Marimari Long Ol Arapela—Long Wanem Rot?
“Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.”—GALESIA 6:10.
1, 2. Tok piksa bilong man Samaria i skulim yumi olsem wanem long pasin marimari?
WANPELA saveman bilong Lo i toktok wantaim Jisas, na em i askim Jisas: “Taim lo i tok long wantok bilong mi, em i tok long husat tru?” Bilong bekim dispela askim Jisas i mekim dispela tok piksa: “Wanpela man i lusim Jerusalem na i wokabaut i go daun long taun Jeriko. Na ol stilman i hait i stap long rot, na ol i kisim olgeta samting bilong em, na ol i paitim em nogut tru. Ol i mekim olsem, na ol i wokabaut i go. Na em i slip i stap long rot, na klostu em i laik i dai. Na long dispela taim wanpela pris i bihainim dispela rot i go daun. Na em i lukim dispela man i slip i stap long rot, na em i abrusim em, na i wokabaut long arere bilong rot na i go. Olsem tasol wanpela Livai tu i kam kamap long dispela hap, na i lukim dispela man, na i abrusim em, na i wokabaut long arere bilong rot na i go. Tasol wanpela man bilong Samaria em i wokabaut long rot na i kam kamap long dispela man. Em i lukim em, na bel bilong en i sori tru long em. Em i go klostu long em, na i kapsaitim wel wantaim wain long ol sua bilong em, na i pasim ol. Na em i litimapim dispela man, na i putim em i sindaun long donki bilong em yet. Na em i bringim em i go long wanpela haus pasindia na i lukautim em gut. Na long de bihain em i givim tupela mani silva long papa bilong dispela haus pasindia, na i tokim em olsem, ‘Yu lukautim gut dispela man. Na sapos yu yusim sampela mani moa bilong yu bilong lukautim em, orait taim mi kam bek, bai mi bekim bilong yu.’ ” Orait Jisas i askim dispela saveman bilong Lo: “Yu ting wanem? Husat bilong ol tripela man i laikim tru dispela man i bin bagarap long han bilong ol stilman?” Dispela saveman bilong Lo i tok: “Dispela man i sori long em na i helpim em.”—Luk 10:25, 29-37a.
2 Pasin dispela man Samaria i mekim long man i kisim bagarap i kamapim klia pasin marimari em i wanem kain pasin tru! Pasin sori i kirapim man Samaria long mekim samting bilong helpim dispela man i kisim bagarap. Na tu, man Samaria i no save long dispela man. Tasol maski pasin bilong ples, lain na lotu bilong dispela man i no wankain olsem bilong dispela man Samaria, dispela i no pasim em long mekim pasin marimari. Taim Jisas i mekim pinis tok piksa long man Samaria i gat pasin marimari, Jisas i tokim saveman bilong lo: “Yu go na yu mekim wankain pasin.” (Luk 10:37b) Yumi mas tingim gut dispela tok na wok strong long mekim pasin marimari long ol arapela. Tasol olsem wanem yumi ken mekim olsem? Long wanem ol rot yumi ken mekim pasin marimari?
“Sapos Wanpela Kristen Brata . . . i Gat Laplap Nogut Tasol”
3, 4. Bilong wanem narapela i mas mekim pasin marimari long narapela insait long kongrigesen Kristen?
3 Aposel Pol i tok: “Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) Orait pastaim yumi bai skelim olsem wanem yumi ken mekim pasin marimari long ol wanbilip bilong yumi.
4 Disaipel Jems i kirapim ol Kristen tru long narapela i mas marimari long narapela, na em i tok: “Sapos wanpela man i no bin sori long ol arapela man, orait taim God i skelim em long kot, God bai i no sori liklik long em.” (Jems 2:13) Ol ves i stap klostu long dispela ves i kamapim sampela rot we yumi inap marimari long ol arapela. Jems 1:27 i tok: “Pasin bilong Kristen i stap stret olgeta na i no gat asua long ai bilong God Papa bilong yumi, em i olsem. Yumi mas tingting long ol pikinini, papamama bilong ol i dai pinis, na long ol meri, man bilong ol i dai pinis, na yumi mas helpim ol long karim ol hevi bilong ol. Narapela samting tu, yumi mas lukautim gut wokabaut bilong yumi yet, bai pasin bilong dispela graun i no ken mekim yumi i kamap doti long ai bilong God.” Jems 2:15, 16 i tok: “Sapos wanpela Kristen brata o susa, em i gat laplap nogut tasol, na em i no gat kaikai, na wanpela bilong yupela i tokim em olsem, ‘Yu ken i stap bel isi. Yu go putim laplap bilong hatim skin bilong yu, na yu go kisim kaikai na pulapim bel bilong yu,’ orait dispela tok bai i helpim em olsem wanem? Yupela yet i mas givim em klos na kaikai bilong helpim bodi bilong em.”
