“Wok Yet Long Strongim Narapela Long Olgeta Wan Wan De”

1, 2. Bilong wanem yumi mas strongim narapela narapela?

CRISTINA^[1] i gat 18 krismas, na em i tok: “Papamama bilong mi i no save strongim mi, nogat, planti taim ol i save sutim tok long mi. Tok bilong ol i save bagarapim tru bel bilong mi. Ol i tok mi stap yet olsem liklik pikinini, na mi no inap lainim wanpela samting, na mi pat. Olsem na planti taim mi save krai na mi no save toktok long ol. Mi pilim olsem mi samting nating.” Dispela i soim klia tru olsem yumi bai i stap bel hevi tru sapos ol narapela i no strongim yumi!

² Taim ol narapela i mekim tok bilong strongim yumi, dispela bai kirapim yumi long mekim gutpela wok. Rubén i tok: “Inap planti yia, mi pilim olsem mi samting nating. Tasol wanpela taim mi autim tok wantaim wanpela elda, na em i luksave olsem mi no amamas. Olsem na em i putim yau taim mi stori long filings bilong mi. Em i kirapim mi long tingim ol gutpela wok mi mekim. Na tu, em i kirapim mi long tingim tok bilong Jisas—yumi olgeta wan wan i gutpela moa winim ol liklik pisin. Mi save tingim yet dispela skripsa, na dispela i save strongim mi. Tok bilong dispela elda i kirapim mi long kisim stretpela tingting.”—Mat. 10:31.

 3. (a) Aposel Pol i stori olsem wanem long pasin bilong strongim ol narapela? (b) Long dispela stadi, yumi bai skelim wanem ol askim?

³ Baibel i soim olsem oltaim yumi mas strongim narapela narapela. Aposel Pol i raitim pas i go long ol Hibru Kristen na em i tok: “Ol brata yupela i mas was gut, nogut wanpela bilong yupela i lusim God i gat laip na bel bilong em i kirap laikim pasin nogut na em i lusim bilip. Narapela i mas wok yet long strongim narapela long olgeta wan wan de . . . . Nogut strong bilong sin long giamanim man i mekim na wanpela bilong yupela i pasim strong bel bilong en.” (Hib. 3:12, 13) Sapos yu tingim bek wanpela taim we narapela i mekim tok bilong strongim yu, yu bai luksave olsem em i bikpela samting long yumi mas strongim narapela narapela. Olsem na yumi ken skelim ol dispela askim: Bilong wanem yumi mas strongim narapela narapela? Yumi inap kisim wanem skul long pasin bilong Jehova, Jisas, na Pol long strongim ol narapela? Olsem wanem yumi inap mekim gutpela tok bilong strongim ol narapela?

 4. (a) Husat i nidim ol narapela long strongim ol? (b) Long nau, bilong wanem ol manmeri i no gat pasin bilong strongim narapela?

⁴ Yumi olgeta i nidim ol narapela long strongim yumi. Ol pikinini i nidim ol narapela long strongim ol. Timothy Evans em wanpela saveman na em i tok: “Ol pikinini . . . i nidim ol narapela long strongim ol wankain olsem ol plaua i nidim wara. Taim ol pikinini i kisim ol tok bilong strongim ol, ol bai pilim olsem ol i gat nem na ol narapela i amamas long ol.” Tasol yumi stap long taim nogut bilong planti hevi. Ol manmeri i tingim laik bilong ol yet tasol, na ol i no gat pasin bilong laikim ol wanfamili, na ol i no gat pasin bilong strongim narapela. (2 Tim. 3:1-5) Sampela papamama i no save tok amamas long ol pikinini bilong ol bikos papamama bilong ol yet i no bin mekim ol tok bilong strongim ol. Long ol wok ples, planti bosman i no save tok amamas long ol wokman bilong ol.

 5. Olsem wanem yumi inap strongim ol narapela?

⁵ Taim yumi tok amamas long wanpela man long gutpela wok em i mekim, dispela i save strongim em. Na tu, yumi inap strongim ol narapela taim yumi tokim ol olsem ol i gat gutpela pasin o yumi mekim ol tok bilong “mekim gut bel bilong ol man i bel hevi.” (1 Tes. 5:14) Tok Grik, ol i tanim olsem “strongim bel,” i makim olsem wanpela man “i singautim narapela i kam sanap long sait bilong em.” Taim yumi wok wantaim ol bratasista bilong yumi, yumi inap mekim tok bilong strongim ol. (Ritim Saveman 4:9, 10.) Olsem wanem? Yumi save painim rot bilong tokim ol narapela long wai na yumi laikim ol na amamas long ol? Paslain long yumi bekim dispela askim, yumi laik tingim dispela tok: “Sapos ol man i toktok i stap na yu wetim gutpela taim na yu mekim wanpela gutpela tok long ol, orait bai yu amamas.”—Snd. 15:23.

