Baibel i Save Senisim i Stap Bilong Man

• YIA MI BON: 1941

• KANTRI: BENIN

• BIPO: MARITIM PLANTI MERI NA BIRUAIM OL WITNES BILONG JEHOVA

LAIP BILONG MI LONG BIPO: Mi bilong Cotonou, wanpela siti long Benin. Papamama i mekim bikpela long mi olsem wanpela Katolik, tasol mi no save go oltaim long lotu. Planti man Katolik long hap mi stap long en i maritim planti meri, long wanem, long dispela taim gavman i orait long ol man i ken mekim olsem. Olsem na mi maritim 4-pela meri.

Taim pait i kirap insait long kantri long 1970 samting, mi ting olsem dispela bai helpim kantri bilong mi. Mi sapotim tru dispela pait na mi insait long wok politik. Ol man insait long dispela pait, ol i no laikim ol Witnes Bilong Jehova, long wanem, ol Witnes i no save insait long wok politik. Mi wanpela bilong ol man i save mekim nogut long ol Witnes. Long 1976, taim ol i rausim ol misineri bilong ol Witnes Bilong Jehova long kantri, mi ting ol i no inap kam bek.

BAIBEL I SENISIM I STAP BILONG MI: Dispela pait i pinis long 1990. Mi kirap nogut olsem ol misineri bilong ol Witnes i kam bek gen. Mi kisim tingting olsem ating God i stap wantaim dispela lain. Long dispela taim, mi senisim ples wok bilong mi. Wanpela nupela wanwok bilong mi em i Witnes, na kwiktaim em i kirap autim tok long mi. Em i soim mi ol ves bilong Baibel i stori long Jehova olsem em i God bilong pasin laikim na stretpela pasin. (Lo 32:4; 1 Jon 4:8) Mi laikim ol dispela pasin bilong God. Mi laik kisim sampela save moa long Jehova, olsem na mi orait long stadi long Baibel.

I no longtaim mi kirap go long ol miting bilong ol Witnes Bilong Jehova. Mi kirap nogut long lukim gutpela pasin laikim bilong ol​—ol i no ting olsem ol man bilong wanpela skin o sindaun i winim narapela, nogat. Taim mi wok long bung planti taim wantaim ol Witnes, mi luksave olsem ol i disaipel tru bilong Jisas.​—Jon 13:35.

Mi ting olsem sapos mi laik lotuim Jehova, mi mas lusim Lotu Katolik. Em i no isi long mekim dispela disisen, long wanem, mi pret ol narapela bai i gat wanem tingting long mi. Inap longpela taim na long rot bilong helpim mi kisim long Jehova, mi strongim bel na risain long lotu.

Tasol i gat narapela bikpela senis mi mas mekim. Taim mi stadi long Baibel, mi kisim save olsem God i no orait long pasin bilong maritim planti meri. (Stat 2:​18-24; Matyu 19:​4-6) Long ai bilong em, namba wan marit bilong mi tasol i stret. Olsem na mi rejistaim dispela marit long gavman, na mi rausim ol narapela meri bilong mi, na mi stretim rot bilong lukautim ol long ol samting bilong skin. I no longtaim na tupela meri bilong mi em mi bin rausim ol, ol i kamap Witnes Bilong Jehova.

GUTPELA SAMTING I PAINIM MI:

Maski meri bilong mi i stap yet olsem Katolik, em i rispektim disisen bilong mi long mekim wok bilong Jehova. Mitupela wantaim i pilim olsem mi kamap gutpela man marit.

Mi bin ting olsem mi bai stretim gut komiuniti bilong mi long rot bilong wok politik, tasol ol dispela hatwok i lus nating. Nau mi save olsem Kingdom Bilong God tasol em i rot bilong pinisim tru ol hevi bilong ol man. (Matyu 6:​9, 10) Mi tenkyu tru long Jehova long em i soim mi long rot bilong stap amamas tru.

• YIA MI BON: 1977

• KANTRI: BRASIL

• BIPO: PASTO BILONG LOTU PENTIKOSTAL

LAIP BILONG MI LONG BIPO:

Mi kamap bikpela long ples klostu long taun Itu, long São Paulo. Planti man long dispela hap i insait long olkain pasin raskol.

Mi man bilong pait na bagarapim tru man na mekim pasin pamuk. Na moa yet, mi insait long mekim wok bisnis bilong salim drak. Tasol bihain, mi luksave olsem mi inap go kalabus o dai long dispela laip mi stap long en, olsem na mi lusim. Orait, mi kirap bung wantaim Lotu Pentikostal, na bihain mi kamap wanpela pasto.

