bilong spirit. Ol manmeri i no bilip long Jehova na wetim em, nogat. Ol i lukluk i go long ol pris haiden na ol man bilong lukluk long sta bilong soim rot long ol. Pasin bilong lotuim Bal wantaim ol pasin sem na pasin pamuk bilong en, em i pulap long Juda. Ol hetman, ol bikman, ol jas, ol i gat wok long lukautim ol manmeri, tasol ol i wok long daunim ol na givim bikpela hevi long ol. (Sefanaia 1:9; 3:3) Olsem na Jehova i tingting pinis long “wilwilim” Juda na Jerusalem na bagarapim tru!—Sefanaia 1:4.
2. Olsem wanem? I gat gutpela samting inap painim ol wokman bilong God long Juda em ol i stap gut long em?
2 Tru, em i taim nogut tru long Juda, tasol i gat gutpela samting inap kamap. Josaia, pikinini bilong Amon, em i stap king. Em i manki yet, tasol em i save laikim tru Jehova. Sapos dispela nupela king i kirapim bek lotu i tru long Juda, dispela bai strongim tru bel bilong ol wan wan man em ol i stap gut long God na mekim wok bilong em! Na ating sampela moa bai kirap bihainim ol, na ol tu bai abrusim bagarap long de bilong Jehova long kamapim belhat bilong em.
Ol Samting Ol i Mas Mekim
3, 4. Wanem 3-pela mak yumi mas winim na bai yumi ken abrusim bagarap long de Jehova bai kamapim belhat bilong em?
3 Olsem wanem? I gat sampela man ol inap tru long abrusim bagarap long dispela de Jehova bai kamapim belhat bilong em? I gat. Tasol ol i mas winim 3-pela mak em Sefanaia 2:2, 3 i kolim. Taim yumi kaunim ol dispela ves, yumi mas tingim gut dispela 3-pela samting. Sefanaia i tok: “Nogut God i kamapim belhat bilong en na wantu bai yupela i bagarap olsem ol plaua i drai. Nogut belhat bilong Bikpela i kamap na kukim yupela olsem paia. Yupela ol manmeri i no save bikhet na sakim tok bilong Bikpela, yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.”
4 Olsem na bilong abrusim bagarap, ol i mas (1) kam long Jehova, (2) mekim pasin i stret, na (3) daunim ol yet. Ol dispela samting ol i mas mekim, em ol samting yumi ol lain bilong nau i mas tingim gut. Bilong wanem? Long wanem, de bilong kot i laik painim Juda na Jerusalem olsem 600 yia samting paslain long Krais, na olsem tasol kot bilong God Jehova i laik painim ol lain bilong Kristendom—na olgeta man nogut wantaim—long taim bilong “bikpela hevi tru” bai kamap bihain. (Matyu 24:21) Ol man i laik bai God i haitim ol long dispela taim, nau tasol ol i mas kirap na mekim sampela samting. Ol i mas mekim wanem? Ol i mas i kam long Jehova, na mekim pasin i stret, na mekim pasin daun, nogut ol i wet na taim i pinis!
5. Bilong “kam” long Jehova long nau, yumi mas mekim wanem?
5 Ating bai yu tok olsem: ‘Mi wanpela wokman bilong Jehova i dediket na baptais pinis—mi wanpela Witnes Bilong Jehova. Mi mekim pinis ol dispela samting.’ Tru, yumi dediketim laip bilong yumi long Jehova, tasol i gat sampela samting moa yumi mas mekim. Lain Israel em wanpela lain i dediket long Jehova, tasol long taim bilong Sefanaia ol manmeri bilong Juda i no bihainim dediket bilong ol, nogat. Olsem na bihain Jehova i rausim dispela lain. Bilong “kam” long Jehova long nau, yumi mas wok long holim strong pasin bilong laikim em tru na pas gut wantaim em, na yumi mas bung wantaim oganaisesen bilong em long graun. Yumi mas kisim save long tingting bilong God long ol samting, na yumi mas pilim tru ol tingting i stap long bel bilong em. Yumi save kam long Jehova taim yumi stadi gut long Tok bilong em, na tingim tingim long bel, na bihainim ol dispela tok. Na taim yumi beten askim Jehova long stiaim yumi, na bihainim rot spirit holi bilong em i makim, yumi wok long pas gut moa wantaim Jehova, na bel bilong yumi i kirapim yumi long mekim wok bilong em ‘long bel na tingting na strong bilong yumi’ olgeta.—Lo 6:5; Galesia 5:22-25; Filipai 4:6, 7; KTH 4:11.
