Ol Yangpela, Yupela i Mekim Ol Samting Bilong Helpim Yupela Long Bihain?
“Mi laik mekim gut long yupela. Mi no laik mekim nogut long yupela. Yupela i ken tingim ol dispela samting mi laik mekim, na yupela i ken wetim dispela taim i kamap.”—JEREMAIA 29:11.
1, 2. I gat wanem kain kain tingting long pasin bilong i stap yangpela?
PLANTI man i bikpela pinis i tingim taim bilong stap yangpela olsem gutpela taim tru. Ol i tingim strong na amamas bilong ol long taim ol i yangpela. Ol i amamas long tingim dispela taim we ol i no gat planti samting ol i mas mekim, em taim bilong amamas na ol i gat bikpela haptaim yet long mekim planti samting long bihain.
2 Ating yupela ol yangpela i gat narapela tingting. Ating senis i save kamap long skin na tingting bilong yangpela i givim hatwok long yupela. Long skul, ating yu pilim hevi long ol wankrismas i pulim yu. Ating yu mas wok strong tru long sakim pasin bilong kisim ol drak, dring alkohol, na insait long pasin pamuk. Na planti bilong yupela i karim hevi, long wanem, yupela i no insait long pait bilong graun o sampela arapela samting i bikpela samting long lotu bilong yupela. Yes, em inap hatwok long stap yangpela. Tasol em i stap tu olsem taim we planti rot i op long bihainim. Bikpela askim i olsem: Bai yu mekim wanem long ol dispela rot?
Amamas Long Taim Yu Yangpela
3. Solomon i bin givim wanem tok kaunsel na tok lukaut long ol yangpela?
3 Ol lapun bai tokim yu olsem taim bilong i stap yangpela i no longpela taim, na tok bilong ol i stret. Insait long sampela yia tasol bai yu no stap yangpela moa. Olsem na stap amamas long dispela taim yu yangpela! Dispela i stret wantaim tok kaunsel bilong King Solomon, em i tok: “Yupela yangpela manmeri, yupela i mas amamas long taim yupela i yangpela yet. Yupela i ken bihainim tingting na laik bilong yupela yet.” Tasol Solomon i givim tok lukaut long ol yangpela olsem: “Yupela i no ken tingting planti long ol samting i save givim hevi long yupela. Na yupela i no ken bihainim pasin i givim pen long bodi bilong yupela.” Na em i tok moa: “Taim bilong yupela i stap yangpela i no longpela taim. Nogat. Em i olsem samting nating.”—Saveman 11:9, 10.
4, 5. Bilong wanem em i savetingting sapos ol yangpela i redi gut long ol samting bilong bihain? Stori long dispela.
4 Yu kisimgut tingting bilong Solomon? I olsem: Tingim wanpela yangpela husat i kisim bikpela presen, ating em mani bilong wanblut i dai pinis. Bai em i mekim wanem long dispela presen? Em inap tromoi mani olgeta long ol samting bilong amamasim em yet—kain olsem pikinini i bin lusim papa long tok piksa bilong Jisas. (Luk 15:11-23) Tasol wanem samting bai kamap taim mani i pinis? Ating em bai bel hevi long em i no bihainim gutpela tingting! Tasol sapos em i yusim mani bilong helpim em long bihain, ating em i putim bikpela hap mani long beng samting, orait bihain, taim samting em i bin mekim long mani i helpim em, yu ting em bai bel hevi long em i no bin yusim olgeta mani long painim amamas taim em i yangpela? Nogat tru!
5 Tingim ol yia bilong yu long stap yangpela olsem presen God i givim long yu, na tru tru ol i olsem. Bai yu yusim ol dispela yia olsem wanem? Yu inap westim nating ol strong na amamas bilong yu long ol samting bilong inapim laik bilong yu yet, olsem painim amamas tasol na maski long ol samting bilong bihain. Tasol sapos yu mekim olsem, taim bilong yu long “stap yangpela” bai “olsem samting nating.” Em i gutpela moa long yusim taim bilong yu long stap yangpela long redi gut long ol samting bilong bihain!
6. (a) Wanem tok bilong Solomon i gutpela long stiaim ol yangpela? (b) Jehova i laik mekim wanem bilong helpim ol yangpela? Olsem wanem dispela inap helpim wanpela yangpela?