 6. Bilong wanem Satan i laik mekim yumi bel hevi? Stori long wanpela eksampel.

⁶ Satan i laik mekim yumi bel hevi bikos em i save olsem dispela inap mekim na yumi kamap slek long sait bilong bilip. Sindaun 24:10, i tok: “Sapos taim nogut i painim yu na bun bilong yu i slek, orait yu no gat strong tru.” Jop em man bilong bihainim stretpela pasin, olsem na Satan i kamapim ol hevi bilong daunim bilip bilong Jop, tasol Jop i no lusim bilip. (Jop 2:3; 22:3; 27:5) Yumi inap winim Satan taim yumi mekim gutpela tok bilong strongim ol wanfamili bilong yumi na ol bratasista long kongrigesen. Taim yumi mekim olsem, dispela inap helpim yumi long pilim olsem Haus Kingdom em ples we yumi inap stap bel isi na amamas.

7, 8. (a) Wanem sampela eksampel bilong Baibel i soim olsem Jehova i tingim tru pasin bilong strongim narapela? (b) Ol papamama i ken mekim wanem bilong bihainim pasin bilong Jehova? (Lukim piksa long kirap bilong stadi.)

⁷ Jehova. Man bilong raitim song i tok: “God i save stap klostu long ol manmeri i gat hevi. Na em i save helpim ol manmeri bilip [“bel,” NW] bilong ol i bagarap.” (Sng. 34:18) Taim profet Jeremaia i pret na bel hevi, Jehova i strongim bilip bilong em. (Jer. 1:6-10) Tingim profet Daniel: Taim em i kamap lapun, God i salim wanpela ensel i go bilong strongim em. Dispela ensel i tokim Daniel: “God i laikim yu tumas”! (Dan. 10:8, 11, 18, 19) Em bai gutpela sapos yu tu i painim rot bilong strongim ol pablisa, ol painia, na ol bratasista em ol i kamap lapun na bodi bilong ol i no strong moa.

⁸ God na Pikinini bilong em i bin wok wantaim inap planti milion yia. Bihain, taim Jisas i kam long graun, God i wok yet long tok amamas na strongim Pikinini bilong em. Inap 2-pela taim Jisas i harim nek bilong Papa i tok: “Dispela em i Pikinini bilong mi, mi laikim em tumas na mi amamas long em.” (Mat. 3:17; 17:5) God i tok amamas long Jisas long ol gutpela wok em i mekim. Jisas i harim ol dispela tok taim em i redi long kirapim wok bilong em na long laspela yia bilong em long i stap long dispela graun, na dispela tok i strongim em. Na tu, long nait paslain long Jisas i dai, em i tingting planti. Olsem na Jehova i salim wanpela ensel i go bilong strongim em. (Luk 22:43) Sapos yumi gat ol pikinini, orait oltaim yumi ken bihainim pasin bilong Jehova na strongim ol na tok amamas long ol taim ol i mekim gutpela wok. Na tu, yumi mas mekim sampela samting moa bilong strongim ol sapos traim i save painim ol long skul long olgeta de.

 9. Yumi inap kisim wanem skul long pasin Jisas i mekim long ol aposel?

⁹ Jisas. Long nait Jisas i kamapim bung bilong Memorial, em i lukim olsem ol aposel i gat pasin antap. Jisas i bihainim pasin daun na i wasim lek bilong ol, tasol ol i tok pait yet long husat namel long ol i winim ol narapela; Pita i strong olsem em i no inap lusim Jisas. (Luk 22:24, 33, 34) Tasol Jisas i mekim gutpela tok amamas long ol aposel long pasin bilong ol long stap wantaim em taim ol traim i painim em. Em i tok profet olsem ol bai mekim planti wok moa winim em, na em i tokim ol olsem God i laikim ol. (Luk 22:28; Jon 14:12; 16:27) Yumi ken askim yumi yet: ‘Mi save bihainim pasin bilong Jisas long tok amamas long ol pikinini bilong mi na ol narapela long ol gutpela wok ol i mekim, o mi save sutim tok tasol long ol popaia bilong ol?’

10, 11. Olsem wanem aposel Pol i soim olsem em i bikpela samting long strongim ol narapela?