6. Yumi mas mekim wanem bilong “mekim pasin i stret”? Olsem wanem yumi inap mekim olsem, maski yumi stap namel long ol lain bilong dispela graun?
6 Namba 2 samting yumi mas mekim na i stap long Sefanaia 2:3, em yumi mas “mekim pasin i stret.” Klostu yumi olgeta i bin senisim sampela pasin bilong yumi long sampela bikpela samting bambai yumi inap winim mak bilong kisim baptais. Tasol long olgeta taim yumi mas wok yet long holimpas ol lo bilong Jehova i tok long ol stretpela pasin yumi mas bihainim. Sampela manmeri, taim ol i baptais nupela ol i bihainim ol dispela lo, tasol bihain ol i larim ol pasin bilong dispela graun i mekim ol i kamap doti. Tru, i hatwok long mekim pasin i stret, long wanem, yumi stap namel long ol manmeri i ting pasin pamuk, giaman, na ol kain rong olsem, ol i orait tasol. Tasol sapos yumi gat strongpela laik long mekim pasin Jehova i laikim, dispela inap daunim pasin bilong mekim ol samting bambai ol lain bilong dispela graun i ken orait long yumi. God i no orait moa long lain Juda, long wanem, ol i bihainim pasin bilong ol haiden i stap klostu long ol. Olsem na yumi no ken bihainim pasin bilong dispela graun—yumi mas ‘bihainim pasin bilong God’ na oltaim yumi mas wok long kamap “nupela manmeri, em ol manmeri God i mekim ol i kamap nupela . . . , long wanem, pasin bilong ol i stretpela olgeta na i holi tru.”—Efesus 4:24; 5:1.
7. Yumi mas mekim wanem bilong ‘daunim yumi yet’?
7 Namba 3 samting em Sefanaia 2:3 i kamapim, i olsem: Sapos yumi laik bai Jehova i haitim yumi long de em bai kamapim belhat bilong em, orait yumi mas ‘daunim yumi yet.’ Long olgeta de yumi save stap namel long ol man, meri, na ol yangpela em ol i no gat pasin daun liklik. Long tingting bilong ol, pasin isi em i wanpela pasin kranki. Ol i ting pasin bilong daun long narapela em i no stret liklik. Ol i strong long ol man i bihainim tok bilong ol, na ol i tingim ol yet tasol, na ol i ting ol tok na tingting bilong ol tasol i stret. Samting ol i ting i stret ol i ken mekim, na ol samting ol yet i laik mekim, ol i strong long mekim ol dispela samting, maski dispela i givim hevi long ol narapela. Nogut sampela tingting na pasin olsem i kalap long yumi! Nau em i taim bilong ‘daunim yumi yet.’ Bai yumi mekim olsem wanem? Yumi mas daun long God na kisim ol tok bilong em bilong stretim yumi, na mekim pasin bilong yumi i kamap stret wantaim laik bilong em.
