Ran Long Kisim Prais

“Yupela i mas ran olsem bai yupela i ken kisim prais.”​—1 KOR. 9:24.

1, 2. (a) Pol i tok wanem bilong strongim ol Kristen Hibru? (b) Pol i tok yumi mas mekim wanem?

BILONG strongim ol Kristen Hibru, Pol i yusim wanpela tok piksa i stori long resis. Em i tok ol i olsem ol man i ran long wanpela resis. Na em i tokim ol olsem ol i no stap wanpis long dispela resis. Nogat. I gat planti gutpela wokboi bilong Jehova bilong bipo husat i winim pinis dispela resis. Pol i tok ol i olsem “bikpela klaut” i raunim ol dispela Kristen Hibru. Sapos oltaim ol Kristen Hibru i tingim samting ol dispela wokboi i bin mekim bilong kamapim bilip bilong ol, dispela bai strongim ol long pinisim dispela resis.

² Long stadi paslain long dispela, yumi bin stori long sampela gutpela wokboi bilong Jehova. Strongpela bilip bilong ol long God i bin helpim ol long stap gut long em i go inap long ol i dai. Ol i ran i go inap long ol i pinisim resis. Olsem wanem yumi tu inap pinisim dispela resis olsem ol i bin mekim? Pol i tok: “Yumi tu mas lusim olgeta samting i putim hevi long yumi na dispela sin i save pasim yumi. Na yumi mas sanap strong na ran long dispela resis God i makim bilong yumi.”​—Hib. 12:1.

 3. Ol Kristen inap kisim wanem save long tok Pol i mekim long pasin bilong ran insait long ol resis bilong ol Grik?

³ Bilong wanem Pol i tok long “lusim olgeta samting i putim hevi long yumi”? Wanpela buk (Backgrounds of Early Christianity) i tok: “Ol Grik i save stap as nating taim ol i eksasais na resis.”a Tru, long nau dispela i no stret. Tasol ol man insait long resis i no pasim klos bikos ol i no laik bai i gat wanpela samting i pasim ol long winim prais. Olsem na taim Pol i tokim ol Kristen Hibru long “lusim olgeta samting i putim hevi,” em i makim olsem ol i mas rausim olgeta samting long laip bilong ol we inap pasim ol long winim prais bilong laip oltaim. Dispela em i gutpela tok bilong helpim ol Kristen Hibru, na em inap helpim yumi tu. Wanem ol samting bilong laip bilong yumi inap putim hevi na givim hatwok long yumi long pinisim resis?

“Lusim Olgeta Samting i Putim Hevi”

 4. Ol manmeri long taim bilong Noa i bin mekim wanem?

⁴ Pol i tok long “lusim olgeta samting i putim hevi.” Dispela i makim olgeta samting em inap pulim tingting bilong yumi na yumi no givim bel olgeta long pinisim dispela resis. Wanem ol samting inap putim hevi long yumi? Yumi ken skelim tok Jisas i mekim long samting i bin kamap long taim bilong Noa. Jisas i tok: “Ol samting i bin kamap long taim bilong Noa, wankain samting bai i kamap long taim bilong Pikinini bilong man.” (Luk 17:26) Tru, bagarap bai kamap long taim bilong yumi wankain olsem i bin kamap long taim bilong Noa. Tasol Jisas i stori long ol pasin ol man bai bihainim. (Ritim Matyu 24:​37-39.) Klostu olgeta man long taim bilong Noa i no laik save long God, na ol i no laik bihainim pasin i mekim em i amamas. Ol i mekim wanem? Ol i kaikai, dring, na marit. Em ol nomol samting. Tasol long tingting bilong ol, ol dispela samting i bikpela samting moa, winim pasin bilong harim tok bilong God. Jisas i tok ol i “no luksave long ol samting i wok long kamap.”

 5. Wanem samting inap helpim yumi long ran inap long pinis bilong resis?

⁵ Olsem Noa na famili bilong en, yumi gat planti samting long mekim long olgeta de. Yumi mas wok na kisim mani, na lukautim yumi yet na famili bilong yumi. Dispela inap kisim bikpela haptaim na strong bilong yumi. Na sapos yumi gat hevi long mani, ating bai yumi tingting planti long olsem wanem yumi bai kisim ol samting yumi nidim long olgeta de. Na tu, yumi dediket long Jehova, olsem na yumi gat ol arapela bikpela wok long mekim. Yumi save autim tok, redim hap bilong ol miting na go long ol, na yumi save stadi Baibel wantaim famili bilong yumi na mekim stadi bilong yumi yet. Noa tu i gat planti wok bilong God long mekim, na em i “mekim olgeta samting” olsem Jehova i tokim em. (Stt. 6:22) Em i bikpela samting tru long yumi no mekim ol samting i putim hevi long yumi na i hatwok long pinisim resis.

