Ol Wokman Bilong Jehova i Bilip na Wetim Samting Bai Kamap Tru
“Lain Israel ol birua i no bagarapim, bai ol i kamap man bilong helpim ol arapela lain, olsem wara bilong nait Bikpela i save salim i kam . . . na bai ol i mekim dispela long strong bilong God tasol.”—MAIKA 5:7.
1. Olsem wanem Israel bilong spirit i stap olsem samting bilong givim nupela strong long ol man?
JEHOVA em i Bikpela Man i wokim ren na wara bilong nait. Yumi no inap bilip na wetim ol man long kamapim wara bilong nait o ren. Profet Maika i bin tok: “Ol dispela lain Israel ol birua i no bagarapim, bai ol i kamap man bilong helpim ol arapela lain, olsem wara bilong nait Bikpela i save salim i kam daun long gras na olsem ren i save mekim ol diwai samting i kamap gutpela. Na bai ol i mekim dispela long strong bilong God tasol, i no long strong bilong ol yet.” (Maika 5:7) Long nau husat dispela “lain Israel ol birua i no bagarapim”? Em ol Israel bilong spirit, hap lain bilong “Israel tru bilong God” i stap yet. (Galesia 6:16) Long “ol arapela lain” bilong graun, ol i stap olsem “wara bilong nait Bikpela i save salim” na olsem “ren i save mekim ol diwai samting i kamap gutpela.” Yes, long nau ol Kristen God i bin makim ol i stap olsem wanpela blesing i kam long God long ol man. Ol i save autim tok bilong Kingdom na long dispela rot Jehova i save yusim ol long tokim ol man long samting tru ol i ken bilip na wetim i kamap.
2. Bilong wanem yumi bilip olsem samting yumi wetim em bai kamap tru maski yumi stap long dispela graun i gat planti hevi long en?
2 Yumi no kirap nogut olsem ol man bilong dispela graun i no gat samting tru ol inap bilip na wetim. Wok gavman i no gat strong, pasin bilong bihainim ol stretpela lo i bagarap, pasin raskol, hevi bilong mani, pasin teroris, ol pait—yumi save ol dispela samting bai kamap long dispela graun Satan i bosim. (1 Jon 5:19) Planti man i pret long tingim wanem ol samting inap kamap bihain. Tasol yumi ol man i lotuim Jehova, yumi no save pret, yumi wetim gutpela samting bilong kamap bihain na samting yumi wetim i tru, long wanem, Baibel i as bilong en. Yumi bilip long Jehova na long Baibel, long wanem, olgeta tok bilong em i save kamap tru.
3. (a) Wanem as na Jehova i tok em bai givim strafe long lain Israel na lain Juda? (b) Bilong wanem ol tok bilong Maika i stret long nau tu?
3 Tok profet God i kirapim Maika long raitim i save strongim yumi long wokabaut long nem bilong Jehova na i givim yumi as tru bilong bilip na wetim samting bai kamap. Long yia 700 B.C.E. samting, taim Maika i mekim wok profet, ol manmeri bilong God i bruk long tupela lain, em lain Israel na lain Juda, na tupela lain wantaim i givim baksait long kontrak bilong God. Dispela i mekim na tupela lain i lusim ol stretpela lo, tromoi lotu i tru, na givim bel long kisim planti tumas mani kago. Olsem na Jehova i tokaut long em bai givim strafe long ol. Tru, dispela tok lukaut i go long ol manmeri i bin stap long taim bilong Maika. Tasol ol samting yumi lukim long nau i kain olsem long taim bilong Maika, olsem na tok bilong Maika i stret long taim bilong yumi tu. Dispela bai kamap ples klia moa taim yumi skelim sampela bikpela tok bilong ol 7-pela sapta bilong Buk Maika.
