Wanpela “Wokboi” i Mekim Gut Wok na i Gat Gutpela Tingting
“Wanem wokboi i gat gutpela tingting, na i save mekim gutpela wok oltaim? Bikman i save makim dispela kain wokboi bilong bosim ol arapela wokboi bilong en.”—MATYU 24:45.
1, 2. I gat wanem as na long nau yumi mas kisim ol kaikai bilong spirit long olgeta taim?
LONG apinun bilong Tunde, Nisan 11, 33 C.E., ol disaipel bilong Jisas i kamapim wanpela askim i bikpela samting tru long yumi long nau. Ol i askim em: “Wanem mak bai i kamap pastaim, na mipela i ken save, yu laik i kam bek na dispela graun i laik pinis?” Bilong bekim dispela askim, Jisas i bin mekim wanpela bikpela tok profet. Em i stori long taim nogut bilong ol bikpela pait, hangre, guria, na ol bikpela sik. Ol i olsem “pen i save kamap pastaim long meri i laik karim pikinini.” Tasol ol samting nogut moa bai kamap. Tok hia bai mekim man i pret, laka?—Matyu 24:3, 7, 8, 15-22; Luk 21:10, 11.
2 Kirap long 1914 i kam inap nau, klostu olgeta samting bilong tok profet bilong Jisas i kamap pinis. Ol samting “olsem pen” i kamap bikpela tru long graun. Tasol ol trupela Kristen i no ken pret. Jisas i tok promis olsem em bai lukautim ol long rot bilong ol gutpela kaikai bilong spirit. Long nau Jisas i stap long heven, orait em i bin mekim wanem na yumi hia long graun i ken kisim ol kaikai bilong spirit?
3. Jisas i mekim wanem na yumi ken kisim ‘kaikai long taim bikman i makim’?
3 Jisas yet i kamapim bekim bilong dispela askim. Taim em i mekim bikpela tok profet, em i askim olsem: “Wanem wokboi i gat gutpela tingting, na i save mekim gutpela wok oltaim? Bikman i save makim dispela kain wokboi bilong bosim ol arapela wokboi bilong en, na bilong skelim kaikai long ol long taim bikman i makim.” Na em i tok moa: “Dispela kain wokboi i ken amamas tru taim bikman bilong en i kam bek na i lukim em i stap mekim wok bilong en. Mi tok tru long yupela, bikman bai i makim dispela wokboi bilong bosim olgeta samting bilong en.” (Matyu 24:45-47) Em nau, bai i gat wanpela “wokboi,” na em wok bilong em long skelim ol kaikai bilong spirit, em “wokboi” i gat gutpela tingting na i save mekim gutpela wok. Olsem wanem? Wokboi em i wanpela man stret, o wanpela lain man we narapela i kamap bihain long narapela, o narapela samting? Dispela gutpela wokboi i skelim ol kaikai bilong spirit em yumi mas kisim, olsem na i gutpela yumi painim bekim bilong askim hia.
Wanpela Man o Wanpela Lain?
4. Olsem wanem yumi save “wokboi i gat gutpela tingting” i no wanpela man stret?
4 “Wokboi i gat gutpela tingting” i no inap makim wanpela man stret. Bilong wanem? Long wanem, dispela wokboi i kirap skelim kaikai bilong spirit long taim bilong ol aposel, na olsem Jisas i tok, wokboi i mekim yet dispela wok long taim Bikman i kam long 1914. Dispela i olsem 1,900 yia bilong wanpela man i stap gut long wok bilong em. I no gat wanpela man i stap planti yia olsem, Metusela tu nogat!—Stat 5:27.
5. Bilong wanem dispela tok “wokboi i gat gutpela tingting” i no inap makim olgeta wan wan Kristen?
5 Orait, yu ting dispela tok “wokboi i gat gutpela tingting” inap makim olgeta wan wan Kristen? Tru, olgeta Kristen i mas i gat gutpela tingting na mekim gutpela wok; tasol Jisas i tingim narapela samting taim em i tok long “wokboi i gat gutpela tingting.” Olsem wanem yumi save i olsem? Yumi save, long wanem, em i tok ‘taim bikman i kam bek’ em bai makim dispela wokboi long “bosim olgeta samting bilong en.” Olsem wanem olgeta wan wan Kristen i ken kisim wok bilong bosim olgeta samting, em “olgeta” samting bilong Bikpela? I no inap tru!