“Sapos Yupela i Mekim Olsem”
8. Long Sefanaia 2:3, dispela tok “sapos yupela i mekim olsem,” em i makim wanem samting?
8 Sefanaia 2:3 i tok: “Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.” Tasol Sefanaia i bin mekim dispela tok long “ol manmeri i no save bikhet na sakim tok bilong Bikpela,” olsem na bilong wanem em i tok, “sapos yupela i mekim olsem”? Tru, ol dispela man i gat pasin daun ol i bin kirap mekim ol samting God i laikim, tasol nogut ol i ting ol i strong pinis na ol i no inap surik. Ol i no kamap yet long pinis bilong laip bilong ol na stap gut long Jehova i go inap long dispela mak. Olsem na sampela ol inap pundaun na mekim sin. Na i wankain tu long yumi. Jisas i tok: “Ol manmeri i stap strong inap long las de, God bai i kisim bek ol.” (Matyu 24:13) Tru tumas, bilong abrusim bagarap long de bilong belhat bilong Jehova na em i ken kisim bek yumi, yumi mas wok yet long mekim pasin i stret long ai bilong em. Yu gat strongpela tingting long mekim olsem?
9. Yangpela King Josaia i kirap mekim wanem ol pasin i stret?
9 Ating yangpela King Josaia i pilim tru dispela tok bilong Sefanaia, na dispela i kirapim em long “lotu [olsem kam]” long Jehova. Baibel i tok: “Long namba 8 yia bilong Josaia i stap king, long taim em i gat 15 krismas tasol, em i stat long lotu long God bilong tumbuna bilong en, King Devit.” (2 Stori 34:3) Na yumi save tu, Josaia i wok long “mekim pasin i stret,” long wanem, Baibel i tok: “Long namba 12 yia bilong en i stap king [taim Josaia i gat olsem 20 krismas], em i tokim ol wokman long raun long olgeta hap bilong Juda na Jerusalem na bagarapim ol ples bilong lotu long ol giaman god na ol piksa bilong god meri Asera na bilong ol arapela giaman god ol i bin wokim long diwai na ain samting. Em i go raun wantaim ol wokman na i lukim ol i brukim ol alta bilong ol giaman god Bal.” (2 Stori 34:3, 4) Na Josaia i wok long ‘daunim em yet’—long pasin daun em i mekim ol samting bambai Jehova ken amamas long em, olsem em i rausim olgeta pasin bilong lotuim piksa bilong ol god giaman na ol narapela pasin bilong lotu giaman. Ating ol narapela man i gat pasin daun ol i amamas tru long lukim ol dispela samting i kamap!
10. Wanem samting i bin kamap long Juda long yia 607 B.C.E.? Tasol husat ol i abrusim bagarap?
10 Taim Josaia i stap king, planti Juda i tanim bel na kam bek long Jehova. Tasol taim king i dai pinis, planti ol i kirap bihainim gen ol pasin bipo ol i bin mekim—ol i mekim ol pasin God i no orait liklik long en. Olsem Jehova i tok pinis, long yia 607 B.C.E. ol Babilon i kam insait long Juda na bagarapim nambawan biktaun bilong en, Jerusalem. Tasol i no olgeta manmeri i lus, nogat. Profet Jeremaia, na Ebetmelek, em man bilong Itiopia, na ol lain bilong Jonadap, na sampela moa em ol i bin stap gut long God, ol i no bagarap long dispela de Jehova bai kamapim belhat bilong em.—Jeremaia 35:18, 19; 39:11, 12, 15-18.
Ol Birua Bilong God—Putim Gut Yau!
11. Bilong wanem i hatwok long i stap gut long God long nau? Tasol ol birua bilong lain bilong Jehova ol i mas tingim wanem samting?