6, 7. Oltaim yumi mas tingim wanem ol tok bilong Jisas?

⁶ Pol i gat wanem tingting taim em i tok long “lusim olgeta samting i putim hevi”? Tru yumi no inap lusim olgeta wok bilong yumi. Tasol tingim tok Jisas i bin mekim, olsem: “No ken tingting planti na tok, ‘Bai yumi kaikai wanem samting?’ o, ‘Bai yumi dring wanem samting?’ o, ‘Bai yumi werim wanem samting?’ Em ol samting ol manmeri bilong ol arapela lain i wok strong long kisim. Papa bilong yupela long heven i save olsem yupela i nidim ol dispela samting.” (Mat. 6:​31, 32) Jisas i helpim yumi long kliagut olsem ol samting yumi mas i gat, olsem kaikai na klos, inap putim hevi long yumi sapos yumi larim ol i kamap olsem nambawan bikpela samting long laip bilong yumi. Ol inap mekim na yumi lusim resis.

⁷ Tingim tok bilong Jisas: “Papa bilong yupela long heven i save olsem yupela i nidim ol dispela samting.” Dispela tok i soim olsem Papa bilong yumi, Jehova, bai lukautim yumi long ol samting yumi nidim. Tru, taim yumi gat “ol dispela samting,” dispela i no makim olsem yumi bai i gat olgeta samting yumi laikim. Jisas i tok yumi no ken tingting planti long ol samting ol lain manmeri i “wok strong long kisim.” Bilong wanem em i tok olsem? Jisas i tok: “Was gut long yupela yet, nogut pasin bilong kaikai planti tumas na dring planti na ol wari bilong laip i daunim yupela, na dispela de i kamap long yupela wantu tasol olsem wanpela trap i holimpas animal.”​—Luk 21:​34, 35.

 8. I gat wanem as na long nau yumi mas “lusim olgeta samting i putim hevi”?

⁸ I olsem yumi lukim mak bilong pinis bilong resis. Olsem na yumi no laik larim wanpela samting i givim hatwok long yumi long pinisim resis. Dispela em i as na yumi mas “lusim olgeta samting i putim hevi.” Yumi mas ting olsem ol samting yumi gat, em inap. Aposel Pol i mekim kain tok olsem taim em i tok long yumi mas “givim bel tru long God na tingting olsem ol samting [yumi] holim pinis em inap long [yumi].” (1 Tim. 6:6) Sapos yumi bihainim tok bilong Pol, em bai isi moa long ran yet na kisim prais.

“Dispela Sin i Save Pasim Yumi”

9, 10. (a) Dispela sin i save pasim yumi em wanem samting? (b) Wanem samting inap kamap long bilip bilong wanpela Kristen?

⁹ Pol i stori long narapela samting yumi mas lusim. Em i tok yumi mas lusim “dispela sin i save pasim yumi.” Tok Grik ol i tanim olsem “pasim” i stap wanpela taim long Baibel, em long dispela ves. Saveman Albert Barnes i tok olsem ol man bilong ran long dispela taim bipo i no save pasim klos bikos ol klos bai givim hatwok long ol long ran. Na long wankain pasin ol Kristen i no ken larim wanpela samting i givim hatwok long ol long ran long resis. Wanem samting inap pasim wanpela Kristen, olsem mekim bilip bilong em i go slek o mekim na bilip i lus olgeta? Olsem wanem dispela samting inap kamap?

¹⁰ Gutpela Kristen i no save lusim bilip wantu tasol. Dispela i save kamap isi isi, na ating Kristen i no luksave olsem bilip bilong em i wok long go daun. Long kirap bilong pas Pol i raitim long ol Kristen Hibru, em i tok lukaut long dispela samting. Em i tok ol i mas was gut, nogut “isi isi” ol i lusim bilip na “na bel bilong [ol] i kirap laikim pasin nogut.” (Hib. 2:1; 3:12) Sapos klos i pasim lek bilong man na em i no inap ran gut, em inap pundaun. Olsem na man i ran i mas save olsem sapos em i pasim klos i no stret, em inap pundaun. Wanem samting inap mekim na dispela man i no ting hevi bai painim em? Ating em i no save putim gut yau taim narapela i givim tok lukaut long em. O em i bilip tumas long em yet na ting olsem em i strongpela man na em i no inap pundaun. O ating ol arapela samting i pulim tingting bilong em. Yumi inap kisim wanem skul long ol gutpela tok bilong Pol?