Ol Bikpela Tok
4. Maika sapta 1 i go 3 i givim wanem save long yumi?
4 Pastaim yumi ken skelim ol bikpela tok bilong Buk Maika. Long sapta 1, Jehova i kamapim klia pasin bikhet bilong Israel na Juda. Ol i bikhet olsem na dispela em i as na Israel bai kisim bagarap na strafe bilong Juda tu bai i bikpela. Sapta 2 i tokaut olsem ol maniman na ol man i gat namba ol i givim hevi long ol lain i no gat strong na ol lain i no inap lukautim ol yet. Tasol i gat wanpela tok promis bilong God i stap. God bai bungim ol lain bilong em na mekim ol i kamap wanbel. Sapta 3 i kamapim ol tok Jehova i mekim long ol hetman bilong gavman na long ol profet i bikhet. Ol hetman i wok long paulim ol stretpela lo, na ol profet i autim ol tok giaman. Tasol maski ol dispela hevi i stap, holi spirit i strongim Maika long tokaut long strafe bilong Jehova.
5. Wanem bikpela stori bilong Maika sapta 4 na 5?
5 Sapta 4 i tok profet olsem long taim bilong las de, olgeta lain bai go antap long maunten long haus bilong Jehova na bai em i ken skulim ol. Tasol paslain long dispela, ol Juda bai go kalabus long Babilon, na bihain Jehova bai kisim bek ol. Sapta 5 i tokaut olsem Mesaia bai kamap long Betlehem bilong Juda. Em bai bosim ol manmeri bilong em na kisim bek ol long han bilong ol lain i daunim ol.
6, 7. Sapta 6 na 7 bilong tok profet bilong Maika i stori long wanem ol bikpela tok?
6 Maika sapta 6 i kamapim ol tok Jehova i sutim long ol lain bilong em olsem ol i stap long kot. Em i bin mekim wanem na lain bilong em i bikhet? Em i no mekim wanpela samting. Ol samting em i tok ol man i mas mekim i no hatwok. Em i laik bai ol man i lotu long em ol i mas bihainim stretpela pasin, pasin bilong mekim gut long ol narapela, pasin daun, na stap wanbel wantaim em. Tasol ol Juda na ol Israel i no bin mekim olsem. Ol i bihainim pasin bilong bikhet, olsem na ol bai kisim pe bilong dispela pasin.
7 Long laspela sapta bilong tok profet bilong em, Maika i tokaut long ol pasin nogut bilong ol man i stap long taim bilong em. Tasol em i no larim belhevi i daunim em. Em i strong long “wetim” Jehova. (Maika 7:7) Pinis bilong buk i kamapim bilip olsem Jehova bai marimari long lain bilong em. Ol samting bilong bipo i kamapim klia olsem ol samting Maika i wet long en i bin kamap. Long 537 B.C.E., taim Jehova i pinisim wok bilong stretim lain bilong em, em i marimari long ol na kisim wanpela hap lain bilong ol i go bek long ples bilong ol.
8. Bai yu mekim wanem tok bilong kamapim ol bikpela tok bilong Buk Maika?
8 Em gutpela tok tru Jehova i givim long Maika! Dispela buk i stori long pasin sampela lain i bin bihainim na i olsem tok lukaut long ol samting God bai mekim long ol man i tok olsem ol i lotuim em tasol ol i no stap gut long em. Em i tok profet long ol samting i kamap long nau. Na em i kamapim tok bilong God long pasin yumi mas bihainim bilong mekim bilip bilong yumi i strong nau long dispela taim bilong ol hevi.
Bikpela King Jehova i Toktok
9. Olsem Maika 1:2 i tok, Jehova bai mekim wanem?
9 Nau bai yumi skelim gut ol tok bilong Buk Maika. Maika 1:2 i tok: “Yupela olgeta lain manmeri, harim dispela tok. Yupela olgeta man i stap long graun, putim yau long tok bilong God. God, Bikpela em i kotim yupela. Yupela harim. Bikpela i stap long haus bilong en long heven na em i mekim dispela tok.” Sapos yu bin stap long taim bilong Maika, ating ol dispela tok bai kirapim tru tingting bilong yu. Tru tumas, ol dispela tok i kirapim tingting bilong yumi, long wanem, Jehova i stap long haus holi bilong em na mekim toktok, na toktok bilong em i no bilong ol Israel na Juda tasol, nogat, em i bilong ol manmeri long olgeta hap. Long taim bilong Maika, ol pipel i bin givim baksait long Bikpela King Jehova inap longpela taim tumas. I no longtaim na senis bai kamap. Jehova i strong olsem em bai kirap stretim dispela samting.