11 Yumi wetim de Jehova bai kamapim belhat bilong em long ol pasin nogut bilong dispela graun, na insait long dispela taim “ol kain kain traim i kamap” long yumi. (Jems 1:2) Long sampela kantri ol i save tok pasin bilong i stap fri long mekim lotu i bikpela samting long ol, tasol ol pris pasto i gat strong long stiaim tingting bilong ol gavman bilong ol dispela kantri na ol i kirapim ol long mekim nogut tru long lain bilong God. Ol man nogut i sutim tok giaman long ol Witnes Bilong Jehova na tok ol i wanpela liklik lotu nogut inap bagarapim ol man. God i save pinis long pasin ol i mekim, na ol i no inap abrusim strafe. Ol birua bilong em ol i mas tingim samting i bin painim ol birua bilong lain bilong em long bipo, olsem ol Filistia. Tok profet i tok: “Taim Bikpela i bagarapim kantri Filistia, bai i no gat wanpela man i stap long taun Gasa. Na taun Askelon tu bai i no gat man. Ol birua bai i rausim ol pipel bilong taun Asdot insait long wanpela de tasol, na bai ol i rausim ol pipel bilong taun Ekron tu.” Ol taun bilong ol Filistia, olsem Gasa, Askelon, Asdot, Ekron, ol bai i bagarap olgeta.—Sefanaia 2:4-7.
12. Wanem samting i bin painim Filistia, Moap, na Amon?
12 Tok profet i tok moa olsem: “Mi harim pinis ol pipel bilong kantri Moap na kantri Amon i tok bilas na tok nogut long ol manmeri bilong mi. Na ol i bikmaus na tok bai ol i kisim graun bilong ol.” (Sefanaia 2:8) Tru, Isip na Itiopia i bin kisim nogut long han bilong ol Babilon. Tasol Jehova i mekim wanem kot long ol Moap na Amon, em ol lain tumbuna pikinini bilong Lot, em pikinini bilong brata bilong Abraham? Jehova i tok profet olsem: “Ol Moap na ol Amon bai i bagarap olsem taun Sodom na Gomora i bin bagarap.” Ol tumbuna meri bilong ol, em tupela pikinini meri bilong Lot, ol i bin abrusim bagarap taim Jehova i bagarapim Sodom na Gomora, tasol ol hambaklain Moap na Amon i no inap abrusim bagarap taim kot bilong God i painim ol. (Sefanaia 2:9-12; Stat 19:16, 23-26, 36-38) Long nau Filistia wantaim ol bikpela taun bilong en i stap we? Na olsem wanem long ol dispela hambaklain, em ol Moap na Amon? Maski yu wok long painim painim ol, yu no inap.
13. Wanpela saveman bilong painim ol samting bilong bipo em i painim pinis wanem samting long Ninive?
13 Long taim bilong Sefanaia, Gavman Asiria i gat bikpela strong long bosim ol kantri. Wanpela saveman bilong painim ol samting bilong bipo, em Austen Layard, em i stori long wanpela hap bilong haus king em i bin painim long nambawan biktaun bilong Asiria, em Ninive, na em i tok: ‘Rup insait long haus, ol i katim ol mak long en olsem ol blok blok, na ol i penim ol plaua na ol animal long en. Sampela hap bilong rup ol i karamapim long samting ol i wokim long tit bilong elefan, na long arere bilong olgeta wan wan blok ol i wokim ol kain kain gutpela mak. Ol sparen na ol banis bilong ol rum, ating ol i bin karamapim long gol na silva, na ol plang samting ol i wokim long ol gutpela gutpela diwai i hatwok long painim, na ol i wokim planti long diwai sida.’ Tasol olsem Sefanaia i tok profet long en, Asiria i mas bagarap na Ninive i mas kamap ‘ples drai nating i no gat man i stap long en.’—Sefanaia 2:13.
14. Truim bilong tok profet bilong Sefanaia i kamap olsem wanem long Ninive?
14 Inap 15 yia tasol bihain long taim Sefanaia i bin mekim dispela tok profet, ol birua i bagarapim strongpela taun Ninive, na haus king i bagarap olgeta na i kamap olsem pipia. Yes, ol i daunim dispela hambak taun olgeta. Tok profet bilong Sefanaia i stori gut long dispela bikpela bagarap i mas painim Nineve na i tok: “Olgeta haus bai i bagarap i stap . . . na ol pisin bilong nait bai i stap long ol dispela haus, na bai ol i sindaun long ol windo na singaut. . . . Bai ples i bagarap i stap olsem.” (Sefanaia 2:14, 15) Ol gutpela gutpela haus bilong Ninive bai kamap olsem ples bilong ol pisin i slip long en. Long ol rot bilong taun bai i no gat singaut bilong ol man bilong wokim bisnis, o singaut bilong ol strongpela man bilong pait, o singsing bilong ol pris. Long ol dispela rot bipo i gat planti man i go i kam long en, nau i gat krai bilong ol pisin tasol em ol i sindaun long ol windo o krai bilong win. Yumi laik bai olgeta birua bilong God i mas pinis olsem!
