Mekim Wok Long Bel na Tingting Bilong Painim God

Lotu Kristen tru i laik kirapim yumi long mekim wok long bel na tingting long kisim bilip God i save laikim.

MAN i kamapim lotu Kristen, em Jisas Krais, em i lainim ol man long ol i mas laikim tru God long “bel” bilong ol, na long “tingting” tu bilong ol. (Matyu 22:37) Yes, tingting bilong yumi i mas mekim bikpela wok insait long pasin bilong yumi long lotuim God.

Taim Jisas i laik kirapim ol man long tingim ol tok em i bin skulim ol long en, planti taim em i tok: “Yupela i ting wanem?” (Matyu 17:25; 18:12; 21:28; 22:42) Na olsem tasol, aposel Pita i raitim pas long ol wanbilip bilong em bilong ‘kirapim ol long tingim gen ol samting.’ (2 Pita 3:⁠1) Aposel Pol, em i bin mekim wok misineri long planti hap, em i tokim ol Kristen long ol i mas mekim wok long “stretpela tingting” bilong ol na ‘save tru long laik bilong God na long ol pasin i gutpela na long ol pasin God i laikim tumas na long ol pasin i inap tru na i stret olgeta.’ (Rom 12:​1, 2; NW ) Em nau, ol Kristen i mas skelim gut ol tok ol i bilip long en. Long dispela rot tasol bai ol inap kisim bilip God i laikim, na kisim bilip i helpim ol long sanap strong taim hevi i painim ol.​​—⁠Hibru 11:​1, 6.

Bilong helpim ol man long kisim kain bilip olsem, ol Kristen bilong pastaim ol i save ‘toktok wantaim ol man long ol tok i stap long buk bilong God na ol i autim as bilong tok bilong God.’ (Aposel 17:​1-3) Dispela i kirapim planti man i gat stretpela bel long bilip. Olsem: Planti man long taun Beria long Masedonia “ol i harim tok bilong Pol [wantaim ol wanwok bilong em], na ol i laikim tru. Na long olgeta de ol i save ritim na skelim tok i stap long buk bilong God, bilong ol i ken save, tok bilong Pol em i tru, o nogat.” (Aposel 17:11) I gat tupela samting long dispela skripsa yumi ken tingim. Namba wan, ol Beria i gat laik tru long harim Tok Bilong God. Namba tu, ol i no bilip nating​—⁠ol yet i lukim ol tok i stap long buk bilong God na bai ol i ken save olsem ol tok ol i harim em i tok tru bilong God. Misineri Kristen, Luk, i lukim gutpela pasin ol Beria i mekim na long gutpela pasin daun em i tok amamas long ol⁠—em i tok ol i “gutpela lain manmeri.” Olsem wanem? Taim yu wok long kisim save long God, yu tu i bihainim dispela pasin bilong ol Beria?

Tingting na Bel i Wok Gut Wantaim

Olsem yumi stori pinis, bilong lotu tru long God, yumi mas mekim wok long tingting na bel wantaim. (Mak 12:30) Tingting bek long stori i kamap paslain long dispela, em stori i toktok long wanpela man em narapela i baim em long penim haus tasol em i mekim wok long ol kala em papa bilong haus i no orait long en. Sapos em i bin putim gut yau long ol tok bilong papa bilong haus, orait em inap givim bel olgeta long mekim dispela wok na bilip tru olsem papa bilong haus bai orait long wok em i mekim. Na i wankain long pasin bilong yumi long lotuim God.

Jisas i tok: ‘Olgeta man i laik lotu tru bai ol i lotu long Papa long spirit na long pasin i tru.’ (Jon 4:​23) Olsem na aposel Pol i tok: “Olsem na . . . oltaim mitupela i save prea na askim God long helpim yupela, bai yupela i ken save gut tru long laik bilong em. Na bai Holi Spirit i ken givim yupela olkain gutpela save na tingting, na dispela i ken pulap tru long yupela. Olsem bai yupela inap wokabaut long pasin bilong ol manmeri tru bilong Bikpela, na bai em i laikim olgeta pasin bilong yupela.” (Kolosi 1:​9, 10) Taim ol man i gat gutpela bel ol i “save gut tru,” dispela i save helpim ol long lotuim God long bel olgeta na bilip tru long em, long wanem, ol i “lotu long samting [ol] i save long en.”​​—⁠Jon 4:​22.

Long ol dispela as, ol Witnes Bilong Jehova i no save baptaisim ol bebi o ol nupela man em ol i no bin stadi gut long Baibel. Jisas i tokim ol disaipel: “Go mekim olgeta lain manmeri i kamap disaipel bilong mi . . . [na] lainim ol long bihainim olgeta tok mi bin givim long yupela.” (Matyu 28:​19, 20) Em nau, ol sumatin bilong Baibel i mas kisim stretpela save long laik bilong God na bai ol i ken lotuim God long pasin em i laikim. Olsem wanem? Yu save wok strong long kisim stretpela save olsem?