¹⁰ Aposel Pol. Long ol pas Pol i raitim i go long ol wanbilip Kristen, em i stori long ol gutpela wok ol i mekim. Em i raun wantaim sampela bilong ol inap planti yia na ating em i save long sampela pasin kranki bilong ol, tasol em i stori long ol gutpela pasin bilong ol. Kain olsem: Pol i tok Timoti “em i pikinini bilong mi na em i save mekim wok bilong Bikpela na mi laikim em tumas.” (1 Kor. 4:17; Fili. 2:19, 20) Pol i mekim gutpela tok amamas long Taitus na em i tokim ol Kristen long Korin olsem Taitus “em i poroman bilong mi na wanwok bilong mi bilong helpim yupela.” (2 Kor. 8:23) Yumi inap tok olsem ol dispela tok i bin strongim tru Timoti na Taitus!

¹¹ Pol na Barnabas inap lusim laip bilong ol taim ol i go bek long ples we ol birua i bin mekim nogut tru long ol. Maski ol man i birua long ol long Listra, tupela i go bek long Listra long strongim ol nupela disaipel long holimpas bilip. (Apo. 14:19-22) Taim Pol i go long Efesus, ol manmeri i bung na kros long em. Aposel 20:1, 2 i tok: “Taim bikmaus na singaut bilong ol manmeri i pinis, Pol i singautim ol disaipel i kam. Em i strongim bel bilong ol na tok gutbai long ol, na em i go long Masedonia. Em i raun long dispela hap na mekim planti tok bilong strongim ol disaipel na bihain em i kamap long Grik.” Pol i tingim tru pasin bilong strongim ol narapela.

12. Olsem wanem ol miting i opim rot long yumi ken strongim narapela narapela?

¹² Wanpela risen na Papa bilong yumi long heven i stretim rot bilong yumi long bung oltaim long ol miting, em olsem yumi ken strongim narapela narapela. (Ritim Hibru 10:24, 25.) Olsem ol disaipel bilong Jisas long pastaim, yumi tu i bung wantaim bilong kisim save na strongim narapela narapela. (1 Kor. 14:31) Cristina, em yumi stori long em long kirap bilong dispela atikol, em i tok: “Mi laikim tru ol miting bikos ol narapela i save soim pasin laikim long mi na strongim mi. Sampela taim mi save bel hevi tru taim mi go kamap long Haus Kingdom. Tasol ol sista i save kam hagim mi na tok olsem mi luk nais. Ol i save tokim mi olsem ol i laikim mi na ol i amamas long lukim olsem mi kamap strong long sait bilong bilip. Tok bilong ol i save mekim mi amamas!” Em i gutpela samting long yumi olgeta i “strongim” narapela narapela!—Rom 1:11, 12.

13. Bilong wanem ol wokman bilong God i nidim ol tok bilong strongim ol?

¹³ Ol manmeri bilong God husat i mekim wok bilong em inap planti yia, ol tu i nidim tok bilong strongim ol. Tingim Josua. Em i bin mekim wok bilong God inap planti yia. Tasol Jehova i tokim Moses long strongim Josua. Em i tok: “Skulim Josua gut, na strongim tingting bilong em, long wanem, mi yet bai mi bringim ol manmeri i go long hapsait bilong wara, bai ol i ken sindaun long dispela graun yu lukim nau.” (Lo 3:27, 28) Josua bai mekim bikpela wok bilong bringim lain Israel i go insait long Graun Bilong Promis. Em bai bungim ol hevi, na em bai daunim wanpela lain ami. (Jos. 7:1-9) Olsem na Josua i mas kisim ol tok bilong strongim em! Olsem tasol yumi tu i mas strongim ol elda, na ol wasman raun em ol i givim bel tru long lukautim lain sipsip bilong God. (Ritim 1 Tesalonaika 5:12, 13.) Wanpela wasman sekit i tok: “Sampela bratasista i save raitim pas na tok tenkyu long mipela i go visitim ol. Mipela i save holim ol dispela pas na ritim taim mipela i pilim olsem mipela i no gat strong. Ol dispela pas i strongim tru mipela.”

14. Bilong wanem i gutpela long yumi tok amamas na mekim tok bilong strongim ol narapela taim yumi laik givim tok kaunsel?

