Ol i Karim Hevi Bilong Ol Nil i Sutim Skin Bilong Ol

“Wanpela samting olsem nil i kam i stap wantaim mi na i save sutim skin bilong mi. Dispela samting em i wokboi bilong Satan, na em i save mekim nogut long mi.”​—⁠2 KORIN 12:⁠7.

 1. Wanem sampela hevi i save painim ol manmeri long nau?

OLSEM WANEM? Yu wok long karim hevi bilong wanpela traim i bin stap longtaim? Sapos olsem, orait dispela samting i no painim yu tasol. Nau long dispela taim bilong “planti hevi nogut tru,” ol gutpela Kristen i save karim hevi bilong pasin birua, ol hevi insait long famili, ol sik, hevi bilong mani, pasin bilong wari, wanpela long famili i dai, na ol narapela samting i givim hatwok long ol. (2 Timoti 3:​1-5) Long sampela kantri, laip bilong planti i laik lus long hevi bilong bikpela hangre na woa.

2, 3. Yumi inap kisim wanem tingting kranki long ol hevi bilong yumi? Dispela inap nogutim yumi olsem wanem?

² Ol kain hevi olsem inap mekim na man i pilim olsem ol bai daunim em olgeta, na dispela tingting bai strong tru sapos planti hevi i painim em long wankain taim. Tingim tok bilong Sindaun 24:10: “Sapos taim nogut i painim yu na bun bilong yu i slek, orait yu no gat strong tru.” Tru tumas, bel hevi yumi kisim long ol traim i painim yumi inap pinisim strong bilong yumi na yumi no tingting strong moa long karim ol hevi i go inap long pinis. Olsem wanem em inap mekim olsem?

³ Bel hevi inap mekim na yumi no tingting stret. Olsem: I no hatwok long yumi tingting olsem ol hevi bilong yumi i bikpela moa yet, na yumi sori long yumi yet. Sampela inap krai na askim God, “Bilong wanem yu larim ol dispela samting i kamap long mi?” Sapos dispela kain tingting kranki i kamap strong long bel bilong man, em inap bagarapim pasin bilong em long bilip na stap amamas. Bikpela bel hevi tru inap kirapim wanpela wokman bilong God long lusim pasin bilong ‘ran strong long resis.’​—⁠1 Timoti 6:⁠12.

4, 5. Olsem wanem Satan i insait long sampela hevi bilong yumi, tasol yumi inap bilip long wanem samting?

⁴ God Jehova i no as bilong ol traim i save painim yumi. (Jems 1:13) Sampela traim i painim yumi, long wanem, yumi wok strong bilong stap gut long em. Tru tumas, olgeta man i lotuim Jehova ol i kamap birua bilong dispela nambawan birua bilong Jehova, em Satan. Insait long sotpela hap taim bilong em i stap yet, dispela “giaman god bilong dispela graun” i laik traim long kirapim ol man i laikim tumas Jehova long lusim wok bilong Em. (2 Korin 4:⁠4) Satan i wok strong long givim bikpela pen na bel hevi long ol brata bilong yumi i stap long olgeta hap bilong graun. (1 Pita 5:⁠9) Tru, Satan i no as bilong olgeta hevi i painim yumi, tasol em i save mekim wok long ol dispela hevi bilong daunim yumi moa yet.

⁵ Tasol maski Satan yet na ol samting em i yusim bilong daunim yumi i gat bikpela strong, yumi inap winim em! Olsem wanem yumi inap bilipim dispela tok? Yumi inap bilipim, long wanem, God Jehova i helpim yumi. Em i givim save long ol wokman bilong em na ol i no paul long ol wok Satan i mekim. (2 Korin 2:11) Tok Bilong God i givim save long yumi long ol traim i save painim ol trupela Kristen. Baibel i tok, ol hevi bilong Pol i olsem ‘nil i sutim skin.’ Bilong wanem Baibel i tok olsem? Yumi ken skelim olsem wanem Baibel i kamapim insait bilong dispela tok. Dispela bai helpim yumi long save olsem i no yumi tasol i mas kisim helpim long Jehova bilong winim ol traim.

Bilong Wanem Ol Traim i Stap Olsem Ol Nil

 6. Pol i stori long wanem samting taim em i tok long ‘nil i sutim skin?’ Ating dispela nil i sutim Pol em i wanem samting?

