Planti Man i Gat Dispela Bilip

“Mi save driman olsem ol i tromoi mi i go insait long hel na paia i kukim mi. Mi singaut nogut tru na kirap long slip. Mi wok strong long mi no ken mekim sin.”​​—⁠Arline.

OLSEM WANEM? Yu bilip olsem hel em i wanpela ples we ol sinman bai i go long en na kisim pen? Planti man i bilip olsem. Long 2005 wanpela saveman long University of St. Andrews long Skotlan i mekim wok painimaut, na em i kisim save olsem 33 pesen bilong ol pris pasto long Skotlan i bilip olsem ol man i stap longwe long God ol bai “kisim bikpela pen long tingting inap oltaim oltaim long hel.” Inap 20 pesen bilong ol i bilip olsem ol man i stap long hel bai kisim bikpela pen long bodi bilong ol.

Long planti kantri, planti man i bilip long hel. Long 2007, wanpela lain (Galup) bilong mekim wok painimaut ol i kisim save olsem 70 pesen bilong ol man long Amerika i bilip long hel. Long ol kantri tu we planti man i no save tingim lotu, i gat dispela bilip long hel. Long 2004, dispela lain i kisim save olsem long Kanada, 42 pesen bilong ol manmeri i bilip long hel. Na long Inglan, 32 pesen ol i bilip olsem i gat hel.

Samting Ol Pris Pasto i Skulim Ol Man Long En

Planti pris pasto i no moa skulim ol man olsem hel em i wanpela ples paia we ol man i kisim pen. Ol i strongim wanpela tingting i wankain long tok i stap long wanpela buk (Catechism of the Catholic Church) ol i wokim long 1994. Dispela buk i tok: “Nambawan strafe bilong hel em olsem man bai stap longwe long God inap oltaim oltaim.”

Maski i olsem, planti man i bilip yet olsem hel em i wanpela ples we man i kisim pen long tingting o long bodi. Ol man i strong long kamapim dispela bilip ol i tok olsem Baibel i as bilong en. Presiden bilong Southern Baptist Theological Seminary, em Albert Mohler, i tok: “Dispela tok i stap long Baibel.”

Bilong Wanem Samting Yu Bilip Long En i Bikpela Samting?

Sapos hel em i wanpela ples tru we man i kisim pen, orait yu mas pret long en. Tasol sapos dispela tok i no tru, orait ol bikman bilong lotu em ol i skulim ol man long dispela bilip, ol i mekim ol man i paul na pret nating. Na tu, ol i bagarapim nem bilong God.

Baibel i tok wanem long dispela samting? Ol stori i kamap bihain bai bekim dispela 3-pela askim: (1) Wanem samting i save painim man taim em i dai? (2) Jisas i tok wanem long hel? (3) Taim yu save hel em wanem samting, dispela inap mekim wanem long yu?