Painim Tok i Tru Long Ol Samting Bilong Heven

TINGTING bilong i go long heven long bihain em i gutpela samting tru long ol man! Ol lain bilong lotu Muslim, Hindu, Buda, ol lotu bilong Kristendom, na planti manmeri i no save tingting long lotu, ol i wet long kisim laip bihain long taim ol i dai. Planti ol i tingim heven olsem naispela ples i gat amamas long en, na ol manmeri bai i no kisim pen na hevi moa, na ol inap bung gen wantaim ol wanblut i dai pinis. Tasol wanpela tok bilong bipo i makim stret planti man bilong graun: Olgeta man i laik i go long heven, tasol i no gat wanpela man i laik i dai bilong i go long dispela hap. Bilong wanem i olsem?

Sapos God i bin wokim yumi bilong i dai na go long heven, ating planti man bai i gat laik long i go, wankain olsem ol pikinini i gat laik long kamap bikpela na ol yangpela i gat laik long marit. Tasol klostu olgeta manmeri i no laik i dai.

Tasol maski i olsem, ol man bilong autim tok bilong lotu ol i tok, yumi bai stap sotpela haptaim long graun na bihain yumi bai go long heven, em ples tru bilong yumi. Theodore Edgar Cardinal McCarrick, bipo em asbisop bilong Washington, D.C., em i tok: “God i no bin wokim yumi bilong kisim dispela kain laip nau yumi gat, nogat. Em i wokim yumi bilong i stap long heven.” Na wanpela presiden bilong lain U.S. National Association of Evangelicals long bipo, em i tok: “Yumi stap laip bilong givim biknem long God na go long heven . . . long wanem, heven em ples bilong yumi.”

Ol man husat i bilip long kisim laip long heven bihain long taim ol i dai, ol i bin kisim ol liklik hap stori nabaut i olsem as bilong dispela bilip. George Barna, em presiden bilong wanpela kampani i save skelim tingting bilong ol man long lotu, em i painimaut olsem planti man i kisim “olkain tingting long laip bihain long taim man i dai, long rot bilong ol muvi, musik, na ol buk.” Wanpela pasto bilong lotu Episkopelian long Florida i tok: “Yumi no gat save long ol samting bilong heven​—yumi save tasol olsem heven em ples God i stap long en.”

Tasol heven em i wanpela bikpela tok em Baibel i stori long en. Baibel i tok heven em i wanem kain ples? Yu ting God i bin wokim ol man bilong i stap long heven? Sapos ol man i go long heven, ol bai mekim wanem long dispela hap?

[Rait long pes 3]

Bilong wanem planti man i laik i go long heven, tasol klostu olgeta man i no laik i dai bilong i go long dispela hap?