6 Solomon i kolim wanpela stiatok em inap helpim yu long mekim gutpela wok long ol yia bilong yu long stap yangpela. Em i tok: “God i bin wokim yumi olgeta. Olsem na long taim yupela i yangpela yet, yupela i mas tingim em.” (Saveman 12:1) Dispela em i nambawan bikpela samting bilong helpim yu—harim tok bilong Jehova na bihainim laik bilong em. Jehova i tokim ol Israel bilong bipo long samting em i laik mekim long ol, em i tok: “Mi tingim pinis ol samting mi laik mekim bilong helpim yupela. Mi laik mekim gut long yupela. Mi no laik mekim nogut long yupela. Yupela i ken tingim ol dispela samting mi laik mekim, na yupela i ken wetim dispela taim i kamap.” (Jeremaia 29:11) Jehova i laik mekim gut long yu tu na bai ‘yu ken wetim’ ol gutpela samting. Sapos yu tingim Jehova long pasin bilong yu, long ol samting yu tingting long en, na long ol samting yu makim bilong mekim, orait samting yu bilip na wet long en bai kamap.—KTH 7:16, 17; 21:3, 4.
“Go Klostu Tru Long God”
7, 8. Olsem wanem wanpela yangpela i ken i go klostu long God?
7 Jems i kirapim yumi long tingim Jehova taim em i tok: “Go klostu tru long God, na em bai i kam klostu tru long yupela.” (Jems 4:8) Jehova em i Man Bilong Wokim yumi, em i King bilong heven, na i stret olgeta man i lotu long em na givim biknem long em. (KTH 4:11) Tasol sapos yumi go klostu long em, em bai i kam klostu long yumi. Olsem wanem? Pasin bilong em long laikim yumi na tingim yumi i mekim gut bel bilong yu?—Matyu 22:37.
8 Yumi ken go klostu long Jehova long kain kain rot. Olsem: Aposel Pol i tok: “Yupela i mas holim strong pasin bilong prea. Na long taim yupela i prea, yupela i mas tingting gut na yupela i mas tenkyu long God.” (Kolosi 4:2) Olsem na kisim pasin bilong beten. No ken amamas tasol long tok amen nating bihain long papa bilong yu o wanpela wanbilip Kristen long kongrigesen i mekim prea yu insait long en. Olsem wanem? Yu bin kamapim tru bel bilong yu long Jehova na autim tingting bilong yu, na ol samting yu pret long en, na ol samting i givim hatwok long yu? Yu bin tokim em long sampela samting yu bai sem long kamapim long wanpela man? Ol beten we yu tokaut stret long ol samting na mekim ol tok yu pilim tru long bel, ol i kamapim bel isi. (Filipai 4:6, 7) Ol i helpim yumi long go klostu long Jehova na long save olsem em i kam klostu long yumi.
9. Olsem wanem wanpela yangpela inap putim yau long tok bilong Jehova?
9 Baibel i kolim narapela rot long go klostu long Jehova, olsem: “Sapos yu larim man i skulim yu na givim gutpela tingting long yu, orait bihain bai yu gat gutpela tingting na save.” (Sindaun 19:20) Em nau, sapos yu putim yau long tok bilong Jehova na bihainim, yu wok long redim ol samting bilong yu long bihain. Olsem wanem yu ken soim olsem yu save putim yau long Jehova? Ating yu go oltaim long ol miting na putim yau long ol tok i kamap. Na tu, yu “aninit long papamama bilong yu” long taim yu stap long famili Baibel stadi. (Efesus 6:1, 2; Hibru 10:24, 25) Em i gutpela. Tasol olsem wanem? Yu save lusim sampela samting yu save mekim na bai yu gat taim long redim ol samting bilong miting, ritim Baibel long olgeta de, na mekim stadi olsem wok painimaut? Yu wok strong long bihainim tok yu ritim na bai yu ken wokabaut olsem man i gat savetingting? (Efesus 5:15-17; Song 1:1-3) Sapos yu mekim olsem, yu wok long go klostu long Jehova.
10, 11. Wanem ol gutpela samting i painim ol yangpela i putim yau long tok bilong Jehova?
