Oltaim i Mas i Gat Wanpela Lo Bilong Baibel Bilong Stiaim Yu?
TAIM yu stap yangpela, ating papamama i bin putim planti lo long yu mas bihainim. Taim yu kamap bikpela, yu luksave olsem ol i laik helpim yu, olsem na ol i bin putim ol dispela lo. Na ating yu bihainim yet sampela bilong ol dispela lo, maski yu no stap aninit moa long wok bos bilong ol.
Papa bilong yumi long heven, Jehova, em i bin givim sampela lo long yumi long rot bilong Baibel. Olsem: Em i tambuim pasin bilong lotuim ol giaman god, pasin pamuk, bagarapim marit, na stil. (Kisim Bek 20:1-17; Aposel 15:28, 29) Taim yumi “kamap strongpela manmeri” long ol samting bilong spirit, yumi pilim tru olsem Jehova i tingim ol samting i gutpela bilong helpim yumi, na ol lo em i putim i no kalabusim yumi.—Efesus 4:15; Aisaia 48:17, 18; 54:13.
Tasol, i gat planti samting we i no gat wanpela lo stret bilong en. Olsem na sampela i pilim olsem sapos i no gat wanpela lo bilong Baibel, orait ol i ken bihainim laik bilong ol yet na mekim ol samting. Ol i tok sapos God i no orait long wanpela samting, orait em bai putim lo i kamapim klia dispela laik bilong em.
Ol man i gat kain tingting olsem, planti taim ol i no save tingting gut na makim samting ol bai mekim, na bihain ol i save bel hevi long dispela. Ol i no luksave olsem Baibel i kamapim ol lo, na tu, em i kamapim ol tok i makim tingting bilong Jehova. Taim yumi stadi long Baibel na yumi kisim save long tingting bilong Jehova long ol samting, dispela i save skulim gut maus bilong bel, na i helpim yumi long tingim ol pasin bilong em taim yumi makim ol samting yumi bai mekim. Taim yumi mekim olsem, yumi mekim Jehova i belgut, na tu, dispela i helpim yumi yet.—Efesus 5:1.
Ol Man Baibel i Stori Long Ol
Taim yumi ritim ol stori bilong Baibel long ol wokman bilong God long bipo, yumi lukim olsem ol i bin skelim tingting bilong Jehova taim i no gat wanpela lo i makim stret samting ol i mas mekim. Tingim Josep. Long taim meri bilong Potifar i wok long mekim ol samting bilong pulim em long mekim pasin pamuk, i no bin gat wanpela lo God i bin raitim i tambuim dispela pasin. Tasol maski i olsem, Josep i skelim olsem sapos em i mekim dispela pasin, em bai mekim sin long maus bilong bel na “long ai bilong God.” (Stat 39:9) Josep i luksave olsem pasin bilong bagarapim marit em i no stret wantaim tingting na laik bilong God, olsem God i bin kamapim long Iden.—Stat 2:24.
Tingim narapela man tu Baibel i stori long em. Long Aposel 16:3, yumi kisim save olsem paslain long Pol i kisim Timoti i go wantaim em long wok misineri, em i bin katim skin bilong Timoti. Tasol long ves 4, yumi lukim olsem Pol na Timoti i go long ol taun na ol i givim “dispela tok bipo ol aposel na ol hetman ol i pasim long Jerusalem.” Wanpela bilong ol dispela tok em long ol Kristen i no stap aninit moa long lo bilong katim skin! (Aposel 15:5, 6, 28, 29) Bilong wanem Pol i ting olsem Timoti i mas katim skin? “Em i ting long ol Juda i stap long ol dispela hap, na em i mekim dispela pasin, long wanem, olgeta Juda i save olsem, papa bilong Timoti em i Grik.” Pol i no laik bai ol Juda i pundaun. Em i laik bai olgeta man i ken “skelim pasin bilong [ol Kristen] na long bel bilong ol, ol i ken save olsem [ol dispela Kristen] i mekim stretpela wok long ai bilong God.”—2 Korin 4:2; 1 Korin 9:19-23.
