Go Klostu Long God
Nambawan Bikpela Samting i Kamapim Pasin Laikim Bilong God
ABRAHAM i laikim God. Dispela gutpela man i laikim tu Aisak, pikinini em i bin kamapim long taim em i lapun. Tasol taim Aisak i gat 25 krismas samting, God i tokim Abraham long kilim i dai Aisak olsem ofa, em samting wanpela papa i no inap long mekim. Tasol olsem stori i kamapim, Aisak i no bin dai. Taim Abraham i apim naip bilong kilim Aisak, wantu Jehova i pasim em long rot bilong wanpela ensel. Dispela stori bilong Baibel i stap long Stat 22:1-18, i olsem piksa bilong helpim yumi long tingim bikpela pasin laikim bilong God i mekim long yumi.
Stat sapta 22 Ves 1 i tok, “God i traim Abraham.” Abraham em man i gat bilip, tasol nau wanpela samting i kamap bilong traim bilip bilong em winim bipo. God i tok: “Yu gat wanpela pikinini tasol, Aisak, na yu laikim em tumas. Yu mas kisim dispela pikinini na yu go long hap . . . Na long dispela maunten yu mas givim Aisak long mi olsem ofa bilong paia i kukim olgeta.” (Stat sapta 22 Ves 2) Tingim dispela samting, God i no inap larim wanpela traim i kamap long ol wokman bilong em we i winim strong bilong ol, nogat. Olsem na dispela traim i kamapim olsem God i gat bilip long Abraham.—1 Korin 10:13.
Abraham i kirap bihainim kwik tok. Stat sapta 22 Ves 3 i tok: “Long moningtaim tru Abraham i redim donki na i kisim Aisak wantaim tupela wokboi. Em i brukim sampela paiawut bilong mekim ofa, na em i wokabaut i go.” Abraham i no bin stori long ol narapela long olgeta samting bilong dispela traim.
Ol i wokabaut inap 3-pela de, na dispela i givim taim long Abraham i ken tingim tingim long bel ol dispela samting. Tasol Abraham i no senisim tingting bilong em. Ol toktok em i kamapim i soim bilip bilong em. Taim em i lukim dispela maunten em God i bin makim, em i tokim ol wokboi olsem: “Yutupela stap hia . . . Bai mi go long hap wantaim pikinini, na bai mitupela i mekim lotu. Na bihain bai mitupela i kam bek.” Taim Aisak i askim long sipsip bilong mekim ofa, Abraham i tok: “God yet bai i givim pikinini sipsip.” (Stat sapta 22 Ves 5, 8) Abraham i bilip olsem em bai kam bek wantaim pikinini bilong em. Bilong wanem? Long wanem, Abraham i tingting olsem, ‘Sapos Aisak i dai, God inap long kirapim em bek.’—Hibru 11:19.
Long maunten, taim Abraham i kisim “naip na i laik kilim pikinini” bilong em, wanpela ensel i pasim han bilong em. Na God yet i givim wanpela sipsip man—em i pas long wanpela liklik diwai—bilong Abraham i ken mekim ofa long en na i “kisim ples bilong Aisak.” (Stat sapta 22 Ves 10-13) Long ai bilong God, i kain olsem Abraham i bin ofaim Aisak. (Hibru 11:17) Wanpela saveman i tok, “Taim Abraham i redi long mekim ofa long pikinini bilong em, long ai bilong God dispela i wankain olsem Abraham i mekim ofa pinis long pikinini bilong em.”
Jehova i kamapim klia olsem em i bilip long Abraham. Na Abraham i bilip long Jehova na em i kisim blesing, long wanem, God i kamapim gen na kolim sampela samting moa bilong dispela kontrak em i bin mekim wantaim Abraham. Long rot bilong dispela kontrak, God i tok promis olsem ol manmeri bilong olgeta lain bai kisim blesing.—Stat sapta 22 Ves 15-18.
Em nau, God i no bin larim Abraham i ofaim Aisak, tasol bihain God yet i ofaim Pikinini bilong em. Pasin bilong Abraham long redi long mekim ofa long pikinini bilong em, em i piksa long ofa em God i mekim long dispela wanpela Pikinini bilong em long baim bek yumi long sin. (Jon 3:16) Dispela ofa bilong Krais i nambawan bikpela samting i kamapim pasin laikim bilong Jehova long yumi. God i mekim kain ofa olsem bilong helpim yumi, olsem na yumi mas askim yumi yet, ‘Mi redi long mekim wanem samting bilong amamasim God?’