⁶ Pol i bin karim hevi bilong ol bikpela traim na bihain spirit holi i kirapim em long tok: “Wanpela samting olsem nil i kam i stap wantaim mi na i save sutim skin bilong mi. Dispela samting em i wokboi bilong Satan, na em i save mekim nogut long mi. Em i kam bilong daunim mi, bai mi no ken amamas na litimapim nem bilong mi yet.” (2 Korin 12:⁠7) Dispela nil i sutim skin bilong Pol em i wanem samting? Wanpela nil i stap insait tru long skin bai givim pen long man. Olsem na dispela tok i stori long nil i makim samting i givim pen long Pol​—⁠maski em i pen long skin, o long bel, o tupela wantaim. Ating Pol i karim hevi bilong wanpela sik bilong ai o narapela hevi bilong skin. O ating dispela nil i makim ol man i no wanbel long Pol i holim wok aposel na i tok em i no mekim gut wok bilong autim tok na skulim ol narapela. (2 Korin 10:​10-12; 11:​5, 6, 13) Tasol maski dispela nil em i wanem samting, em i givim hevi long Pol na em i no inap rausim.

7, 8. (a)  Dispela tok nil i wok long “mekim nogut” i makim wanem samting? (b) Bilong wanem yumi mas karim hevi bilong ol samting i olsem nil i sutim yumi long nau?

⁷ Pol i tok dispela nil i wok long mekim nogut long em. Tok Grik Pol i yusim long hia i kam long wanpela tok i makim “ol skru bilong han.” Long Matyu 26:67 ol i kamapim dispela tok bilong makim olsem man i paitim narapela, na long 1 Korin 4:11 dispela tok em i tok piksa. Satan i no laikim tru Jehova na ol wokboi bilong Em, olsem na yumi ken save olsem Satan i amamas long wanpela nil i wok long mekim nogut long Pol. Long nau tu Satan i kisim wankain amamas taim yumi karim ol hevi i kain olsem nil i sutim skin.

⁸ Olsem Pol, yumi mas save long ol samting yumi ken mekim bilong karim hevi bilong ol kain nil olsem. Yumi mas mekim olsem bilong stap laip! Tingim, Jehova i laik bai yumi stap oltaim long nupela taim em bai kamapim, em long dispela taim ol hevi i olsem nil bai i no inap painim yumi moa. Bilong helpim yumi long kisim dispela gutpela prais tru, God i kamapim planti stori long Baibel i soim olsem ol gutpela wokman bilong em i bin winim ol hevi i olsem nil i sutim skin bilong ol. Ol dispela wokman ol i no narakain, ol i gat sin wankain olsem yumi. Taim yumi tingim sampela bilong “ol dispela manmeri bilong bipo ol i sanap na raunim yumi i stap olsem bikpela klaut,” dispela inap helpim yumi long “ran strong long dispela resis God i bin makim bilong yumi ran long en.” (Hibru 12:⁠1) Pasin bilong tingim gut ol hevi dispela lain i bin karim inap strongim yumi, na helpim yumi long bilip olsem yumi tu inap karim hevi bilong ol samting i olsem nil em Satan i yusim bilong sutim yumi.

Ol Nil i Sutim Mefiboset

9, 10. (a) Olsem wanem Mefiboset i kisim wanpela nil i sutim skin bilong em? (b) King Devit i mekim wanem gutpela pasin long Mefiboset? Olsem wanem yumi ken bihainim pasin bilong Devit?

⁹ Tingim Mefiboset, em i pikinini man bilong pren bilong Devit, em Jonatan. Taim Mefiboset i gat faipela krismas, toksave i kam olsem papa bilong em, Jonatan, na bubu man bilong em, King Sol, ol i dai pinis. Meri i lukautim Mefiboset i pret nogut tru. Olsem na em “i karim Mefiboset na i ranawe. Tasol em i ran hariap tumas na Mefiboset i pundaun na kisim bagarap, na em i kamap lek nogut.” (2 Samuel 4:⁠4) Ating dispela bagarap bilong skin i olsem bikpela nil i givim hevi long Mefiboset i go inap long em i bikpela.

¹⁰ Sampela yia bihain, pasin bilong King Devit long laikim tru Jonatan i kirapim em long mekim gut long Mefiboset. Devit i givim olgeta graun samting bilong Sol i go long Mefiboset na em i makim wanpela wokman bilong Sol, em Siba, long lukautim dispela graun. Devit i tokim Mefiboset: “Olgeta taim yu ken i kam kaikai wantaim mi.” (2 Samuel 9:​6-10) Gutpela pasin bilong Devit i mekim gut bel bilong Mefiboset na daunim bel hevi bilong em long stap lek nogut. Dispela stori i skulim gut yumi! Yumi tu i mas helpim ol man i karim hevi bilong wanpela nil i sutim skin bilong ol.