15. Samting i bin painim Filistia, Moap, Amon, na Asiria, dispela inap skulim yumi long wanem samting?
15 Samting i bin painim Filistia, Moap, Amon na Asiria, dispela inap skulim yumi long wanem samting? Olsem: Yumi ol wokman bilong Jehova yumi no ken pret long ol birua bilong yumi. Taim ol man i mekim pasin birua long lain bilong em, God i save lukim. Bipo Jehova i bin kirap na mekim save long ol birua bilong em, na long nau tu, kot bilong em bai painim olgeta lain bilong graun. Tasol sampela bai abrusim bagarap—em ‘planti manmeri tru bilong olgeta lain.’ (KTH 7:9) Yu inap i stap namel long dispela lain sapos yu wok yet long kam long Jehova, na mekim pasin i stret, na mekim pasin daun.
Ol Man Bilong Mekim Rong i Mas Lukaut!
16. Tok profet bilong Sefanaia i tok wanem long ol bikman bilong Juda na ol hetman bilong lotu? Olsem wanem ol dispela tok i sutim stret Kristendom?
16 Tok profet bilong Sefanaia i toktok gen long Juda na Jerusalem. Sefanaia 3:1, 2 i tok: “Jerusalem, yu bai bagarap. Pasin bilong ol manmeri bilong yu i sting tru long ai bilong Bikpela. Ol i save sakim tok bilong en, na ol i wok long mekim nogut long ol lain bilong ol yet. Ol i no bin harim tok bilong Bikpela, na ol i no laikim Bikpela i stretim ol. Na ol i no bilip strong long Bikpela na ol i no askim Bikpela long helpim ol.” Sori tru, ol tok Jehova i givim long lain bilong em bilong stretim ol, ol i no laik harim! Ol hetman, ol bikman, na ol man i stap olsem jas, ol i mekim nogut tru long ol manmeri. Sefanaia i tokaut long rong bilong ol hetman bilong lotu, em ol i no sem liklik long pasin nogut ol i mekim. Em i tok: “Ol profet i no mekim gut wok bilong ol, na ol i giamanim ol man bilong bagarapim ol tasol. Na ol pris i mekim nogut long ol samting i tambu, na ol i paulim lo bilong God bilong helpim ol yet.” (Sefanaia 3:3, 4) Dispela tok i makim stret pasin bilong ol profet na pris bilong Kristendom long nau! Ol i mekim pasin bikhet tru na ol i rausim nem bilong God long ol Baibel ol i bin tanim, na ol i skulim ol man long ol bilip i bagarapim nem bilong dispela Man ol i tok ol i lotu long en.
17. Maski ol man i harim o nogat, bilong wanem yumi mas wok yet long autim gutnius?
17 Jehova i mekim gutpela pasin na em i givim tok lukaut long lain bilong em bilong bipo long ol samting em bai mekim. Em i salim ol wokman bilong em, em ol profet—olsem Sefanaia na Jeremaia na sampela moa—bilong kirapim ol manmeri long tanim bel. Tru tumas, “ol pasin i no stret, [Jehova] i no save mekim. Nogat tru. Long olgeta de, em i save mekim stretpela kot long ol manmeri bilong en. Em i no save lusim dispela wok.” Orait ol i mekim wanem? Sefanaia i tok: “Tasol ol man nogut i stap long dispela taun ol i wok long mekim pasin i no stret tasol, na ol i no sem liklik.” (Sefanaia 3:5) Long taim bilong yumi tu i gat wankain tok lukaut i go long ol man. Sapos yu wanpela man o meri bilong autim gutnius, orait yu insait long dispela wok bilong givim tok lukaut long ol man. Olsem na yu mas wok yet long autim gutnius na no ken slek liklik long mekim! Maski ol man i harim o nogat, long tingting bilong Jehova yu mekim gut wok bilong yu sapos yu stap gut long en na yu mekim yet. Yu no ken sem taim yu wok strong long mekim wok bilong God.
