Lainim Wanpela Samting Long Pasin Bilong Nikodemus
“SAPOS wanpela man i laik bihainim mi, orait em i mas daunim laik bilong em yet, na em i mas karim diwai . . . bilong en long olgeta de, na em i mas bihainim mi.” (Luk 9:23) Ol man bilong painim pis na wanpela man bilong kisim takis ol i kirap kwiktaim long bihainim dispela singaut. Ol i lusim olgeta samting bilong ol na ol i go bihainim Jisas.—Matyu 4:18-22; Luk 5:27, 28.
Long nau tu yumi inap harim dispela singaut bilong Jisas, na planti man i harim na bihainim. Tasol sampela man em ol i amamas long stadi long Baibel wantaim ol Witnes Bilong Jehova, ol i surik liklik long ‘daunim laik bilong ol yet na karim diwai bilong ol.’ Ol i no laik mekim wok na kisim gutpela samting bilong stap olsem disaipel bilong Jisas.
Bilong wanem sampela man i surik long bihainim singaut bilong Jisas na dediket long God Jehova? Tru, ol man i no bin go bikpela insait long bilip bilong lotu Juda na lotu Kristen olsem i gat wanpela God tasol, ating bikpela hap taim i mas lus pastaim na bai ol inap save gut olsem Man bilong wokim olgeta samting em i stap tru na em i gat olgeta strong. Tasol maski ol i bilip pinis olsem God i stap tru, sampela i no laik bihainim lek mak bilong Jisas. Ating ol i pret long ol wanblut na pren bilong ol bai ting olsem wanem long ol sapos ol i kamap Witnes Bilong Jehova. Sampela em ol i no pilim moa olsem taim i sot pinis, ol i wok strong long kisim biknem na planti mani kago. (Matyu 24:36-42; 1 Timoti 6:9, 10) Maski i gat wanem as na ol man i surikim taim bilong kamap disaipel bilong Jisas, i gat samting yumi inap lainim long stori bilong Nikodemus, em i wanpela maniman na hetman bilong ol Juda long taim bilong Jisas.
Rot i Op Long Kisim Ol Gutpela Samting
Inap 6-pela mun tasol bihain long Jisas i kirapim wok bilong em long graun, Nikodemus i luksave olsem ‘God i bin salim Jisas i kam olsem tisa.’ Nikodemus i kirap nogut long ol mirakel Jisas i wokim long Jerusalem long Pasova bilong yia 30 C.E., olsem na long nait em i go long Jisas bilong tokaut olsem em i bilip long em na bilong kisim sampela save moa long dispela tisa. Jisas i tokim Nikodemus long wanpela bikpela tok i tru, olsem man i mas “kamap nupela gen” olsem bon-agen bilong i go insait long Kingdom bilong God. Long dispela taim Jisas i tok tu olsem: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:1-16.
Tru tumas, rot i op long Nikodemus inap kisim gutpela samting tru! Em inap kamap wanwok bilong Jisas, na em inap lukim ol samting Jisas i mekim taim em i stap long graun. Nikodemus i wanpela hetman bilong ol Juda na tisa long Israel, olsem na em i save gut long Tok Bilong God. Em i gat gutpela tingting, olsem na em i luksave olsem God i bin salim Jisas i kam olsem tisa. Nikodemus i save laikim ol samting bilong spirit na em i gat pasin daun tru. I hatwok long wanpela memba bilong nambawan kot bilong ol Juda long tokaut olsem pikinini bilong wanpela kamda nating em i man God i bin salim i kam! Tasol ol dispela pasin i bikpela samting long man i laik kamap disaipel bilong Jisas.
Nikodemus i laik kisim sampela save moa long dispela man bilong Nasaret. Winim tupela yia bihain, long bung bilong Ol Bikpela De Bilong i Stap Long Haus Win, Nikodemus i stap long wanpela miting bilong ol kaunsil. Long dispela taim, Nikodemus i stap yet olsem wanpela “bilong lain bilong ol.” Ol bikpris na ol Farisi i salim ol plisman i go bilong holim Jisas. Ol plisman i kam bek na tok: “Bipo i no gat wanpela man i mekim toktok olsem dispela man i mekim.” Ol Farisi i mekim ol tok bilong daunim ol: “Em i trikim yupela tu, a? Ating long lain bilong mipela ol hetman na ol Farisi, yupela i lukim wanpela man i bilip long em? Nogat tru. Ol lain i bilip long em, em ol dispela lain manmeri ol i no save long lo. God i tok pinis long ol bai i bagarap.” Nikodemus i no inap pasim maus moa. Em i tok: “Ating lo bilong yumi em i tok long yumi ken kotim nating wanpela man? Nogat. Yumi mas harim tok bilong en pastaim, na bai yumi ken save gut long samting em i bin mekim.” Ol narapela Farisi i kirap long sutim tok long em: “Ating yu tu yu man bilong Galili, a? Ritim gut ol tok i stap long buk bilong God, na bai yu tu yu ken save olsem, i no gat wanpela profet bai i kamap long Galili.”—Jon 7:1, 10, 32, 45-52.
