Jehova i Save Givim Planti Gutpela Samting Long Yumi
“Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.”—SINDAUN 10:22.
1, 2. Bilong wanem mani kago i no rot bilong i stap amamas?
PASIN bilong painim planti mani kago i bosim laip bilong planti milion manmeri long nau. Tasol olsem wanem? Mani kago i mekim na ol i stap amamas? Wanpela nius (The Australian Women’s Weekly) i kamapim dispela tok: “Mi no inap tingim wanpela hap taim olsem nau em planti manmeri i no amamas long i stap bilong ol.” Nius i tok moa: “Dispela i narakain tru. Ol i tokim yumi olsem Australia i no gat hevi bilong mani, na sindaun bilong ol man i gutpela tru, winim olgeta taim bipo. . . . Tasol ol man long olgeta hap bilong kantri ol i ting ol i no gat ol gutpela samting. Ol man na meri wantaim i pilim olsem ol i sot long sampela samting, tasol ol i no save em wanem samting.” Tok bilong Baibel i stret tru taim em i tok, mani kago i no inap givim amamas o laip long yumi!—Saveman 5:10; Luk 12:15.
2 Baibel i tok blesing bilong God i mekim na man i stap amamas tru. Sindaun 10:22 i tok long dispela samting, olsem: “Sapos Bikpela yet i givim yumi planti gutpela samting, em i no save larim ol dispela samting i givim hevi long yumi.” Planti man i save kisim ol hevi taim ol i wok strong long kisim mani kago. Olsem na aposel Pol i tok: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta. Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.”—1 Timoti 6:9, 10.
3. Bilong wanem ol wokboi bilong God i save karim ol hevi?
3 Tasol ol man i wok long “bihainim tok bilong God,” ol bai kisim ol blesing i no givim hevi long ol. (Lo 28:2) Tasol sampela inap tok: ‘Sapos blesing bilong Jehova i no givim hevi long man, bilong wanem planti wokboi bilong God i karim ol hevi?’ Baibel i tok God i larim ol hevi i painim yumi, tasol Satan, na pasin nogut bilong graun bilong en, na sin bilong yumi yet, i as bilong ol dispela hevi. (Stat 6:5; Lo 32:4, 5; Jon 15:19; Jems 1:14, 15) Jehova i as bilong “olgeta gutpela samting yumi save kisim na olgeta presen i gutpela tru.” (Jems 1:17) Olsem na ol blesing bilong em i no save givim hevi long man. Nau yumi ken skelim sampela gutpela presen God i save givim yumi.
Tok Bilong God—Nambawan Gutpela Presen
4. Lain bilong Jehova i bin kisim wanem blesing na gutpela presen long dispela “taim bilong las de”?
4 Tok profet bilong Daniel i stori long “taim bilong las de,” em i tok: “Stretpela save bai kamap planti.” Tasol em i tok tu olsem: “I no gat wanpela man nogut bai save long as bilong dispela tok; tasol ol man i gat gutpela tingting na save ol bai save long as bilong en.” (Daniel 12:4, 10, NW ) Tingim dispela! Gutpela tingting na save i as bilong Tok Bilong God na ol tok profet, olsem na ol man nogut i no inap kisim gut mining bilong en, tasol lain bilong Jehova inap mekim olsem. Pikinini bilong God i beten olsem: “Papa, yu Bikpela bilong heven na graun, mi tenkyu long yu, long wanem, yu bin haitim ol dispela samting long ol man i gat gutpela save na tingting, na yu bin soim long ol man i stap olsem ol liklik pikinini tasol.” (Luk 10:21) Em i wanpela gutpela samting tru long yumi gat Tok bilong God, em Baibel, na yumi stap long dispela lain em Jehova i givim save long en long planti samting bilong spirit!—1 Korin 1:21, 27, 28; 2:14, 15.
5. Gutpela tingting na save em i wanem samting? Olsem wanem yumi inap kisim gutpela tingting na save?
5 Sapos yumi no kisim “gutpela tingting na save i kam long God,” bai yumi no inap save liklik long ol samting bilong spirit. (Jems 3:17) Gutpela tingting na save i helpim yumi long mekim gutpela wok long save bilong yumi, na bai yumi inap stretim ol hevi, abrusim ol samting inap bagarapim yumi, winim ol mak, o givim gutpela tok long narapela. Olsem wanem yumi inap kisim gutpela tingting na save bilong God? Sindaun 2:6 i tok: “Bikpela yet em i as bilong gutpela tingting. Na em i save givim gutpela tingting na save long yumi.” Em nau, Jehova bai givim gutpela tingting na save long yumi sapos yumi wok long beten askim em long givim, olsem em i bin givim “gutpela tingting na save” long King Solomon. (1 King 3:11, 12; Jems 1:5-8) Bilong kisim gutpela tingting na save, yumi mas wok long harim tok bilong Jehova long rot bilong stadi oltaim na bihainim Tok bilong em.
