Kaikai Bilong Bikpela Em i Helpim Tru Yu

OLSEM WANEM? Kaikai Bilong Bikpela i helpim tru yu na i mekim olsem inap oltaim oltaim? Bilong kisim save long dispela samting, pastaim yumi mas kisim save long tingting bilong Jisas Krais yet long dispela bikpela bung.

Long apinun bilong Nisan 14, 33 C.E., Jisas wantaim 12-pela aposel bilong em ol i bung long wanpela rum antap long Jerusalem bilong mekim Pasova, em wanpela bung ol i save mekim wanpela taim long olgeta yia. Taim ol i kisim pinis kaikai bilong Pasova, Judas, em dispela man bilong kamapim Jisas long ol birua, em i lusim dispela rum na i go ausait bilong kamapim Jisas. (Jon 13:​21, 26-30) Orait nau Jisas i kirapim ‘kaikai bilong Bikpela’ wantaim ol 11-pela aposel i stap yet. (1 Korin 11:20) Ol man i kolim tu dispela bung olsem Memorial, long wanem, Jisas i tokim ol disaipel bilong em: “Yupela i mas mekim olsem bilong tingim mi.” Dispela bung tasol Jisas i bin tokim ol disaipel long tingim, i no gat narapela bung.​​—⁠1 Korin 11:⁠24.

Long planti hap, ol man i save sanapim wanpela hap ston samting o makim wanpela de bilong tingim wanpela man o wanpela bikpela samting. Long dispela taim Jisas i bin kamapim wanpela kaikai bilong helpim ol disaipel bilong em long tingim ol bikpela samting i bin kamap long dispela bikpela de. Inap planti handet yia bihain, dispela kaikai bai helpim ol man i mekim dispela kaikai long tingim ol bikpela samting Jisas i bin mekim long dispela nait, na tu, dispela bai helpim ol long tingim ol samting bret na wain i makim. Bret na wain Jisas i yusim, em i makim wanem samting? Orait nau yumi ken skelim stori bilong Baibel long ol samting i bin kamap long dispela nait long 33 C.E.

Makim Samting Holi

“Em i kisim wanpela bret, na i tenkyu long God, na i brukim, na i givim long ol disaipel. Na em i tok, ‘Dispela em i [“makim,” “NW” ] bodi bilong mi, mi givim bilong helpim yupela. Yupela i mas mekim olsem bilong tingim mi.’ ”​​—⁠Luk 22:⁠19.

Taim Jisas i kisim bret na i tok “dispela em i makim bodi bilong mi,” em i tokaut olsem bret i no gat yis i makim bodi bilong em i no gat sin, na em i givim bambai “ol manmeri bilong graun ol i ken kisim laip.” (Jon 6:​51) Tru, sampela Baibel i tanim dispela tok olsem “dispela em i [tok Grik, es·tinʹ] bodi bilong mi,” tasol wanpela buk (Greek-English Lexicon of the New Testament) i tok, planti taim dispela tok i olsem “i makim, i olsem.” Dispela tok i kamapim tingting olsem dispela i makim wanpela samting.​​—⁠Matyu 26:⁠26.

Na i wankain long kap wain. Jisas i tok: “Dispela kap wain em i [“makim,” “NW” ] nupela kontrak mi mekim long blut bilong mi, em mi kapsaitim bilong helpim yupela.”​​—⁠Luk 22:⁠20.

Long stori bilong Matyu, Jisas i tok long dispela kap: “Dispela em i [“makim,” NW ] blut bilong mi bilong mekim kontrak. Mi kapsaitim bilong lusim sin bilong planti manmeri.” (Matyu 26:28) Jisas i bin yusim wain i stap long kap bilong makim blut bilong em yet. Dispela blut em i kapsaitim i as bilong wanpela “nupela kontrak” bilong ol disaipel em God i bin makim long holi spirit, em ol bai mekim wok king na pris wantaim em long heven.​​—⁠Jeremaia 31:​31-​33; Jon 14:​2, 3; 2 Korin 5:5; KTH 1:​5, 6; 5:​9, 10; 20:​4, 6.

Wain i stap long kap i mas helpim ol long tingim olsem blut Jisas i kapsaitim i olsem as bilong “tekewe sin,” na dispela i opim rot long ol man i dring wain long ol bai kisim laip long heven bilong mekim wok wantaim Krais. Ol dispela man em God i bin singautim ol bilong i go long heven​—⁠ol i liklik lain​—⁠ol tasol i kisim bret na wain long Memorial.​​—⁠Luk 12:32; Efesus 1:​13, 14; Hibru 9:​22; 1 Pita 1:​3, 4.

Tasol olsem wanem long ol disaipel bilong Jisas em ol i no insait long nupela kontrak? Ol dispela man em ol “arapela sipsip” bilong Bikpela, na ol i tingting long i stap oltaim long Paradais long graun, ol i no tingting long mekim wok king wantaim Krais long heven. (Jon 10:16; Luk 23:​43, NW; KTH 21:​3, 4) Olsem bikpela lain Kristen i stap gut long God ‘ol i mekim wok bilong God long san na long nait,’ na ol i amamas long bung wantaim bilong tingim Kaikai Bilong Bikpela. Tok na pasin bilong ol i kamapim ples klia olsem: “God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi na mekim yumi i stap gut.”​​—⁠KTH 7:​9, 10, 14, 15.

