Yu Save Long Dispela?

I gat wanem as na Pontius Pailat i pret long Sisar?

Ol hetman bilong lotu Juda i subim Gavena Pontius Pailat bilong Rom long kilim i dai Jisas, na ol i tok: “Sapos yu lusim dispela man i go, orait yu no pren bilong Sisar.” (Jon 19:12) “Sisar” em dispela ves i toktok long en em King Taiberius Bilong Rom. Yu ting i gat as na Pailat i pret long dispela king?

King Taiberius em i wanem kain man? Wanpela buk (The New Encyclopædia Britannica) i stori olsem inap planti yia paslain long Jisas i bin sanap long kot, Taiberius i bin stap pinis olsem “man bilong tingim ol laik bilong em yet tasol, na em i save painim kain kain rot nogut bilong inapim ol dispela laik.” Em i no save trastim ol man, na dispela pasin i kirapim em long mekim nogut tru long ol man em i saspek long ol i no stap gut long gavman, na kilim ol i dai. Dispela buk i tok tu olsem: “Ol saveman i bin i stap long wankain taim olsem em, ol i tok, em i save kisim amamas long pasin bilong mekim nogut tru long man na mekim ol tok doti. Na em i save amamas long kilim nating wanem wanem man em i laik kilim i dai na long wanem wanem taim em i laik mekim olsem.”

Olsem na ating pasin bilong Taiberius i mekim na Pailat i harim tok bilong ol hetman bilong Juda na putim tok long ol i mas kilim i dai Jisas.​—Jon 19:​13-16.

Bilong wanem Jisas i wasim lek bilong ol aposel bilong em?

Long Israel bilong bipo, ol man nating ol i save wokabaut lek nating taim ol i raun mekim ol wok bilong ol. Ol sandel em ol man i save pasim, em ol kain sandel i gat ol rop bilong pasim i kam antap klostu long skru daunbilo long lek. I gat planti das na graun malumalum long ol rot na ol gaden, olsem na lek bilong ol i save doti nogut tru.

Em pasin bilong ol man long dispela hap long rausim sandel bilong ol taim ol i laik i go insait long haus. Taim ol i singautim man i kam long haus bilong ol, ol i mas wasim lek bilong em. Papa bilong haus o wanpela wokboi bilong em i save mekim dispela wok. Planti tok bilong Baibel i kamapim stori bilong dispela pasin bilong wasim lek. Olsem: Abraham i tokim ol man i kam lukim em long haus sel bilong em: “Bai mi tokim wanpela man long kisim wara i kam na . . . wasim lek bilong yupela. Na yupela i ken malolo pastaim aninit long as bilong dispela diwai. Na bai mi kisim sampela kaikai bilong strongim yupela.”​—Stat 18:​4, 5; 24:32; 1 Samuel 25:41; Luk 7:​37, 38, 44.

Dispela stori i helpim yumi long kliagut long as na Jisas i wasim lek bilong ol disaipel bilong em long taim em i mekim laspela kaikai bilong Pasova wantaim ol. Long dispela taim, papa bilong haus o wokboi i no bin i stap bilong wasim lek bilong ol, na i luk olsem i no gat wanpela disaipel i laik mekim dispela wok. Olsem na taim Jisas i kisim wanpela dis i gat wara na taul bilong wasim na draim lek bilong ol aposel, em i skulim ol dispela man long mekim pasin laikim na pasin daun.​—Jon 13:5.