Mi pilim olsem mi inap helpim gut ol man long rot bilong wok mi mekim long dispela lotu. Na tu, mi save mekim tok long wanpela program bilong lotu long redio stesin, na planti manmeri i save long mi. Tasol isi isi mi lukim olsem lotu i no tingim ol manmeri bilong en, na tu, lotu i no tingting long givim ona long God. Mi pilim olsem lotu i tingting tasol long kisim mani. Olsem na mi tingting long risain long dispela lotu.

BAIBEL I SENISIM I STAP BILONG MI:

Taim mi kirap stadi long Baibel wantaim ol Witnes Bilong Jehova, wantu mi luksave olsem ol i narapela kain long ol narapela lotu. I gat tupela samting mi kirap nogut long en. Namba wan, ol Witnes Bilong Jehova i no tok tasol olsem ol man i mas laikim God na laikim ol narapela, nogat, ol yet i kamapim dispela pasin. Namba tu, ol i no insait long wok politik na woa. (Aisaia 2:4) Dispela tupela samting i strongim mi olsem mi painim pinis lotu i tru​—em liklik rot i go long laip oltaim.​—Matyu 7:​13, 14.

Mi kisim save olsem sapos mi laik bai God i amamas long mi, orait mi mas mekim sampela bikpela senis. Mi mas tingim gut famili bilong mi. Na mi mas wok long kisim pasin daun tru. I no isi long senisim ol pasin bilong mi, tasol Jehova i helpim mi na mi mekim ol senis. Meri bilong mi i amamas tru long ol dispela senis. Em i bin kirap stadi long Baibel paslain long mi, tasol nau em i kamap strong hariap long stadi bilong em. I no longtaim, mitupela wantaim i save olsem mipela i laik kamap Witnes Bilong Jehova. Mitupela i kisim baptais long wankain de.

GUTPELA SAMTING I PAINIM MI:

Mi wantaim meri bilong mi i amamas tru long helpim 3-pela pikinini bilong mipela long kisim pasin bilong pas gut wantaim Jehova. Famili bilong mipela i stap amamas. Mi tenkyu long Jehova i bin kirapim tingting bilong mi na bringim mi i go long tok i tru bilong em i stap long Baibel. Tru tumas, Baibel i save senisim i stap bilong man! Samting i kamap long mi i soim olsem dispela tok em i tru.

• YIA MI BON: 1957

• KANTRI: AUSTRALIA

• BIPO: LAIP BILONG MI I NOGUT TRU TAIM MI LIKLIK

LAIP BILONG MI LONG BIPO:

Mi kamap bikpela long New Castle, long New South Wales. Mi namba wan bilong 7-pela pikinini. Papa bilong mi i save dring oltaim na kros pait, na mama tu em i meri bilong kros pait. Mama i save paitim na tok nogutim mi. Planti taim em i tokim mi olsem mi nogut na bai mi kisim pen oltaim long helpaia. Kain tok olsem i pretim mi tru.

Ol bagarap mama i kamapim long skin bilong mi i mekim na planti taim mi no go long skul. Taim mi gat 11-pela krismas, gavman i kisim mi long papamama na putim mi long wanpela haus bilong lukautim ol pikinini, na bihain ol i putim mi long wanpela haus sister. Taim mi gat 14 krismas, mi ranawe long dispela haus sister. Mi no laik go bek long famili bilong mi, olsem na mi save slip long strit bilong Kings Cross, wanpela ples long Sydney.

Taim mi slip nabaut long strit, mi kisim drak, dring alkohol, insait long ponografi, na mekim wok olsem pamukmeri. Wanpela samting i bin kamap long mi na dispela i pretim mi tru. Mi bin stap long flet bilong papa bilong wanpela nait klap. Wanpela nait, tupela man i kam lukim em. Em i salim mi i go long rum slip, tasol mi ken harim toktok ol i mekim. Dispela papa bilong klap i stretim rot bilong salim mi long dispela tupela man. Ol bai haitim mi long wanpela sip bilong karim kago na kisim mi i go long Japan bilong wok long wanpela ba. Mi pret nogut tru na mi kalap long veranda i go daun long graun na mi ranawe i go bilong kisim helpim.

Mi painim wanpela man husat i kam visitim Sydney, na mi stori long samting i painim mi, na mi ting em bai givim sampela mani long mi. Tasol em i singautim mi i go long hap em i stap long en, bambai mi ken waswas na kaikai. Bihain ol samting i senis na mi no lusim em. Wanpela yia bihain, mitupela i marit.