Mekim Hamas Taim?

“Yupela i mas mekim olsem bilong tingim mi.”​​—⁠Luk 22:⁠19.

Yumi mas mekim Memorial hamas taim bilong tingim indai bilong Krais? Jisas i no tokaut long hamas taim stret yumi mas mekim. Tasol em i kamapim Kaikai Bilong Bikpela long Nisan 14, long apinun bilong Pasova, em ol Israel i bin mekim wanpela taim tasol long olgeta yia, olsem na yumi ken ting Jisas i laik yumi tingim Memorial long wankain pasin. Wanpela taim long olgeta yia ol Israel i bin bung bilong tingim taim God i bin kisim bek ol long kalabus long Isip, na olsem tasol ol Kristen i save tingim wanpela taim long olgeta yia olsem God i bin kisim bek ol long sin na indai.​​—⁠Kisim Bek 12:​11, 17; Rom 5:​20, 21.

Tingting long wanpela bung i save kamap wanpela taim long olgeta yia bilong tingim wanpela bikpela samting em i no narapela kain samting. Tingim olsem: Taim tupela marit i laik tingim de bilong marit o wanpela kantri i laik mekim sampela samting bilong tingim wanpela bikpela samting i bin kamap long ol. Planti taim ol i save tingim dispela samting wanpela taim long olgeta yia, long de dispela samting i bin kamap. Inap planti handet yia bihain long Krais, planti man ol i tok ol i Kristen ol man i kolim ol olsem “Ol Man Bilong De 14.” Ol i kolim ol olsem, long wanem, ol i bin tingim indai bilong Jisas wanpela taim long olgeta yia, em long Nisan 14.

Em i No Gat Planti Bilaspasin

Aposel Pol i tok pasin bilong tingim Kaikai Bilong Bikpela bai helpim ol disaipel bilong Jisas long “tokaut long pen na i dai bilong Bikpela.” (1 Korin 11:26) Olsem na dispela bung em bilong tingim bikpela wok indai bilong Krais i mekim bilong kamapim laik bilong God.

Jisas Krais i stap gut long God i go inap long taim em i dai, na long dispela rot em i kamapim klia olsem God Jehova em i Man bilong wokim yumi na em i gat gutpela tingting na pasin sori na em i stretpela King. Tru Satan i tok ol man i no inap i stap gut long God, tasol Jisas i no olsem Adam, Jisas i kamapim long ples klia olsem wanpela man inap i stap gut long God, maski bikpela hevi tru i painim em.​​—⁠Jop 2:​4, 5.

Kaikai Bilong Bikpela i helpim yumi tu long tingim pasin bilong Jisas long laikim tru ol narapela na daunim sampela laik bilong em yet. Maski bikpela hevi i painim em, Jisas i bihainim stret olgeta tok bilong Papa bilong em. Long dispela rot em inap long givim laip bilong em olsem man i gutpela olgeta bilong karamapim bikpela pe bilong sin bilong Adam. Olsem Jisas yet i tok, em i kam “bilong givim laip bilong em bilong baim bek planti manmeri.” (Matyu 20:28) Olsem na olgeta man i bilip long Jisas, God bai lusim sin bilong ol na ol inap kisim laip i stap oltaim. Dispela i stret wantaim laik bilong Jehova long pastaim.​​—⁠Rom 5:​6, 8, 12, 18, 19; 6:​23; 1 Timoti 2:​5, 6.a

Ol dispela samting i kamapim tu gutpela pasin na pasin marimari bilong Jehova long mekim ol samting bilong kisim bek ol man. Baibel i tok: “God i gat wanpela Pikinini tasol, na em i salim dispela Pikinini i kam long graun, bai yumi kisim laip long em. Long dispela pasin God i soim yumi olsem em i laikim yumi tru. Pasin bilong laikim ol arapela, em i pasin bilong God. Yumi no ken ting, yumi bin laikim God pastaim. Nogat. God i laikim yumi pastaim. Olsem na em i bin salim Pikinini Man bilong en i kam long graun bilong lusim ol sin bilong yumi.”​​—⁠1 Jon 4:​9, 10.

Tru tumas, bung bilong Memorial em i gutpela samting tru! Em i no gat planti bilaspasin na i no hatwok long ol manmeri bilong kain kain sindaun long olgeta hap ol i ken tingim, tasol Memorial i makim bikpela samting bilong helpim yumi long tingim indai bilong Jisas inap longtaim.

Em i Helpim Yu Olsem Wanem?

Bikpela bilong yumi Jisas Krais i bin givim laip bilong em olsem ofa, maski dispela em i bikpela pe tru long em yet na Papa bilong em, Jehova. Dai i save painim yumi olgeta, long wanem, yumi kisim sin long Adam, tasol dispela kain dai i no ken painim Jisas, long wanem, em i no gat sin. (Rom 5:​12; Hibru 7:​26) Em inap i stap laip oltaim oltaim. Sapos Jisas i no larim, ol man i no inap tekewe laip bilong em. Em i tok: “I no gat wanpela man inap pinisim laip bilong mi. Nogat. Long laik bilong mi yet mi bai lusim laip bilong mi.”​​—⁠Jon 10:⁠18.

