“Yupela Bai Stap Witnes Bilong Mi”

1, 2. (a) Husat man i stap olsem nambawan witnes bilong Jehova? (b) Nem bilong Jisas i gat wanem mining? Olsem wanem Jisas i inapim mining i stap long nem bilong em?

JISAS i tok: “As na mama i bin karim mi, na as na mi kam stap namel long ol manmeri bilong graun, em bilong mi ken tokaut long tok i tru.” (Ritim Jon 18:33-37.) Taim Jisas Krais i sanap long kot, em i mekim dispela tok long gavana bilong Judia. Jisas i tokaut olsem em i wanpela king. Sampela yia bihain, aposel Pol i stori long pasin bilong Jisas long strongim bel na em i bin “sanap strong na tokaut klia long Pontius Pailat.” (1 Tim. 6:13) Dispela graun bilong Satan i pulap tru long pasin birua, olsem na sampela taim yumi mas strongim bel na bai yumi inap “holimpas wok bilong autim tok na mekim tok tru tasol”!​—Rev.3:14.

² Jisas i kamap long lain Juda, olsem na em i stap olsem witnes bilong Jehova kirap long taim mama i karim em. (Ais. 43:10) Em i stap olsem nambawan bikpela witnes husat i sambai long nem bilong God. Jisas i tingim tru nem we God i bin givim long em. Josep em waspapa bilong Jisas, na taim ensel i tokim Josep olsem holi spirit i kamapim pikinini i stap long bel bilong Maria, ensel i tok: “Em bai karim wanpela pikinini man, na yu mas kolim em Jisas, long wanem, em bai kisim bek lain bilong en long ol sin bilong ol.” (Mat. 1:20, 21) Ol saveman bilong Baibel i wanbel olsem dispela nem Jisas i kam long wanpela nem Hibru, em Jesua, na nem bilong God i stap long en, na mining bilong en i olsem “Jehova i Save Kisim Bek Ol Man,” na ol i sotim dispela nem. Jisas i inapim mining i stap long nem bilong em, na em i go long “ol sipsip bilong lain Israel em ol i lus pinis” na em i helpim ol long tanim bel long rong bilong ol na bai Jehova i ken orait long ol. (Mat. 10:6; 15:24; Luk 19:10) Olsem na Jisas i givim bel tru long autim tok bilong Kingdom Bilong God. Mak, man bilong raitim gutnius, i stori olsem: “Jisas i go long Galili na autim gutnius bilong God na i tok: ‘Taim i kamap pinis, na Kingdom bilong God i kam klostu. Yupela i mas tanim bel na bilip long gutnius.’” (Mak 1:14, 15) Na tu, Jisas i strongim bel na em i tokaut long rong bilong ol hetman bilong lotu Juda, olsem na ol i belhat na stretim rot long hangamapim em long diwai pos.​—Mak 11:17, 18; 15:1-15.

 3. Wanem samting i kamap long namba 3 de bihain long Jisas i dai?

³ Gutpela samting tru i kamap! Long namba 3 de bihain long Jisas i dai, Jehova i kirapim em bek olsem wanpela spirit, na i no olsem wanpela man. (1 Pita 3:18) Jisas i laik soim klia long ol disaipel olsem God i bin givim laip gen long em, olsem na em i kisim bodi bilong man na bai ol disaipel inap lukim em na bilip olsem dispela samting i bin kamap. Long fes de bihain long em i kirap bek, inap 5-pela taim em i kamap long ol narapela narapela disaipel.​—Mat. 28:8-10; Luk 24:13-16, 30-36; Jon 20:11-18.

 4. Bihain long Jisas i kirap bek, em i bung wantaim ol disaipel na em i toktok wantaim ol long wanem samting? Em i tokim ol olsem ol i mas mekim wanem wok?

⁴ Long namba 5 taim, Jisas i kamap long ol aposel na ol narapela husat i bung wantaim ol. Long dispela taim, Jisas i skulim ol gut long Tok Bilong God, na ol lain i stap long dispela bung i no inap lusim tingting long dispela samting. “Em i mekim na tingting bilong ol i op tru na ol inap kliagut long mining bilong ol Rait Holi.” Olsem na ol i luksave olsem Rait Holi i tok promis pinis olsem ol birua bilong God bai kilim Jisas i dai na God bai wokim mirakel na kirapim em bek. Long pinis bilong dispela bung, Jisas i tokaut klia long wok ol i mas mekim. Em i tokim ol olsem: “Long rot bilong nem bilong em ol bai autim tok long olgeta lain man olsem ol man i mas tanim bel na bai God i ken lusim ol sin bilong ol. Kirap long Jerusalem na i go long ol arapela hap.” Na em i tok moa olsem: “Yupela bai stap olsem ol witnes bilong ol dispela samting.”​—Luk 24:44-48.