10. Bilong wanem tok bilong Maika 1:2 i bikpela samting long yumi?
10 Na i wankain long taim bilong yumi. Kamapim Tok Hait 14:18-20 i soim olsem long nau tu Jehova i stap long haus holi bilong em na mekim toktok. I no longtaim na em bai kirap stretim ol samting, na ol bikpela samting i kamap bai mekim ol manmeri i kirap nogut tru. Long dispela taim, em bai tromoi “diwai wain bilong graun” i go long bikpela tang ston bilong krungutim pikinini wain. Dispela samting i makim olsem dispela graun Satan i bosim bai bagarap olgeta.
11. Wanem mining bilong ol tok bilong Maika 1:3, 4?
11 Putim yau long samting Jehova bai mekim. Maika 1:3, 4 i tok: “Bikpela i lusim gutpela ples bilong em yet na i laik i kam. Em bai i kam daun na wokabaut antap long kil bilong ol maunten. Na bai ol maunten i kamap olsem wara aninit long lek bilong en, olsem kandel i lait na gris bilong en i save kamap wara. Bai ol dispela maunten i kapsait i go daun long ples stret olsem wara i save ran i kam daun long maunten.” Olsem wanem? Bai Jehova i lusim ples bilong em long heven na wokabaut tru tru antap long ol maunten bilong Graun Bilong Promis? Nogat. Em i no gat wok long mekim olsem. Em bai stap long heven na kamapim laik bilong em hia long graun. Na tu, i no graun tru tru bai kisim nogut—em ol manmeri i stap long dispela graun, ol bai kisim hevi. Taim Jehova i kirap mekim dispela samting, bikpela hevi bai painim ol man i no stap gut long em—kain olsem ol maunten i kamap wara olsem gris bilong kandel i save kamap wara, na i olsem bikpela guria i mekim na stretpela ples i bruk olgeta.
12, 13. Olsem 2 Pita 3:10-12 i kamapim, yumi mas mekim wanem na bai yumi inap kisim samting yumi wetim?
12 Ating tok profet bilong Maika 1:3, 4 i kirapim yu long tingim narapela tok profet i stori long ol samting nogut bai kamap long graun. Long 2 Pita 3:10, aposel Pita i tok: “De bilong Bikpela bai i kamap wantu tasol olsem ol stilman i save kam. Long dispela De skai bai i pairap bikpela na i pinis olgeta. Na olgeta liklik samting God i bin wokim graun long en, paia bai i kukim ol na ol bai i pinis. Olsem na graun wantaim olgeta samting ol i wokim i stap long en, ol bai i no i stap moa.” Wankain olsem tok profet bilong Maika, tok bilong Pita i no makim graun na heven tru tru. Em i makim bikpela hevi tru i laik painim ol man bilong dispela graun i givim baksait long God.
13 Maski dispela bagarap i laik kam, ol Kristen inap bilip tru olsem gutpela samting bai kamap bihain, olsem Maika i bin bilipim. Olsem wanem ol inap bilip tru olsem? Ol i mas bihainim ol tok Pita i kamapim long ol ves i kam bihain. Em i tok: “Yupela i ting yupela i mas bihainim wanem kain pasin? Yupela i mas givim laip bilong yupela long God na wokabaut long pasin holi na bihainim olgeta pasin bilong God. Long dispela pasin yupela i mas wetim De bilong God i kamap.” (2 Pita 3:11, 12) Yumi bai kisim samting yumi wet long en sapos yumi kisim pasin bilong bihainim tok na bihainim pasin holi na givim bel long mekim ol wok bilong God. Bilong kisim samting yumi wetim yumi no ken lusim tingting olsem dispela de bilong Jehova bai kam.
14. Bilong wanem i stret lain Israel na lain Juda i kisim strafe?
14 Jehova i kamapim as na ol lain bilong em long bipo ol i mas kisim strafe. Maika 1:5 i tok: “Dispela olgeta samting bai i kamap, long wanem, ol Israel i bin mekim sin na sakim tok bilong God. Dispela bikhetpasin i stap long Israel, em i asua bilong husat? Bilong ol Samaria tasol. Na pasin bilong lotu long ol giaman god long Juda, em i asua bilong husat? Bilong ol Jerusalem tasol.” Jehova i as na Israel na Juda i stap. Tasol ol i bin sakim tok bilong em, na pasin bikhet bilong ol i bikpela tru na dispela pasin i stap long biktaun bilong Israel, em Samaria, na long biktaun bilong Juda, em Jerusalem.