6. Olsem wanem lain Israel i bin stap olsem “wokman,” o “wokboi” bilong God?
6 Olsem na i stret yumi tingting olsem Jisas i tok long wanpela lain Kristen ol i olsem “wokboi i gat gutpela tingting.” Yu ting wanpela wokboi inap makim wanpela lain man? Yes, em inap. Seven handet yia paslain long Krais, Jehova i bin kolim lain Israel olgeta olsem “witnes bilong mi” na “wokman bilong mi.” (Aisaia 43:10) Olgeta manmeri bilong Israel, kirap long taim ol i kisim Lo Bilong Moses long 1513 B.C.E. na i go inap long Pentikos 33 C.E., ol i insait long dispela lain i olsem wokman. Planti manmeri Israel i no insait stret long wok bilong bosim ol samting bilong kantri o stretim ol samting na bai i gat ol kaikai bilong spirit. Jehova i makim ol king, jas, profet, pris, na Livai long mekim ol wok olsem. Tasol lain Israel olgeta ol i bin makim wok king bilong Jehova na ol i tokaut long biknem bilong em long ol narapela lain. Olgeta wan wan Israel i mas stap olsem wanpela witnes bilong Jehova.—Lo 26:19; Aisaia 43:21; Malakai 2:7; Rom 3:1, 2.
Rausim Wanpela “Wokman”
7. Bilong wanem lain Israel bilong bipo i no inap stap moa olsem “wokman” bilong God?
7 Planti handet yia i go pinis ol Israel i bin stap olsem “wokman” bilong God, orait yu ting ol i makim tu dispela wokboi Jisas i bin stori long en? Nogat, long wanem, ol Israel bilong bipo i no bin bihainim gutpela tingting na ol i no mekim gutpela wok. Pol i kamapim dispela long taim em i kolim tok Jehova i bin mekim long ol Israel, Pol i tok: “Asua bilong yupela tasol, na ol arapela lain i wok long tok bilas na daunim nem bilong God.” (Rom 2:24) Tru tumas, ol Israel i bikhet planti taim na dispela pasin bilong ol i go bikpela tru long taim ol i sakim Jisas, na Jehova i sakim ol.—Matyu 21:42, 43.
8. Long wanem taim wanpela “wokman” i kamap na i kisim wok bilong ol Israel? Dispela i kamap olsem wanem?
8 Ol Israel, em “wokman” i no stap gut long wok, tasol dispela i no makim olsem ol gutpela man i lotuim Jehova bai i no gat rot moa long kisim ol kaikai bilong spirit. Long Pentikos 33 C.E., 50 de bihain long Jisas i kirap bek, holi spirit i kam daun long 120 disaipel bilong em i stap long rum antap bilong wanpela haus long Jerusalem. Long dispela taim stret, wanpela nupela lain i kamap. I stret i gat tokaut olsem wanpela nupela lain i kamap, na ol manmeri insait long dispela lain i mekim olsem long taim ol i tokim ol manmeri bilong Jerusalem long “ol strongpela wok bilong God.” (Aposel 2:11) Olsem na dispela nupela lain, em wanpela lain bilong spirit, em i kamap “wokman” husat bai tokaut long biknem bilong Jehova long ol man na i givim kaikai long taim stret. (1 Pita 2:9) I stret bihain ol man i kolim dispela lain olsem “Israel tru bilong God.”—Galesia 6:16.
9. (a) “Wokboi i gat gutpela tingting” i makim husat? (b) Husat em “ol arapela wokboi”?