5, 6. (a) Bilong wanem Jisas i mekim dispela tok: “Yupela bai stap witnes bilong mi”? (b) Ol disaipel bilong Jisas i gat wok long tokim ol narapela long wanem nupela samting Jehova i tingting pinis long mekim?

⁵ Inap 40 de bihain, long laspela taim bilong Jisas long kamap long ol aposel, em i mekim liklik tok na dispela tok i gat strong, na ating long dispela taim ol aposel i kliagut long tok bilong em. Em i tok: “Yupela bai stap witnes bilong mi long Jerusalem na long olgeta hap bilong Judia na Samaria, na i go inap long olgeta hap bilong graun.” (Apo. 1:8) Bilong wanem Jisas i tok, “Yupela bai stap witnes bilong mi,” na em i no tok ol bai i stap witnes bilong Jehova? I no gat wok long Jisas i mekim dispela tok, long wanem, em i toktok long lain Israel na ol i stap pinis olsem ol witnes bilong Jehova.

⁶ Ol disaipel bilong Jisas i mas tokim ol narapela long wanpela nupela samting Jehova i tingting pinis long mekim​—em samting i gutpela moa winim samting God i mekim long kisim bek lain Israel long wok kalabus long Isip na Babilon. Indai na kirap bek bilong Jisas Krais i opim rot na yumi inap kamap fri long kalabus bilong stap olsem sleiv bilong sin na dai. Long Pentikos bilong yia 33 C.E., God i makim ol nupela disaipel bilong Jisas. Ol dispela disaipel i tokim ol manmeri long “ol strongpela wok bilong God,” na planti manmeri i bilip. Olsem na taim Jisas i stap long han sut bilong Papa long heven, em i lukim olsem planti manmeri i pilim tru nem bilong em, na ol i tanim bel na bilip olsem long rot bilong em, Jehova bai kisim bek ol.​—Apo. 2:5, 11, 37-41.

 7. Ol samting i kamap long Pentikos bilong yia 33 C.E. i soim klia wanem samting?

⁷ Jisas i bin kisim laip olsem man bilong graun na em i gutpela olgeta, na em i givim dispela laip bilong em olsem ofa bilong tekewe sin. Ol samting i kamap long Pentikos bilong yia 33 C.E. i soim klia olsem Jehova i orait long dispela ofa. (Hib. 9:11, 12, 24) Olsem Jisas i tok, em “i no kam bilong ol man i mas helpim em, nogat, em i kam bilong helpim ol man na givim laip bilong em olsem pe bilong baim bek planti manmeri.” (Mat. 20:28) Taim Jisas i tok ofa bilong em bai helpim “planti manmeri,” dispela i makim ol Juda husat i tanim bel, na tu, em i makim sampela lain moa. God “i laik kisim bek olgeta kain man,” long wanem, ofa bilong baim bek man i save “tekewe sin bilong olgeta manmeri!”​—1 Tim. 2:4-6; Jon 1:29.

 8. Ol disaipel bilong Jisas i autim tok i go inap long wanem mak? Olsem wanem ol inap mekim dispela wok?

⁸ Yu ting ol disaipel bilong Jisas long pastaim i bin strongim bel na wok yet long autim tok na skulim ol man long Jisas? Yes, ol i bin mekim olsem, tasol ol i no mekim long strong bilong ol yet, nogat. Holi spirit bilong Jehova i kirapim ol na strongim ol long wok yet long autim tok. (Ritim Aposel 5:30-32.) Inap olsem 27 yia bihain long Pentikos bilong yia 33 C.E., ol inap tok olsem “tok i tru bilong gutnius” i go kamap long lain Juda na ol manmeri bilong arapela lain “long olgeta hap bilong graun aninit long skai.”​—Kol. 1:5, 23.

