Yu “Kliagut Long Mining”?

1, 2. Olsem wanem Jisas i strongim ol disaipel long de em i bin kirap bek?

LONG wankain de Jisas i kirap bek long en, 2-pela disaipel i wokabaut long rot i go long wanpela ples we i stap inap olsem 11 kilomita longwe long Jerusalem. Tupela i no save olsem Jisas i kirap bek pinis, olsem na tupela i bel hevi yet. Taim tupela i wokabaut i go, Jisas i kam na wokabaut wantaim tupela. Em i mekim gut bel bilong tupela. “Em i stat long ol rait bilong Moses na ol Profet na em i kamapim mining bilong ol samting long Rait Holi i makim em yet.” (Luk 24:13-15, 27) Dispela i mekim na bel bilong ol i pulap tru long amamas, long wanem, em i toktok wantaim ol na “kamapim gut” ol tok bilong Rait Holi long ol.—Luk 24:32.

² Long apinun, dispela tupela disaipel i go bek long Jerusalem. Ol i go painim ol aposel na tokim ol long ol samting i bin kamap long tupela. Taim ol i wok long toktok i stap, Jisas i kamap long ol. Tasol ol aposel i pret na tingting planti. Jisas i strongim ol olsem wanem? Baibel i tok: “Em i mekim na tingting bilong ol i op tru na ol inap kliagut long mining bilong ol Rait Holi.”—Luk 24:45.

 3. (a) Wanem sampela hevi we inap painim yumi? (b) Wanem samting inap helpim yumi long holim stretpela tingting long wok autim tok?

³ Wankain olsem ol disaipel, sampela taim yumi tu i save bel hevi. Ating yumi bisi long mekim wok bilong Bikpela, tasol yumi bel hevi bikos i no gat gutpela samting i kamap long wok yumi mekim. (1 Kor. 15:58) O ating ol Baibel stadi bilong yumi i no kamap strong long sait bilong bilip. Yumi helpim sampela, tasol ating ol i givim baksait long Jehova. Yumi mas mekim wanem bilong holim stretpela tingting long wok autim tok bilong yumi? Wanpela samting we inap helpim yumi em olsem, yumi mas kliagut long mining bilong ol tok piksa bilong Jisas i stap long Baibel. Yumi ken skelim 3-pela bilong ol dispela tok piksa na painimaut wanem skul yumi inap kisim.

 4. Wanem mining bilong tok piksa bilong Jisas long man i tromoi sid long graun na bihain em i slip?

⁴ Ritim Mak 4:26-29. Wanem mining bilong tok piksa bilong Jisas long man i tromoi ol sid long graun na em i slip? Man long dispela tok piksa i makim olgeta wan wan man bilong autim tok bilong Kingdom. Sid i makim tok bilong Kingdom em yumi autim long ol man i gat gutpela bel. Olsem yumi save mekim long olgeta de, man bilong tromoi ol sid “em i slip long nait na i kirap long san.” Kirap long taim man i planim sid i go inap long taim bilong kamautim kaikai, sampela haptaim i save lus paslain long kaikai i redi long kamautim. Insait long dispela haptaim, “ol sid i kru na gro i go antap.” “Graun yet i save kamapim kaikai isi isi.” Long wankain pasin, isi isi man i save kamap strong long bilip. Taim man i kamap strong long bilip na em i laik mekim wok bilong God, em i save dediket long Jehova na kisim baptais, na dispela i kain olsem sid i gro na kamap bikpela na i karim kaikai.

 5. Bilong wanem Jisas i mekim tok piksa bilong man i tromoi sid long graun na bihain em i slip?

⁵ Bilong wanem Jisas i mekim dispela tok piksa? Jisas i helpim yumi long luksave olsem Jehova tasol i save mekim tok i tru i gro insait long bel bilong ol “manmeri em bel bilong ol i gutpela.” (Apo. 13:48; 1 Kor. 3:7) Yumi planim sid bilong tok i tru na givim wara, tasol yumi no kontrolim gro bilong en. Yumi no inap fosim dispela sid long kru na gro kwik. Wankain olsem dispela man long tok piksa, yumi no save long hau dispela sid i gro. Taim yumi mekim ol wok bilong wan wan de, yumi no luksave long dispela. Tasol bihain, sid bilong Kingdom inap kamap bikpela na karim kaikai. Man inap kamap nupela disaipel na joinim yumi na helpim yumi long wok bilong bungim kaikai.—Jon 4:36-38.