9 Olgeta wan wan bilong “Israel tru bilong God” ol i Kristen i dediket na baptais pinis na God i bin makim ol long holi spirit na ol bai go long heven. Olsem na “wokboi i gat gutpela tingting” i makim olgeta manmeri husat i insait long dispela lain bilong spirit God i bin makim na ol i bin i stap long graun kirap long 33 C.E. na i kam inap long nau. Kain olsem olgeta manmeri Israel i bin stap laip namel long 1513 B.C.E. na Pentikos 33 C.E. ol i bin insait long lain wokman i bin stap paslain long taim bilong ol Kristen. Tasol husat em “ol arapela wokboi,” em ol i kisim ol kaikai bilong spirit long wokboi i gat gutpela tingting? Long taim bilong ol aposel, olgeta Kristen i bilong go long heven. Olsem na, ol arapela wokboi, ol tu em ol Kristen God i bin makim, tasol em i makim ol wan wan bilong lain wokboi, i no makim olgeta wantaim. Olgeta bilong ol, na ol lain i mekim bikpela wok insait long kongrigesen tu, ol i mas kisim ol kaikai bilong spirit i kam long gutpela wokboi.—1 Korin 12:12, 19-27; Hibru 5:11-13; 2 Pita 3:15, 16.
“Tilim Wok Long Ol Wan Wan”
10, 11. Olsem wanem yumi save olsem olgeta bilong lain wokboi i no kisim wankain wok?
10 “Israel tru bilong God” em lain wokboi i gat gutpela tingting i kisim wanpela bikpela wok, na tu, olgeta wan wan bilong dispela lain i gat wok bilong ol yet long mekim. Tok bilong Jisas long Mak 13:34 i kamapim klia dispela samting. Em i tok: “I olsem wanpela man i lusim haus bilong en na i go wokabaut long narapela hap. Em i tokim ol wokboi long bosim ol samting, na em i tilim wok long ol wan wan. Na em i tokim man i save was long dua long em i mas was gut.” Olsem na olgeta wan wan bilong lain wokboi i kisim wok—em long mekim ol samting bilong Krais hia long graun i kamap planti. Ol i mekim wok bilong ol inap tru long skel na save bilong ol.—Matyu 25:14, 15.
11 Na tu, aposel Pita i bin tokim ol Kristen God i bin makim long taim bilong em: “God i bin marimari long yupela olgeta wan wan na givim ol kain kain presen long yupela. Olsem na yupela wan wan i mas i stap gutpela wokboi bilong God, na yusim ol dispela presen bilong helpim ol arapela manmeri bilong God.” (1 Pita 4:10) Em nau, ol dispela manmeri God i bin makim i mas yusim ol presen God i bin givim long ol na bai narapela i helpim narapela long lain bilong ol yet. Na tu, tok bilong Pita i soim olsem olgeta Kristen bai i no gat wankain save, asainmen, o wok long mekim. Tasol olgeta wan wan bilong lain wokboi inap mekim sampela samting i helpim lain bilong spirit i go bikpela. Olsem wanem ol inap mekim?
12. Olsem wanem olgeta wan wan bilong lain wokboi, maski ol i man o meri, ol i bin insait long wok bilong helpim dispela lain i go bikpela?
12 Bikpela samting em olgeta wan wan i mas stap olsem witnes bilong Jehova, olsem autim gutnius bilong Kingdom. (Aisaia 43:10-12; Matyu 24:14) Paslain stret long em i go long heven, Jisas i tokim olgeta gutpela disaipel bilong em, ol man na meri wantaim, long mekim wok tisa. Em i tok: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.”—Matyu 28:19, 20.
13. Ol lain God i bin makim i bin kisim wanem gutpela wok?
13 Taim ol i painim ol nupela disaipel, ol bai skulim ol gut long bihainim olgeta tok Krais i bin givim long ol disaipel bilong em. Bihain, ol man i harim tok, ol i winim mak bilong skulim ol narapela. Ol man bilong planti kantri husat bai insait long lain wokboi, ol inap long kisim gutpela kaikai bilong spirit i redi i stap. Olgeta Kristen God i bin makim, ol man na meri wantaim, ol i insait long wok bilong kamapim ol disaipel. (Aposel 2:17, 18) Wok bai i stap olsem kirap long taim dispela wokboi i stat long mekim wok bilong en na i go inap long pinis bilong pasin nogut bilong nau.
14. Husat tasol inap skulim ol narapela insait long kongrigesen? Ol gutpela meri em holi spirit i bin makim, ol i gat wanem tingting long dispela samting?