 9. Olsem tok profet i kamapim, wanem hevi i painim namba 1 kongrigesen Kristen?

⁹ Tasol sori tru, isi isi namba 1 kongrigesen Kristen i bagarap olgeta. (Apo. 20:29, 30; 2 Pita 2:2, 3; Jut 3, 4) “Satan” i save kamapim pasin apostet, na olsem Jisas i tok pinis, dispela kain pasin apostet bai kamap bikpela na bagarapim lotu Kristen i go inap long “pinis bilong dispela taim.” (Mat. 13:37-43) Jehova bai putim Jisas i stap King na em bai bosim ol manmeri long olgeta hap bilong graun. Dispela samting i kamap long Oktoba 1914, na dispela i kirapim “taim bilong las de.”​—2 Tim. 3:1.

10. (a) Ol Kristen God i bin makim, ol i bin kolim wanem det olsem spesel det? (b) Wanem samting i kamap long Oktoba 1914? Olsem wanem ol man inap luksave long dispela samting?

¹⁰ Ol Kristen God i bin makim, ol i tok olsem Oktoba 1914 em wanpela spesel det. Ol i tok olsem, long wanem, ol i tingim tok profet bilong Daniel long traipela diwai ol i bin katim na em i gro gen bihain long “7-pela yia.” (Dan. 4:16) Jisas i kolim dispela wankain haptaim olsem “haptaim bilong ol manmeri bilong ol arapela lain.” Jisas i bin tok olsem taim em i mekim tok profet long ol samting bai kamap bilong soim olsem em i kam i stap na “pinis bilong dispela taim i kamap pinis.” Kirap long 1914, olgeta man i luksave long ‘sain i kamap bilong soim olsem Krais i kam i stap’ na em i mekim wok olsem nupela King bilong graun. (Mat. 24:3, 7, 14; Luk 21:24) Olsem na kirap long dispela taim i kam inap long nau, God i bin mekim “ol strongpela wok.” Wanpela bilong ol dispela wok em olsem, Em i makim Jisas long mekim wok King na bosim ol manmeri long olgeta hap bilong graun.

11, 12. (a) Bihain long woa i pinis long 1919, nupela King bilong graun i kirap long mekim wanem? (b) Kirap long yia 1935 samting, wanem samting moa i kamap klia? (Lukim piksa long kirap bilong stadi.)

¹¹ Jisas Krais i stap olsem nupela King bilong graun, olsem na bihain liklik em i kirap long kisim bek ol disaipel bilong em—ol Kristen God i bin makim—na ol i lusim kalabus bilong “Bikpela Babilon.” (Rev. 18:2, 4) Bihain long woa i pinis long 1919, rot i op long autim tok long olgeta hap bilong graun na tokim ol manmeri long rot God i makim bilong kisim bek ol, na tokim ol olsem Kingdom i kirap pinis long mekim wok. Ol Kristen God i bin makim, ol i mekim wok bilong autim tok, na dispela i opim rot long ol inap helpim planti tausen manmeri moa, em ol Kristen God i bin makim na ol inap mekim wok king wantaim Krais.

¹² Kirap long yia 1935 samting na i kam inap long nau, Krais i bungim planti milion “arapela sipsip,” na dispela lain inap stap olsem “bikpela lain manmeri” em ol i kam long olgeta kantri. Dispela bikpela lain manmeri i stap daun long ol Kristen God i bin makim, na ol tu i bihainim eksampel bilong Jisas long strongim bel na tokaut klia long ol man olsem God na Krais tasol bai kisim bek ol. Sapos dispela bikpela lain manmeri i wok strong yet long autim tok na wok yet long bilip long ofa bilong Krais long baim bek ol man, ol bai abrusim bagarap long taim bilong “traipela hevi tru” we bai kamap na pinisim wok bos bilong Satan.​—Jon 10:16; Rev. 7:9, 10, 14.

13. Yumi stap olsem ol Witnes Bilong Jehova, olsem na yumi mas tingting strong long mekim wanem? Yumi inap kisim helpim long wanem rot?

¹³ Yumi mas amamas yet long i stap olsem ol Witnes na tokaut long “ol strongpela wok” em God Jehova i bin mekim na ol samting em i tok promis long mekim long bihain. Em tru olsem sampela taim i hatwok long mekim dispela wok. Planti bratasista i autim tok long ol hap we ol man i les long harim tok, tok bilas, o mekim nogut long ol. Yumi mas bihainim wankain pasin olsem aposel Pol na ol poroman bilong em i bin mekim. Pol i tok: “God bilong mipela i helpim mipela na mipela i strongim bel na i no surik long tokim yupela long gutnius bilong God. Na mipela i bin wok hat tru long mekim olsem.” (1 Tes. 2:2) Olsem na yumi no ken givap. Yumi mas tingting strong long inapim dediket bilong yumi na mekim olsem yet i go inap long haptaim bilong Satan i bagarap na pinis olgeta. (Ais. 6:11) Yumi no inap mekim dispela wok long strong bilong yumi yet, nogat. Yumi mas bihainim eksampel bilong ol Kristen bilong pastaim na beten askim Jehova long yusim holi spirit long givim “strong i winim strong bilong yumi.”​—Ritim 2 Korin 4:1, 7; Luk 11:13.