Kisim Gut Beten Bilong Bikpela

Bilong helpim yumi long save olsem wanem pasin bilong kisim stretpela save long ol tok bilong Baibel em i narapela kain long kisim liklik save tasol, yumi ken skelim Beten Bilong Bikpela long Matyu 6:​9-​13.

Planti milion manmeri i save kolim dispela beten taim ol i go lotu. Tasol hamas manmeri i bin skul long insait bilong ol tok bilong en, na moa yet long dispela namba wan hap i toktok long nem bilong God na Kingdom? Dispela tupela samting ol i bikpela samting tru, olsem na Jisas i putim ol long namba wan hap bilong dispela beten.

Beten i kirap olsem: “Papa bilong mipela, yu stap long heven, nem bilong yu i mas i stap holi.” Tingim, Jisas i tok yumi mas beten long nem bilong God i mas i stap holi. Long planti manmeri, dispela i kamapim tupela askim: Namba wan, wanem nem bilong God? Na namba tu, i gat wanem as na i gat wok long mekim nem bilong em i stap holi?

Bekim bilong namba wan askim i stap long 7,000 hap long Baibel long ol tok ples bilong pastaim. Wanpela i stap long Song 83:18 (NW ): “Bai ol manmeri i mas save olsem yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.” Kisim Bek 3:​15 (NW ) i stori long nem bilong God, Jehova, olsem: “Dispela em i nem bilong mi i go inap oltaim oltaim, na dispela em i nem ol i mas tingim mi long en i go inap long olgeta taim bihain.”a Tasol i gat wanem as na i gat wok long mekim gutpela nem bilong God i stap holi? Dispela i olsem, long wanem, kirap long taim bilong namba wan man na meri, ol i bin tok bilas na nogutim dispela nem.

Long Iden, God i tokim Adam na Iv sapos ol i kaikai long prut tambu, ol bai dai. (Stat 2:​17) Satan i daunim tok bilong God, na em i tokim Iv: “Nogat. Yutupela i no inap i dai.” Em nau, Satan i tok God em i giaman. Tasol i no dispela samting tasol. Em i mekim sampela tok moa bilong bagarapim nem bilong God. Em i tokim Iv olsem, God i pasim em long kisim gutpela save. “Sapos yutupela i kaikai pikinini bilong dispela diwai [bilong givim gutpela save long wanem samting i gutpela na wanem samting i nogut], bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God. God i save long dispela, olsem na em i tambuim yutupela long kaikai pikinini bilong dispela diwai.” Dispela tok i bagarapim tru nem bilong God!​​—⁠Stat 3:​4, 5.

Long pasin bilong kisim dispela prut tambu, Adam tupela Iv i sapotim Satan. Bihain long dispela taim, planti man​—⁠maski ol i save o nogat​—⁠ol i bin bagarapim nem bilong God taim ol i sakim ol stretpela lo bilong em. (1 Jon 5:​19) Ol man i wok yet long nogutim nem bilong God taim ol i tok em asua bilong God taim hevi i painim ol​—⁠maski pasin nogut bilong ol yet i as bilong dispela. Sindaun 19:3 i tok: “Sampela manmeri i save mekim longlong pasin na bagarapim ol yet, na bihain ol i putim hevi long Bikpela na i kros long em.” Olsem wanem? Nau yu inap save long as, na Jisas​—⁠em i laikim tru Papa bilong em⁠—em i beten long nem bilong God i mas i stap holi?

“Kingdom Bilong Yu i Mas i Kam”

Taim Jisas i beten pinis long nem bilong God i mas i stap holi, em i tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:​10) Orait yumi ken tok: ‘Kingdom bilong God em i wanem samting? Na taim Kingdom i kam, olsem wanem long laik bilong God hia long graun?’

Long Baibel, dispela tok “kingdom” i makim “wok bos bilong wanpela king.” Olsem na Kingdom bilong God i makim wok bos, o gavman, bilong God, na i gat wanpela king em i makim. Dispela King em Jisas Krais em i kirap bek pinis​​—⁠em “King bilong olgeta king, na Bikpela bilong olgeta bikman.” (KTH 19:16; Daniel 7:​13, 14) Profet Daniel i stori long Kingdom bilong God long han bilong Mesaia, em Jisas Krais, olsem: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”​​—⁠Daniel 2:​44.

Yes, Kingdom bilong God bai bosim tru olgeta samting long graun, na rausim ol man nogut long en, na dispela Kingdom bai stap “oltaim oltaim.” Olsem na Kingdom bilong God em rot Jehova bai mekim wok long en bilong mekim holi nem bilong em na rausim olgeta tok giaman Satan na ol man nogut i bin mekim long dispela nem.​​—⁠Esekiel 36:⁠23.