18. Truim bilong Sefanaia 3:6 bai kamap olsem wanem?
18 Jehova i no ken givim strafe bilong kot long ol lain bilong Kristendom tasol, nogat. Jehova i givim tok bilong kot long olgeta lain bilong graun. Em i tok: “Mi bin pinisim tru sampela kantri, na bagarapim ol biktaun bilong ol, na ol strongpela banis na ol haus bilong wasman i stap antap long banis ol i bagarap i stap. Na ol man i no moa wokabaut long ol rot insait long ol taun, long wanem, i no gat wanpela man i stap.” (Sefanaia 3:6) Ol man inap bilip tru long ol dispela tok, olsem na Jehova i mekim kain tok i olsem em i bagarapim pinis ol dispela taun. Orait wanem samting i bin painim ol taun bilong Filistia, Moap, na Amon? Na olsem wanem long Ninive, em nambawan biktaun bilong Asiria? Bagarap i painim ol, na dispela i mas i stap olsem piksa bilong ol lain bilong nau i mas tingim. Ol man i tok bilas long God, em i no inap larim ol.
Wok Yet Long Kam Long Jehova
19. Yumi ken mekim wanem ol bikpela askim?
19 Long taim bilong Sefanaia, God i kamapim belhat bilong em long ol man em ol i ‘mekim ol pasin nogut i winim ol pasin nogut ol i bin mekim bipo.’ (Sefanaia 3:7) Na wankain samting bai kamap long taim bilong yumi. Olsem wanem? Yu lukim ol mak i kamapim olsem de bilong Jehova i klostu pinis? Yu wok yet long kaunim Tok Bilong God long olgeta de na bai yu ken wok yet long i kam long em? Yu wok long “mekim pasin i stret” long i stap bilong yu olsem ol lo bilong God i makim? Yu wok long ‘daunim yu yet,’ olsem daun long God na ol samting em i bin putim bilong helpim ol man long kisim laip i stap oltaim?
20. Bai yumi skelim wanem ol askim long laspela stori bilong tok profet bilong Sefanaia?
20 Sapos yumi wok yet long kam long Jehova, na mekim pasin i stret na pasin daun na yumi no lusim, bai yumi kisim planti blesing tru long nau, maski yumi stap long “taim bilong las de” i gat planti samting i save traim bilip bilong yumi. (2 Timoti 3:1-5; Sindaun 10:22) Tasol olsem wanem Jehova i save mekim gut long yumi ol wokman bilong em long nau? Na tok profet bilong Sefanaia i makim wanem ol gutpela samting bai painim ol manmeri em Jehova bai haitim ol long dispela de bilong kamapim belhat bilong em, em i kam klostu pinis?
Bai Yu Bekim Olsem Wanem?
• Ol man i save mekim wanem bilong “kam” long Jehova?
• Bilong “mekim pasin i stret” yumi mas mekim wanem?
• Yumi ken mekim wanem bilong ‘daunim yumi yet’?
• Bilong wanem yumi mas wok long kam long Jehova, na mekim pasin i stret, na daunim yumi yet?
[Piksa long pes 18]
Yu save kam long Jehova long rot bilong stadi long Baibel na beten strong?
[Piksa long pes 21]
Wanpela bikpela lain manmeri bai abrusim bagarap long de Jehova bai kamapim belhat bilong em, long wanem, ol i wok yet long kam long em