No Ken Lusim Pasin Bilong Pilim Tru Ol Gutpela Samting
“God, i hat tumas long mi save long olgeta tingting bilong yu. Tingting bilong yu i no liklik, na i no gat rot long mi ken save long en.”—SONG 139:17.
1, 2. Bilong wanem i stret yumi pilim tru Tok Bilong God? Devit i mekim wanem tok bilong soim olsem em i pilim tru Tok Bilong God?
OL I kirap nogut long samting ol i painim. Taim ol i wok long stretim tempel bilong Jehova long Jerusalem, Hetpris Hilkia i painim “buk i gat tok bilong lo bipo Bikpela i bin givim long ol Israel long han bilong Moses.” I luk olsem dispela em buk Moses yet i bin raitim winim 800 yia bipo! Tingim samting gutpela King Josaia i pilim taim ol i soim em dispela buk. Em i pilim olsem em i gutpela samting tru, na wantu em i tokim kuskus Safan long ritim long em.—2 Stori 34:14-18.
2 Long nau, planti bilion man inap ritim Baibel olgeta o sampela hap bilong Baibel. Tasol yu ting dispela i mekim na Baibel i no bikpela samting? Nogat! Tingting bilong God i Gat Olgeta Strong i stap long Baibel, na em i stap bilong helpim yumi. (2 Timoti 3:16) Devit i kamapim tingting bilong em long Tok Bilong God, na em i tok: “God, i hat tumas long mi save long olgeta tingting bilong yu. Tingting bilong yu i no liklik, na i no gat rot long mi ken save long en.”—Song 139:17.
3. Wanem samting i soim olsem Devit i pilim tru pasin bilong pas gut wantaim Jehova?
3 Long olgeta taim Devit i pilim tru ol samting Jehova i bin mekim, Tok bilong em, na pasin Em i kamapim bilong mekim lotu i tru. Ol naispela song Devit i bin raitim i kamapim bel bilong em. Olsem: Long Song 27:4, em i tok: “Mi bin askim God long wanpela samting tasol, na mi laikim tumas bai em i mekim olsem. Mi askim em bai mi ken i stap long haus bilong em inap olgeta de mi gat laip. Mi laik amamas long em i gutpela tumas long mi [“Na mi laik lukluk na tingim tru tempel bilong em,” NW]. Na mi laik askim em long soim mi gutpela rot.” Long tok Hibru, mining bilong dispela tok “lukluk na tingim tru” i olsem tingting gut long en, skelim gut tru, kisim amamas long lukim na pilim tru. Em i klia tru olsem Devit i pilim tru pasin bilong em long pas gut tru wantaim Jehova na em i amamas tru long ol samting Jehova i givim em bilong strongim bilip bilong em na em i laikim tru olgeta tok i tru God i kamapim long em. I gutpela yumi bihainim pasin bilong em long pilim tru ol samting bilong God.—Song 19:7-11.
Amamas Tru Long Save Long Tok i Tru Bilong Baibel
4. Wanem samting i mekim na “Holi Spirit i mekim bel bilong Jisas i amamas”?
4 Bilong save gut long Tok Bilong God yumi no gat wok long ol save bilong dispela graun, em kain save i kirapim man long hambak. Nogat. Yumi gat wok long gutpela pasin sori bilong Jehova, na em i save givim dispela pasin long ol man i gat pasin daun na ol i save olsem ol i sot long ol samting bilong God. (Matyu 5:3; 1 Jon 5:20) Taim Jisas i wok long tingim tingim olsem God i raitim pinis nem bilong sampela man husat i no gutpela olgeta long buk bilong em long heven, orait “Holi Spirit i mekim bel bilong Jisas i amamas, na Jisas i tok olsem, ‘Papa, yu Bikpela bilong heven na graun, mi tenkyu long yu, long wanem, yu bin haitim ol dispela samting long ol man i gat gutpela save na tingting, na yu bin soim long ol man i stap olsem ol liklik pikinini tasol.’ ”—Luk 10:17-21.
5. Bilong wanem ol disaipel bilong Jisas i no ken ting ol tok i tru bilong Kingdom ol i kisim save long en, em i liklik samting tasol?
