YU SAVE LONG DISPELA?
Yu ting ol Juda i kam long Jerusalem long Pentikos 33 C.E., ol i “kam long olgeta kantri”?
Bikpela lain manmeri long Jerusalem long Pentikos 33 C.E.
Long Baibel, Aposel 2:5-11 i stori long bikpela lain manmeri i bin kam long Jerusalem long Pentikos 33 C.E. Na tu, Filo em wanpela man Juda long bipo husat i raitim ol buk, i mekim wankain tok.
Filo i stori long ol man i go long Jerusalem olsem: “Bikpela lain manmeri i kam long planti biktaun, sampela i wokabaut longwe tru, na ol arapela i kalap long sip. Ol i kam long hap is, wes, not, na saut bilong mekim ol bikpela bung bilong amamas.” Na em i kamapim tu tok bilong pas em Agripa Namba 1, tumbuna pikinini bilong King Herot, i bin salim i go long Kaligula em empera bilong Rom. Long dispela pas, Agripa i tok long Jerusalem olsem: “Dispela Taun Holi . . . i stap biktaun bilong klostu olgeta kantri na i no bilong Judia tasol, nogat. Long wanem, Jerusalem i bosim planti kantri i stap klostu long en.”
Agripa i kolim nem bilong sampela kantri em ol Juda i stap long en, na sampela bilong ol i stap longwe long Esia Maina, Grik, Mesopotemia, Not Afrika, na ol ailan long Mediterenian. Saveman Joachim Jeremias i tok: “Agripa i no stori olsem ol man bilong ol dispela kantri i bin go long Jerusalem. Tasol yumi ken ting olsem ol i go, long wanem, lo i tok long ol man Juda i gat bikpela krismas i mas go long Jerusalem bilong mekim lotu.”—Lo 16:16.
Planti tausen manmeri i kam long Jerusalem long bung bilong ol bikpela de bilong lotu bilong ol Juda i slip we?
Ples waswas long Jerusalem bilong bipo
Long olgeta yia, ol i save mekim 3-pela bikpela de bilong lotu long Jerusalem em Pasova, Pentikos, na Ol Bikpela De Bilong i Stap Long Haus Win. Long taim bilong ol aposel, planti handret tausen manmeri long olgeta hap bilong Israel na ol Juda i stap long ol narapela ples i save go long Jerusalem bilong mekim ol dispela bung. (Luk 2:41, 42; Aposel 2:1, 5-11) Olsem na ol dispela lain i mas painim ples slip.
Sampela i stap long haus bilong ol pren na ol narapela i stap long ol haus pasindia samting. Na planti i slip long ol haus sel long Jerusalem na klostu long banis bilong biktaun. Long laspela taim Jisas i stap long Jerusalem, em i stap long Betani em wanpela taun i stap klostu long Jerusalem.—Matyu 21:17.
Klostu long tempel long Jerusalem, ol saveman i painim planti haus i gat ol ples waswas. Ating em ol haus pasindia we ol man i go bilong lotu inap stap long en na waswas bilong i stap klin paslain long ol i go long tempel. Ol saveman i painim wanpela hap rait long wanpela bilong ol dispela haus, na ol i kisim save olsem Tiodotus, em wanpela pris na bikman bilong sinagog long dispela hap, i “wokim sinagog bilong ol man i ken ritim Tora . . . na tu, em i wokim haus pasindia na ol ples waswas bilong ol man.”