11. Siba i tok Mefiboset i laik mekim wanem? Olsem wanem yumi save tok bilong em i giaman tasol? (Lukim sta.)

¹¹ Bihain, Mefiboset i mas karim hevi bilong narapela nil i sutim skin bilong em. Wokman bilong em Siba i bagarapim gutnem bilong Mefiboset long ai bilong King Devit taim Devit i ranawe lusim Jerusalem, long wanem, pikinini bilong em, Apsalom, i laik daunim wok king bilong em. Siba i tok Mefiboset i no stap gut long Devit, em i stap long Jerusalem bilong traim long kisim wok king long em yet.a Devit i bilipim tok bilong Siba na em i givim olgeta graun samting bilong Mefiboset i go long dispela man bilong giaman!​—⁠2 Samuel 16:​1-4.

12. Taim ol traim i painim Mefiboset em i mekim wanem? Olsem wanem em i stap olsem gutpela piksa long yumi?

¹² Tasol taim Mefiboset i bungim Devit long bihain, em i tokim king long ol samting i bin kamap tru. Em i bin redim ol samting bilong go joinim Devit taim Siba i kam trikim em na tok em bai kisim ples bilong Mefiboset na go. Yu ting Devit i stretim dispela rong? Em i stretim liklik. Devit i brukim graun bilong Sol na tupela man wantaim i kisim hap bilong en. Dispela samting tu inap i stap olsem nil i sutim skin bilong Mefiboset. Yu ting em i bel hevi tru long dispela samting? Yu ting em i no wanbel long samting Devit i mekim, na tok olsem em i no stret? Nogat, long pasin daun em i orait tasol long ol samting King i laik mekim. Em i tingting long ol gutpela samting, na em i amamas long king tru bilong Israel i kam bek pinis na em i no bin kisim bagarap. Mefiboset i stap olsem gutpela piksa tru long pasin bilong karim hevi bilong skin i bagarap, na long narapela i bagarapim gutnem bilong em, na long samting i no kamap olsem em i laikim.​—⁠2 Samuel 19:​24-30.

Nehemia i Karim Hevi Bilong Ol Traim Bilong Em

13, 14. Taim Nehemia i go bek long wokim gen banis bilong Jerusalem, em i mas karim hevi bilong wanem ol nil?

¹³ Tingim ol hevi i olsem nil Nehemia i karim long taim em i go bek long taun Jerusalem i no gat banis long en long 455 B.C.E. Nehemia i luksave olsem i no hatwok long ol birua i kam na daunim taun, na tu, ol Juda i sindaun gen long dispela hap, ol i mekim nabaut ol wok, ol i bel hevi, na ol i no stap klin long ai bilong Jehova. Maski King Artaserksis i givim tok orait long wokim gen banis bilong Jerusalem, kwiktaim Nehemia i kisim save olsem wok em i kam long mekim i olsem stingpela samting long ol hetman bilong ol narapela kantri i stap klostu. Nehemia i tok: “Tupela [hetman] i harim tok long mi bin kam bilong helpim ol manmeri bilong Israel. Olsem na tupela i bel nogut tru.”​—⁠Nehemia 2:⁠10.

¹⁴ Ol dispela birua bilong ol narapela kantri ol i wok strong long stopim wok bilong Nehemia. Pasin bilong ol long tromoi tok bilong pretim em, tok giaman, bagarapim nem bilong em, na salim ol man long bagarapim bel bilong em​—⁠olgeta dispela samting i bin i stap olsem ol nil i wok oltaim long sutim skin bilong Nehemia. Yu ting em i larim pasin bilong ol birua i daunim em? Nogat! Nehemia i bilip tru long God, na em i no lusim dispela pasin. Olsem na taim ol banis bilong Jerusalem i sanap pinis, i olsem ol dispela banis i tokaut long pasin bilong Jehova long sapotim Nehemia.​—⁠Nehemia 4:​1-12; 6:​1-19.