 6. Yumi mas luksave long wanem samting long sait bilong bilip bilong Baibel sumatin?

⁶ Yumi inap kisim wanem skul long dispela tok piksa? Namba 1: Yumi mas luksave olsem taim yumi stadi wantaim wanpela man long Baibel, yumi no gat strong long mekim bilip bilong em i kamap strong kwik. Pasin daun bai helpim yumi na yumi no inap fosim em long kisim baptais. Yumi mekim olgeta samting bilong helpim na sapotim Baibel sumatin, tasol long pasin daun yumi larim sumatin yet i mekim disisen long dediket na kisim baptais. Sapos man i laikim tru God, dispela bai kirapim laik bilong em long dediket long God. Jehova i no inap orait long man sapos bel i no kirapim man long dediket.—Sng. 51:12; 54:6; 110:3.

7, 8. (a) Wanem sampela skul moa yumi kisim long tok piksa bilong Jisas long man i tromoi sid long graun na bihain em i slip? Stori long wanpela eksampel. (b) Dispela i givim wanem skul long yumi long Jehova na Jisas?

⁷ Namba 2: Taim yumi kliagut long skul i stap long dispela tok piksa, dispela bai helpim yumi na yumi no inap bel hevi sapos yumi lukim olsem i no gat gutpela samting i kamap long wok bilong yumi. Yumi mas wet na no ken les kwik. (Jems 5:7, 8) Ating yumi wok strong long helpim Baibel sumatin, tasol em i no kamap strong long tok i tru. Sapos kain samting olsem i kamap, yumi no ken pilim olsem em asua bilong yumi. Sapos Baibel sumatin yet i bihainim pasin daun na senisim pasin bilong em, dispela bai opim rot long Jehova i blesim em na sid bilong tok i tru bai kamap bikpela na karim kaikai. (Mat. 13:23) Olsem na yumi mas holim stretpela tingting long wok autim tok bilong yumi. Jehova i no save lukluk long bilip bilong Baibel sumatin bilong Em i ken skelim wok bilong yumi. Maski Baibel sumatin i no kamap strong long bilip, Jehova i pilim tru hatwok bilong yumi.—Ritim Luk 10:17-20; 1 Korin 3:8.

⁸ Namba 3: Sampela taim yumi no inap luksave long ol senis em Baibel sumatin i mekim. Olsem: Wanpela misineri i bin stadi wantaim tupela marit na ol i go long em na tokim em olsem ol i laik kamap pablisa i no baptais yet. Em i tokim tupela olsem sapos tupela i laik kamap pablisa, orait tupela i mas lusim pasin bilong smok. Em i kirap nogut taim ol i tokim em olsem ol i lusim smok inap sampela mun i go pinis. Wanem samting i kirapim ol long lusim pasin bilong smok? Ol i luksave olsem Jehova inap lukim ol taim ol i smok, na tu, ol i save olsem Jehova i heitim pasin bilong 2-pela maus. Olsem na bel bilong ol i kirapim ol long mekim disisen—olsem ol bai smok long ai bilong misineri o lusim tru dispela pasin. Tupela i kirap long laikim Jehova, na dispela i helpim tupela long mekim disisen i stret. Ol i kamap strong long sait bilong bilip maski misineri i no save long senis ol i bin mekim.

 9. Wanem mining bilong tok piksa bilong umben?

⁹ Ritim Matyu 13:47-50. Wanem mining bilong tok piksa bilong Jisas long umben? Jisas i stori long wok bilong autim tok bilong Kingdom long olgeta kain man, na em i tok dispela wok i olsem traipela umben ol i daunim i go insait long solwara. Umben i save kisim bikpela namba bilong “olgeta kain pis,” na olsem tasol, wok autim tok i save kirapim planti milion man bilong olgeta kain lain long harim tok i tru. (Ais. 60:5) Dispela samting i kamap tru, long wanem, long ol kibung na bung bilong Memorial long olgeta yia, bikpela lain manmeri tru i save kam long ol dispela bung. Sampela bilong ol dispela manmeri i olsem “ol gutpela pis” na ol i kam insait long kongrigesen Kristen. Tasol sampela manmeri i olsem “ol pis nogut,” long wanem, ol i bihainim ol pasin em Jehova i no orait long en.