14 Ol nupela baptais em God i bin makim ol i kam insait long lain wokboi, na maski husat i bin skulim ol long namba wan taim, bihain ol i kisim tok long ol brata bilong kongrigesen i winim ol mak Baibel i kolim bilong mekim wok elda. (1 Timoti 3:1-7; Taitus 1:6-9) Olsem na ol dispela elda i gat gutpela rot tru long helpim lain Israel bilong spirit i go bikpela. Ol gutpela meri Kristen God i bin makim, ol i no bel nogut olsem ol man Kristen tasol i kisim wok tisa insait long kongrigesen. (1 Korin 14:34, 35) Ol i amamas long gutpela helpim ol i kisim long ol man bilong kongrigesen i givim bel long wok bilong ol, na ol i pilim tru ol gutpela wok ol meri yet i ken mekim, olsem bringim gutnius i go long ol narapela. Ol sista long nau em holi spirit i bin makim, ol tu i kamapim wankain pasin daun, maski ol elda long kongrigesen i bilong liklik lain o nogat.
15. Wanem wanpela bikpela rot bilong kisim ol kaikai bilong spirit long taim bilong ol aposel? Husat i go pas long tilim ol dispela samting i go long ol narapela?
15 Bikpela kaikai bilong spirit ol man i kisim long taim bilong ol aposel i bin kam long ol pas bilong ol aposel na ol narapela disaipel i go pas long wok. Ol pas ol i raitim—na moa yet ol pas bilong ol i stap insait long 27 buk bilong Ol Skripsa Grik em God i as bilong en—ol i go long olgeta kongrigesen na i bin stap olsem as bilong ol tok ol elda i lainim ol narapela long en. Long dispela rot sampela bilong lain gutpela wokboi i bin tilim ol gutpela kaikai bilong spirit long ol Kristen i gat gutpela bel. Lain wokboi long taim bilong ol aposel i kamapim klia ol i stap gut long wok bilong ol.
Dispela “Wokboi” Long 1,900 Yia Bihain
16, 17. Olsem wanem lain wokboi i kamapim klia olsem ol i stap gut long wok bilong ol long ol yia paslain long 1914?
16 Olsem wanem long nau? Taim Jisas i kam i stap pinis long 1914, em i lukim wanpela lain Kristen em God i bin makim na ol i mekim gut wok bilong givim ol kaikai long taim stret? Yes, em i lukim. I no hatwok long luksave long dispela lain, long wanem, wok ol i mekim i kamapim ol gutpela samting. (Matyu 7:20) Ol samting i kamap kirap long dispela taim na i kam inap nau i soim olsem i stret ol dispela Kristen i lain wokboi i gat gutpela tingting.
17 Taim Jisas i kam, i gat klostu 5,000 bilong lain wokboi i givim bel long autim tok i tru bilong Baibel. I no gat planti wokman, tasol dispela wokboi i bin yusim kain kain samting bilong helpim planti man moa long harim gutnius. (Matyu 9:38) Olsem: Ol i stretim rot na bai i gat ol tok bilong Baibel i kamap long klostu 2,000 niuspepa. Long dispela rot, tok tru bilong Baibel i go long planti tausen tausen man long wankain taim. Na tu, ol i redim wanpela program bilong 8-pela aua i gat ol piksa slait na piksa wokabaut. Dispela narapela kain program i helpim 9 milion manmeri long ol narapela narapela hap bilong graun long harim ol tok bilong Baibel—program i stori long kirap bilong taim God i wokim ol samting na i go inap long pinis bilong Taim Bilong Wan Tausen Yia Bilong Krais i Stap King. Na tu, ol i mekim wok long ol buk na nius ol i prinim. Olsem: Long 1914 ol i bin wokim 50,000 Wastaua.
18. Long wanem taim Jisas i bin makim wokboi long lukautim olgeta samting bilong em? Bilong wanem em i mekim olsem?
18 Tru tumas, taim Bikman i kam, em i lukim gutpela wokboi bilong em i givim bel long givim kaikai long ol arapela wokboi na long autim gutnius. Orait nau wokboi bai kisim bikpela wok moa. Jisas i tok: “Mi tok tru long yupela, bikman bai i makim dispela wokboi bilong bosim olgeta samting bilong en.” (Matyu 24:47) Jisas i mekim olsem long 1919, bihain long wokboi i winim taim bilong sampela traim. Tasol bilong wanem “wokboi i gat gutpela tingting” i kisim bikpela wok moa? Long wanem, ol samting bilong Bikman i kamap planti. God i givim wok king long Jisas long 1914.