11. Wanem samting inap mekim na yumi lusim bilip?

¹¹ Tingim, ol samting Kristen i mekim i olsem as na bilip bilong em inap lus. Narapela saveman i stori long “dispela sin i save pasim yumi.” Em i tok sindaun bilong yumi, ol man yumi bung wantaim, na ol laik nogut bilong yumi, ol inap mekim bikpela samting long yumi. Ol inap mekim na bilip bilong yumi i go slek o yumi lusim bilip.​—Mat. 13:​3-9.

12. Sapos yumi no laik lusim bilip, yumi mas bihainim wanem ol tok lukaut?

¹² Planti taim gutpela wokboi i gat savetingting i givim tok lukaut long yumi long ol samting yumi lukim na putim yau long en, long wanem, ol dispela samting i save stiaim tingting na laik bilong yumi. Na tu, ol i tok lukaut long pasin bilong laikim sampela moa mani na kago. Sapos yumi laikim amamas bilong dispela graun o yumi laikim olgeta nupela samting, yumi inap bisi tumas long ol dispela samting na yumi no gat taim bilong mekim ol samting i bikpela moa. Hevi inap kamap sapos yumi sakim ol dispela tok lukaut, long wanem, yumi ting ol i pasim yumi tumas. Na nogut yumi ting olsem yumi gat strongpela bilip, olsem na ol dispela tok lukaut em bilong ol arapela. Satan i save mekim wok long ol tingting na laik bilong dispela graun bilong kirapim yumi long sakim ol dispela tok lukaut. Em i no laik bai yumi pinisim dispela resis. Sampela i lusim bilip, bikos ol i no putim gut yau taim narapela i givim tok lukaut long ol, o ol i bilip tumas long ol yet, o ol arapela samting bilong graun i pulim tingting bilong ol. Sapos dispela samting i kamap long yumi, yumi inap lus long kisim prais bilong laip oltaim.​—1 Jon 2:​15-17.

13. Yumi mas mekim wanem na bai yumi no bihainim tingting bilong ol manmeri i stap aninit long wok bos bilong Satan?

¹³ Olgeta de, ol manmeri i stap aninit long wok bos bilong Satan i save traim long kirapim yumi long bihainim tingting bilong ol. Samting i bikpela samting long ol, ol i laik bai yumi tu i ting olsem em i bikpela samting. Na ol i laik bai yumi mas mekim wankain samting olsem ol yet i mekim. (Ritim Efesus 2:​1, 2.) Tasol yumi yet i ken makim samting yumi bai mekim. Olsem, yumi ken larim tingting bilong dispela graun i stiaim yumi o nogat. Pol i tok tingting bilong ol manmeri bilong dispela graun i olsem win i stap long olgeta hap. Tasol dispela tingting i olsem win i gat posin long en. Yumi no laik pulim win i gat posin long en, na wankain tu, yumi no ken larim tingting bilong ol manmeri bilong graun i stiaim tingting bilong yumi. Wanem samting inap helpim yumi long ran yet long resis? Em eksampel bilong Jisas. Em i nambawan gutpela eksampel long man i ran i go inap long pinis bilong resis, na yumi inap bihainim pasin bilong em. (Hib. 12:2) Na tu, aposel Pol i stap olsem gutpela eksampel. Em i bin ran long dispela resis na em i kirapim ol brata bilong en long bihainim pasin bilong em.​—1 Kor. 11:1; Fili. 3:14.

Rot Bilong “Kisim Prais”

14. Long tingting bilong Pol, olsem wanem em i bikpela samting long pinisim resis?

¹⁴ Long tingting bilong Pol, olsem wanem em i bikpela samting long pinisim resis? Taim em i toktok wantaim ol elda long Efesus long laspela taim, em i tok: “Mi no tingim laip bilong mi em i bikpela samting. Mi laik tru long bihainim yet dispela rot mi wokabaut long en na pinisim wok mi bin kisim long Bikpela Jisas.” (Apo. 20:24) Olsem na Pol i redi long lusim olgeta samting, na laip bilong em tu, bilong pinisim resis. Pol i bin wok strong tru long autim gutnius. Tasol em i tok ol wok em i bin mekim bai lus nating sapos em i no pinisim resis. Em i no gat tingting olsem em i kisim pinis prais. (Ritim Filipai 3:​12, 13.) Tasol paslain liklik long em i dai, em inap tok: “Mi mekim pinis dispela gutpela pait, mi ran pinis long dispela resis, na mi bin holimpas bilip.”​—2 Tim. 4:7.