5 Jisas i beten pinis na em i tokim ol disaipel olsem: “Ol man i lukim ol samting yupela i save lukim, ol i ken amamas. Mi tokim yupela, bipo planti profet na planti king ol i laik lukim ol samting nau yupela i lukim, tasol ol i no bin lukim. Na ol i laik harim dispela ol tok yupela i save harim, tasol ol i no bin harim.” Yes, Jisas i strongim ol gutpela disaipel bilong em long ol i no ken ting ol tok i tru bilong Kingdom ol i kisim save long en, em i liklik samting tasol. God i no bin kamapim ol dispela tok i tru long ol wokboi bilong em long bipo na em i no kamapim long “ol man i gat gutpela save na tingting” long taim bilong Jisas. Nogat tru!—Luk 10:23, 24.
6, 7. (a) Bilong wanem yumi mas pilim tru tok i tru i kam long God? (b) Yumi inap lukim wanem samting i soim olsem lotu i tru na lotu giaman i narapela narapela long nau?
6 Long taim bilong yumi, i gat planti as moa na yumi pilim tru tok i tru i kam long God, long wanem, long rot bilong “wokboi i gat gutpela tingting,” Jehova i givim bikpela save moa long ol manmeri bilong em. (Matyu 24:45; Daniel 12:10) Profet Daniel i stori long taim bilong pinis, em i tok: “Planti manmeri bai i raun long olgeta hap, na stretpela save bai kamap planti.” (Daniel 12:4, NW) Ating yumi wanbel long tok olsem, long nau save i kam long God i “kamap planti” na ol wokboi bilong Jehova i save kisim planti kaikai bilong spirit, a?
7 Yumi lukim olsem ol manmeri bilong God i gat bikpela save long God na laik bilong em, tasol ol lotu bilong Bikpela Babilon i paul nabaut! Long dispela as na planti husat i no bilip moa o i no amamas long lotu giaman, ol i kam long lotu i tru. Ol i stap olsem ol sipsip na ol i no laik “poroman wantaim em [Bikpela taun Babilon] long ol sin em i save mekim” na “poroman wantaim em tu long taim em i kisim pe nogut bilong ol dispela sin.” Jehova na ol wokboi bilong em i save singautim ol kain man olsem long i kam insait long kongrigesen Kristen tru.—KTH 18:2-4; 22:17.
Ol Man i Gat Gutpela Bel i Kam Long God
8, 9. Olsem wanem tok bilong Hagai 2:7 i wok long kamap tru long taim bilong yumi?
8 Jehova i stori long haus lotu spirit bilong em olsem: “Bai mi seksekim olgeta lain man na bai ol gutpela samting bilong olgeta lain ol i mas i kam insait; na bai mi pulapim ol gutpela gutpela samting long haus bilong mi.” (Hagai 2:7, NW) Dispela tok profet i gat truim bilong em long taim bilong Hagai, taim liklik lain bilong ol manmeri bilong God i wokim gen tempel long Jerusalem. Long nau, narapela truim bilong tok bilong Hagai i kamap tru long bikpela tempel spirit bilong Jehova.
9 Planti milion manmeri i kam pinis long dispela tempel spirit bilong lotuim God long “strong bilong Holi Spirit na long pasin i tru,” na long olgeta wan wan yia winim 200,000 manmeri moa, olsem “ol gutpela samting bilong olgeta lain,” i wok long kam insait. (Jon 4:23, 24) Olsem: Ripot bilong olgeta hap bilong 2006 sevis yia i tok 248,327 i bin kisim baptais bilong makim olsem ol i dediket long Jehova. Dispela i kain olsem 680 i kisim baptais long olgeta wan wan de! Pasin bilong ol long laikim tok i tru na laik bilong ol long mekim wok bilong Jehova olsem man bilong autim tok bilong Kingdom i kamapim klia olsem God i bin bringim ol i kam long em.—Jon 6:44, 65.
10, 11. Kamapim wanpela ekspiriens i soim olsem wanem ol manmeri i ken kirap pilim tru tok i tru bilong Baibel.