BAIBEL I SENISIM I STAP BILONG MI:

Taim mi kirap stadi long Baibel wantaim ol Witnes Bilong Jehova, bel na tingting bilong mi i no stap isi. Mi belhat taim mi kisim save olsem Satan em i as bilong ol pasin nogut, long wanem, bipo ol i bin skulim mi olsem God i mekim na yumi karim pen na hevi. Mi amamas tru taim mi kisim save olsem God i no save kukim ol man long helpaia bilong givim strafe long ol, em wanpela bilip bilong lotu we i bin pretim mi tru inap longpela taim.

Mi kirap nogut long pasin bilong ol Witnes long larim Baibel i stiaim olgeta disisen ol i mekim. Ol i bihainim tru bilip bilong ol. Mi wanpela strongpela het, tasol maski mi tok wanem o mekim wanem, ol Witnes i mekim pasin laikim long mi na rispektim mi.

Samting i givim bikpela hatwok tru long mi em dispela tingting mi gat olsem mi nogut tru. Mi save heitim tru mi yet, na dispela tingting i bin stap yet wantaim mi inap longpela taim bihain long mi kisim baptais na kamap wanpela Witnes Bilong Jehova. Mi save olsem mi laikim Jehova, tasol mi ting olsem em i no inap laikim kain meri olsem mi.

Inap 15 yia bihain long mi bin kisim baptais, wanpela tok i senisim tru tingting bilong mi. Long wanpela tok i kamap long Haus Kingdom bilong ol Witnes Bilong Jehova, brata i mekim tok i stori long Jems 1:​23, 24. Ol dispela ves i tok Baibel i olsem wanpela mira we yumi ken lukim yumi yet wankain olsem Jehova i lukim yumi. Mi tingting planti olsem tingting mi gat long mi yet i narapela long tingting Jehova i gat long mi. Pastaim mi sakim dispela nupela tingting. Mi pilim yet olsem mi no gutpela inap long Jehova i ken laikim mi.

Sampela de bihain, mi ritim wanpela ves na dispela i senisim laip bilong mi. Dispela ves em Aisaia 1:​18, we Jehova i tok: “Harim. Bai yumi mas bung na stretim tok. Maski yupela i gat planti sin, na yupela i stap olsem waitpela laplap em retpela pen i bagarapim pinis, mi Bikpela, mi tok, bai yupela inap kamap waitpela gen olsem ais.” Mi pilim olsem Jehova i toktok long mi, olsem: “Harim Vicky. Bai yumi mas bung na stretim tok. Mi save long yu, mi save long ol sin bilong yu, na mi save long samting yu pilim long bel​—na mi laikim yu tru.”

Mi no inap slip long dispela nait. Mi gat tupela tingting yet olsem tru Jehova i laikim mi o nogat, tasol mi tingim ofa bilong Jisas bilong baim bek ol man. Wantu tasol, mi pilim tru olsem Jehova i no bin les kwik long mi inap longpela taim tru, na long planti rot em i kamapim olsem em i laikim mi tru. Tasol i olsem mi tokim em: “Pasin laikim bilong yu i no bikpela inap long laikim mi. Ofa bilong Pikinini bilong yu i no bikpela inap long karamapim sin bilong mi.” I olsem mi tromoi dispela ofa i go bek long Jehova. Tasol nau, taim mi tingim tingim long bel dispela gutpela presen bilong baim bek man, mi kirap long pilim olsem Jehova i laikim mi tru.

GUTPELA SAMTING I PAINIM MI:

Mi pilim olsem mi stap klin na mi amamas long laip bilong mi. Marit bilong mi i kamap gutpela moa, na mi amamas olsem mi ken yusim ekspiriens bilong mi long helpim ol narapela. Mi pilim olsem mi wok long i go klostu moa long Jehova.

• YIA MI BON: 1974

• KANTRI: RASIA

• BIPO: LAIKIM TUMAS HEVI METAL MUSIK

LAIP BILONG MI LONG BIPO:

Mi bon long Votkinsk, ples bilong Pyotr Ilich Tchaikovsky, em man i gat nem long wokim musik. Famili bilong mipela i stap rabis. Papa bilong mi i gat planti gutpela pasin, tasol em i man bilong dring planti, olsem na oltaim i gat hevi long famili.

Mi no gutpela sumatin, na bihain mi kisim tingting olsem mi no gutpela tumas. Mi wok long stap wanpis na mi no bilip moa long ol narapela. I hatwok tru long mi go long skul. Olsem: Taim mi mas givim ripot, planti taim i hatwok long mi stori gut long ol tok i isi long kamapim olsem mi save mekim long ol narapela taim. Taim mi pinis long gret 8, ripot kat bilong mi i tok: “Em i no save long planti tok, na em i no inap kamapim tingting bilong em.” Ol dispela tok i bagarapim tru bel bilong mi na mi pilim olsem mi nogut tru. Mi tingting olsem laip bilong mi i gat wanem as bilong en.