Inap 6-pela mun bihain, long de Pasova bilong yia 33 C.E., Nikodemus i lukim ol i rausim bodi bilong Jisas long diwai pos. Em wantaim Josep bilong Arimatea—em tu i wanpela memba bilong ol kaunsil—ol i redim bodi bilong Jisas bilong planim. Bilong redim bodi bilong Jisas, Nikodemus i bringim “sampela sanda i gat gutpela smel,” em hevi bilong en inap olsem 33 kilogram. Planti sanda olsem i gat bikpela pe tru bilong en. Na tu, em i mas strongim bel na redi long karim ol hevi inap kamap sapos ol man i lukim em i stap wantaim “dispela man bilong giaman,” em nem ol Farisi i kolim long Jisas. Dispela tupela man i redim kwik bodi bilong Jisas na putim long wanpela nupela matmat i stap klostu. Tasol long dispela taim tu, Nikodemus i no kamap disaipel bilong Jisas!—Jon 19:38-42; Matyu 27:63; Mak 15:43.
As na Em i No Mekim Sampela Samting
Long stori Jon i raitim, em i no kamapim as na Nikodemus i no laik “karim diwai” bilong em na bihainim Jisas. Tasol sampela tok em i kamapim inap helpim yumi long save long as na dispela Farisi i gat tupela tingting.
Pastaim Jon i stori olsem, dispela hetman bilong ol Juda i go “long Jisas long nait.” (Jon 3:2) Wanpela saveman bilong Baibel i tok: “I no olsem Nikodemus i pret na em i go long Jisas long nait, nogat; tasol em i no laik bai ol manmeri i pasim rot bilong em long toktok wantaim Jisas.” Tasol Jon i tok Nikodemus em i “dispela man pastaim em i bin i kam lukim Jisas long nait,” na long wankain hap bilong Baibel em i tok Josep bilong Arimatea “em i wanpela disaipel bilong Jisas, tasol em i pret long ol Juda na em i haitim bilip bilong en.” (Jon 19:38, 39) Olsem na ating Nikodemus i go long Jisas long nait, long wanem, em i “pret long ol bikman bilong ol Juda,” olsem ol narapela man long taim bilong em i pret long bung wantaim Jisas.—Jon 7:13.
Olsem wanem? Yu surikim taim bilong kamap disaipel bilong Jisas, long wanem, yu pret long ol wanblut, pren, na wanwok samting bai tok wanem long yu? Wanpela savetok i tok: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet.” Olsem wanem yu inap daunim dispela pret? Dispela savetok i tok moa: “Tasol sapos man i bilip strong long Bikpela, bai em i stap gut.” (Sindaun 29:25) Bilong yu inap bilip strong long Jehova, pastaim yu yet i mas pilim na save tru olsem God bai strongim yu long taim yu gat hevi. Beten long Jehova na askim em long strongim bel bilong yu na bai yu inap makim ol samting yu laik mekim, maski em ol liklik samting bilong lotu. Isi isi bilip bilong yu long Jehova bai kamap strong na bai yu inap long mekim ol bikpela samting i stret wantaim laik bilong God.
Nikodemus i wanpela memba bilong ol lain hetman na ating dispela tu i bin pasim em long mekim dispela bikpela samting bilong daunim laik bilong em yet. Ating long dispela taim em i laikim tumas namba em i holim olsem wanpela memba bilong kaunsil. Olsem wanem? Yu surik liklik long kamap disaipel bilong Krais, long wanem, yu pret long lusim bikpela namba bilong yu o dispela bai pasim rot bilong yu long kisim biknem samting? Tasol i no gat wanpela bilong ol dispela samting i gutpela tru olsem pasin bilong mekim wok bilong God Antap Tru, em i amamas long inapim ol laik bilong yu i stret wantaim laik bilong em.—Song 10:17; 83:18; 145:18.
Nikodemus i gat planti mani kago, na ating dispela em i narapela as na em i no laik kamap disaipel bilong Jisas. Em i wanpela Farisi na ating pasin bilong ol narapela Farisi long “laikim mani” i stiaim tingting bilong em. (Luk 16:14) Yumi save olsem em i wanpela maniman, long wanem, em i bin baim wanpela kain sanda i gat bikpela pe bilong en. Long nau, sampela i surikim taim bilong kirap mekim ol wok Kristen, long wanem, ol i tingting planti long mani kago bilong ol. Tasol Jisas i bin tokim ol disaipel bilong em: “Mi tokim yupela, yupela i no ken tingting planti long laip bilong yupela na tok, ‘Bai yumi kaikai wanem samting? Bai yumi dring wanem samting?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ . . . Papa bilong yupela i stap long heven em i save pinis, yupela i mas kisim dispela olgeta kain samting. Tasol namba wan samting yupela i mas mekim i olsem. Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting tu long yupela.”—Matyu 6:25-33.