19. Stori long olsem wanem bikpela lain manmeri i kisim ol kaikai bilong spirit.
19 Wanem dispela olgeta samting em Bikman, olsem nupela King, i bin givim long gutpela wokboi bilong em long lukautim? Em olgeta samting bilong spirit bilong Em hia long graun. Olsem: Twenti yia bihain long Krais i kamap King long 1914, bikpela lain bilong “ol arapela sipsip” i kamap ples klia. (KTH 7:9; Jon 10:16) Ol i no lain God i bin makim olsem lain “Israel tru bilong God,” tasol ol i gutpela man na meri i bilip na wet long kisim laip oltaim long graun, na ol i laikim tru Jehova na mekim wok bilong em olsem ol lain God i bin makim i mekim. I olsem ol i bin tokim “wokboi i gat gutpela tingting”: “Mipela i harim olsem God i stap wantaim yupela . . . Olsem na mipela i laik kamap wanlain wantaim yupela.” (Sekaraia 8:23) Ol dispela Kristen i baptais nupela i bin kisim ol gutpela kaikai bilong spirit wankain olsem ol arapela wokboi God i bin makim, na i kam inap long nau tupela lain wantaim i kisim kaikai long wankain tebol spirit. Em i gutpela blesing tru bilong ol bikpela lain manmeri!
20. Olsem wanem ol manmeri bilong bikpela lain i helpim ol samting bilong Bikman i kamap planti?
20 Ol manmeri bilong bikpela lain i bin amamas long kirap autim gutnius wantaim lain wokboi God i bin makim. Ol i mekim wok autim tok na ol samting bilong Bikman long graun i kamap planti, na dispela i mekim wok bilong “wokboi i gat gutpela tingting” i go bikpela moa. Namba bilong ol man i laikim tok i tru i go antap, olsem na ol i mas wokim ol faktori bilong prinim ol buk samting i go bikpela moa na bai i gat inap buk na nius bilong Baibel. Na ol i wokim ol brens ofis bilong ol Witnes Bilong Jehova long planti kantri. Ol i salim ol misineri i go long “olgeta hap bilong graun.” (Aposel 1:8) I gat samting olsem 5,000 Kristen God i bin makim ol i bin stap long 1914, tasol namba bilong ol man i givim biknem long Jehova i go bikpela tru na i winim 6 milion long nau, planti bilong ol em ol manmeri bilong bikpela lain. Em nau, kirap long taim Bikman i kamap king long 1914 na i kam inap nau, ol samting bilong em i kamap planti tru!
21. Bai yumi skelim wanem tupela tok piksa long stadi i kamap bihain long dispela?
21 Ol dispela samting i soim olsem dispela wokboi em “i gat gutpela tingting, na i save mekim gutpela wok oltaim.” Bihain stret long Jisas i toktok long “wokboi i gat gutpela tingting,” em i mekim tupela tok piksa i kamapim ol dispela pasin: em tok piksa bilong sampela kranki meri na sampela meri i gat save na tok piksa bilong mani. (Matyu 25:1-30) Man! Tingting bilong yumi i kirap! Olsem wanem dispela tupela tok piksa i bikpela samting long yumi ol manmeri long nau? Bai yumi skelim dispela askim long stori i kamap bihain long dispela.
Yu Ting Olsem Wanem?
• Husat i insait long lain “wokboi i gat gutpela tingting”?
• “Ol arapela wokboi” i makim husat?
• Long wanem taim gutpela wokboi i kisim wok bilong lukautim ol samting bilong Bikman? Bilong wanem em long dispela taim?
• Husat i helpim ol samting bilong Bikman i kamap planti long taim bilong yumi? Olsem wanem ol i bin mekim olsem?
[Ol Piksa long pes 10]
Lain wokboi long taim bilong ol aposel i mekim gut wok bilong en