15. Wanem ol hevi bilong ol Juda i givim bikpela pen long Nehemia?

¹⁵ Nehemia em i wanpela gavena, olsem na em i gat wok long stretim ol hevi i kamap namel long ol manmeri bilong God. Ol dispela hevi i stap olsem ol nil i sutim Nehemia, long wanem, ol i mekim na ol manmeri i no stap gut long Jehova. Ol maniman i singaut long bikpela winmani taim ol narapela i bekim dinau long ol, na ol brata bilong ol i stap rabis, ol i mas salim graun bilong ol na ol pikinini bilong ol long kamap wokboi nating bilong kisim mani na bai ol i ken bekim dinau na baim takis bilong gavman Persia. (Nehemia 5:​1-10) Planti Juda i save brukim lo bilong Sabat, na ol i no helpim ol Livai na ol wok bilong tempel. Na tu, sampela i bin maritim “ol meri bilong distrik Asdot na Amon na Moap.” Ol dispela samting i givim bikpela pen long Nehemia! Tasol ol dispela samting olsem nil i no mekim na em i lusim wok. Oltaim Nehemia i stap olsem man i givim bel long bihainim ol stretpela lo bilong God. Olsem Nehemia, yumi tu i no ken larim pasin bilong ol narapela long brukim lo bilong Jehova i daunim pasin bilong yumi long stap gut long wok bilong em.​—⁠Nehemia 13:​10-13, 23-27.

Planti Narapela Bilipman i Winim Ol Hevi

16-18. Olsem wanem ol hevi i kamap insait long famili bilong Aisak na Rebeka, Hana, Devit, na Hosea?

¹⁶ Baibel i gat planti stori moa bilong ol manmeri i bin winim ol bikpela hevi i olsem nil. Ol hevi bilong famili i as bilong planti hevi i olsem nil. Tupela meri bilong Iso “i save mekim Aisak na Rebeka i bel pen tru,” em papamama bilong Iso. Rebeka i bin tok olsem em i les pinis long ol dispela meri. (Stat 26:​34, 35; 27:46) Tingim tu Hana, na pasin bilong namba tu meri, em Penina, long “tok bilas na tok sem long Hana,” long wanem, Hana i no gat pikinini. Taim ol i stap long haus, ating Hana i bin karim hevi bilong dispela pasin inap planti taim. Penina i tok bilas long em long ai bilong ol narapela tu​—⁠ating long ai bilong ol wantok na pren taim famili i go lotu long Silo. Samting Penina i mekim i kain olsem pasin bilong subim nil i go insait moa yet long skin bilong Hana.​—⁠1 Samuel 1:​4-7.

¹⁷ Tingim hevi Devit i karim, long wanem, tambu bilong em, King Sol, i jeles nogut tru long em. Bilong Devit i no ken kisim bagarap, em i mas i stap long ol hul bilong maunten long ples drai nating bilong Engedi. Long dispela hap Devit inap kisim bagarap taim em i wokabaut na brukim ol ples ston i antap tru long ol maunten. I no stret em i karim kain hevi olsem na dispela i bagarapim tru bel bilong Devit, long wanem, em i no bin mekim wanpela samting nogut long Sol. Tasol inap planti yia Devit i mas ranawe na stap hait​—⁠pasin jeles bilong Sol i as bilong ol dispela samting.​—⁠1 Samuel 24:​14, 15; Sindaun 27:⁠4.

¹⁸ Tingim ol hevi i painim famili bilong Hosea. Meri bilong em i kamap pamukmeri. Ating pasin nogut bilong meri ya i mas givim pen long Hosea kain olsem wanpela nil i sutim lewa bilong em. Na pen na hevi bilong Hosea i go bikpela moa taim meri i karim tupela pikinini long pasin pamuk bilong em!​—⁠Hosea 1:​2-9.

19. Wanem pasin birua i bin painim profet Mikaia?

¹⁹ Narapela nil i save sutim skin em pasin birua. Tingim samting i bin painim profet Mikaia. Mikaia i lukim olsem King Ahap i laik harim tok bilong ol giaman profet, na ating pasin bilong Ahap long bilipim ol tok giaman bilong ol i bin bagarapim tru bel bilong stretpela man Mikaia. Bihain, Mikaia i tokim Ahap olsem, “Bikpela . . . i salim dispela spirit i kam na i mekim olgeta dispela profet bilong yu i trikim yu.” Taim Mikaia i tok olsem, orait hetman bilong ol giaman profet hia i mekim wanem? Em i “solapim wasket bilong [Mikaia]”! Na samting nogut moa em pasin Ahap i mekim taim em i harim Jehova i tokaut olsem, em bai i no inap winim pait bilong kisim bek taun Ramot. Ahap i tokim ol man long putim Mikaia long kalabus na givim em liklik kaikai tasol. (1 King 22:​6, 9, 15-17, 23-28) Tingim tu Jeremaia na ol samting ol birua i bin mekim long em.​—⁠Jeremaia 20:​1-9.