6. Bilong wanem em i savepasin long bihainim ol lo bilong God long laip bilong yumi?
6 Gutpela save na tingting bilong God i stap long ol lo na ol tok bilong Baibel bilong stiaim tingting. Ol i save helpim yumi long olgeta samting—long skin, tingting, bel, na long ol samting bilong spirit. Man bilong raitim Song i tok: “Lo bilong Bikpela em i stret olgeta, na i save givim nupela laip long yumi. Tok bilong Bikpela em i samting yumi inap bilip tru long en. Em i save givim gutpela tingting long ol man i no gat planti save. Bikpela i save skulim yumi long gutpela tok tumas. Dispela tok i save mekim bel bilong yumi i amamas. Lo bilong God i nambawan tru, na i givim gutpela save long yumi. Man i lotu long Bikpela em i mekim gutpela pasin. Na dispela pasin i save stap oltaim oltaim. Bikpela i save tokim yumi long olgeta pasin yumi mas mekim, na dispela tok i tru na i stret olgeta. Tok bilong Bikpela i winim gol. Em i winim gol i gutpela tru, olsem na yumi mas laikim dispela tok moa moa yet.”—Song 19:7-10; 119:72.
7. Wanem samting i painim ol man i givim baksait long ol stretpela lo bilong God?
7 Tasol ol man i no bihainim ol stretpela lo bilong God, ol i no kisim dispela amamas na pasin bilong i stap fri ol i wok long painim. Bihain ol i kisim save olsem, ol i no inap sakim tok bilong God na hevi i no painim ol, long wanem, samting man i planim, dispela samting tasol em bai kamautim. (Galesia 6:7) Planti milion manmeri em ol i save givim baksait long ol lo bilong Baibel, ol i kisim ol bikpela hevi, olsem ol meri i kisim bel nating, ol sik nogut, o ol i kalabus long ol drak samting i save bagarapim skin. Sapos ol i no tanim bel na senisim pasin bilong ol, orait rot ol i wokabaut long en bai bringim ol i go long i dai o bagarap long han bilong God.—Matyu 7:13, 14.
8. Bilong wanem ol man i laikim tru Tok Bilong God ol i stap amamas?
8 Tasol ol manmeri i laikim tru Tok Bilong God na i bihainim tok bilong en, ol bai kisim planti gutpela samting long nau na long bihain. I gat as tru na ol i pilim olsem lo bilong God i mekim na ol i stap fri, na ol i stap amamas tru, na ol i wet long taim ol bai lusim kalabus bilong sin na ol samting nogut sin i save kamapim. (Rom 8:20, 21; Jems 1:25) Dispela samting bai kamap tru, long wanem, as bilong en em i nambawan gutpela presen God i givim long ol man—em ofa bilong Pikinini bilong em, Jisas Krais, bilong baim bek yumi. (Matyu 20:28; Jon 3:16; Rom 6:23) Kain gutpela presen olsem i kamapim klia pasin bilong God long laikim tru ol man, na i soim olsem ol man i wok long bihainim tok bilong Jehova ol bai kisim ol blesing bilong oltaim.—Rom 8:32.
Amamas Long Spirit Holi i Olsem Presen
9, 10. Olsem wanem spirit holi bilong Jehova inap helpim yumi? Stori long dispela.
9 Narapela gutpela presen God i save givim na yumi mas amamas long en, em spirit holi bilong em. Long de Pentikos bilong yia 33 C.E., aposel Pita i tokim lain man i stap long Jerusalem olsem: “Yupela olgeta wan wan i mas tanim bel na kisim baptais long nem bilong Jisas Krais, na God bai i lusim ol sin bilong yupela. Yupela i mekim olsem, na bai God i givim Holi Spirit long yupela.” (Aposel 2:38) Long nau, Jehova i save givim spirit holi long ol wokboi bilong em i dediket pinis, em ol i beten askim God long givim spirit holi na ol i gat laik long mekim laik bilong em. (Luk 11:9-13) Long bipo, dispela nambawan bikpela strong—spirit holi bilong God, olsem strong bilong em—em i givim strong long ol man na meri bilong bilip na ol Kristen bilong bipo. (Sekaraia 4:6; Aposel 4:31) Dispela spirit inap mekim wankain samting long yumi tu, maski ol bikpela hevi i painim yumi ol manmeri bilong Jehova.—Joel 2:28, 29.
