Go Klostu Long God
Inapim Wok God i Givim Long Yumi
SAMPELA taim yu save tingting olsem, ‘Yumi stap bilong mekim wanem?’ Jehova i wokim yumi na em i inapim yumi long kamapim kain askim olsem, na tu, yumi gat bikpela laik long painim bekim bilong en. Yumi tenkyu tru long God i opim rot bambai yumi inap kisim bekim bilong dispela askim. Bekim yumi laik kisim i stap long Baibel. Skelim tok bilong King Solomon long Saveman 12:13.
Laip na sindaun bilong Solomon i mekim na em i narapela kain long ol narapela man. Em inap kamapim ol gutpela tok long ol samting yumi mas mekim bilong i stap amamas na mekim i stap bilong yumi i gat as bilong en. Em i gat gutpela savetingting, planti mani kago, biknem na namba olsem king, na em i save gut tru long ol samting ol man i gat laik long mekim, na tu, em i save long laik bilong ol man long kisim planti mani kago na biknem. (Saveman 2:4-9; 4:4) Holi spirit i kirapim em long raitim tok olsem: “Bilong pinisim olgeta toktok, mi laik tok olsem, namba wan samting long laip bilong yumi man i olsem. Yumi mas aninit [“pret,” NW] long God tasol na bihainim ol lo bilong em.” Ol dispela tok i kamapim klia gutpela samting tru ol man i ken mekim na kisim amamas long en.
‘Pret long God.’ Ating pastaim dispela tok i pretim yu. Tasol dispela tok i makim gutpela kain pret. Dispela i no olsem wanpela wokboi i pret tru long hatim bel bilong hatpela bos, nogat, em i makim pasin bilong pikinini husat i laik tru long mekim gut bel bilong gutpela papa. Wanpela buk i tok pasin bilong pret long God i makim “pasin em lain bilong Em i mekim long daun olgeta long Em na tingim bikpela strong bilong Em, long wanem, ol i laikim Em tru na rispektim biknem bilong Em.” Kain pasin olsem i kirapim yumi long daun na bihainim laik bilong God, long wanem, yumi laikim em tru na yumi save olsem em tu i laikim yumi. Dispela pasin bilong pret em i no samting yumi pilim tasol long bel, nogat, yumi kamapim klia tu long ol pasin yumi mekim. Olsem wanem yumi inap kamapim dispela pasin?
“Bihainim ol lo bilong em.” Pasin bilong pret long God i kirapim yumi long bihainim tok bilong em. I stret yumi bihainim tok bilong Jehova, long wanem, em yet i bin wokim yumi na em i save long nambawan rot bilong yumi ken i stap amamas. Jehova i laik bai ol gutpela samting i painim yumi. Na tu, em i laik bai yumi mas i stap amamas, na ol lo bilong em i bilong helpim sindaun bilong yumi. (Aisaia 48:17) Aposel Jon i tok: “Pasin bilong laikim God i olsem, yumi bihainim ol lo bilong en na ol lo bilong en i no givim hevi long yumi.” (1 Jon 5:3) Pasin bilong yumi long bihainim tok bilong God i soim olsem yumi laikim Em, na ol lo bilong em i soim olsem em i laikim yumi.
“Namba wan samting long laip bilong yumi man.” Dispela tok i kamapim klia wanpela bikpela as long yumi mas pret long God na bihainim tok bilong em. Em bikpela samting long yumi mas mekim olsem. Jehova em Man Bilong Wokim yumi, olsem na laip bilong yumi i stap long han bilong em. (Song 36:9) Na tu, yumi mas bihainim tok bilong em. Taim yumi bihainim tok bilong em long i stap bilong yumi, i olsem yumi inapim wok em i givim long yumi.
Olsem na yumi stap bilong mekim wanem? Yumi ken tok olsem: Yumi stap bilong mekim laik bilong God. Dispela em i gutpela rot bilong mekim i stap bilong yu i gat as tru bilong en. I gutpela yu kisim sampela save moa long laik bilong Jehova na olsem wanem yu ken bihainim long i stap bilong yu. Ol Witnes Bilong Jehova bai amamas long helpim yu long mekim olsem.
Baibel ritim bilong Novemba:
◼ Sindaun 22-31; Saveman 1-12–Solomon 1-8