10 Long kirap bilong Buk Sindaun, man i raitim dispela hap i stori long wok bilong dispela buk bilong Baibel. Em i tok dispela buk em i bilong “givim yumi gutpela tingting na long lainim yumi long gutpela pasin. Na sapos yumi harim tok long as bilong ol samting, orait bai yumi inap klia tru long dispela tok. Gutpela tok bilong dispela buk bai i skulim yumi long wokabaut olsem man i gat gutpela save na long bihainim ol gutpela na stretpela pasin na long mekim wankain stretpela pasin long olgeta man. Na sapos sampela man i gat liklik save tasol, bai dispela tok i helpim ol long kisim gutpela tingting, na em bai i givim gutpela save long ol yangpela man, na soim ol long gutpela pasin bilong wokabaut.” (Sindaun 1:1-4) Olsem na taim yu wok long ritim na bihainim ol tok bilong Buk Sindaun—na ol arapela tok bilong Baibel—bai yu kamapim stretpela na gutpela pasin, na Jehova bai amamas long yu go klostu long em. (Song 15:1-5) Taim yu wok strong moa long kisim gutpela save, gutpela tingting, na pasin bilong skelim gut ol samting, orait ol samting yu makim bilong mekim bai i kamap gutpela moa.
11 Olsem wanem? Wanpela yangpela inap bihainim savetingting olsem? Em inap, long wanem, planti yangpela Kristen i mekim olsem. Olsem na ol narapela i rispek long ol na i no tingim ol olsem “man nating.” (1 Timoti 4:12) I stret papamama bilong ol dispela yangpela i amamas long ol, na Jehova i tok ol i mekim em i belgut tru. (Sindaun 27:11) Maski ol i yangpela, ol i ken save olsem dispela tok bilong God i makim ol: “Yu tingting long man i no gat asua long wanpela samting, na lukim pasin bilong stretpela man. Man i save sindaun isi wantaim ol arapela manmeri, lain bilong en bai i stap oltaim.”—Song 37:37.
Makim Ol Samting i Gutpela Long Mekim
12. Wanem wanpela bikpela samting ol yangpela i gat wok long makim? Bilong wanem dispela bai mekim bikpela samting long ol inap long planti yia bihain?
12 Taim yu stap yangpela, dispela em i taim bilong makim ol samting bilong mekim, sampela em ol bikpela samting. Sampela samting yu makim long nau bai mekim bikpela samting long yu inap planti yia bihain. Bihainim savetingting na makim ol samting, dispela i helpim laip i kamap gutpela. Sapos yu makim ol samting i no stret wantaim savetingting, dispela inap kamapim hevi bilong karim long laip olgeta. Tingim olsem wanem dispela tok i stret long tupela samting yu gat wok long makim. Namba wan: Yu makim husat olsem poroman bilong yu? Bilong wanem dispela em i bikpela samting? Baibel i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Olsem na yumi ken tok, isi isi yumi kamap wankain olsem ol lain yumi save poromanim—man i gat gutpela tingting o man i no gat gutpela tingting. Yu laik stap wanem kain man?
13, 14. (a) Pasin bilong poroman wantaim inap makim pasin bilong poromanim sampela pipel na wanem samting moa? (b) Ol yangpela i mas abrusim wanem tingting kranki?
13 Taim yu tingim pasin bilong poroman wantaim, ating yu tingim pasin bilong stap wantaim sampela pipel. Dispela i stret, tasol em i makim sampela samting moa. Taim yu lukim TV, harim musik, ritim buk, lukim vidio, o skelim samting long Intenet, yu poromanim sampela lain. Sapos kain poroman olsem i strongim laik long pait o mekim pasin pamuk o i kirapim tingting long kisim drak, dring spak, o mekim sampela narapela pasin i no stret wantaim ol stiatok bilong Baibel, orait i olsem yu poromanim “longlong man,” em man i mekim ol samting olsem Jehova i no stap.—Song 14:1.
14 Yu save go long ol miting Kristen na mekim ol wok wantaim kongrigesen, olsem na ating yu pilim olsem bai yu no bagarap sapos yu lukim vidio bilong pasin pait o harim musik i krai gut tasol ol tok bilong en i no gutpela tumas. Ating yu pilim olsem samting nogut bai i no kamap sapos yu lukim sampela piksa bilong pasin sem long wanpela Web-sait long Intenet. Aposel Pol i tokim yu olsem tingting bilong yu i no stret! Em i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Korin 15:33) Sori tru, planti gutpela yangpela Kristen i bagarapim gutpela pasin bilong ol long rot bilong ol poroman nogut. Olsem na yu mas wok strong long sakim ol poroman olsem. Sapos yu mekim olsem, yu bihainim tok bilong Pol: “No ken wokabaut wankain olsem ol man bilong dispela graun. Nogat. Yupela i mas larim God i mekim tingting bilong yupela i kamap nupela na bai pasin bilong yupela i kamap nupela tu. Olsem na bai yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.”—Rom 12:2.