Wankain olsem olgeta kain gavman, Kingdom bilong God tu i gat ol man i stap aninit long en. Ol i husat? Baibel i tok: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:11) Na Jisas tu i tok: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” Ol dispela manmeri i bin kisim stretpela save long God​—⁠em wanpela samting ol man i mas mekim bilong kisim laip oltaim.​​—⁠Matyu 5:5; Jon 17:⁠3.

Ol manmeri i gat pasin daun na laikim tru God na ol narapela, ol bai pulap long graun. Yu inap lukim dispela samting long tingting bilong yu? (1 Jon 4:​7, 8) Jisas i bin beten long dispela, taim em i tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” Olsem wanem? Yu save long as na Jisas i lainim ol disaipel long beten olsem? Na bikpela samting moa, yu save long samting em truim bilong dispela beten inap mekim long yu yet?

Long Nau Planti Milion Manmeri i Save Skelim Ol Tok Bilong Baibel

Jisas i tok profet olsem wanpela bikpela wok bai kamap long olgeta hap bilong graun​—⁠em wok bilong tokaut long Kingdom bilong God. Em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de [bilong dispela pasin i stap nau long graun] i kamap.”​​—⁠Matyu 24:⁠14.

Long olgeta hap bilong graun, inap 6 milion Witnes Bilong Jehova ol i autim gutnius. Ol i laik singautim yu long kisim sampela save moa long God na Kingdom bilong em long rot bilong skelim gut long tingting ol “tok i stap long buk bilong God.” Sapos yu mekim olsem, dispela bai strongim bilip bilong yu na yu bai amamas taim yu tingting long stap laip long Paradais long graun. Long dispela taim, “olgeta samting bai i save tru long” Jehova na “dispela save bai inapim olgeta hap graun olsem solwara i inapim mak bilong en olgeta.”​​—⁠Aisaia 11:​6-9.

[Futnot]

[Blok/Piksa long pes 8]

BIHAINIM PASIN BILONG BIKPELA TISA

Taim Jisas i skulim ol man, planti taim em i kamapim wanpela samting stret em Baibel i stori long en. Olsem: Taim em i kirap bek pinis, em i tokim tupela disaipel long ol wok bilong em insait long ol samting God i laik mekim. Tupela ya i bin tingting planti long i dai bilong em. Luk 24:27 i tok: “Em i stat long tok bilong Moses na bilong olgeta profet, na em i skulim tupela long as bilong olgeta hap bilong buk bilong God i toktok long em yet.”

Tingim: Jisas i makim wanpela tok stret bilong stori long en​​—⁠“em yet,” olsem Mesaia​​—⁠na em i kamapim tok bilong “olgeta hap bilong buk bilong God.” Em i kamapim ol skripsa na skruim wantaim olsem man i skruim ol wan wan hap bilong wanpela pilai pasel, na dispela i helpim ol disaipel long save gut tru long dispela tok i tru bilong Baibel. (2 Timoti 1:​13) Dispela i mekim na ol i kisim save, na tu, bel bilong ol i pilim tru. Baibel i tok: “Tupela i toktok long tupela yet olsem, ‘Tru tumas, taim mitupela i wokabaut long rot, na em i givim toktok long mitupela, na em i autim as tingting bilong buk bilong God long mitupela, bel bilong mitupela i bin kirap tru.’ ”​​—⁠Luk 24:⁠32.

Ol Witnes Bilong Jehova i wok strong long bihainim ol pasin bilong Jisas long mekim wok bilong ol long autim tok. Ol nambawan samting bilong ol long mekim stadi, em buklet God i Laik Yumi Mas Mekim Wanem? na buk Save i Bringim Man Long Laip Oltaim. Dispela tupela samting bilong stadi i stori long planti bikpela tok bilong Baibel, olsem: “God Em i Husat?,” “Bilong Wanem God i Larim Pen na Hevi i Stap?,” “Olsem Wanem Yu Inap Painim Lotu i Tru?,” “Nau Em i Taim Bilong Las De!,” na “Wok Long Kamapim Famili i Givim Biknem Long God.” Olgeta wan wan stadi i gat planti skripsa long en.

Sapos yu laik stadi long Baibel na kisim save long ol dispela tok na sampela tok moa, no gat pe long en, toksave long ol Witnes Bilong Jehova long hap bilong yu o raitim pas long atres i stap long pes 2 bilong dispela nius.

[Piksa]

Putim tok i go daun long bel bilong sumatin long rot bilong kamapim wanpela samting stret em Baibel i stori long en

[Ol Piksa long pes 7]

Yu kisim gut mining bilong dispela beten Jisas i bin lainim ol disaipel long en?

“Papa bilong mipela, yu stap long heven, nem bilong yu i mas i stap holi . . . ”

“Kingdom bilong yu i mas i kam . . . ”

“Mipela i mas bihainim laik bilong yu long graun olsem ol i save bihainim long heven”