20. Naomi i karim wanem ol hevi i olsem nil i sutim skin? Em i bin kisim wanem gutpela blesing?

²⁰ Taim wanpela bilong famili i dai, dispela tu em i wanpela hevi i olsem nil i sutim skin. Naomi i karim hevi taim dai i painim man bilong em wantaim tupela pikinini man. Em i pilim yet pen bilong dispela hevi taim em i go bek long Betlehem. Em i tokim ol pren bilong em olsem ol i no ken kolim em Naomi, ol i mas kolim em Mara, em wanpela nem i makim olsem ol bikpela hevi i painim em. Tasol bihain Jehova i tingim pasin bilong Naomi long sanap strong na karim hevi, na Em i givim gutpela blesing long Naomi olsem Mesaia i kamap long lain tumbuna pikinini bilong em.​—⁠Rut 1:​3-5, 19-21; 4:​13-17; Matyu 1:​1, 5.

21, 22. Olsem wanem planti gutpela samting bilong Jop i lus? Em i mekim wanem taim ol dispela hevi i kamap?

²¹ Ating Jop i kirap nogut tru taim em i kisim toksave olsem wantu dai i painim olgeta 10-pela pikinini bilong em, na olgeta bulmakau sipsip samting na ol wokboi tu ol i dai. I luk olsem wantu tasol olgeta gutpela samting bilong Jop i bagarap! Orait, Jop i wari yet long ol dispela hevi na Satan i givim wanpela sik long em. Ating Jop i ting dispela sik nogut bai kilim em i dai. Pen long skin bilong em i bikpela moa yet, olsem na em i ting i dai tasol bai givim malolo long em.​—⁠Jop 1:​13-20; 2:​7, 8.

²² Em i no karim hevi bilong ol dispela samting tasol, meri bilong em i bel hevi na tingting planti, olsem na em i krai na tokim em: “Mobeta yu lusim [God] na tok nogut long em na yu ken i dai.” Em i wanpela nil i sutim tru skin bilong Jop i gat pen pinis long en! Bihain, tripela pren bilong Jop ol i no mekim gut bel bilong em, ol i kamapim kain kain giaman tingting, na ol i tok Jop i hait na mekim sampela rong na dispela i as bilong ol hevi i painim em. I olsem ol tingting kranki bilong ol i subim ol nil i go insait moa long skin bilong Jop. Na tingim tu, Jop yet i no save long as bilong ol samting nogut i kamap long em, na em i no save olsem laip bilong em bai i no inap lus long dispela taim. Tru tumas, “ol dispela taim nogut i painim Jop, tasol em i no mekim sin na em i no tok nogut long God.” (Jop 1:22; 2:​9, 10; 3:3; 14:13; 30:17) Maski planti nil i sutim skin bilong Jop long wankain taim, i no gat wanpela taim em i lusim pasin bilong stap gut long God. Dispela i strongim tru yumi!

23. I gat wanem as na ol gutpela wokman yumi stori pinis long ol, ol inap winim hevi bilong kain kain nil i sutim skin bilong ol?

²³ I gat planti stori moa long Baibel olsem ol dispela stori yumi bin skelim nau. Olgeta dispela gutpela wokman bilong God i bin karim hevi bilong ol samting i olsem nil i sutim skin bilong ol. Na ol hevi bilong ol i narapela narapela kain! Tasol wanpela samting bilong ol i wankain. I no gat wanpela i bin lusim wok bilong Jehova. Maski ol i karim ol bikpela traim, strong Jehova i bin givim long ol i helpim ol long winim Satan. Olsem wanem dispela strong i bin helpim ol? Stori i kam bihain long dispela bai bekim dispela askim na soim yumi olsem wanem yumi tu inap karim olgeta kain hevi i olsem nil i sutim skin bilong yumi.

[Futnot]

Bai Yu Bekim Olsem Wanem?

• Olsem wanem yumi ken tok ol hevi i save painim yumi i olsem ol nil i sutim skin?

• Mefiboset na Nehemia i bin karim hevi bilong wanem ol nil i sutim skin bilong ol?

• Taim yu tingim ol stori bilong Baibel long ol man na meri i bin karim hevi bilong kain kain nil i sutim skin, yu pilim tru stori bilong husat? Bilong wanem yu tok olsem?

[Ol Piksa long pes 15]

Mefiboset i mas karim hevi bilong skin i bagarap, ol man i bagarapim gutnem bilong em, na long samting i no kamap olsem em i laikim

[Piksa long pes 16]

Nehemia i no lusim wok, maski ol man i birua long em