15. Pol i kirapim ol brata bilong en long mekim wanem?

¹⁵ Pol i laik bai ol brata bilong en i mas pinisim resis. Em i kirapim ol Kristen long Filipai long wok strong long mekim ol samting na bai God i ken kisim bek ol. Em i tokim ol long “holim strong tok bilong laip.” Na tu em i tokim ol long as na dispela i bikpela samting long em: “Olsem na long de bilong Krais, mi inap amamas olsem mi no bin ran nating o hatwok nating.” (Fili. 2:16) Na tu, Pol i kirapim ol Kristen long Korin long ran yet bilong winim prais. Em i tok: “Yupela i mas ran olsem bai yupela i ken kisim prais.”​—1 Kor. 9:24.

16. Bilong wanem yumi mas pilim olsem dispela prais em samting tru?

¹⁶ Man i ran long wanpela longpela resis i no inap lukim mak bilong pinis bilong resis inap long resis i klostu pinis. Tasol oltaim em i tingting long mak bilong pinis. Na taim em i save olsem pinis bilong resis i klostu, em i strong moa long pinisim resis. Resis bilong ol Kristen i wankain. Yumi mas pilim olsem dispela prais em samting tru. Dispela bai strongim yumi long pinisim resis na winim prais.

17. Olsem wanem bilip inap mekim na yumi pilim olsem dispela prais em samting tru?

¹⁷ Pol i tok: “Pasin bilong bilip i olsem, yu save tru olsem ol samting yu bilip na wet long en ol bai kamap tru. Yu bai kliagut tru olsem samting yu bilip long en em i samting tru, maski yu no lukim long ai bilong yu.” (Hib. 11:1) Abraham na Sara i orait long lusim gutpela sindaun bilong ol na “stap olsem tripman long ples ol i sindaun long en.” Olsem wanem ol inap mekim olsem? Ol i pilim olsem ol samting God i promis long givim long ol em samting tru. “Ol i luksave olsem truim bilong ol dispela tok promis bai kamap bihain.” Moses i sakim “ol samting i dia tumas bilong Isip” na em “i no laik bihainim pasin bilong sin na kisim amamas bilong sotpela taim tasol.” Olsem wanem em i gat bilip na strong bilong mekim olsem? “Em i tingting strong long gutpela pe em bai kisim.” (Hib. 11:​8-13, 24-26) Pol i tok ol dispela man “i bilip” na mekim ol samting. Bilip bilong ol i strong, olsem na dispela prais i samting tru long ol. Ol i no larim ol hevi i kirapim ol long lusim tingting long dispela prais. Ol i save olsem God i wok long helpim ol na ol promis bilong em bai kamap tru.

18. Yumi laik winim resis, olsem na yumi mas abrusim wanem samting?

¹⁸ Yumi mas tingim tru ol samting ol dispela bilipman na meri bilong Hibru sapta 11 i bin mekim, na yumi mas bihainim pasin bilong ol. Dispela inap helpim yumi long strongim bilip bilong yumi na lusim “dispela sin i save pasim yumi.” (Hib. 12:1) Na tu, long rot bilong bung wantaim ol brata husat i wok long strongim bilip bilong ol yet, yumi inap “kirapim ol long mekim pasin laikim na mekim ol gutpela wok.”​—Hib. 10:24.

19. Long nau, bilong wanem em i bikpela samting long ran yet long resis?

¹⁹ Yumi stap klostu long pinis bilong resis bilong yumi, na i olsem yumi inap lukim mak bilong pinis. Yumi inap “lusim olgeta samting i putim hevi long yumi na dispela sin i save pasim yumi,” long wanem, Jehova bai helpim yumi na yumi gat strongpela bilip long em. Yumi inap ran yet na winim prais em Papa bilong yumi, Jehova, i promis long givim long yumi.

[Futnot]

Yu Tingim Yet?

• Olsem wanem yumi inap “lusim olgeta samting i putim hevi long yumi”?

• Wanem samting inap mekim na wanpela Kristen i lusim bilip?

• Bilong wanem yumi mas pilim olsem dispela prais em i samting tru?

[Piksa long pes 23]

Dispela “sin i save pasim yumi” em wanem samting? Olsem wanem dispela inap painim yumi?