Em i Lus Long Kisim Planti Samting
Stori bilong Nikodemus i stap tasol long Gutnius Jon i Raitim, na em i no tok Nikodemus i bin kamap disaipel bilong Jisas o nogat. Wanpela stori tumbuna i tok olsem Nikodemus i kamap disaipel bilong Jisas, kisim baptais, ol Juda i mekim nogut long em, ol i pinisim namba bilong em, na bihain ol i rausim em olgeta long Jerusalem. Maski em i bin kamap disaipel bilong Jisas o nogat, yumi save long wanpela samting: Pasin bilong em long holim tupela tingting taim Jisas i stap yet long graun i mekim na em i bin lus long kisim planti gutpela samting.
Sapos Nikodemus i bin kamap disaipel bilong Jisas long namba wan taim stret em i bungim Jisas, em inap kamap gutpela disaipel tru bilong Jisas. Nikodemus i gat save, gutpela tingting, pasin daun, na em i gat laik long kisim ol samting bilong spirit, olsem na em inap kamap wanpela gutpela disaipel tru. Yes, em inap harim ol gutpela tok bilong dispela Bikpela Tisa, kisim gutpela save long ol tok piksa bilong Jisas, lukim ol narakain mirakel Jisas i wokim, na kisim strong long ol tok Jisas i givim long ol disaipel taim em i laik lusim ol. Tasol em i lus long kisim ol dispela samting.
Pasin bilong Nikodemus long holim tupela tingting i mekim na em i lus tru long kisim planti gutpela samting. Wanpela samting em i lus long kisim em singaut bilong Jisas: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, . . . Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. . . . Na samting mi givim yupela bilong karim, em i no hevi.” (Matyu 11:28-30) Nikodemus i lus long kisim dispela malolo em Jisas yet inap givim em!
Olsem Wanem Long Yu?
Kirap long 1914, Jisas Krais i bin mekim wok long heven olsem King bilong Kingdom bilong God. Em i bin tok profet long ol samting bai kamap long taim em i kam i stap, na em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Ol i mas autim tok long olgeta hap bilong graun paslain long pinis i kamap. Jisas Krais i amamas long ol man bilong graun i ken mekim dispela wok. Yu tu inap insait long en.
Nikodemus i luksave olsem God i bin salim Jisas i kam. (Jon 3:2) Long rot bilong stadi long Baibel, ating yu tu i bin kisim dispela tingting. Ating yu bin mekim sampela senis long i stap bilong yu bilong bihainim ol lo bilong Baibel. Ating yu save go long ol miting bilong ol Witnes Bilong Jehova bilong kisim sampela save moa long Baibel. Dispela samting yu mekim i gutpela tru. Tru, Nikodemus i save olsem God i bin salim Jisas i kam, tasol i gat sampela samting moa em i mas mekim. Em i mas “daunim laik bilong em yet, na em i mas karim diwai . . . bilong en long olgeta de, na em i mas bihainim [Jisas].”—Luk 9:23.
Tingim gut tok bilong aposel Pol. Em i tok: “Mipela i save wok wantaim God na mipela i tok strong long yupela olsem, ‘Yupela i kisim pinis marimari bilong God, na nogut yupela i lusim nating marimari bilong em.’ God i tok olsem, ‘Mi yet mi bin makim taim bilong kisim bek yu na mekim gut long yu, na long dispela taim stret mi bin harim krai bilong yu na helpim yu.’ Harim. Nau tasol em i taim bilong God i mekim gut long yumi. Nau tasol em i taim bilong God i kisim bek yumi.”—2 Korin 6:1, 2.
Nau em i taim bilong kisim bilip i kirapim yu long mekim wok. Bilong kisim kain bilip olsem, yu mas tingim tingim long bel ol samting yu wok long stadi long en long Baibel. Beten long Jehova na askim em long helpim yu long kamapim dispela kain bilip. Taim yu lukim em i helpim yu, pasin bilong yu long amamas na laikim em bai kirapim yu long ‘daunim laik bilong yu yet, na karim diwai bilong yu long olgeta de, na bihainim Jisas Krais.’ Olsem wanem? Bai yu kirap nau long mekim olsem?
[Piksa long pes 9]
Pastaim Nikodemus i no pret long mekim tok bilong helpim Jisas
[Piksa long pes 9]
Maski ol man i birua long em, Nikodemus i helpim wok bilong redim bodi bilong Jisas bilong planim
[Piksa long pes 10]
Pasin bilong stadi na beten inap strongim yu long mekim wok
[Piksa long pes 10]
Bai yu orait long mekim wok aninit long wok bos bilong Jisas Krais?