10 Tingim stori bilong Laurel, em i gat sik polio na em i bin stap insait long wanpela masin bilong waitlewa inap 37 yia.a Maski em i karim bikpela hevi tru, em i givim bel long lotuim God i go inap long em i dai. Insait long ol dispela yia, Jehova i givim planti blesing long Laurel. Olsem: Em i helpim 17 man long kisim stretpela save long tok i tru bilong Baibel, maski em i mas i stap insait long dispela masin inap 24 aua long olgeta de! Samting i bin painim em i kirapim yumi long tingim tok bilong aposel Pol, em i tok: “Taim mi no gat strong, long dispela taim tasol mi gat strong tru.” (2 Korin 12:10) Em nau, taim wok autim tok bilong yumi i karim gutpela kaikai, strong na save bilong yumi yet i no as bilong dispela samting, nogat; spirit holi bilong God i helpim yumi, em i save givim dispela spirit long ol man i wok long bihainim tok bilong em.—Aisaia 40:29-31.
11. Spirit bilong God i save kirapim ol man i kamap “nupela” long bihainim wanem ol pasin?
11 Sapos yumi bihainim tok bilong God, spirit bilong em bai kamapim ol gutpela pasin, olsem pasin bilong laikim tru ol arapela, amamas, stap bel isi, no ken belhat kwik, helpim ol man, mekim gutpela pasin long ol, wokabaut stret oltaim, stap isi, na daunim laik bilong olpela bel. (Galesia 5:22, 23) Dispela ‘ol pasin holi spirit i save kamapim,’ em ol “nupela” pasin ol Kristen i kirap bihainim taim ol i lusim ol pasin nogut olsem bilong ol animal em bipo ol i bin bihainim. (Efesus 4:20-24; Aisaia 11:6-9) Pasin bilong laikim tru ol arapela em i bikpela samting tru—em i “nambawan pasin bilong mekim ol man i stap wanbel.”—Kolosi 3:14, NW.
Sori Kristen—Wanpela Presen Yumi Mas Laikim Tru
12. Tabita na ol narapela Kristen long taim bilong ol aposel i mekim wanem bilong kamapim pasin bilong laikim tru ol narapela?
12 Pasin sori Kristen em i narapela gutpela presen i kam long Jehova—em wanpela samting yumi mas laikim tru. Ol tok bilong Baibel i stiaim dispela pasin sori, na i kirapim ol bilipman long laikim tru narapela narapela na pas gut wantaim, winim pasin bilong ol wanblut long pas gut wantaim. (Jon 15:12, 13; 1 Pita 1:22) Tingim Tabita, em wanpela gutpela meri Kristen i bin stap long taim bilong ol aposel. “Oltaim em i save mekim ol gutpela pasin na em i save helpim ol manmeri i sot long ol samting,” na em i helpim moa yet ol meri bilong kongrigesen em man bilong ol i dai pinis. (Aposel 9:36) Ating ol dispela meri i gat ol wanblut, tasol Tabita i laik mekim ol samting em inap mekim bilong helpim na strongim bel bilong ol. (1 Jon 3:18) Tabita i stap olsem gutpela piksa tru! Pasin bilong laikim tru ol brata i kirapim Prisila na Akwila long “redi long i dai” bilong helpim Pol. Pasin bilong laikim ol narapela i kirapim tu Epafras, Luk, Onesiforus, na sampela narapela long helpim dispela aposel taim em i stap long kalabus long Rom. (Rom 16:3, 4; 2 Timoti 1:16; 4:11; Filemon 23, 24) Em nau, ol kain Kristen olsem long nau ol i save “laikim tru” narapela narapela, em wanpela gutpela presen i kam long God na i makim olsem ol i disaipel tru bilong Jisas.—Jon 13:34, 35.