10 Planti bilong ol dispela manmeri i gat gutpela bel i bin kam insait long tok i tru bikos ol i bin luksave olsem “stretpela man i narapela kain long man nogut, na man i mekim wok bilong God i narapela kain long man i no bin mekim wok bilong God.” (Malakai 3:18, NW) Yumi laik skelim ekspiriens bilong Wayne na Virginia, tupela marit em bipo ol i insait long wanpela lotu Kristen na ol i gat planti askim em lotu i no inap bekim gut. Tupela i nolaik tru long pasin bilong pait na ol i paul na bel i bagarap taim ol i lukim ol pris pasto i blesim ol soldia na ol samting bilong pait. Taim tupela i wok long i go lapun, ol i pilim olsem ol narapela long lotu i givim baksait long ol, maski Virginia i bin stap tisa bilong Sande skul inap planti yia. Tupela i tok: “I no gat wanpela i kam visitim mipela o askim olsem mipela i stap orait long sait bilong lotu o olsem wanem. Dispela lotu i laikim mani bilong mipela, em tasol. Mipela pilim bel hevi tru.” Ol i bel hevi moa yet taim lotu i orait long pasin bilong man i slip wantaim man.
11 Taim ol dispela samting i wok long kamap, tumbuna pikinini meri na pikinini meri bilong Wayne na Virginia ol i kamap Witnes Bilong Jehova. Pastaim Wayne na Virginia i no amamas long dispela, tasol bihain ol i senisim tingting bilong ol na ol i kirap stadi long Baibel. Wayne i tok: “Insait long 3-pela mun tasol mipela i kisim bikpela save long Baibel, winim save mipela i bin kisim insait long 70 yia i go pinis! Mipela i no bin save olsem nem bilong God em Jehova, na mipela i no save liklik long Kingdom na Paradais hia long graun.” I no longtaim na tupela i kirap kam long ol miting Kristen na ol i kirap mekim wok autim tok. Virginia i tok: “Mipela i laik tokim olgeta man long tok i tru.” Tupela i winim 80 krismas, na ol i baptais long 2005. Ol i tok: “Mitupela i painim pinis ol lain Kristen tru we mitupela i amamas long i stap wantaim ol.”
Amamas Long “Redi Long Mekim Olgeta Kain Gutpela Wok”
12. Olgeta taim Jehova i save givim wanem samting long ol wokboi bilong em? Bilong dispela i ken helpim yumi, yumi mas mekim wanem?
12 Olgeta taim Jehova i save helpim ol wokboi bilong em long mekim laik bilong em. Olsem: Noa i kisim tok i makim klia stret pasin bilong wokim sip—em wanpela wok em i mas mekim gut long namba wan taim! Na em i bin mekim olsem. Bilong wanem em i mekim gut? Long wanem, “Noa i mekim olgeta samting olsem God i tokim em.” (Stat 6:14-22) Long nau tu, Jehova i save redim ol wokboi bilong em long mekim laik bilong em. Nambawan wok bilong yumi, em bilong autim gutnius olsem Kingdom Bilong God i kirap pinis long mekim wok na yumi mekim wok bilong helpim ol gutpela man i kamap disaipel bilong Jisas Krais. Na bilong yumi ken mekim gut dispela wok yumi mas bihainim tok olsem Noa i bin mekim. Yumi mas bihainim tok Jehova i givim long yumi long rot bilong Baibel na oganaisesen bilong em.—Matyu 24:14; 28:19, 20.
13. Jehova i save skulim yumi long wanem rot?
13 Bilong inapim dispela wok, yumi mas lain long mekim gutpela wok long nambawan tul bilong yumi—em Tok Bilong God—“em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi na bilong skulim yumi long ol pasin i stret long ai bilong God. Olsem na dispela tok i mekim yumi ol manmeri bilong God i kisim tru olgeta gutpela pasin, na em i mekim yumi i redi long mekim olgeta kain gutpela wok.” (2 Timoti 2:15; 3:16, 17) Long taim bilong ol aposel, Jehova i bin givim gutpela skul long rot bilong kongrigesen Kristen, na i wankain long nau. Long ol 99,770 kongrigesen i stap long olgeta hap, i gat Skul Tiokratik Bilong Autim Tok na Miting Bilong Wok long olgeta wik bilong helpim yumi long mekim wok autim tok. Olsem wanem? Yu save soim olsem yu amamas long ol dispela miting long rot bilong i go olgeta taim long ol na wok long bihainim ol tok yu lainim?—Hibru 10:24, 25.
14. Ol wokboi bilong Jehova i save mekim wanem bilong soim olsem ol i pilim tru wok bilong ol long lotuim God? (Kamapim sampela tok long sat i stap long pes 27-30.)