15. Wanem namba tu samting ol yangpela i gat wok long makim? Wanem samting inap givim hevi long ol?
15 Orait nau em namba tu samting yu mas makim. Taim bai kamap we yu gat wok long makim samting yu laik mekim taim yu skul pinis. Sapos yu stap long wanpela hap we i no gat planti wok mani, yu inap pilim olsem yu mas kisim wanem wanem wok yu inap kisim. Sapos yu stap long wanpela kantri i gat planti wok bisnis, ating i gat kain kain wok yu inap kisim, na sampela yu laikim tru. Gutpela laik i as na ol tisa o papamama bilong yu inap kirapim yu long kisim wanpela wok we yu no gat hevi long mani, o yu inap kamap maniman. Tasol ol trening bilong kisim dispela wok inap pasim tru taim bilong yu long mekim wok bilong Jehova.
16, 17. Stori long olsem wanem Baibel inap helpim yangpela long kisim stretpela tingting long samting bilong wok skin.
16 No ken lusim tingting long skelim Baibel paslain long yu makim samting. Baibel i strongim yumi long mekim wok skin, em i soim olsem yumi gat wok long lukautim yumi yet. (2 Tesalonaika 3:10-12) Tasol i gat ol narapela samting long tingim. Mipela i laik bai yu ritim ol skripsa daunbilo na tingim olsem wanem ol inap helpim wanpela yangpela long bihainim stretpela tingting taim em i makim wok em i laik kisim: Sindaun 30:8, 9; Saveman 7:11, 12; Matyu 6:33; 1 Korin 7:31; 1 Timoti 6:9, 10. Bihain long yu ritim ol dispela ves, yu kisimgut tingting bilong Jehova long dispela samting?
17 Wok skin i no ken kamap bikpela samting tru i winim wok bilong Jehova yumi mekim. Sapos save yu kisim long haiskul i inapim yu long kisim wanpela wok we yu inap lukautim ol samting bilong yu, em i gutpela. Sapos yu mas kisim sampela trening moa bihain long haiskul, dispela em i samting bilong skelim wantaim papamama bilong yu. Tasol no ken lusim tingting long “ol samting i bikpela samting tru”—em ol wok bilong spirit. (Filipai 1:9, 10, NW ) No ken mekim wankain popaia olsem Baruk, kuskus bilong Jeremaia, i bin mekim. Em i no tingim moa gutpela wok em i holim, em i kirap painim “ol gutpela samting” bilong em yet. (Jeremaia 45:5) Inap sotpela taim em i lusim tingting olsem i no gat wanpela “gutpela samting” bilong dispela graun em inap bringim em i go klostu moa long Jehova o helpim em long abrusim bagarap long Jerusalem. Na wankain tok i stret long yumi long nau tu.
Amamas Long Ol Samting Bilong Spirit
18, 19. (a) Planti manmeri long hap bilong yu i karim wanem hevi? I stret yu gat wanem tingting long ol? (b) Bilong wanem planti man i no pilim olsem ol i sot tru long ol samting bilong spirit?
18 Yu lukim ol piksa long TV o niuspepa long ol pikinini i stap long ol kantri i bagarap long hangre? Sapos olsem, ating yu bel sori tru long ol. Yu gat wankain bel sori long ol manmeri i stap long hap bilong yu? Bilong wanem i stret yu pilim olsem? Long wanem, planti bilong ol tu i hangre. Amos i tok profet long kaikai ol i sot long en, em i tok: “Bihain bai mi mekim bikpela hangre i kamap long kantri bilong yupela. Na bai olgeta manmeri i hangre tru, tasol bai ol i no hangre bilong kaikai. Na bai nek bilong ol i drai, tasol bai ol i no laik dring wara. Long wanem, dispela hangre i no bilong kaikai na wara. Ol bai i hangre tumas long harim tok bilong mi tasol. Mi God, Bikpela mi yet mi tok olsem.”—Amos 8:11.
19 Tru, planti bilong dispela lain i sot long kaikai bilong spirit ol i no save “ol i stap rabis tru long ol samting bilong God.” (Matyu 5:3) Ol i no pilim hangre long ol samting bilong spirit. Ating sampela i pilim olsem ol i pulap pinis. Tasol sapos ol i pilim olsem, as bilong dispela em ol pipia kaikai ol i save kisim, em “olgeta save bilong ol man bilong dispela graun,” olsem laikim tumas mani, tok nating bilong saiens, kain kain tingting long stretpela pasin, na ol narapela samting olsem. Sampela i ting “save” bilong nau i soim olsem tok bilong Baibel i samting bilong ol man long bipo. Tasol, ‘long save bilong ol yet, ol man i no inap save long God.’ Olgeta save bilong ol man bilong graun bai i no inap helpim yu long go klostu long God. Em i olsem “longlong pasin tasol long ai bilong God.”—1 Korin 1:20, 21; 3:19.