Dispela kain tingting i makim tru pasin bilong Pol na Timoti. Ritim ol hap bilong Baibel olsem Rom 14:15, 20, 21 na 1 Korin 8:9-13; 10:23-33, na lukim olsem Pol i tingim tru i stap bilong ol narapela long ol samting bilong spirit, na em i tingim tru ol man em ol inap pundaun long samting i no gat rong long en. Na Pol i stori long Timoti olsem: “I no gat narapela man i stap wantaim mi em i wankain olsem Timoti. Em i save wanbel wantaim mi na oltaim em i save tingting long painim rot bilong helpim yupela. Olgeta arapela man i save wari long ol samting bilong ol yet, na ol i no save laik tru long mekim wok bilong Jisas Krais i go het. Tasol yupela i save long gutpela pasin bilong Timoti. Yupela i save, em i bin helpim mi long wok bilong gutnius, olsem pikinini i save helpim papa.” (Filipai 2:20-22) Dispela tupela Kristen i makim gutpela pasin tru yumi ken bihainim long nau! Taim i no gat lo stret bilong wanpela samting, ol i no bihainim laik bilong ol yet, nogat. Ol i bihainim pasin laikim bilong Jehova na Pikinini bilong em, na ol i skelim olsem pasin bilong ol bai mekim wanem long ol narapela long ol samting bilong spirit.
Tingim Jisas Krais, em man i stap olsem nambawan gutpela piksa. Long tok bilong em antap long maunten, em i stori gut olsem man i klia gut long as tingting bilong ol lo bilong God, em bai bihainim gut tru, winim samting lo i tok long en. (Matyu 5:21, 22, 27, 28) Jisas, Pol, Timoti, na Josep, ol i no bin kisim tingting olsem sapos i no gat lo stret bilong wanpela samting, orait ol i ken bihainim laik bilong ol yet, nogat. Ol i mekim samting i stret wantaim tingting bilong God, na ol i bihainim samting em Jisas i kolim olsem tupela lo i winim olgeta narapela lo—laikim God na ol narapela.—Matyu 22:36-40.
Olsem Wanem Long Ol Kristen Long Nau?
Yumi no ken tingim Baibel olsem wanpela pepa bilong gavman, na ting olsem em i mas kolim stret lo bilong olgeta samting. Yumi mekim Jehova i belgut taim yumi mekim samting i kamapim olsem yumi bihainim tingting bilong em, maski i no gat lo long dispela samting. O yumi ken tok, yumi no wet oltaim long Baibel i mas tokim yumi long samting God i laik yumi mas mekim, nogat, yumi yet inap ‘save long laik bilong Bikpela.’ (Efesus 5:17; Rom 12:2) Bilong wanem dispela i mekim Jehova i amamas? Long wanem, em i soim olsem yumi no tingim laik bilong yumi yet tasol, nogat, yumi tingting long amamasim em. Em i soim tu olsem yumi pilim pasin laikim bilong em na yumi laik bihainim, na mekim dispela pasin i stap olsem samting i kirapim yumi. (Sindaun 23:15; 27:11) Na tu, taim yumi mekim ol samting olsem Baibel i makim, dispela i helpim yumi long stap gut long ol samting bilong skin na bilong spirit.
Yumi ken stori long olsem wanem yumi inap bihainim dispela stiatok long ol samting bilong yumi yet.
Amamas Yumi Laik Kisim
Tingim wanpela yangpela man em i laik baim wanpela kaset bilong musik. Em i laikim ol musik long dispela kaset, tasol em i tingting planti, long wanem, ol rait long karamap bilong kaset i makim olsem ol singsing i kolim ol tok bilong pasin sem na i doti tru. Na tu, planti singsing long dispela kaset i kamapim pasin bilong kros na belhat. Dispela yangpela i laikim Jehova, olsem na em i laik save long tingting bilong Em long dispela samting. Olsem wanem em inap save long laik bilong God long dispela samting em i laik mekim?