5, 6. Olsem wanem yumi ken mekim pasin marimari long ol bratasista bilong yumi long kongrigesen?
5 Pasin bilong lukautim na helpim ol arapela i sot long ol samting em hap wok bilong lotu tru. Tasol yumi no ken tok tasol long ol wanbilip i gat hevi olsem yumi laik bai hevi bilong ol i pinis, nogat. Pasin sori i mas kirapim yumi long mekim sampela samting bilong helpim ol. (1 Jon 3:17, 18) Sampela samting i olsem: redim kaikai bilong wanpela i sik, helpim wanpela lapun long ol wok bilong haus, na long taim i gat wok long mekim olsem, kisim ol bratasista long ka i go i kam long ol miting Kristen, na no ken surik long mekim ol wok bilong helpim ol bratasista i sot long ol samting.—Lo 15:7-10.
6 Tru yumi mas helpim ol bratasista bilong yumi long kongrigesen Kristen long ol samting bilong skin, tasol bikpela samting moa em yumi mas helpim ol long ol samting bilong lotu. Baibel i kirapim yumi long “strongim bel bilong ol man i save pret na long helpim ol man i no strong.” (1 Tesalonaika 5:14) Baibel i tokim “ol lapun meri” long “skulim ol arapela long mekim gutpela pasin.” (Taitus 2:3) Baibel i tok long ol elda Kristen olsem: “Ol wan wan bikman bai i helpim gut ol manmeri i kam bilong kisim helpim bilong ol. Ol bai i stap olsem ol ples hait ol manmeri i ken i go na hait long en long taim bilong bikpela win na ren.”—Aisaia 32:2.
7. Ol disaipel i stap long Antiok bilong Siria i lainim yumi olsem wanem long pasin marimari?
7 Ol kongrigesen i stap long taim bilong ol aposel i save lukautim ol meri man bilong ol i dai pinis, ol pikinini i no gat papamama, ol manmeri long kongrigesen i sot long ol samting, na sampela taim ol i save salim kaikai samting i go long ol narapela kongrigesen i sot long ol samting. Olsem, taim profet Agabus i tok profet long “bikpela hangre bai i kamap long olgeta hap bilong graun,” ol disaipel long Antiok bilong Siria i “pasim tok long salim mani i go long ol brata long Judia, bilong helpim ol. Na olgeta Kristen i givim mani inap long skel bilong ol.” Ol i salim ol samting i go long han bilong “Barnabas na Sol.” (Aposel 11:28-30) Olsem wanem long nau? Lain “wokboi i gat gutpela tingting” i bin kamapim ol komiti bilong lukautim wok bilong helpim ol brata em hevi bilong bikpela win, graun guria, o sunami samting i painim ol. (Matyu 24:45) Sapos yumi givim taim, strong na mani samting bilong yumi bilong helpim dispela wok, dispela em i gutpela rot bilong kamapim pasin marimari.
‘Sapos Yupela i Mekim Gut Long Wanpela na Givim Baksait Long Narapela’
8. Olsem wanem pasin bilong mekim gut long wanpela lain tasol i pasim rot bilong mekim pasin marimari?
8 Jems i stori long wanpela pasin i save pasim man long mekim pasin marimari na kamapim pasin bilong “laikim tru ol arapela man” na em i tok: “Sapos yupela i mekim gut long wanpela man na givim baksait long narapela, orait yupela i mekim sin. Na dispela lo i soim olsem, yupela i man bilong brukim lo.” (Jems 2:8, 9) Pasin bilong mekim gut long ol man i gat planti mani o long ol man i gat namba, dispela inap mekim na yumi no ‘harim ol rabisman i singaut long yumi helpim ol.’ (Sindaun 21:13) Pasin bilong mekim gut long wanpela lain tasol na ol narapela nogat, dispela pasin i save pasim man long mekim pasin marimari. Yumi mekim pasin marimari taim yumi mekim wankain pasin long olgeta man.