Tasol long laik bilong em yet em i givim laip bilong em olsem man i gutpela olgeta olsem ofa bambai “em i ken i dai, na long dispela pasin em i ken bagarapim Satan, em dispela man i gat strong bilong mekim ol manmeri i dai. Ol manmeri ol i save pret long dai, na olgeta taim ol i stap long graun, dispela pret bilong ol i mekim ol i stap olsem ol kalabus bilong Satan. Tasol Jisas em i dai bilong lusim ol long dispela kalabus.” (Hibru 2:​14, 15) Na tu, pasin bilong Krais long laikim tru ol narapela na daunim sampela laik bilong em yet i kamap ples klia long pasin bilong em long i dai. Em i bin save tru long wanem pasin em bai kisim pen na i dai long en.​​—⁠Matyu 17:22; 20:​17-​19.

Memorial i helpim yumi tu long tingim nambawan bikpela samting Papa bilong yumi long heven, Jehova, em i bin mekim bilong kamapim klia olsem em i laikim tumas ol manmeri. Jehova, em i man bilong “sori moa yet long yumi, na oltaim em i save marimari long yumi,” olsem na em i bel hevi tru taim em i harim na lukim olsem Jisas “i singaut strong na i krai planti” long gaden Getsemani, na ol i wipim em nogut tru, na nilim em long pos, na em i kisim bikpela pen na isi isi em i dai. (Jems 5:​11; Hibru 5:7; Jon 3:​16; 1 Jon 4:​7, 8) Taim ol man i tingim dispela samting, maski ol i stap long nau, em planti handet yia bihain, bel bilong planti man i save bagarap stret.

Tingim bikpela pe tru God Jehova na Jisas Krais i bin givim bilong helpim yumi sinman! (Rom 3:​23) Long olgeta de, yumi pilim hevi bilong sin na ol rong yumi save mekim. Tasol long rot bilong bilip long ofa bilong Jisas, yumi ken askim God long lusim ol rong bilong yumi. (1 Jon 2:​1, 2) Dispela i opim rot long yumi na yumi no sem long beten long God na bel bilong yumi i no gat tok. (Hibru 4:​14-​16; 9:​13, 14) Na tu, yumi inap tingting long i stap oltaim oltaim long Paradais long graun. (Jon 17:3; KTH 21:​3, 4) Nambawan gutpela pasin bilong Jisas long daunim laik bilong em yet i as bilong ol dispela blesing na planti blesing moa.

Pilim Tru Ol Samting Bilong Kaikai Bilong Bikpela

Kaikai Bilong Bikpela em i kamapim ples klia tru olsem “marimari bilong God i pulap tru long [yumi].” Ol samting God Jehova i bin mekim bilong baim bek ol man, em i wanpela “presen God i bin givim yumi”​—⁠Jehova inap mekim olsem long rot bilong pasin bilong Jisas long laikim tru ol narapela na daunim sampela laik bilong em yet. (2 Korin 9:​14, 15) Olsem wanem? Ol dispela gutpela pasin God i bin mekim long rot bilong Jisas Krais ol i kirapim bel bilong yu long tenkyu tru long em?

Mipela i bilip tru olsem ol i mekim olsem. Olsem na mipela i amamas long singautim yu long bung wantaim ol Witnes Bilong Jehova long tingim Memorial bilong indai bilong Jisas. Long dispela yia Memorial bai kamap long Trinde, Epril 16, bihain long san i go daun pinis. Ol Witnes Bilong Jehova long hap bilong yu ol bai amamas long tokim yu long taim na ples stret em dispela bikpela bung bai kamap.

[Futnot]

[Blok/Ol Piksa long pes 6]

“DISPELA EM I BODI BILONG MI” O “DISPELA EM I MAKIM BODI BILONG MI” WANEM TOK I STRET?

Taim Jisas i tok, “mi yet mi dua” na, “mi yet mi diwai wain tru,” i no gat wanpela man i ting em i wanpela dua tru o wanpela diwai wain tru. (Jon 10:7; 15:⁠1) Na olsem tasol, taim Buk Baibel i kolim tok bilong Jisas, em i tok: “Dispela kap wain em i nupela kontrak,” yumi no ken ting olsem dispela kap yet i nupela kontrak. Na tu, taim em i tok olsem bret “em i” bodi bilong em, yumi no ken ting olsem bret “em i” bodi tru bilong em. Olsem na Baibel Charles B. Williams i tok: “Dispela em i makim bodi bilong mi.”​​—⁠Luk 22:​19, 20.

[Piksa long pes 5]

Bret i no gat yis na wain, ol i piksa bilong bodi bilong Jisas i no gat sin na blut em i bin kapsaitim

[Piksa long pes 7]

Memorial i kirapim yumi long tingim bikpela pasin sori God Jehova na Jisas Krais i bin kamapim