13. Olsem wanem yumi ken soim olsem yumi amamas tru long lain brata Kristen bilong yumi?
13 Olsem wanem? Yu save laikim tru pasin sori i stap insait long kongrigesen Kristen? Yu amamas long lain brata bilong spirit i stap long olgeta hap? Ol dispela samting tu em ol gutpela presen i kam long God na i mekim yumi stap gut. Olsem wanem yumi ken soim olsem yumi amamas tru long ol dispela samting? Long rot bilong mekim wok bilong God, na insait long ol miting Kristen, na bihainim pasin sori na ol narapela pasin em spirit bilong God i kamapim.—Filipai 1:9; Hibru 10:24, 25.
‘Ol Man i Olsem Presen’
14. Bilong man inap kamap elda o kongrigesen sevent, em i mas inapim wanem ol mak?
14 Ol man Kristen i gat laik long helpim ol wanbilip bilong ol na stap olsem ol elda o kongrigesen sevent, ol i laik mekim gutpela wok. (1 Timoti 3:1, 8) Bilong inapim mak bilong mekim ol dispela wok, brata i mas strong long ol samting bilong spirit, save gut long Baibel, na givim bel long wok autim tok. (Aposel 18:24; 1 Timoti 4:15; 2 Timoti 4:5) Em i mas i gat pasin daun na pasin bilong isi na no ken les kwik, long wanem, God i no givim ol blesing long ol man i hambak, i gat pasin antap, na i laik kisim namba. (Sindaun 11:2; Hibru 6:15; 3 Jon 9, 10) Sapos em i marit, em i mas i stap olsem gutpela het bilong famili, em inap lukautim gut famili olgeta. (1 Timoti 3:4, 5, 12) Em i ting ol samting bilong spirit i bikpela samting, olsem na Jehova i blesim em.—Matyu 6:19-21.
15, 16. Husat ol man i stap olsem “presen”? Stori long dispela.
15 Taim ol elda bilong kongrigesen i givim bel long mekim wok autim tok, wok wasman, na wok tisa, i gat as tru na yumi mas amamas long ol dispela man i olsem “presen.” (Efesus 4:8, 11) Ol brata sista i kisim helpim long gutpela wok ol elda i save mekim, ating ol i no save tok tenkyu long ol elda long olgeta taim, tasol Jehova i lukim olgeta samting ol gutpela elda i save mekim. Em bai no lusim tingting long gutpela wok ol i mekim bilong litimapim nem bilong em na helpim lain bilong em.—1 Timoti 5:17; Hibru 6:10.
16 Tingim stori bilong wanpela elda i save wok strong, em i go lukim wanpela yangpela meri Kristen em ol dokta i laik mekim operesen long kru bilong em. Wanpela pren bilong famili i tok: “Pasin bilong dispela elda i gutpela tru, em i strongim na tingim tru mipela. Em i askim mipela sapos em i ken beten long Jehova wantaim mipela. Taim em i beten, papa [em i no wanpela Witnes] i krai, na olgeta man i stap long dispela rum long haus sik ol tu i krai. Elda i mekim gutpela beten tru, na Jehova i mekim gutpela pasin sori long mipela na salim dispela elda i kam long kain taim olsem!” Narapela Witnes i stap long haus sik i stori long ol elda i kam lukim em. Em i tok: “Taim ol i wokabaut i kam long bet bilong mi long wod bilong ol man i gat bikpela sik, mi save olsem maski wanem samting bai kamap, mi inap karim hevi bilong en. Mi kisim strong na bel isi.” Olsem wanem? Wanpela man inap baim dispela kain gutpela pasin sori? Nogat tru! Em i presen i kam long God, em yumi inap kisim long rot bilong kongrigesen Kristen.—Aisaia 32:1, 2.
Wok Autim Tok i Wanpela Presen
17, 18. (a) Olgeta wokboi bilong Jehova inap mekim wanem wok i olsem presen? (b) God i givim wanem helpim long yumi bambai yumi inap mekim wok autim tok?
17 Man inap mekim wok bilong Jehova, em God Antap Tru, em i no inap kisim narapela gutpela wok i winim dispela. (Aisaia 43:10; 2 Korin 4:7; 1 Pita 2:9) Tasol olgeta man—ol yangpela na lapun, man na meri—em ol i gat laik long mekim wok bilong God, ol inap mekim wok autim tok. Yu save insait long dispela wok i olsem gutpela presen? Ating sampela i no mekim, long wanem, ol i ting ol i no inap mekim gut. Tasol tingim dispela: Jehova i save givim spirit holi long ol man i mekim wok bilong em, na spirit holi i helpim yumi long ol samting yumi sot long en.—Jeremaia 1:6-8; 20:11.