9. Bilong wanem i no gat rong long tingim gut sampela man?
9 Tasol olsem wanem? Pasin bilong mekim gut long olgeta man i makim olsem yumi no ken tingim gut wanpela man tasol? Nogat. Aposel Pol i raitim pas long ol Kristen long Filipai na em i tokim ol long wanwok bilong em Epafroditus olsem: “Yupela i mas givim biknem long ol dispela kain man.” Bilong wanem em i tok olsem? Long wanem, “em i mekim wok bilong Krais na klostu em i dai pinis. Em i no tingting long em yet i mas i stap gut. Nogat. Em i tingting tasol long wok yupela i bin givim em bilong helpim mi, na em i sakim sik bilong en na mekim wok yet.” (Filipai 2:25, 29, 30) I stret ol i givim biknem long Epafroditus long wok em bin mekim. Na tu, 1 Timoti 5:17 i tok: “Yupela i mas givim biknem na gutpela pe long ol hetman i mekim gutpela wok. Namba wan lain bilong kisim dispela em ol hetman i save hatwok long autim tok bilong God na long skulim ol manmeri long ol pasin God i laikim.” Yumi mas amamas long ol arapela i gat ol gutpela pasin Kristen. Taim yumi tingim gut ol man, dispela i no pasin bilong mekim gut long wanpela man tasol, nogat.
Gutpela Tingting i Kam Long God i Save Kirapim Man Long “Sori”
10. Bilong wanem yumi mas bosim gut maus bilong yumi?
10 Jems i stori long maus na i tok: “Oltaim maus i save kirap nabaut na mekim tok nogut. I olsem marasin nogut bilong kilim man i dai i pulap long maus bilong yumi. Long maus yumi save mekim tok bilong litimapim nem bilong Bikpela, em Papa bilong yumi. God i bin mekim yumi olgeta manmeri i kamap olsem em yet, tasol long maus yumi save mekim tok nogut bilong bagarapim ol arapela manmeri. Tok bilong litimapim nem bilong God na tok nogut tu, tupela kain tok i save kamap long wanpela maus tasol.” Long dispela ves, Jems i tok moa: “Sapos yupela i save bel nogut tru long ol arapela man, na sapos oltaim yupela i painim rot bilong apim nem bilong yupela yet, orait yupela i no ken amamas long gutpela tingting na save bilong yupela. Nogut yupela i giaman na pasin bilong yupela i daunim tok i tru. Dispela kain save em i no kam daun long heven. Nogat. Em i samting bilong dispela graun tasol. Em i save kamap long olpela bel, na Satan em i papa bilong en. Harim. Ol man i save bel nogut long ol arapela man, na oltaim ol i save painim rot bilong apim nem bilong ol yet, ol dispela man i no save sindaun gut, na ol i save mekim olgeta kain pasin nogut. Tasol ol man i kisim kain gutpela tingting na save i kam long God, ol i save mekim ol pasin olsem. Namba wan, ol i save bihainim klinpela tingting. Na namba 2, ol i save stap wanbel wantaim ol arapela, na ol i save isi long ol, na ol i save harim tok bilong ol arapela man. Ol i save sori tru long ol arapela na mekim gutpela pasin long ol. Ol i save mekim wankain pasin tasol long olgeta man. Na ol i no save giaman long bihainim gutpela pasin. Nogat. Ol i bihainim tru.”—Jems 3:8-10a, 14-17.
11. Olsem wanem pasin bilong yumi long toktok i soim olsem yumi gat pasin marimari?
11 Olsem na pasin bilong yumi long toktok inap soim olsem yumi gat savetingting i save kirapim yumi long “sori” olsem marimari long man o nogat. Tasol olsem wanem sapos yumi jeles o kros long narapela na nau yumi tok giaman, tok baksait, o apim nem bilong yumi yet? Song 94:4 i tok: “Ol man nogut i . . . bikhet na amamas long pasin nogut ol i bin mekim.” Pasin bilong mekim tok baksait long narapela dispela inap bagarapim gutnem bilong em! (Song 64:2-4) Na tu, tingim hevi inap kamap taim man i giaman long kot. (Sindaun 14:5; 1 King 21:7-13) Taim Jems i stori pinis long pasin bilong mekim wok nogut long maus, em i tok: “Ol brata bilong mi, dispela kain pasin em i no gutpela pasin.” (Jems 3:10b) Pasin marimari tru i makim olsem yumi mas mekim ol klinpela tok, stap wanbel wantaim ol arapela, na isi long ol. Jisas i tok: “Mi tokim yupela, long de God i makim bilong kotim ol manmeri, em bai i tingting long olgeta toktok nabaut ol manmeri i bin mekim na em bai i skelim ol.” (Matyu 12:36) Em i bikpela samting long yumi mas mekim gutpela wok long maus bilong yumi!