Taim mi tineja, mi kirap dring alkohol. Pastaim dring i mekim na mi pilim gutpela tru. Tasol taim mi dring planti tumas, maus bilong bel bilong mi i gat tok. I luk olsem laip bilong mi i no gat as bilong en. Mi pilim bikpela bel hevi tru, na sampela taim mi no save lusim haus inap sampela de. Mi ting i gutpela mi suasaid.

Taim mi gat 20 krismas, i gat wanpela nupela samting i mekim gut bel bilong mi inap liklik haptaim. Mi kisim save long hevi metal musik. Mi pilim olsem musik i givim strong long mi, na mi painim ol narapela husat i harim dispela musik. Mi larim gras bilong mi i gro longpela, putim yauring, na bilas olsem ol man bilong mekim musik em mi save laikim ol. Isi isi mi kisim pasin bikhet, belhat, na planti taim mi tok pait wantaim famili bilong mi.

Mi ting pasin bilong harim hevi metal musik bai helpim mi long i stap amamas, tasol nogat, mi no stap amamas liklik. Pasin bilong mi i senis olgeta! Na taim mi kisim save long sampela pasin nogut ol dispela man bilong pilai musik i save mekim, bel bilong mi i bagarap olgeta.

Orait mi tingting gen long suasaid​—tasol nau mi tingting strong long mekim. Wanpela samting tasol i pasim mi, em mi tingim dispela bai mekim wanem long mama bilong mi. Em i laikim mi tumas, na em i bin mekim planti samting bilong lukautim mi. Dispela samting i bagarapim tru bel bilong mi. Mi no laik i stap laip moa, tasol mi no gat strong long pinisim laip bilong mi.

Bilong lusim tingting long ol dispela samting, mi kirap ritim sampela olpela buk bilong Rasia. Wanpela buk i stori long wanpela man i mekim wok insait long haus lotu. Wantu mi pilim olsem mi gat strongpela laik long mekim wok bilong God na helpim ol narapela manmeri. Mi beten strong tru long God, em samting mi no bin mekim bipo. Mi askim God long soim mi long olsem wanem mi ken mekim laip bilong mi i gat as tru bilong en. Taim mi beten i stap, mi pilim bel isi tru. Tasol bihain narapela gutpela samting i kamap. Tupela aua bihain, wanpela Witnes Bilong Jehova i nok long dua bilong mi na askim mi long stadi long Baibel. Mi bilip olsem dispela em i bekim bilong beten bilong mi. Dispela em i namba wan de bilong nupela laip bilong mi i gat amamas long en.

BAIBEL I SENISIM I STAP BILONG MI:

Maski i hatwok tru, mi rausim olgeta samting bilong hevi metal musik em mi bin holim. Tasol musik i stap long tingting bilong mi inap longpela taim tru. Sapos mi wokabaut long wanpela ples we ol i pilaim dispela kain musik, wantu mi save tingim laip bilong mi long bipo. Mi no laik bungim ol dispela samting i bin kamap long bipo wantaim ol gutpela samting nau i stap long bel na tingting bilong mi. Olsem na mi save abrusim ol dispela ples. Na taim mi kirap long tingim gen ol samting long bipo, mi save beten strong tru. Taim mi mekim olsem dispela i helpim mi long pilim tru “bel isi bilong God i winim tru tingting bilong man.”​—Filipai 4:7.

Taim mi stadi long Baibel, mi kisim save olsem ol Kristen i gat wok long autim bilip bilong ol long ol narapela man. (Matyu 28:​19, 20) Mi ting olsem mi no inap tru long mekim olsem. Long wankain taim, ol nupela save mi wok long kisim i givim bikpela amamas na bel isi long mi. Mi save olsem ol narapela tu i mas kisim save long ol dispela tok i tru. Maski mi pret, mi kirap tokim ol narapela long ol samting mi lainim. Mi kirap nogut olsem taim mi wok long tokim ol narapela long Baibel, dispela i mekim na mi amamas moa long mi yet. Na tu, dispela i strongim tru ol nupela bilip bilong mi.

GUTPELA SAMTING I PAINIM MI:

Nau mi marit na mi stap amamas, na tu, mi amamas olsem mi bin helpim sampela manmeri long kisim save long Baibel, na mi helpim tu mama na susa bilong mi. Pasin bilong mekim wok bilong God na helpim ol narapela long kisim save long em, dispela i mekim na laip bilong mi i gat as tru bilong en.