Long pas aposel Pol i salim long ol Galesia, em i kolim ol pasin bilong olpela bel na ol pasin em spirit bilong God i save kamapim. Ating yu save pinis long ol dispela pasin bilong spirit: pasin bilong laikim tru narapela, amamas, stap bel isi, no belhat kwik, helpim ol man, mekim gutpela pasin long ol, wokabaut stret oltaim, stap isi na daunim laik bilong olpela bel. Tasol wanem ol pasin i makim ol pasin bilong olpela bel? Pol i tok: “Yupela i save pinis long pasin bilong olpela bel. Em olkain pasin olsem, pasin pamuk na pasin doti na pasin bilong bel i kirap long mekim ol pasin nogut, na pasin bilong lotu long ol giaman god na pasin bilong mekim olkain posin na pasin birua na belhat na kros na bel nogut na mangal na pasin bilong ting long yu yet tasol na tok pait na brukim lain, na pasin bilong bel kaskas long ol man i stap gut na pasin bilong spak na hambak na singaut bikmaus nabaut, na ol kain kain pasin olsem. Bipo mi tokim yupela pinis, na nau mi mekim wankain tok gen. Olgeta man i mekim ol dispela kain pasin, ol bai i no inap i go insait long kingdom bilong God.”—Galesia 5:19-23.
Tingim gen laspela hap tok bilong dispela ves—“ol dispela kain pasin.” Pol i no kolim olgeta samting i makim pasin bilong olpela bel, nogat. Na dispela i no makim olsem man i ken kisim tingting olsem, ‘Baibel i orait long mi ken mekim ol samting em Pol i no kolim.’ Ol man i mas yusim tingting bilong ol long skelim ol samting Pol i no kolim tasol ol i “kain” olsem ol dispela pasin. Ol man i no laik tanim bel na ol i mekim yet “ol dispela kain pasin,” ol bai i no inap kisim ol blesing bilong Kingdom bilong God.
Olsem na yumi mas save long ol pasin Jehova i no laikim. Yu ting i hatwok long mekim olsem? Tingim olsem dokta i tokim yu long kaikai planti prut na kumu samting, na no ken kaikai pai, aiskrim, na ol kain kaikai olsem. Yu ting i hatwok long save olsem kek i bilong wanem lain kaikai? Orait, skelim gen ol pasin em spirit bilong God i save kamapim na ol pasin bilong olpela bel. Yu ting dispela kaset yumi bin toktok long en em i insait long wanem kain pasin? Ol singsing bilong dispela kaset i no kamapim pasin bilong laikim narapela, bosim laik bilong bel, o ol narapela pasin em spirit bilong God i save kamapim, nogat. I no gat wok long man i mas lukim stret wanpela lo na bai em i ken save olsem dispela kaset i no stret wantaim tingting bilong God. Yumi ken bihainim dispela stiatok long ol buk yumi laik ritim, ol piksa wokabaut, ol program bilong televisen, ol kompiuta-gem, ol Web-sait bilong Intenet, na sampela samting moa.
Bilas i Stret
Baibel i kamapim tu ol stiatok long pasin bilong bilas na stretim skin. Ol dispela stiatok i helpim ol Kristen wan wan long holimpas gutpela pasin bilong bilas na mekim gut skin. Long dispela samting tu, man i laikim Jehova em bai tingting long amamasim Papa bilong em long heven, na i no long bihainim laik bilong em yet. Olsem yumi stori pinis, maski Jehova i no putim lo long olgeta wan wan samting, dispela i no makim olsem em i no tingim ol samting lain bilong em i mekim, nogat. Olgeta ples i gat ol narapela narapela stail bilong bilas, na tu, long wankain ples yet, stail bilong bilas i save senis senis. Tasol God i givim ol stiatok bilong stiaim ol manmeri bilong em maski ol i stap long wanem wanem taim o long wanem hap.