“Lusim Rong Bilong Ol Arapela”
12, 13. (a) Tok piksa bilong wokboi i gat dinau long bikman bilong em i skulim yumi olsem wanem long pasin marimari? (b) Wanem mining bilong dispela tok olsem lusim rong bilong brata “inap 70 taims 7-pela taim”?
12 Tok piksa bilong Jisas long wanpela wokboi i gat 10 milion kina dinau long bikman bilong em, em wanpela king, dispela i soim narapela rot yumi ken mekim pasin marimari. Dispela wokboi i no gat mani inap long bekim dispela dinau, na em i askim bosman bilong em long marimari long em. Bikman i “sori long en” na lusim dinau bilong en. Tasol dispela wokboi i go ausait na i lukim wanpela wanwok bilong en, em i gat dinau long em inap 10 kina tasol na em i go putim wanwok i stap long kalabus inap em i bekim dinau. Taim bikman i harim stori bilong dispela samting, em i singautim dispela wokboi na tokim em: “Yu wokboi nogut. Pastaim yu krai long mi, na mi lusim olgeta dinau bilong yu. Mi bin sori long yu. Olsem na watpo yu no sori tu long wanwok bilong yu?” Bikman i putim em long han bilong ol woda. Jisas i pinisim tok piksa bilong em na i tok: “Olsem tasol Papa bilong mi i stap long heven, em bai i mekim wankain pasin tasol long yupela sapos yupela i no lusim tru ol rong ol brata i mekim long yupela.”—Matyu 18:23-35.
13 Dispela tok piksa i kamapim klia olsem pasin bilong lusim rong bilong narapela i insait long pasin marimari. Jehova i lusim sin bilong yumi. Olsem na yumi tu i mas “lusim rong bilong ol arapela,” a? (Matyu 6:14, 15) Paslain long Jisas i kamapim tok piksa bilong dispela wokboi i no gat pasin marimari, Pita i askim em: “Bikpela, hamas taim brata bilong mi i ken mekim rong long mi, na mi mas lusim rong bilong en? Ating inap long 7-pela taim?” Jisas i tok: “Mi no tok long yu mas lusim rong bilong en inap 7-pela taim tasol. Nogat. Mi tok, yu mas lusim inap 70 taims 7-pela taim.” (Matyu 18:21, 22) Yes, man i gat pasin marimari em bai redi long lusim rong bilong narapela “inap 70 taims 7-pela taim.” Dispela i makim olsem i no gat mak bilong hamas taim man i mas lusim rong bilong narapela.
14. Olsem Matyu 7:1-4 i kamapim, olsem wanem yumi inap mekim pasin marimari long olgeta de?
14 Jisas i kamapim narapela rot bilong kamapim pasin marimari long Bikpela Tok Long Maunten, na em i tok: “Yupela i no ken skelim pasin bilong ol arapela na tok ol i man nogut. Nogut God i mekim wankain pasin long yupela tu. God bai i skelim pasin bilong yupela long wankain pasin olsem yupela i save mekim long ol arapela man. . . . Bilong wanem yu lukim liklik hap pipia i stap long ai bilong brata bilong yu, tasol yu no tingim bikpela plang i stap long ai bilong yu yet? Sapos plang i stap long ai bilong yu yet, orait olsem wanem na yu inap tokim brata bilong yu, ‘Brata, mi laik kamautim pipia i stap long ai bilong yu?’ ” (Matyu 7:1-4) Olsem na yumi inap mekim pasin marimari long olgeta de taim yumi no tingim rong bilong ol arapela na yumi no skelim ol.