14 Long rot bilong wok strong tru long autim tok, planti milion manmeri bilong God long olgeta hap i soim olsem ol i pilim tru skul ol i kisim. Olsem: Long 2006 sevis yia, 6,741,444 pablisa bilong Kingdom i bin lusim 1,333,966,199 aua long mekim kain kain wok autim tok. Insait long dispela wok ol i stadi long Baibel wantaim 6,286,618 manmeri. Dispela em i sampela tasol bilong ol gutpela samting i stap insait long ripot bilong wok autim tok long olgeta hap. Mipela i laik kirapim yupela long skelim gut dispela ripot na kisim strong long en, olsem ol brata long taim bilong ol aposel i bin kisim strong long ol ripot ol i kisim long wok autim tok i go bikpela long taim bilong ol.—Aposel 1:15; 2:5-11, 41, 47; 4:4; 6:7.
15. Bilong wanem yumi no ken bel hevi long wok bilong Jehova, em yumi givim bel olgeta long mekim?
15 Dispela bikpela wok bilong litimapim nem bilong God long olgeta yia i kamapim klia olsem ol wokboi bilong Jehova i save amamas tru olsem ol i save long Jehova na ol inap autim tok long nem bilong em. (Aisaia 43:10) Tru, yumi ken tok olsem wok autim tok bilong sampela bratasista bilong yumi, em ol i lapun, o sik samting, i kain olsem liklik mani em rabismeri wanpis i bin givim. Tasol yumi no ken lusim tingting olsem Jehova na Pikinini bilong em i save tingim tru olgeta manmeri husat i givim bel olgeta long lotuim God, na ol i mekim olgeta samting ol inap long mekim.—Luk 21:1-4; Galesia 6:4.
16. God i bin givim yumi wanem ol gutpela tul bilong skulim ol man?
16 Jehova i skulim yumi long autim tok, na tu, long rot bilong oganaisesen bilong em, em i save givim yumi ol gutpela tul bilong helpim yumi long skulim ol man. Kirap long 1968 na i kam inap long nau, sampela bilong ol dispela tul em ol buk olsem Tok i Tru i Bringim Man Long Laip Oltaim, Yu Inap i Stap Oltaim Long Paradais Long Graun, Save i Bringim Man Long Laip Oltaim, na nau, Tru Tru Baibel i Tok Wanem? Ol man i save amamas tru long ol dispela gutpela buk ol i save mekim gutpela wok long ol taim ol i mekim wok autim tok.
Mekim Gutpela Wok Long Buk Baibel i Tok
17, 18. (a) Yu yet i laik stori long wanem ol hap bilong buk Baibel i Tok taim yu autim tok? (b) Wanpela wasman sekit i tok wanem long buk Baibel i Tok?
17 Buk Tru Tru Baibel i Tok Wanem? i gat 19 sapta, gutpela apendiks, na ol i raitim long pasin i no hatwok long kisimgut ol tok, olsem na em i save helpim tru wok autim tok. Olsem: Sapta 12 i stori long “Wokabaut Long Pasin God i Laikim.” Dispela sapta i stori gut long olsem wanem sumatin inap kamap pren bilong God, em wanpela samting planti man i no tingting long en o ol i ting dispela samting i no inap kamap. (Jems 2:23) Ol man i gat wanem tingting long dispela helpim bilong Baibel?
18 Wanpela wasman sekit long Australia i tok “wantu ol man i laikim buk Baibel i Tok na kwiktaim dispela i kirapim ol man bilong haus long toktok wantaim yumi.” Em i tok moa olsem em i isi tru long yusim dispela buk na dispela i mekim na “planti pablisa i pilim olsem ol inap mekim gutpela wok autim tok na ol i amamas long mekim olsem. Ol i kisim gen strong na amamas long mekim wok olsem bipo. Olsem na sampela i save kolim dispela buk olsem Liklik Hap Gol!”
19-21. Stori long sampela ekspiriens i soim olsem buk Baibel i Tok em i wanpela gutpela buk tru.