20. Bilong wanem laik long bihainim ol manmeri husat i no lotuim Jehova i no gutpela tingting?
20 Taim yu lukim ol dispela piksa bilong ol pikinini i hangre, yu gat laik long stap wankain olsem? Nogat tru! Tasol sampela yangpela bilong ol famili Kristen i soim olsem ol i laik stap wankain olsem ol manmeri long hap bilong ol em ol i hangre tru long ol samting bilong spirit. Ating ol dispela yangpela i pilim olsem ol yangpela i no stap insait long tok i tru ol i mekim ol samting long laik tasol na stap amamas. Ol i lusim tingting olsem ol dispela yangpela i stap longwe long Jehova. (Efesus 4:17, 18) Ol i lusim tingting tu long ol hevi i kamap taim man i no gat ol kaikai bilong spirit. Sampela bilong ol em pasin bilong kisim bel nating taim ol i yangpela yet, na ol hevi bilong skin na tingting em pasin pamuk, smok, dring spak, na drak i save kamapim. Taim i no gat kaikai bilong spirit, dispela i kamapim pasin bilong sakim tok na tingting olsem gutpela samting i no inap kamap na laip i no gat as bilong en.
21. Yumi ken mekim wanem na bai yumi no kisim tingting kranki bilong ol man i no lotuim Jehova?
21 Olsem na taim yu stap long skul namel long ol lain i no lotuim Jehova, no ken kisim pasin bilong ol. (2 Korin 4:18) Sampela bai rabisim ol samting bilong spirit. Na tu, TV na redio samting bai kamapim sampela tok bilong pulim tingting, olsem i no gat rong long mekim pasin pamuk, dring spak, o tok swea. Sakim ol dispela tok. Bung oltaim wantaim ol manmeri i ‘bilip tru long Jisas na no gat asua long ai bilong God.’ Olgeta taim “wok strong long mekim wok bilong Bikpela.” (1 Timoti 1:19; 1 Korin 15:58) Mekim planti wok long Haus Kingdom na long autim tok. Long ol yia yu stap yet long skul, mekim wok painia haptaim long sampela taim. Strongim tingting bilong yu long ol samting bilong spirit olsem na yu bai stap strong.—2 Timoti 4:5.
22, 23. (a) Bilong wanem planti taim wanpela yangpela Kristen bai makim ol samting ol narapela bai i no inap kliagut long as bilong en? (b) Gutpela sapos ol yangpela i mekim wanem?
22 Pasin bilong tingim ol samting bilong spirit inap kirapim yu long mekim ol samting ol narapela bai i no kliagut long as bilong en. Olsem: Wanpela yangpela man Kristen i smat long wokim musik na em i kisim ol gutpela mak long skul. Taim em i gretiuet, em i joinim papa long wanpela wok bisnis bilong wasim ol windo na bai em inap insait long wanpela wok em yet i makim, em autim tok fultaim, olsem painia. Ol tisa i no kliagut long as na em i makim dispela wok, tasol sapos yu go klostu pinis long Jehova, mipela i save yu yet yu kliagut long as na em i mekim olsem.
23 Taim yu tingim olsem wanem yu ken mekim gutpela wok long taim bilong yu long stap yangpela, wok long ‘bungim planti samting bilong helpim yu long bihain, na yu bai i kisim dispela laip em i laip tru.’ (1 Timoti 6:19) Yu mas tingting strong long “God i bin wokim yumi,” mekim olsem long taim yu stap yangpela—na long laip olgeta bilong yu. Dispela tasol em i rot bilong bihainim na bai ol gutpela samting i ken painim yu long bihain, em ol gutpela samting bilong i stap oltaim.
Yu Ting Olsem Wanem?
• Wanem tok bilong God i helpim ol yangpela taim ol i wok long makim ol samting ol bai mekim long bihain?
• Wanem sampela rot bilong ol yangpela long i “go klostu tru long God”?
• Wanem sampela samting yangpela i makim na em bai mekim bikpela samting long i stap bilong em long bihain?
[Ol Piksa long pes 15]
Bai yu yusim olgeta strong na amamas bilong yu long mekim ol samting bilong yu yet tasol?
[Piksa long pes 16, 17]
Ol yangpela Kristen i gat savetingting i mekim ol samting na bai ai bilong ol long ol samting bilong spirit i no kamap tudak