10. Bilong wanem Jisas i mekim tok piksa bilong umben?

¹⁰ Bilong wanem Jisas i mekim dispela tok piksa? Long tok piksa, ol i bungim ol gutpela pis na tromoi ol pis nogut, tasol dispela i no makim laspela kot bai kamap long taim bilong traipela hevi tru, nogat. Em i makim samting bai kamap long dispela haptaim bilong las de. Jisas i soim klia olsem i no olgeta man husat i kam insait long tok i tru bai stap long sait bilong Jehova. Planti bilong ol i save bung wantaim yumi long ol miting. Sampela i amamas long yumi stadi wantaim ol long Baibel, tasol ol i no redi long givim bel olgeta long stadi. (1 Kin. 18:21) Sampela i no bung moa wantaim yumi long kongrigesen Kristen. Sampela yangpela i bin kamap bikpela insait long tok i tru, tasol ol yet i no laikim tru ol lo bilong Jehova. Maski wanem samting i kamap, Jisas i kamapim klia olsem olgeta wan wan man i mas mekim disisen bilong ol yet. Taim ol manmeri i mekim gutpela disisen, God i save tingim ol olsem “ol gutpela samting bilong olgeta lain.”—Hag. 2:7, NW.

11, 12. (a) Tok piksa bilong umben inap helpim yumi olsem wanem? (b) Dispela i givim wanem skul long yumi long Jehova na Jisas?

¹¹ Tok piksa bilong umben inap helpim yumi olsem wanem? Taim yumi kliagut long skul yumi kisim long dispela tok piksa, dispela bai helpim yumi na yumi no inap bel hevi taim wanpela Baibel sumatin o pikinini bilong yumi yet i no bihainim rot bilong tok i tru. Dispela samting inap kamap maski yumi traim bes bilong yumi. Maski sapos man i orait long stadi long Baibel o em i kamap bikpela namel long ol lain i save long tok i tru, dispela i no makim olsem wantu em bai kisim pasin bilong pas gut wantaim Jehova, nogat. Sapos ol manmeri i no laik stap daun long wok bos bilong Jehova, em bai rausim ol long lain bilong em.

¹² Yu ting dispela i makim olsem i no gat rot long ol lain i lusim tok i tru inap kam bek long kongrigesen? O sapos man i no dediketim laip bilong em long Jehova, yu ting dispela i makim olsem em i stap olsem “pis nogut”? Nogat. Rot i op yet long ol kain man olsem inap kam bek long kongrigesen paslain long traipela hevi tru i kirap. I olsem Jehova i singautim ol na i tok: “Yupela i lusim pasin nogut na kam bek long mi, mi tu bai mi lusim belhat na kisim bek yupela.” (Mal. 3:7) Dispela samting i kamap klia long narapela tok piksa bilong Jisas, em tok piksa bilong pikinini i bin lusim papa.—Ritim Luk 15:11-32.

13. Wanem mining bilong tok piksa bilong Jisas long pikinini i lusim papa?

¹³ Wanem mining bilong tok piksa bilong Jisas long pikinini i lusim papa? Papa long dispela tok piksa i gat pasin sori, na em i stap olsem piksa bilong makim Jehova, em gutpela Papa bilong yumi long heven husat i gat pasin laikim. Wanpela pikinini i askim Papa long kisim ol mani samting we em bai kisim long bihain, na em i go westim dispela mani. Dispela pikinini i stap olsem piksa bilong makim ol lain husat i lusim kongrigesen. Taim ol i lusim kongrigesen, i olsem ol i go long wanpela kantri i stap longwe, em dispela graun Satan i bosim, na ol i stap longwe long Jehova. (Efe. 4:18; Kol. 1:21) Bihain, sampela i save kisim gutpela tingting, na maski i gat planti hevi, ol i wok strong na kam bek gen long oganaisesen bilong Jehova. Ol dispela lain i daunim ol yet na tanim bel na kam bek, olsem na Papa bilong yumi i save fogivim ol na orait gen long ol.—Ais. 44:22; 1 Pita 2:25.