18 Jehova i bin givim wok bilong autim tok long Kingdom long ol wokboi bilong em i gat pasin daun, em i no givim dispela wok long ol man i gat pasin antap na i ting ol inap mekim ol samting long strong bilong ol yet. (1 Korin 1:20, 26-29) Ol man i gat pasin daun ol i save long ol samting ol i sot long en, na ol i askim God long helpim ol taim ol i mekim wok autim tok. Ol i amamas tu long ‘wokboi i gat gutpela tingting’ i save helpim ol long ol samting bilong spirit.—Luk 12:42-44; Sindaun 22:4.
Famili i Stap Amamas—Wanpela Gutpela Presen
19. Wanem ol samting i mekim na wok bilong mekim bikpela long ol pikinini bai karim gutpela kaikai?
19 Marit na famili i stap amamas em ol presen i kam long God. (Rut 1:9; Efesus 3:14, 15) Ol pikinini tu i “gutpela blesing tru yumi kisim long God,” na ol i givim amamas long papamama i mekim gutpela wok bilong lainim ol pikinini long bihainim ol pasin bilong God. (Song 127:3) Sapos yu wanpela papa o mama, wok long bihainim tok bilong Jehova na skulim ol liklik pikinini bilong yu long save long Tok bilong em. Ol man i mekim olsem ol i ken bilip tru olsem Jehova bai helpim na blesim ol.—Sindaun 3:5, 6; 22:6; Efesus 6:1-4.
20. Wanem samting inap helpim ol papamama em pikinini bilong ol i bin lusim lotu i tru?
20 Maski ol papamama i daun long God ol i wok strong long skulim ol pikinini, ating sampela pikinini bai lusim lotu i tru taim ol i kamap bikpela. (Stat 26:34, 35) Dispela inap bagarapim tru bel bilong papamama. (Sindaun 17:21, 25) Tasol ol i no ken les, gutpela sapos ol i tingim tok piksa bilong Jisas long pikinini i bin lusim papa. Maski pikinini i lusim papa na bihainim rot nogut, bihain em i kam bek long papa, na long gutpela pasin sori na amamas papa i kisim em bek. (Luk 15:11-32) Maski wanem samting i kamap, ol papamama Kristen i ken bilip olsem Jehova i pilim tru hevi bilong ol, na em i tingim ol, na helpim ol.—Song 145:14.
21. Yumi mas bihainim tok bilong husat? Bilong wanem yumi mas bihainim tok bilong em?
21 Orait, yumi olgeta wan wan i mas skelim wanem samting i bikpela samting long laip bilong yumi. Olsem wanem? Yumi save givim bel long kisim planti samting bilong skin, em ol dispela samting inap givim bikpela hevi long yumi na famili bilong yumi? O yumi save wok strong long kisim ‘olgeta gutpela samting na olgeta presen i gutpela tru’ i save kam long ‘Papa i bin mekim i kamap olgeta lait bilong skai.’ (Jems 1:17) Satan “em i papa tru bilong pasin bilong tok giaman” em i laik bai yumi wok strong long kisim ol samting bilong skin, na lus long kisim amamas na laip. (Jon 8:44; Luk 12:15) Tasol Jehova i save tingim yumi na i laik bai yumi mas stap gut. (Aisaia 48:17, 18) Olsem na yumi mas wok long bihainim tok bilong gutpela Papa bilong yumi long heven, na oltaim “amamas” long em. (Song 37:4) Sapos yumi mekim olsem, ol gutpela presen na blesing bilong Jehova bai mekim yumi stap gut—na ol i no givim hevi long yumi.
[Futnot]
Yu Inap Tingim?
• Wanem samting i mekim na man i stap amamas tru?
• Wanem sampela presen em Jehova i save givim long lain bilong em?
• Bilong wanem wok autim tok i olsem wanpela presen?
• Ol papamama i ken mekim wanem bilong kisim blesing bilong God taim ol i mekim bikpela long pikinini bilong ol?
[Piksa long pes 16]
Yu soim olsem yu amamas long Baibel em wanpela presen i kam long God?
[Piksa long pes 17]
Maski Laurel Nisbet i karim bikpela hevi tru, em i givim bel long mekim wok bilong God
[Ol Piksa long pes 18]
Olsem Tabita, ol Kristen long nau i gat nem long mekim gut long ol narapela
[Piksa long pes 19]
Ol elda Kristen i save tingim tru ol wanbilip