“Mekim Gutpela Pasin Long Ol Arapela”
15. Bilong wanem yumi no ken mekim pasin marimari long ol wanbilip tasol?
15 Buk Jems long Baibel i stori long pasin bilong wanpela wanbilip i marimari long narapela wanbilip, tasol dispela i no makim olsem yumi mas marimari tasol long ol lain insait long kongrigesen, nogat. Song 145:9 i tok: “[God] i save mekim gutpela pasin long olgeta manmeri na em i save marimari long olgeta samting em i bin wokim.” Baibel i kirapim yumi long “bihainim ol pasin” bilong God na “mekim gutpela pasin long ol arapela.” (Efesus 5:1; Galesia 6:10) Tru yumi no laikim “ol pasin bilong graun na olgeta samting bilong graun,” tasol yumi save pilim hevi bilong ol man bilong dispela graun.—1 Jon 2:15.
16. Wanem ol samting i stiaim pasin bilong yumi long marimari long ol arapela?
16 Yumi Kristen olsem na yumi laik helpim ol man em “taim nogut” o sampela bikpela hevi i painim ol. (Saveman 9:11) Sapos yumi inap long helpim ol narapela orait yumi ken mekim olsem. (Sindaun 3:27) Tru yumi laik helpim ol arapela long ol samting, tasol yumi mas was gut tu olsem gutpela pasin yumi mekim i no ken mekim na ol i kamap lesman. (Sindaun 20:1, 4; 2 Tesalonaika 3:10-12) Man i mekim pasin marimari em i save sori long narapela na bihainim gutpela tingting.
17. Wanem wanpela gutpela rot bilong mekim pasin marimari long ol man i no insait long kongrigesen Kristen?
17 Wanpela gutpela rot tru bilong marimari long ol man i no insait long kongrigesen Kristen em long tokim ol long tok i tru bilong Baibel. Bilong wanem? Long wanem, planti manmeri long nau ol i stap long tudak bilong ol samting bilong spirit. Ol i no save long rot bilong karim ol hevi i painim ol na ol i no gat gutpela samting ol i ken wetim, na planti bilong ol “i stap nogut tru, olsem ol sipsip i no gat wasman.” (Matyu 9:36) Tok Bilong God inap i stap olsem ‘lam bilong helpim ol’ long karim ol hevi bilong ol. Na tu, em inap i stap olsem ‘lait bilong soim rot long ol,’ long wanem, Baibel i tokaut long ol samting God i tingting pinis long kamapim, na ol inap wetim gutpela samting bai kamap bihain. (Song 119:105) Yumi gat gutpela wok tru bilong bringim tok i tru i go long ol man em ol i gat hevi na ol i no gat gutpela samting bilong wetim i kamap! Klostu nau “bikpela hevi tru” bai kamap, olsem na nau em i taim bilong givim bel tru long autim tok bilong Kingdom na kamapim disaipel. (Matyu 24:3-8, 21, 22, 36-41; 28:19, 20) Dispela pasin bilong marimari long ol arapela i bikpela samting moa.
Givim “Ol Samting i Stap Long Insait”
18, 19. Bilong wanem yumi mas mekim moa yet pasin marimari?
18 Jisas i tok: “Ol samting i stap long insait, em yupela i mas givim long ol man i sot, bilong helpim ol.” (Luk 11:41) Bilong man i ken marimari tru, bel i mas kirapim em long mekim olsem. (2 Korin 9:7) Dispela kain pasin marimari em i save givim nupela strong long man i stap long dispela taim nau we i gat hatpela pasin, pasin bilong man long tingim em yet tasol na i no tingim ol narapela i karim pen na hevi.
19 Yumi mas wok long kamapim moa yet pasin marimari long i stap bilong yumi. Taim yumi mekim moa yet pasin marimari, bai yumi bihainim pasin bilong God. Dispela i helpim yumi long i stap amamas na laip bilong yumi bai i gat as bilong en.—Matyu 5:7.
Yu Lainim Wanem Samting?
• Bilong wanem em i bikpela samting long marimari long ol wanbilip?
• Olsem wanem yumi ken kamapim pasin marimari insait long kongrigesen Kristen?
• Olsem wanem yumi ken mekim gutpela pasin long ol man i no insait long kongrigesen?
[Piksa long pes 26]
Man Samaria i mekim pasin marimari
[Ol Piksa long pes 27]
Ol Kristen i save mekim pasin marimari
[Piksa long pes 30]
Wanpela gutpela rot bilong kamapim pasin marimari long ol man i no insait long kongrigesen em long tokim ol long tok i tru bilong Baibel