14, 15. (a) Long taim bilong ol aposel, ol man i holim wanem tingting long ol Kristen? Aposel Pita i givim wanem tok bilong strongim ol? (b) Yumi stap olsem ol Witnes Bilong Jehova, olsem na yumi mas pilim olsem wanem sapos ol man i birua long yumi?

¹⁴ Long nau, planti milion manmeri i tok ol i Kristen, “tasol pasin ol i bihainim i soim olsem ol i givim baksait long [God]. Ol i olsem stingpela samting na ol manmeri bilong sakim tok, ol i no fit long mekim wanpela gutpela wok.” (Tai. 1:16) Yumi mas tingim olsem long taim bilong ol aposel, planti manmeri i heitim ol Kristen tru. Olsem na aposel Pita i tok: “Sapos ol i tok nogut long yupela, long wanem, nem bilong Krais i stap long yupela, orait yupela i ken amamas. Long wanem, holi spirit bilong God . . . i stap long yupela.”​—1 Pita 4:14.

¹⁵ Yu ting ol dispela tok inap strongim ol Witnes Bilong Jehova long nau? Yes, em inap strongim yumi, long wanem, yumi tokaut long wok king bilong Jisas. Yumi holim nem bilong Jehova, olsem na ol man i heitim yumi, na dispela i wankain olsem samting i bin painim ol Kristen bilong pastaim. “Ol [man] i tok nogut long [ol], long wanem, nem bilong [Jisas] Krais i stap long [ol]” na Jisas i bin tokim ol birua olsem: “Mi kam long nem bilong Papa bilong mi, tasol yupela i no bin kisim mi.” (Jon 5:43) Olsem na sapos yu mekim wok autim tok na ol man i birua long yu, orait yu mas strongim bel. Taim ol man i mekim nogut long yu, dispela i soim klia olsem God i orait long yu na holi spirit “i stap long [yu].”

16, 17. (a) Wanem gutpela samting i kamap long planti hap bilong graun na lain bilong Jehova i amamas long en? (b) Yu tingting strong long mekim wanem?

¹⁶ Yumi mas tingim olsem long planti hap bilong graun, planti man moa i wok long kisim save long tok i tru. Long ol teritori we yumi save autim tok planti taim long en, yumi save bungim yet ol man husat i amamas long harim tok na yumi inap tokim ol long rot God i makim bilong kisim bek yumi. Yumi mas givim bel tru long mekim gobek long ol man husat i amamas long harim tok, na sapos rot i op, orait yumi ken stadi wantaim ol na helpim ol long kamap strong long bilip na bai ol inap dediket na kisim baptais. Ating yu pilim wankain olsem Sarie, em wanpela sista long Saut Afrika, husat i mekim wok autim tok winim 60 yia. Em i tok: “Mi tenkyu tru olsem long rot bilong ofa bilong Jisas long baim bek ol man, mi inap pas gut wantaim Jehova, em King bilong heven na graun, na mi amamas olsem mi inap tokim ol narapela long gutpela nem bilong em.” Sarie na man bilong em, Martinus, i bin helpim planti manmeri, na tu, ol i helpim 3-pela pikinini bilong ol yet long lotuim Jehova. Sarie i tok moa olsem: “I no gat narapela wok inap helpim yumi long i stap belgut tru, na Jehova i save yusim holi spirit long strongim yumi long mekim yet dispela wok bilong helpim ol man long kisim laip.”

¹⁷ Maski yumi baptais pinis na kamap Kristen o yumi wok long winim ol mak bilong kisim baptais, yumi ken amamas tru olsem yumi inap bung wantaim ol Witnes Bilong Jehova, em ol i stap olsem wanpela bikpela lain long olgeta hap bilong graun. Olsem na yu mas wok yet long autim gut tok i tru, na tu, yu mas wok strong long stap longwe long ol pasin doti bilong dispela graun em Satan i bosim. Taim yu mekim olsem, yu bai givim biknem long Papa bilong yumi long heven—nem bilong em i gutpela olgeta na yumi amamas tru long holim dispela nem.