Askim
Wanem samting i bin kamap em Kisim Bek 4:24-26 (NW) i stori long en? Laip bilong husat i laik lus?
Moses wantaim meri bilong em Sipora na tupela pikinini bilong ol, em Gersom na Elieser, ol i wokabaut i go long Isip taim wanpela samting i kamap, olsem: “Jehova i bungim em long rot long wanpela ples slip, na em i wok long painim rot bilong kilim em i dai. Olsem na Sipora i kisim wanpela ston i sap tru na katim skin bilong sem bilong pikinini man bilong en na putim long lek bilong em. Na em i tok, ‘Mi mekim, long wanem, long mi yu olsem man i laik marit na man bilong blut.’ Olsem na em i no kilim em i dai. Orait nau Sipora i tok: ‘Man i laik marit na man bilong blut,’ long wanem, em i tingting long dispela pasin bilong katim skin.” (Kisim Bek 4:20; 4:24-26, NW ) Maski dispela hap tok i no klia tumas na i hatwok long save gut long mining bilong en, tok bilong Baibel i helpim yumi long kisim sampela save long mining bilong en.
Stori i no kamapim klia laip bilong husat i laik lus. Tasol i stret yumi ken ting dispela i no makim Moses, long wanem, nau tasol God i bin givim em wok long kisim ol Israel long Isip na bringim ol i kam. (Kisim Bek 3:10) Yumi ken ting olsem ensel bilong God i no inap tok long kilim Moses i dai taim em i go long mekim wok God i bin givim em. Olsem na ensel i mas tok long kilim i dai wanpela pikinini bilong Moses. Lo God i bin givim long Abraham long pasin bilong katim skin i tok: “Sapos ol i no katim skin bilong wanpela man, orait em i sakim tok bilong kontrak bilong mi. Olsem na ol i mas rausim dispela man long lain bilong en, na em i no ken i stap moa wantaim ol.” (Stat 17:14) I luk olsem Moses i no bin katim skin bilong pikinini man bilong em, olsem na ensel bilong Jehova i tok long kilim em i dai.
Taim Sipora i katim skin bilong pikinini man bilong stretim dispela hevi, em i putim dispela skin bilong sem long lek bilong husat? Ensel bilong Jehova i gat namba long kilim i dai dispela pikinini husat ol i no bin katim skin bilong en. Olsem na Sipora i bin putim skin bilong sem long lek bilong dispela ensel, bilong soim olsem em i bin bihainim tok bilong dispela kontrak.
Tok Sipora i mekim olsem “long mi yu olsem man i laik marit na man bilong blut” em i narapela kain tok. Dispela tok i makim olsem em i mekim wanem? Taim em i mekim samting bilong bihainim dispela kontrak bilong katim skin, Sipora i tokaut em i insait long wanpela kontrak wantaim Jehova. Bihain, kontrak bilong Lo em God i mekim wantaim lain Israel i soim olsem taim Jehova i wokim kontrak wantaim narapela i olsem Jehova em i man marit na narapela i kontrak wantaim em i stap olsem meri bilong em. (Jeremaia 31:32) Olsem na taim Sipora i toktok wantaim Jehova (long rot bilong ensel bilong em) na kolim Jehova “man i laik marit na man bilong blut,” i luk olsem Sipora i tokaut olsem em i daun long ol samting bilong dispela kontrak. I kain olsem em i orait long stap olsem meri insait long kontrak bilong katim skin, na God Jehova i stap olsem man marit. Pasin bilong em long hariap na bihainim tok bilong God i mekim na laip bilong pikinini bilong em i no inap lus.