14. Bilong wanem Jisas i mekim tok piksa bilong pikinini i bin lusim papa?

¹⁴ Bilong wanem Jisas i mekim dispela tok piksa? Long gutpela pasin, Jisas i soim olsem Jehova i laik bai ol lain husat i lusim Em i mas senisim pasin bilong ol na kam bek long Em. Oltaim dispela papa long tok piksa i bilip olsem pikinini man bilong em bai kam bek. Taim em i lukim pikinini i kam bek, maski pikinini “i stap longwe yet,” papa i ran i go na welkamim em. Dispela i mas kirapim ol man i lusim Jehova long senisim pasin bilong ol na kwiktaim ol i mas kam bek long em! Ating ol i stap rabis tru long sait bilong bilip, na ol inap pilim sem na pilim hatwok tru long kam bek long Jehova. I stret long ol i mas winim ol dispela hatwok, long wanem, ol lain long heven tu bai amamas taim ol i kam bek.—Luk 15:7.

15, 16. (a) Yumi kisim wanem ol skul long tok piksa bilong pikinini i bin lusim papa? Stori long sampela eksampel. (b) Dispela i givim wanem skul long yumi long Jehova na Jisas?

¹⁵ Tok piksa bilong pikinini i bin lusim papa inap helpim yumi olsem wanem? Yumi mas bihainim gutpela pasin bilong Jehova. Yumi no ken “strong tumas long bihainim stretpela pasin,” long wanem, dispela inap pasim yumi long welkamim ol man husat i tanim bel na kam bek long kongrigesen. Dispela inap “bagarapim” yumi yet long sait bilong bilip. (Sav. 7:16) Yumi inap kisim narapela skul tu long dispela tok piksa. Taim wanpela i no pas gut moa wantaim kongrigesen, yumi no ken tingim em olsem man i nogut olgeta, nogat, yumi mas tingim em olsem wanpela “sipsip i lus.” (Sng. 119:176) Sapos yumi bungim kain man olsem, yumi bai mekim sampela samting long helpim em long kam bek, o nogat? O, yumi bai toksave long ol elda na ol i ken helpim em, o nogat? Yumi bai helpim em sapos yumi bihainim skul yumi kisim long tok piksa bilong Jisas long pikinini i bin lusim papa.

¹⁶ Long nau, sampela man husat i bin lusim Jehova na bihain ol i kam bek long em, ol i pilim tru pasin marimari bilong Jehova na pasin laikim na pasin helpim bilong ol bratasista long kongrigesen. Wanpela brata husat i stap raus inap 25 yia, em i tok: “Kirap long taim kongrigesen i kisim mi bek oltaim amamas bilong mi i wok long kamap bikpela, long wanem, Jehova i ‘givim nupela strong’ long mi. (Apo. 3:19) Olgeta i soim pasin laikim na helpim mi! Long nau, ol bratasista long kongrigesen i stap olsem famili bilong mi.” Wanpela yangpela sista husat i bin lusim Jehova inap 5-pela yia na bihain em i kam bek, em i tok: “I no gat tok mi inap yusim bilong stori long mi bin pilim olsem wanem taim mi lukim ol bratasista i soim pasin laikim em Jisas i bin toktok long en. Em i gutpela blesing tru long stap insait long oganaisesen bilong Jehova!”

17, 18. (a) Yumi bin kisim wanem skul long 3-pela tok piksa yumi bin skelim? (b) Yumi mas tingting strong long mekim wanem?

¹⁷ Yumi bin kisim wanem skul long dispela 3-pela tok piksa? Namba 1: Yumi mas luksave olsem yumi no gat strong long mekim bilip bilong Baibel sumatin i kamap strong kwik. Dispela em wok Jehova yet bai mekim. Namba 2: I no olgeta Baibel sumatin bilong yumi o ol man husat i save kam bung wantaim yumi bai kisim tok i tru. Namba 3: Maski sampela i lusim tok i tru na givim baksait long Jehova, yumi mas holim tingting yet olsem ol bai kam bek long Jehova. Taim ol i kam bek na yumi welkamim ol, pasin bilong yumi i mas soim olsem yumi holim wankain tingting olsem Jehova.

¹⁸ Yumi wan wan i mas wok yet long kisim save na gutpela tingting na pasin bilong skelim gut ol pasin yumi mas bihainim. Taim yumi ritim ol tok piksa bilong Jisas, yumi mas painimaut mining bilong ol, wai na ol dispela tok piksa i stap long Baibel, olsem wanem yumi ken bihainim skul yumi kisim, na dispela i givim wanem skul long yumi long Jehova na Jisas. Taim yumi mekim olsem, yumi soim olsem yumi kliagut long mining bilong ol tok bilong Jisas.