Pasin Nogut i Pulap
15, 16. Ol man i stap long taim bilong Maika i bin mekim wanem ol pasin nogut?
15 Pasin nogut bilong ol man long taim bilong Maika i stap ples klia long Maika 2:1, 2, em i tok: “Sori tumas long yupela man i tingting long mekim pasin nogut, bai yupela i bagarap. Yupela i no save slip long nait. Yupela i tingting long mekim pasin nogut tasol, na long moningtaim tru yupela i save kirap na mekim dispela samting, long wanem, yupela i painim rot pinis. Sapos yupela i mangalim gaden bilong wanpela man, yupela i save kisim tasol. Na sapos yupela i mangalim haus, yupela i save kisim tasol. Yupela i save wokim pasin giaman na stilim ol haus samting bilong ol arapela man.”
16 Ol man bilong mangal i no save slip long nait, ol i wok long tingim olsem wanem ol i ken pulim nating gaden na haus bilong ol neiba bilong ol. Long moningtaim, ol i hariap long mekim samting ol i bin tingting long en. Sapos ol i bin tingim lo bilong Jehova ol bai i no inap mekim ol kain pasin nogut olsem. Lo Bilong Moses i lukautim ol rabisman. Lo i tok graun bilong wanpela lain famili i no ken kamap graun bilong narapela man inap oltaim oltaim. Tasol ol dispela man bilong mangal ol i no wari long dispela samting. Ol i sakim tok bilong Wok Pris 19:18, em i tok: “Yu mas laikim tru ol wantok olsem yu laikim yu yet.”
17. Wanem samting inap kamap taim ol manmeri husat i tok olsem ol i lotuim God ol i tingim wok bilong kisim samting bilong skin i namba wan bikpela samting?
17 Dispela i soim yumi wanem samting inap painim ol manmeri husat i tok ol i lotuim God, tasol ol i no tingim moa sampela mak bilong spirit long winim—namba wan bikpela samting bilong ol em wok bilong kisim ol samting bilong skin. Pol i givim tok lukaut long ol Kristen i stap long taim bilong em: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta.” (1 Timoti 6:9) Taim man i putim wok bilong kisim mani i stap olsem namba wan samting long laip bilong em, i olsem em i lotuim wanpela god giaman—mani. Dispela god giaman i no gat wanpela gutpela samting bilong givim ol man long bihain.—Matyu 6:24.
18. Wanem samting bai painim ol man long taim bilong Maika husat i tingting tasol long kisim planti samting bilong skin?
18 Planti man long taim bilong Maika i bin kisim hevi long ol pasin ol i bin mekim na dispela i lainim ol olsem pasin bilong bilip long mani kago em i no inap tru long helpim ol. Long Maika 2:4, Jehova i tok: “Taim ol dispela samting nogut i kamap bai ol man . . . i tok bilas long yupela. Na bai ol i mekim song bilong sori na krai olsem, ‘Mipela i bagarap olgeta. Bikpela i givim graun bilong mipela long ol arapela lain. Na em i salim mipela i go kalabus long narapela hap graun.’ ” Yes, ol dispela man i bin stilim haus na graun bilong ol narapela, graun bilong ol lain famili bilong ol yet bai lus. Ol bai go kalabus long narapela kantri, na ol samting bilong ol bai i go long ol narapela lain. Bikpela laik bilong ol long kisim planti samting bilong skin long bihain bai i nogat nau.
19, 20. Wanem samting i bin painim ol Juda i bilip long Jehova?
19 Tasol ol man i bilip long Jehova, ol gutpela samting ol i wetim bai kamap tru. Jehova i save tingim ol tok promis em i bin mekim long Abraham na Devit, na em i save marimari long ol man olsem Maika, em ol man i laikim tru Jehova na ol i krai sori long ol wanples i stap longwe long God. Bilong helpim ol stretpela man, wok bilong stretim bek ol samting bai kamap long taim God i makim.