Olsem: Long 1 Timoti 2:9, 10, Baibel i tok: “Mi laik bai ol meri i mas putim ol gutpela klos samting, inap tasol long ol. Ol i no ken hambak na bilasim gras na skin bilong ol long ol kain kain bis na bilas gol na ol klos i dia tumas. Nogat. Ol meri i laik bihainim tok bilong God, ol i mas mekim ol kain kain gutpela wok. Dispela em i bilas tru bilong ol.” Olsem na ol meri Kristen—na ol man tu—ol i mas tingim gut stail bilong bilas em ol man long hap bilong ol i ting i stret long ol man i “bihainim tok bilong God.” Kristen i mas tingting gut olsem pasin bilong em long bilas bai kirapim ol man long kisim wanem tingting long ol tok bilong Baibel em i autim. (2 Korin 6:3) Man i bihainim gutpela pasin Kristen em bai i no tingim tumas laik bilong em yet, nogat, em bai tingting long abrusim pasin we inap mekim ol narapela i pundaun o i pasim rot long ol long kisim tok i tru.—Matyu 18:6; Filipai 1:10.
Taim Kristen i lukim olsem wanpela stail bilong bilas inap pundaunim ol narapela, em i ken bihainim pasin bilong aposel Pol na daunim ol laik bilong em yet, na tingim i stap bilong ol narapela long ol samting bilong spirit. Pol i tok: “Yupela i mas bihainim pasin bilong mi na wokabaut, olsem mi tu mi save bihainim pasin bilong Krais na wokabaut.” (1 Korin 11:1) Na long Jisas, Pol i tok: “Krais tu i no bin ting long helpim em yet tasol.” Tok Pol i givim long ol Kristen i klia tru: “Yumi man i gat strongpela bilip, yumi gat wok bilong helpim ol man i no gat strongpela bilip na karim hevi bilong ol. Yumi no ken ting long helpim yumi yet tasol. Yumi olgeta wan wan yumi mas wok long helpim ol brata, bai ol i ken kisim gutpela pasin na bilip bilong ol i ken kamap strong.”—Rom 15:1-3.
Skulim Gut Tingting
Olsem wanem yumi inap skulim gut tingting na bai yumi ken save long rot bilong amamasim Jehova maski em i no putim lo long wanpela samting stret? Sapos yumi ritim Baibel long olgeta de, stadi long en oltaim, na tingim tingim long bel ol samting yumi ritim, yumi bai kamap gutpela moa long pasin bilong skelim gut tingting. Dispela samting i no inap kamap wantu tasol, nogat. Olsem pikinini i go bikpela, pasin bilong kamap bikpela long ol samting bilong spirit, em samting i save kamap isi isi na man i no inap luksave kwik long en. Olsem na yumi mas i gat pasin bilong wet na stap isi, na yumi no ken tingting planti sapos yumi no lukim gutpela samting i kamap hariap. Tasol pasin bilong wet tasol na larim bikpela hap taim i lus nating, dispela i no inap mekim na yumi kisim pasin bilong skelim gut tingting, nogat. Insait long dispela hap taim, yumi mas wok oltaim long skelim Baibel olsem yumi stori pinis, na yumi mas bihainim ol tok bilong en inap tru long skel bilong yumi.—Hibru 5:14.
Yumi ken tok, ol lo bilong God i traim pasin bilong yumi long bihainim tok, tasol ol stiatok bilong em i traim pasin bilong yumi, olsem yumi stap strong long ol samting bilong spirit na yumi laik amamasim em o nogat. Taim yumi wok long kamap bikpela long ol samting bilong spirit, yumi bai wok strong moa long bihainim pasin bilong Jehova na Pikinini bilong em. Yumi bai skelim tingting bilong God olsem i stap long Baibel taim yumi laik makim ol samting yumi bai mekim. Taim yumi amamasim Papa bilong yumi long heven long olgeta samting yumi mekim, amamas bilong yumi yet bai kamap bikpela moa.
[Ol Piksa long pes 23]
Olgeta ples i gat narapela narapela stail bilong bilas, tasol ol stiatok bilong Baibel i mas stiaim yumi taim yumi makim ol bilas yumi laik pasim