Askim
Yu ting Abel i bin save pinis em i mas givim wanpela animal olsem ofa bilong God i ken orait long em?
Dispela stori long Baibel long Kein na Abel i mekim ofa, em i sotpela stori tasol. Long Stat 4:3-5, yumi ritim tok olsem: “Bihain Kein i kamautim kaikai long gaden na em i bringim sampela na i mekim ofa long Bikpela. Na Abel i kisim wanpela naispela patpela pikinini sipsip. Dispela sipsip em i namba wan pikinini sipsip mama i bin karim. Na Abel i kilim na i mekim ofa long Bikpela. Bikpela i amamas long Abel na ofa bilong em, tasol em i no amamas long Kein na ofa bilong em.”
Paslain long dispela samting i kamap Baibel i no stori olsem Jehova i bin mekim sampela tok long givim ofa o wanem kain ofa em i orait long en. Olsem na i luk olsem Kein na Abel i givim dispela ofa long laik bilong ol yet. Ol i no inap go insait long dispela Paradais i bin i stap ples bilong papamama bilong ol long bipo; ol i kirap pilim ol samting sin i kamapim; na ol i stap longwe long God. Sin i stap long skin bilong ol na ol i stap tarangu tru, ating dispela i mekim ol i pilim tru olsem ol i mas askim God long helpim ol. Ating long rot bilong givim presen long God long laik bilong ol yet, ol i laik God i ken amamas long ol.
God i bin orait long ofa bilong Abel, tasol ofa bilong Kein nogat. Bilong wanem i olsem? Yu ting Abel i ofaim samting i stret na Kein nogat? Yumi no save, em i bikpela samting wanem kain ofa ol i givim o nogat, long wanem, God i no bin tokim tupela long wanem kain ofa em i laikim na wanem kain ofa em i no laikim. Tasol i luk olsem God i orait long tupela kain ofa wantaim. Long dispela Lo Jehova i givim long ol Israel long bihain, em i orait long ol animal na ol hap bilong animal ol man i givim olsem ofa, na tu, ol i ken givim wit, rais bali, plaua, kain kain bret, na wain tu. (Wok Pris 6:19-23; 7:11-13; 23:10-13) Olsem na wanem samting Kein na Abel i givim olsem ofa i no as na God i orait long wanpela na narapela nogat.—Skelim wantaim Aisaia 1:11; Amos 5:22.
Winim 4,000 yia bihain, Pol i tok: “Abel i bilip long God, na i mekim ofa long em. Na God i laikim ofa bilong Abel, tasol em i no laikim ofa bilong Kein. Abel i bilip, na long dispela as God i laikim ol presen Abel i givim em. Na dispela i soim yumi olsem God i kolim em stretpela man.” (Hibru 11:4) Olsem na pasin bilong bilip em i as na God i tok Abel em i stretpela man. Tasol em i bilip long wanem samting? Em i bilip long tok promis bilong Jehova long salim dispela Pikinini husat bai ‘krungutim het bilong snek’ na kamapim gen pasin bilong stap isi na nogat sin, olsem sindaun bilong man long bipo. Taim Abel i harim olsem snek bai ‘kaikaim lek bilong Pikinini,’ em inap ting dispela samting i makim olsem blut i mas kapsait taim em i givim ofa. (Stat 3:15) Tasol yumi save tru; bilip bilong Abel em i as na “God i laikim ofa bilong Abel, tasol em i no laikim ofa bilong Kein.”
Olsem tasol God i no orait long ofa bilong Kein, ofa em i mekim i no as bilong dispela samting, nogat, pasin bilong Kein i kamapim klia em i no gat bilip, na dispela em i as na God i no orait long ofa bilong em. Jehova i bin tok klia long Kein: “Sapos yu mekim gutpela pasin, orait bai yu amamas.” (Stat 4:7) God i no bin sakim Kein, long wanem, em i no laikim ofa bilong em, nogat. Em i jeles na bel nogut na bihain em i kilim brata bilong em, dispela i kamapim klia “pasin bilong en em i nogut” na em dispela samting i mekim na God i no orait long Kein.—1 Jon 3:12.