20 Dispela i kamap long 537 B.C.E., bihain long Babilon i pundaun na taim sampela bilong lain Juda i go bek long ples bilong ol. Taim ol i mekim olsem, namba wan truim bilong tok bilong Maika 2:12 i kamap. Jehova i tok: “Bai mi bungim yupela olgeta manmeri bilong Israel i stap yet. Bai mi bungim yupela gen olsem ol sipsip wasman i bringim i kam bek long banis. Na planti manmeri bai i pulap long graun bilong yupela, olsem ol sipsip i pulap long hap i gat gutpela gras bilong kaikai.” Tru tumas, Jehova em i God bilong sori! Bihain long em i givim strafe long lain bilong em, em i larim hap lain i go bek na lotuim em long graun em i bin givim long ol tumbuna bilong ol.
Ol Samting i Wankain Long Taim Bilong Yumi
21. Olsem wanem ol samting bilong nau i wankain olsem long taim bilong Maika?
21 Taim yumi bin skelim sapta 1 na 2 bilong Maika, ating yu pilim tru olsem ol samting long nau i wankain olsem long taim bilong Maika, a? Olsem long taim bilong Maika, i gat planti man long nau i tok ol i lotuim God. Tasol olsem ol man bilong Juda na Israel, ol i no stap wanbel, na tu, i bin i gat ol woa i kamap namel long ol yet. Planti ol maniman bilong Kristendom i bin daunim ol man i stap rabis. Pasin bilong ol hetman bilong lotu long orait long ol samting Baibel i tambuim i wok long kamap bikpela moa. Olsem na yumi no kirap nogut olsem i no longtaim na Kristendom wantaim ol narapela lain bilong “Bikpela taun Babilon,” em olgeta lotu giaman, bai bagarap! (KTH 18:1-5) Tasol wankain olsem long taim bilong Maika, Jehova i gat ol gutpela wokboi i stap yet long graun.
22. Wanem tupela lain i bilip na wet long Kingdom bilong God?
22 Long 1919, ol Kristen God i bin makim ol i lusim Kristendom olgeta, na ol i stat long autim gutnius bilong Kingdom i go long olgeta lain man. (Matyu 24:14) Pastaim ol i givim bel long painim hap lain bilong ol Israel bilong spirit. Bihain ol i kirap bungim “ol arapela sipsip,” na tupela lain wantaim i kamap “wanpela lain sipsip tasol na wanpela wasman.” (Jon 10:16) Maski ol i mekim wok bilong God long 234 narapela narapela kantri, Jehova i ‘bungim ol olsem ol sipsip em wasman i bringim i kam bek long banis.’ Long nau dispela banis bilong ol sipsip i gat “planti manmeri” tru long en. Ol i no bilip long ol samting bilong nau, nogat, ol i bilip long Kingdom bilong God, em dispela kingdom klostu nau bai kamapim gen Paradais long graun.
23. Wanem as na yu ken bilip tru olsem samting yu bilip na wetim bai kamap tru?
23 Long ol manmeri i stap gut long Jehova na lotuim Em, laspela ves bilong Maika sapta 2 i tok: “Bikpela yet, em bai i go pas long ol.” Yu yet yu stap insait long dispela lain i mats i go? Yu bihainim King bilong yu, Jisas Krais, na Jehova yet i go pas long ol? Sapos olsem, yu ken bilip tru olsem klostu nau bai yu win na samting yu wet long en bai kamap tru. Dispela bai kamap ples klia moa taim yumi skelim moa ol bikpela tok bilong tok profet bilong Maika.
Bai Yu Bekim Olsem Wanem?
• Long taim bilong Maika, wanem as na Jehova i tokaut olsem em bai givim strafe long lain Juda na lain Israel?
• Wanem samting inap kamap taim ol manmeri husat i tok ol i lotuim God ol i tingim wok bilong kisim samting bilong skin i namba wan bikpela samting?
• Yu skelim pinis tok bilong Maika sapta 1 na 2, olsem na wanem as na yu bilip tru olsem samting yu bilip na wetim bai kamap tru?
[Piksa long pes 9]
Tok profet bilong Maika inap strongim yumi long ol samting bilong spirit
[Ol Piksa long pes 10]
Olsem hap lain Juda i bin go bek long ples long 537 B.C.E., ol Israel bilong spirit na ol poroman bilong ol, ol i save litimapim lotu i tru