¹⁴ Ol elda na ol papamama i luksave olsem taim ol i tok amamas na strongim ol lain i stap aninit long lukaut bilong ol, dispela lain bai amamas long kisim tok kaunsel bilong Baibel. Taim Pol i tok amamas long ol Kristen long Korin long bihainim tok kaunsel bilong em, ating dispela i strongim ol long bihainim yet stretpela pasin. (2 Kor. 7:8-11) Andreas em papa i gat 2-pela pikinini, na em i tok: “Taim papamama i strongim ol pikinini, dispela bai helpim ol long kamap strong long bilip na kisim pasin bilong skelim gut ol samting long tingting na long bel. Taim yu strongim ol, dispela bai helpim ol long tingim gut ol skultok. Maski ol pikinini i save long wanem pasin i stret, taim yumi strongim ol long olgeta taim, dispela bai kirapim ol long bihainim stretpela pasin long olgeta taim.”

15. Yumi ken mekim wanem bilong strongim ol narapela?

¹⁵ Tok amamas long ol wanbilip long ol gutpela wok na ol gutpela pasin ol i mekim. (2 Sto. 16:9; Jop 1:8) Maski sindaun bilong yumi i pasim yumi long mekim bikpela wok, Jehova na Jisas i tingim tru ol gutpela wok yumi mekim bilong sapotim wok bilong Kingdom. (Ritim Luk 21:1-4; 2 Korin 8:12.) Sampela lapun bratasista i wok strong long i kam long ol miting na autim tok long olgeta taim. Yumi mas tok amamas long ol na strongim ol.

16. Bilong wanem yumi mas strongim ol narapela?

¹⁶ Painim rot bilong strongim ol narapela. Sapos yumi lukim narapela i mekim gutpela wok, orait yumi mas tok amamas long em. Tingim samting i kamap taim Pol na Barnabas i stap long Antiok long Pisidia. Ol ofisa bilong sinagog i tok: “Ol brata, sapos yupela i gat sampela tok bilong strongim bel bilong ol manmeri, orait autim.” Olsem na Pol i mekim tok bilong strongim ol. (Apo. 13:13-16, 42-44) Sapos yumi inap mekim tok bilong strongim ol narapela, orait yumi mas strongim ol. Taim yumi mekim olsem, ol narapela tu bai strongim yumi.—Luk 6:38.

17. Taim yumi laik tok amamas long ol narapela, yumi mas mekim wanem bai tok bilong yumi inap helpim ol?

¹⁷ Pilim tru na kolim stret tok. Taim yumi laik tok amamas na strongim ol narapela, sampela taim yumi no save kolim stret wanpela samting yumi laik strongim ol o tok amamas long en. Tasol tok Jisas i givim long ol Kristen bilong Taiataira i soim olsem yumi mas kolim stret samting yumi laik toktok long en. (Ritim Revelesen 2:18, 19.) Sapos yumi gat pikinini na em i wok long kamap strong long bilip, yumi ken kolim stret wanpela samting em i mekim na yumi tok amamas long en. Sapos i gat wanpela mama wanpis, yumi ken tokim em olsem yumi pilim tru gutpela pasin bilong em long lukautim ol pikinini, maski em i gat hevi. Taim yumi tok amamas na strongim em, dispela bai helpim em!

18, 19. Olsem wanem yumi inap strongim ol narapela?

¹⁸ Jehova i no inap tokim yumi long husat stret yumi mas strongim, olsem em i bin tokim Moses long strongim Josua. Tasol God i save amamas taim yumi mekim ol tok bilong strongim ol wanbilip na ol narapela. (Snd. 19:17; Hib. 12:12) Kain olsem: Taim wanpela brata i mekim pablik tok, yumi ken tokim em olsem tok bilong em i kamapim wanpela skultok yumi nidim o em i helpim yumi long kliagut long wanpela skripsa. Wanpela sista i raitim tok bilong tok amamas long wanpela brata husat i kam long narapela hap na em i givim tok long kongrigesen bilong dispela sista, na sista i tok: “Maski yumi toktok inap sampela minit tasol, yu luksave long bel hevi bilong mi, na tok bilong yu i mekim gut bel bilong mi na i strongim mi. Mi laik bai yu save olsem yu gat gutpela pasin bilong mekim tok, olsem na taim yu sanap long pletfom na toktok na taim yu toktok wantaim mi, dispela i olsem presen i kam long Jehova.”

¹⁹ Yumi bai painim kain kain rot bilong strongim bilip bilong ol narapela sapos yumi tingting strong long bihainim tok kaunsel bilong Pol, em i tok: “Wok yet long mekim isi bel bilong narapela narapela na strongim narapela narapela, olsem yupela i wok long mekim.” (1 Tes. 5:11) Yumi olgeta bai mekim Jehova i amamas sapos yumi “wok yet long strongim narapela long olgeta wan wan de.”