19 Wanpela meri long Gaiana i bin tok long wanpela painia i kam long haus bilong em: “Mi ting God i bin salim yu i kam.” I no longtaim i go pinis na man i save stap nating wantaim dispela meri i bin lusim em wantaim tupela liklik pikinini bilong ol. Painia i opim buk Baibel i Tok i go long sapta 1 na em i ritim paragraf 11, aninit long liklik het tok “God i Ting Olsem Wanem Long Ol Pasin i No Stret i Painim Yumi?” Painia i tok: “Meri i pilim tru ol dispela tok na em i lusim painia na i go baksait long liklik stua bilong em na em i krai bikpela.” Dispela meri i orait long kirap stadi long Baibel wantaim wanpela sista long dispela kongrigesen na em i wok long kamap strong.
20 José i sindaun long Spen. Meri bilong em i bin dai long wanpela ka eksiden. José i kirap kisim ol drak bilong daunim bel hevi bilong em, na em i save go lukim ol dokta bilong helpim em. Tasol ol dokta i no inap bekim askim i save bagarapim tru bel bilong José, olsem: “Wai na God i larim meri bilong mi i dai?” Wanpela taim José i bungim Francesc, husat i wok long seim kampani. Francesc i tok i gutpela sapos ol i skelim sapta 11 bilong buk Baibel i Tok, het tok bilong en “Bilong Wanem God i Larim Pen na Hevi i Stap?” José i pilim tru bekim bilong Baibel em buk i kamapim wantaim tok piksa bilong wanpela tisa na sumatin. Em i kirap givim bel long stadi, go long wanpela kibung sekit, na nau em i save kam long ol miting long Haus Kingdom.
21 Roman em i wanpela bisnisman long Polan i gat 40 krismas. Long olgeta taim em i bin i gat rispek long Tok Bilong God. Tasol em i givim bel tumas long wok skin, olsem na em i no kamap strong. Maski i olsem, em i bin go long wanpela kibung distrik na em i kisim wanpela buk Baibel i Tok. Bihain, pasin bilong em i senis. Em i tok: “Dispela buk i mekim na olgeta as bilip bilong Baibel i kamap klia tru.” Long nau Roman i save mekim Baibel stadi long olgeta taim na em i wok long kamap strong.
Wok Long Pilim Moa Yet
22, 23. Yumi ken mekim wanem bilong soim olsem yumi pilim tru gutpela samting God i promis long givim long yumi?
22 Olsem ol gutpela “De Bilong Kisim Bek Yumi i Klostu!” Kibung Distrik i bin kamapim, ol trupela Kristen i laik tru long God i mas kisim bek ol “bilong oltaim oltaim,” em samting God i bin promis long mekim na em i kamap long rot bilong blut bilong Jisas Krais. Nambawan rot bilong kamapim bel bilong yumi olsem yumi pilim tru dispela gutpela samting yumi wetim, em long rot bilong wok yet long stap klin tru na yumi no bihainim moa “ol dispela lo i no gat laip, na yumi ken mekim wok bilong God bilong i stap oltaim.”—Hibru 9:12, 14.
23 Yes, winim 6 milion manmeri i save stap gut long God na mekim wok bilong em, maski long nau i gat planti samting i stap bilong kirapim ol man long bihainim laik bilong ol yet. Dispela i olsem wanpela mirakel. Na tu, em i kamapim klia olsem ol wokboi bilong Jehova i save pilim tru gutpela wok bilong ol long mekim wok bilong God. Ol i save olsem “hatwok [ol] i save mekim long Bikpela, em bai i no inap lus nating.” Yumi laik bai dispela pasin bilong pilim tru ol samting God i bin mekim i mas kamap strong moa long olgeta taim!—1 Korin 15:58; Song 110:3.
Bai Yu Bekim Olsem Wanem?
• Yumi kisim wanem skul long man bilong raitim song long pasin bilong pilim tru ol samting God i mekim na ol kaikai bilong spirit em i givim long yumi?
• Olsem wanem tok bilong Hagai 2:7, (NW) i wok long kamap tru long taim bilong yumi?
• Olsem wanem Jehova i bin redim ol wokboi bilong em long mekim gutpela wok long lotuim em?
• Yu ken mekim wanem bilong soim olsem yu pilim tru gutpela pasin bilong Jehova?
[Sat long pes 27-30]
RIPOT BILONG WOK BILONG OL WITNES BILONG JEHOVA LONG 2006
(Lukim buk o magasin)
[Ol Piksa long pes 25]
Jehova i save givim yumi planti samting bilong helpim yumi long mekim laik bilong em